ທ່ານນາງນາຍົກລັດຖະມົນຕີໄທ ຍິງຣັກ ຊິນນະວັດ
(ພາບ: ອິນເຕີແນດ)
(vovworld) – ປະເທດໄທ ສືບຕໍ່ຕົກເຂົ້າສູ່ສະພາບຂາດສະຖຽນລະພາບຢ່າງຮ້າຍແຮງ, ໃນຂະນະທີ່ຫຼາຍມື້ຜ່ານມາ, ການແຫ່ຂະບວນປະທ້ວງຂອງທັງຝ່າຍສະໜັບສະໜູນ ແລະ ຝ່າຍຕ້ານລັດຖະບານໄດ້ດຳເນີນໄປດ້ວຍຂະໜາດໃຫຍ່ສຸດນັບແຕ່ປີ 2010. ຫາງສຽງສະແດງຄວາມວິຕົກກັງວົນຕໍ່ລັດຖະບານກຳອຳນາດໄທ. ແຕ່ດ້ວຍອິດທິພົນຊື່ສຽງເຊິ່ງໄດ້ຮັບການສ້າງຂຶ້ນໃນ 2 ປີຜ່ານມາ, ໃນຖານະແມ່ນການນຳທີ່ຄ່ອງແຄ້ວ, ສະຫງ່ຽມຄ່ຽມຄົມນັ້ນ, ທ່ານນາງນາຍົກລັດຖະມົນຕີ ຍິງຣັກ ຊິນນະວັດ ສາມາດນຳພາປະເທດ ໃຫ້ຫຼຸດພົ້ນອອກຈາກສະພາບຂາດສະຖຽນລະພາບ ແລະ ການປະທະກັນຄັ້ງໃໝ່ໄດ້ຫຼືບໍ່. ແອ໋ງຮ່ຽນ, ນັກຂ່າວວິທະຍຸກະຈາຍສຽງຫວຽດນາມ ມີບົດວິຈານ: “ການທົດສອບສຳລັບທ່ານນາງນາຍົກລັດຖະມົນຕີໄທ ຍິງຣັກ ຊິນນະວັດ“ ເຊີນທ່ານຮັບຟັງ.
ວັນທີ 26/11, ລັດຖະບານໄທ ເລີ່ມດຳເນີນການໂຕ້ວາທີ, ປ່ອນບັດບໍ່ໄວ້ວາງໃຈ, ດ້ວຍການຊັກຖາມຂອງ ສະມາຊິກສະພາແຫ່ງຊາດ (ສສຊ) ຝ່າຍຄ້ານ 20 ທ່ານ. ການປ່ອນບັດບໍ່ໄວ້ວາງໃຈຄັ້ງນີ້, ພ້ອມກັບໃບສະເໜີໄຈ້ແຍກໂທດຂອງທ່ານນາຍົກລັດຖະມົນຕີ ແລະ ບັນດາສະມາຊິກໃນລັດຖະບານນັ້ນ ໄດ້ເປັນຄວາມດັນເຊິ່ງຝ່າຍຄ້ານຍົກອອກມາ ເພື່ອແນໃສ່ໂຄ່ນລົ້ມລັດຖະບານຂອງທ່ານນາງນາຍົກລັດຖະມົນຕີ ຍິງຣັກ ຊິນນະວັດ
ສາຍເຫດ ແລະ ການແບ່ງແຍກຢ່າງເລິກເຊິ່ງໃນສັງຄົມໄທ
ວິກິດການການເມືອງຄັ້ງຫຼ້າສຸດຢູ່ໄທ ແມ່ນເລີ່ມມາຈາກເຫດການທ່ານນາງນາຍົກລັດຖະມົນຕີ ຍິງຣັກ ຊິນນະວັດ ຊອກຫາວິທີຮັບຮອງຮ່າງກົດໝາຍອະໄພຍະໂທດ, ເຊິ່ງແມ່ນຮ່າງກົດໝາຍທີ່ຖືກຖືວ່າ ມີຄວາມສະດຸ້ງໄວທີ່ສຸດສຳລັບຝ່າຍຄ້ານ. ຝ່າຍຄ້ານຖືວ່າ, ຮ່າງກົດໝາຍນີ້ຖືກຍົກອອກມາ ແມ່ນຄວາມມານະພະຍາຍາມຂອງທ່ານນາງນາຍົກລັດຖະມົນຕີ ຍິງຣັກ ຊິນນະວັດ ເພື່ອ“ລົບລ້າງໂທດ“ ໃຫ້ແກ່ອ້າຍຄີງຂອງຕົນແມ່ນອະດີດນາຍົກລັດຖະມົນຕີໄທ ທັກສິນ ຊິນນະວັດ, ແນໃສ່ອະນຸຍາດໃຫ້ທ່ານຜູ້ນີ້ກັບເມືອປະເທດ ພາຍຫຼັງຕ້ອງພັດຖີ່ນຢູ່ຕ່າງປະເທດເປັນເວລາຫຼາຍປິ ເພື່ອຫຼົບຫຼີກການປະຕິບັດຄຳຕັດສິນລົງໂທດຂອງສານແມ່ນຈຳຄຸກ 2 ປີ ຍ້ອນໂທດສໍ້ລາດບັງຫຼວງ ເມື່ອປີ 2008. ເຖິງວ່າຮ່າງກົດໝາຍທີ່ກໍ່ຄວາມໂຕ້ຖຽງກັນດັ່ງກ່າວ ໄດ້ຖືກວຸດທິສະພາໄທປະຕິເສດແລ້ວກໍ່ຕາມ, ແຕ່ມັນໄດ້ກາຍເປັນເຫດການພາໃຫ້ຄວາມຂັດແຍ່ງກັນໃນສັງຄົມໄທຮ້າຍແຮງຍິ່ງຂຶ້ນ.
ອາດເຫັນໄດ້ວ່າ, ທຸກສິ່ງທຸກຢ່າງທີ່ກ່ຽວຂ້ອງເຖິງທ່ານ ທັກສິນ ນັ້ນ, ຍັງຄົງແມ່ນໜຶ່ງໃນບັນດາບັນຫາການເມືອງທີ່ມີຄວາມສະດຸ້ງໄວທີ່ສຸດຢູ່ໄທ ໃນປະຈຸບັນ. ທ່ານ ທັກສິນ ແມ່ນສາຍເຫດຕົ້ນຕໍທີ່ພາໄປເຖິງການແບ່ງແຍກຢ່າງເລິກເຊິ່ງ ແລະ ຄວາມສັບສົນດ້ານການເມືອງຢູ່ໄທ ໃນຫຼາຍປີຜ່ານມາ. ອະດີດນາຍົກລັດຖະມົນຕີ ທັກສິນ ໄດ້ຮັບຄວາມຮັກແພງຈາກປະຊາຊົນຜູ້ທຸກຍາກນັບລ້ານຄົນ ຍ້ອນນະໂຍບາຍຂອງທ່ານ, ແຕ່ບໍ່ໄດ້ຮັບຄວາມເພິ່ງພໍໃຈຈາກລາຊາວົງ, ກອງທັບ ແລະ ຊົນຊັ້ນກາງໃນສັງຄົມໄທ.
ໃນຊຸມປີຜ່ານມາ, ຜູ້ຄົນທັງຫຼາຍໄດ້ເຫັນປະຈັກຕາການເຈລະຈາຫຼາຍຄັ້ງລະຫວ່າງກຳລັງສະໜັບສະໜູນທ່ານ ທັກສິນ (ຝ່າຍເສື້ອແດງ) ກັບ ຝ່າຍຄັດຄ້ານ (ຝ່າຍເສື້ອເຫຼືອງ). ການປະທະກັນເຫຼົ່ານັ້ນ ໄດ້ກໍ່ໃຫ້ເກີດຄວາມຂາດສະຖຽນລະພາບທາງການເມືອງ, ພາໄປເຖິງການປ່ຽນແປງອຳນາດການປົກຄອງຢ່າງຕໍ່ເນື່ອງ, ກໍ່ຜົນສະທ້ອນຢ່າງໜັກໜ່ວງເຖິງພື້ນຖານເສດຖະກິດ ກໍ່ຄືຊີວິດຂອງປະຊາຊົນຢູ່ປະເທດນີ້. ເຖິງວ່າໄດ້ຮັບໄຊຊະນະຢ່າງຂາດຂັ້ນໃນການເລືອກຕັ້ງກ່ອນນີ້ 2 ປີ ແລະ ໄດ້ນຳພາປະເທດໄທ ຜ່ານໄລຍະສັນຕິພາບ ຍາວທີ່ສຸດໃນຊຸມປີມໍ່ໆມານີ້ກໍ່ຕາມ, ແຕ່ຍ້ອນບັນຫາທີ່ກ່ຽວຂ້ອງເຖິງທ່ານ ທັກສິນນັ້ນເອງ ໄດ້ກໍ່ຜົນສະທ້ອນບໍ່ດີເຖິງລັດຖະບານຂອງທ່ານນາງນາຍົກລັດຖະມົນຕີ ຍິງຣັກ ຊິນນະວັດ .
ໄທຈະຕົກເຂົ້າສູ່ສະພາບຄືໃນປີ 2010 ຫຼືບໍ?
ພັກປະຊາທິປັດຝ່າຍຄ້ານມີບົດບາດແກ່ນສານໃນການຈັດຕັ້ງການແຫ່ຂະບວນຄັດຄ້ານລັດຖະບານໃນປະຈຸບັນ. ມາຮອດປະຈຸບັນ, ການແຫ່ຂະບວນປະທ້ວງຄັ້ງຕ່າງໆຍັງຄົງດຳເນີນໄປໃນສັນຕິພາບ, ແຕ່ຫາງສຽງພັດວິຕົກກັງວົນຕໍ່ເລື່ອງຈະເກີດການແຫ່ຂະບວນປະທ້ວງທີ່ນອງເລືອດຄືເມື່ອປີ 2010, ເຮັດໃຫ້ຜູ້ແຫ່ຂະບວນ (ຝ່າຍເສື້ອແດງ) ກວ່າ 90 ຄົນ ເສຍຊີວິດຍ້ອນຄວາມເຄັ່ງຕຶງດ້ວຍການປາບປາມຂອງອຳນາດການປົກຄອງ ໂດຍພັກປະຊາທິປັດ ນຳພາເພີ່ມຂຶ້ນ. ຕໍ່ໜ້າຄວາມດັນຂອງກຳລັງຄັດຄ້ານໃນປະຈຸບັນນັບມື້ນັບເພີ່ມຂຶ້ນນັ້ນ, ດ້ານໜຶ່ງ, ທ່ານນາງນາຍົກລັດຖະມົນຕີ ຍິງຣັກ ຊິນນະວັດ ໄດ້ຮຽກຮ້ອງບັນດາຜູ້ແຫ່ຂະບວນລະງັບໃຈ ແລະ ຢືນຢັນວ່າລັດຖະບານຈະບໍ່ນຳໃຊ້ກຳລັງອາວຸດ ເພື່ອຮັບມືກັບການແຫ່ຂະບວນ, ພ້ອມແລ້ວທີ່ຈະດຳເນີນການເຈລະຈາ, ປຶກສາຫາລືກັບຝ່າຍຄ້ານ ເພື່ອແກ້ໄຂສະພາບຂາດສະຖຽນລະພາບດ້ານການເມືອງຢູ່ໄທ ໃນປະຈຸບັນ, ດ້ານໜຶ່ງແມ່ນເດັດດຽວນຳໃຊ້ກົດໝາຍວ່າດ້ວຍປ້ອງກັນຄວາມສະຫງົບພາຍໃນ ເພື່ອແນໃສ່ປາບປາມບັນດາການກະທຳ ທີ່ທຳລາຍລັດຖະບານ ແລະ ຂົ່ມຂູ່ເຖິງຄວາມສະຫົງບຂອງຊາດ.
ການທົດສອບສຳລັບທ່ານນາງນາຍົກລັດຖະມົນຕີ ຍິງຣັກ ຊິນນະວັດ
ບັນດາຜູ້ຊ່ຽວຊານ ແລະ ວົງການນັກໄຈ້ແຍກຫຼາຍທ່ານ ໄດ້ສະແດງຄວາມວິຕົກກັງວົນຕໍ່ສະພາບການເມືອງຢູ່ໃທໃນປະຈຸບັນ, ຖ້າຫາກທ່ານນາງນາຍົກລັດຖະມົນຕີ ຍິງຣັກ ຊິນນະວັດ ບໍ່ມີວິທີແກ້ໄຂຢ່າງຄ່ອງແຄ້ວ ຈະເຮັດໃຫ້ລັດຖະບານຂອງຕົນຖືກໂຄ່ນລົ້ມ. ແຕ່ດ້ວຍທຸກສິ່ງທຸກຢ່າງທີ່ທ່ານນາງນາຍົກລັດຖະມົນຕີໄດ້ເຮັດ ເພື່ອນຳພາປະເທດໃນສອງປີຜ່ານມາ, ຫາງສຽງເຊື່ອໝັ້ນວ່າ, ທ່ານນາງຈະປະສົບຜົນສຳເລັດ.
ຫວນຄືນປີ 2012, ທ່ານນາງນາຍົກລັດຖະມົນຕີ ຍິງຣັກ ຊິນນະວັດ ໄດ້ຜ່ານຜ່າການປ່ອນບັດບໍ່ໄວ້ວາງໃຈຢູ່ສະພາຜູ້ແທນລາຊະດອນໄທ ໂດຍບັນດາ ສສຊ ຝ່າຍຄ້ານສະເໜີ ດ້ວຍການກ່າວຫາລັດຖະບານບໍ່ແກ້ໄຂໄພສໍ້ລາດບັງຫຼວງໄດ້ຢ່າງງ່າຍດາຍ. ປະຈຸບັນ, ບັນດານັກໄຈ້ແຍກຍັງຄົງເຊື່ອໝັ້ນຕໍ່ຄວາມສາມາດຟື້ນຟູຂອງທ່ານນາງໃນຄັ້ງນີ້. ນອກນັ້ນ, ເລື່ອງພັກເພື່ອຊາດໄທ ກຳອຳນາດຍັງມີທ່າໄດ້ປຽບຢູ່ສະພາຜູ້ແທນລາຊະດອນ ຈະແມ່ນໜຶ່ງໃນບັນດາປັດໃຈທີ່ກີດຂວາງບັນດາຄວາມມານະພະຍາຍາມກໍ່ຄວາມບໍ່ອຳນວຍໃຫ້ແກ່ທ່ານນາງນາຍົກລັດຖະມົນຕີ ຍິງຣັກ ຊິນນະວັດ