ກ່ອນນີ້ 70 ປີ, ໃນບັນຍາກາດການປະຕິວັດທີ່ຟົດເດືອດຍາມລະດູໃບໄມ້ຫຼົ່ນເດືອນສິງຫາ, ລັດຖະດຳລັດຂອງທ່ານປະທານໂຮ່ຈິມິນເຊັນເມື່ອວັນທີ 28/8/1945 ເພື່ອສ້າງຕັ້ງລັດຖະບານຊົ່ວຄາວແຫ່ງສາທາລະນະລັດ ປະຊາທິປະໄຕຫວຽດນາມ ໄດ້ໃຫ້ສ້າງຕັ້ງພື້ນຖານການທູດຫວຽດນາມທັນສະໄໝຢ່າງເປັນທາງການ. 70 ປີທີ່ຜ່ານມາ, ພ້ອມກັບແນວຮົບອື່ນໆ, ການທູດໄດ້ປະກອບສ່ວນນຳຫວຽດນາມຈາກປະເທດໜຶ່ງທີ່ບໍ່ມີຊື່ໃນແຜນທີ່ໂລກໄດ້ກາຍເປັນປະເທດທີ່ມີທີ່ຕັ້ງບົດບາດນັບມື້ນັບສູງໃນເວທີສາກົນ ແລະ ໄດ້ຮັບການຕີລາຄາສູງຈາກບັນດາເພື່ອນມິດໃນໂລກ.
ການທູດຫວຽດນາມ: 70 ປີແຫ່ງການຍຶດໝັ້ນ ແນວທາງການຕ່າງປະເທດສັນຕິພາບ |
ປະຫວັດສາດຂອງຫວຽດນາມແມ່ນປະຫວັດສາດຂອງການຕໍ່ຕ້ານອັນຍຶດເຍື້ອຍາວນານ. ໃນຕະຫຼອດໄລຍະ 70 ປີທີ່ຜ່ານມາ, ການທູດຫວຽດນາມຍາມໃດກໍຮ່ວມເດີນທາງພ້ອມກັບຊາດ. ບໍ່ພຽງແຕ່ປົກປັກຮັກສາໝາກຜົນແຫ່ງການປະຕິວັດຂອງລັດຫວຽດນາມທີ່ໜຸ່ມແໜ້ນເທົ່ານັ້ນ, ຫາກຍັງປະກອບສ່ວນສ້າງກຳລັງສັງລວມ, ນຳການຕໍ່ຕ້ານອັນຍຶດເຍື້ອຍາວນານຂອງຊາດຫວຽດນາມ ຈາກໄຊຊະນີ້ໄປສູ່ໄຊຊະນະອື່ນໆ.
ຍຶດໝັ້ນແນວທາງການທູດໂຮ່ຈິມິນ
ນັບແຕ່ປີ 1945 ມາຮອດປະຈຸບັນ, ການທູດຫວຽດນາມໄດ້ຮັບການກໍ່ສ້າງບົນພື້ນຖານແນວຄິດຂອງ ປະທານໂຮ່ຈິມິນ, ໃນນັ້ນ, ເນັ້ນໜັກເຖິງນ້ຳໃຈ “ຢາກເປັນເພື່ອນກັບບັນດາປະເທດ, ບໍ່ກໍ່ຄວາມອາຄາດບາດໝາງກັບໃຜ”. ເນື້ອໃນທີ່ເປັນແກ່ນສານຂອງແນວຄິດການທູດປະທານໂຮ່ຈິມິນແມ່ນນ້ຳໃຈຮັກຫອມສັນຕິພາບ ແລະ ສາມັກຄີກັບເພື່ອນມິດສາກົນ. ຍ້ອນແນວນັ້ນ, ຫວຽດນາມຍາມໃດກໍໄດ້ຮັບການສະໜັບສະໜູນຈາກປະຊາຄົມໂລກຜ່ານໄລຍະພັດທະນາຕ່າງໆ, ໃນການຕໍ່ສູ້ຍາດເອົາເອກະລາດແຫ່ງຊາດ, ກໍຄືໃນການປຸກລະດົມບັນດາແຫຼ່ງກຳລັງເພື່ອສ້າງສາປະເທດຊາດ ແລະ ປົກປັກຮັກສາອະທິປະໄຕຂອງປະເທດຊາດ.
ໃນກິດຈະການປ່ຽນແປງໃໝ່, ການປະຕິບັດຢ່າງຖືກຕ້ອງຕາມທິດນຳ “ພ້ອມແລ້ວເປັນເພື່ອນກັບທຸກໆປະເທດປະຊາທິປະໄຕ”, ຫວຽດນາມໄດ້ກາຍເປັນເພື່ອນ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈຂອງທຸກໆປະເທດ ແລະ ເປັນສະມາຊິກທີ່ມີຄວາມຮັບຜິດຊອບຂອງປະຊາຄົມໂລກ. ທ່ານເອກອັກຄະລັດຖະທູດຈີນປະຈຳຫວຽດນາມ ຮຸ່ງສ່ຽວຢຸງ ໃຫ້ຮູ້ວ່າ :
“ ຫວຽດນາມໄດ້ສ້າງຕັ້ງການພົວພັນທາງການທູດກັບກວ່າ 180 ປະເທດເປັນລ້ຳດັບ, ສ້າງການພົວພັນດ້ານເສດຖະກິດ, ການຄ້າ ແລະ ການລົງທຶນກັບກວ່າ 230 ປະເທດ ແລະ ເຂດແຄ້ວນ, ແລະ ເປັນສະມາຊິກທີ່ຕັ້ງໜ້າຂອງກວ່າ 70 ອົງການລະດັບພາກພື້ນ ແລະ ສາກົນ. ຫວຽດນາມກໍໄດ້ເຂົ້າເປັນສະມາຊິກຂອງບັນດາກົນໄກຫຼາຍຝ່າຍສາກົນ ແລະ ພາກພື້ນຄື ສະຫະປະຊາຊາດ, ອົງການການຄ້າໂລກ, ເວທີ່ປາໄສຮ່ວມມືອາຊີ-ເອີລົບ, ອາຊຽນ ແລະ ໄດ້ສວມບົດບາດທີ່ນັບມື້ນັບສຳຄັນໃນເວທີປາໄສເຫຼົ່ານັ້ນ ”
ກໍຍ້ອນໄດ້ຍຶດໝັ້ນແນວທາງການຕ່າງປະເທດເອກະລາດ, ເປັນເຈົ້າຕົນເອງ, ສັນຕີພາບ, ຮ່ວມມື ແລະ ພັດທະນາ, ການປະຕິບັດນະໂຍບາຍການຕ່າງປະເທດເປີດປະຕູ, ຫັນເປັນຫຼາຍຮູບຫຼາຍແບບ ແລະ ຫຼາຍຝ່າຍ, ການທູດຫວຽດນາມໄດ້ປະກອບສ່ວນຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບເພື່ອພັດທະນາປະເທດຊາດ. ການທູດຫວຽດນາມໄດ້ຕັ້ງໜ້າປະກອບສ່ວນເຂົ້າໃນການເພີ່ມທະວີການພົວພັນດ້ານເສດຖະກິດກັບຕ່າງປະເທດ. ເປັນຄັ້ງທຳອິດພາຍຫຼັງ 2 ທົດສະວັດ, ຫວຽດນາມໄດ້ບັນລຸວົງເງິນສົ່ງອອກເກີນດຸນນັບແຕ່ປີ 2012 ຫາ 2014, ສືບຕໍ່ແມ່ນຈຸດທີ່ສະຫ່ວາງສະໄຫວຢູ່ອາຊີຕາເວັນອອກສ່ຽງໃຕ້ໃນການດຶງດູດການລົງທຶນຈາກຕ່າງປະເທດ. ທ່ານເອກອັກຄະລັດຖະທູດຝະລັ່ງປະຈຳຫວຽດນາມ Jean- Noel Poirier ຢືນຢັນວ່າ :
“ ປະຈຸບັນ, ຫວຽດນາມໄດ້ຮັບການຮັບຮູ້ວ່າ ແມ່ນເສົາຄ້ຳແຫ່ງສັນຕິພາບຂອງພາກພື້ນ ແລະ ໂລກ. ຫວຽດນາມໄດ້ຮັບການຍ້ອງຍໍໃນທົ່ວໂລກ.ບັນດານັກລົງທຶນຂອງປະເທດຂ້າພະເຈົ້າ ຕ່າງກໍຢືນຢັນວ່າ ຫວຽດນາມມີສະພາບແວດລ້ອມແຫ່ງສັນຕິພາບ ແລະ ສະຖຽນລະພາບ ແລະ ຍ້ອນເຫດນີ້ເອງ ໄດ້ເປັນການດຶງດູດເຂົາເຈົ້າເລືອກເຟັ້ນເອົາຫວຽດນາມເປັນສະຖານທີ່ລົງທຶນ ”
ສືບຕໍ່ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ວັດທະນາຖາວອນລວມ.
ພາຍຫຼັງ 70 ປີ , ອາດຈະຢືນຢັນວ່າ ທີ່ຕັ້ງບົດບາດຂອງຫວຽດນາມໃນພາກພື້ນ ແລະ ເວທີສາກົນ ຍັງບໍ່ທັນມີຍາມໃດສູງຄືໃນປະຈຸບັນ, ຊຶ່ງໄດ້ຮັບການຮັບຮູ້ຈາກບັນດາປະເທດໃນພາກພື້ນ ແລະ ສາກົນ. ທີ່ຕັ້ງບົດບາດຂອງຫວຽດນາມໄດ້ຮັບການຕີລາຄາຜ່ານບັນດາຜົນງານໃນການພັດທະນາເສດຖະກິດ, ແລະ ພັດທະນາປະເທດຊາດ, ຜົນງານໃນການປະຕິບັດບັນດາຄຳໝັ້ນໝາຍສາກົນ ກໍຄືບັນດາເປົ້າໝາຍສະຫັດສະວັດ. ພິເສດປະຊາຄົມໂລກໄດ້ຕີລາຄາສູງ ເລື່ອງຫວຽດນາມນຳໃຊ້ນະໂຍບາຍການທູດແຫ່ງສັນຕິພາບ ແລະ ສະໜິດສະໜົມ, ມານະພະຍາຍາມຮັກສາສະຖຽນລະພາບໃນພາກພື້ນໃນສະພາວະທີ່ຄວາມໝັ້ນຄົງໃນພາກພື້ນມີການຜັນແປທີ່ສັບສົນຫຼາຍຢ່າງ. ທ່ານ Victoria Kwakwa ຜູ້ອຳນວຍການທະນາຄານໂລກ ຖືວ່າ :
“ ຫວຽດນາມໄດ້ ແລະ ພວມເຂົ້າຮ່ວມຢ່າງຕັ້ງໜ້າເຂົ້າໃນບັນດາຂໍ້ລິເລີ່ມຮ່ວມມືລະດັບພາກພື້ນ. ຫວຽດນາມໄດ້ຮັກສາສັນຕິພາບກັບບັນດາປະເທດບ້ານໃກ້ເຮືອນຄຽງ ແລະ ປະຈຸບັນພວມນຳໃຊ້ບັນດາກົນໄກສາກົນ ແນໃສ່ຊອກຫາວິທີການແກ້ໄຂ, ນັບທັງບັນຫາທີ່ເຄັ່ງຕຶງທີ່ສຸດ ຄືບັນຫາການຂັດແຍ້ງເຂດນ້ຳແດນດິນກັບຈີນຢູ່ທະເລຕາເວັນອອກ. ວິທີການແກ້ໄຂຂອງຫວຽດນາມໄດ້ຊ່ວຍປິດອະດີດຕະການໃນສົງຄາມທີ່ຮ້າຍກາດໄວ້, ດຳເນີນການຮ່ວມມືກັບບັນດາປະເທດອ້ອມຂ້າງ, ສ້າງສາຍພົວພັນມິດຕະພາບກັບທຸກໆປະເທດ. ນີ້ແມ່ນໄຊຊະຊະຂອງ ການທູດຫວຽດນາມ ”
ໂດຍແມ່ນປະເທດທີ່ມີທີ່ຕັ້ງດ້ານພູມສາດ ແລະ ຍຸດທະສາດທີ່ສຳຄັນໃນພາກພື້ນອາຊີ-ປາຊີຝິກ, ຫວຽດນາມພວມຢືນຢູ່ຕໍ່ໜ້າຫຼາຍກາລະໂອກາດເພື່ອ ສົມທົບກຳລັງແຮງແຫ່ງຊາດກັບກຳລັງແຮງຍຸກສະໄໝໃນສະພາບການໃໝ່, ຍາດແຍ່ງບັນດາເງື່ອນໄຂສະດວກ ເພື່ອແນໃສ່ປະຕິບັດພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ. ການທູດຫວຽດນາມເສີມຂະຫຍາຍມູນເຊື້ອ 70 ປີສືບຕໍໍ່ແມ່ນກຳລັງປະຈັນບານ, ນຳປະເທດຊາດເຊື່ອມໂຍງເຂົ້າກັບສາກົນຢ່າງຮອບດ້ານ.