(vovworld) – ພາຍຫຼັງໄດ້ຮັບດຳລົງຕຳແໜ່ງເມື່ອທ້າຍອາທິດຜ່ານມາ, ປະທານາທິບໍດີອີຣານຄົນໃໝ່ Hassan Rowhani ເລີ່ມລົງມືກໍ່ສ້າງລັດຖະບານໃໝ່. ໃນບັນຊີລາຍຊື່ຄະນະລັດຖະບານ ໂດຍທ່ານ Hassan Rowhani ແຕ່ງຕັ້ງນັ້ນ, ສາມາດເຫັນໄດ້ຢ່າງຈະແຈ້ງວ່າ, ບັນດາຕຳແໜ່ງສຳຄັນລ້ວນແຕ່ໂດຍຜູ້ມີປະສົບການ ແລະ ມີແນວຄິດປະຕິຮູບຮັບຜິດຊອບ. ການແຕ່ງຕັ້ງນີ້ເພື່ອແນໃສ່ປະຕິບັດຄຳໝັ້ນສັນຍາຂອງທ່ານ ເມື່ອໄດ້ຮັບໄຊຊະນະໃນການເລືອກຕັ້ງປະທານາທິບໍດີເມື່ອເດືອນ 6 ຜ່ານມາ ນັ້ນແມ່ນຢຸດຕິສະພາບເສດຖະກິດ - ການເມືອງພວມຕົກຢູ່ໂດດດຽວຂອງປະເທດອິດສະລາມນີ້. ແຕ່ສິ່ງດັ່ງກ່າວບໍ່ແມ່ນເລື່ອງງ່າຍ. ໃນລາຍການສະຖານະການການເມືອງມື້ນີ້, ຮົ່ງເວີນ, ນັກຂ່າວວິທະຍຸກະຈາຍສຽງຫວຽດນາມ, ມີບົດຂຽນທີ່ພາດຫົວເລື່ອງວ່າ “ການທ້າທາຍໃຫຍ່ສຳລັບປະທານາທິບໍດີອີຮານຄົນໃໝ່ “
ປະທານາທິບໍດີອີຮານ Hassan Rowhani
ປະທານາທິບໍດີອີຮານ Hassan Rowhani ໄດ້ແຕ່ງຕັ້ງ ແລະ ປະກາດລາຍຊື່ສະມາຊິກໃນຄະນະລັດຖະບານໃໝ່ພາຍໃນເວລາພຽງ 2 ວັນເທົ່ານັ້ນ. ຕາມນັ້ນແລ້ວ, ພາກສ່ວນລັດຖະບານໃໝ່ໂດຍປະທານາທິບໍດີ Hassan Rowhani ເລືອກເຟັ້ນລວມມີນັກການເມືອງ Eshaq Jahangiri ເປັນຮອງປະທານາທິບໍດີຜູ້ທີ 1 ພ້ອມກັບລັດຖະມົນຕີ 18 ທ່ານ. ເຂົາເຈົ້າລ້ວນແຕ່ແມ່ນນັກການເມືອງທີ່ມີປະສົບການໃນເວທີການເມືອງ. ໃນຄະນະລັດຖະບານໃໝ່ມີນັກການທູດອາວຸໂສ Mohammad Javad Zarid ຮັບດຳລົງຕຳແໜ່ງລັດຖະມົນຕີການຕ່າງປະເທດ ແລະ ອະດີດລັດຖະມົນຕີນ້ຳມັນບໍ່ແຮ່ Bijan Namdar Zanganeh ຮັບດຳລົງຕຳແໜ່ງລັດຖະມົນຕີນຳ້ມັນບໍ່ແຮ່ຄືນໃໝ່. ເລື່ອງແຕ່ງຕັ້ງນັກປະຕິຮູບ Mohammad Javad Zarid ໄດ້ຮັບການສັງເກດວ່າ ເພື່ອຊອກຫາຜູ້ຮັບຜິດຊອບໜ້າທີ່ເຈລະຈາດ້ານນິວຄະເລຍລະຫວ່າງອີຮານ ແລະ ກຸ່ມ P5+1 (ອາເມລິກາ, ອັງກິດ, ຝລັ່ງ, ຈີນ, ລັດເຊຍ ແລະ ເຢຍລະມັນ). ໃນຂະນະນັ້ນ, ຜູ້ຮັບດຳລົງຕຳແໜ່ງລັດຖະມົນຕີນ້ຳມັນບໍ່ແຮ່ Bijan Namdar Zanganeh ເປັນຜູ້ທີ່ເຄີຍຮັບຜິດຊອບກະຊວງນີ້ເປັນເວລາ 8 ປີ ໃນສະໄໝຂອງອະດີປະທານາທິບໍດີ Mohammad Khatami, ພັດມີຄວາມເອົາໃຈໃສ່ເປັນພິເສດເຖິງການສ້າງສາຍພົວພັນອັນດີງາມກັບບັນດາຄູ່ຮ່ວມມືຂອງອີຮານໃນອົງການຈັດຕັ້ງບັນດາປະເທດສົ່ງອອກນຳ້ມັນ (OPEC) ແລະ ແລະ ພັດທະນາຂົງເຂດພະລັງງານພາຍໃນປະເທດ.
ວົງການນັກໄຈ້ແຍກຖືວ່າ, ການເລືອກເຟັ້ນຂອງປະທານາທິບໍດີອີຮານຄົນໃໝ່ໃນສະພາບການປະຈຸບັນແມ່ນເໝາະສົມພໍສົມຄວນ. ແຕ່ເພື່ອກູ້ເອົາພື້ນຖານເສດຖະກິດທີ່ພວມຊຸດໂຊມຍ້ອນບັນດາຄຳສັ່ງຂວ້ຳບາດຂອງຝ່າຍຕາເວັນຕົກ, ພ້ອມທັງຟື້ນຟູທີ່ຕັ້ງຂອງອີຮານໃນເວທີສາກົນຄືນໃໝ່ນັ້ນ ພັດແມ່ນບັນຫາບໍ່ງ່າຍດາຍ, ຈຳເປັນຕ້ອງມີວິວັດການຢ່າງເໝາະສົມ. ກ່ຽວກັບທາງດ້ານເສດຖະກິດ, ນີ້ແມ່ນເທື່ອທຳອິດນັບແຕ່ຊຸມປີ 80 ຂອງສະຕະວັດກ່ອນ, ອີຮານ ມີລະດັບເຕີບໂຕເສດຖະກິດບັນລຸຕົວເລກລົບໃນ 2 ປີ ຢ່າງຕໍ່ເນື່ອງ. ອັນຕາຫວ່າງງານເພີ່ມຂຶ້ນ 13%. ຄຽງຂ້າງນັ້ນແມ່ນອັດຕາໄພເງິນເຟີ້ຢູ່ໃນລະດັບສູງສຸດໃນພາກພື້ນ (ແມ່ນປະມານ 40%)ນີ້ອາດຈະແມ່ນລະດັບໄພເງິນເຟີ້ສູງສຸດຂອງໂລກ. ອະດີດລັດຖະມົນຕີກະສີກຳຂອງອີຮານ ທ່ານ Issa Kalantari ຍອມຮັບວ່າ ປະທານາທິບໍດີອີຮານຄົນໃໝ່ ໄດ້ຮັບດຳລົງຕຳແໜ່ງໃນສະພາບການທີ່ຫຼາຍຂົງເຂດຂອງປະເທດພວມປະສົບກັບຄວາມຫຍຸ້ງຍາກທີ່ສຸດຄື: ທະນາຄານ, ຄັງເງິນ, ບັນດາທ່າກຳ່ປັ່ນ.
ຄວາມຫຍຸ້ງຍາກຍິ່ງເພີ່ມຂຶ້ນອີກ ໃນຂະນະກ່ອນທີ່ທ່ານ Hassan Rowhani ຮັບດຳລົງຕຳແໜ່ງ, ສະພາຕຳ່ອາເມລິກາ ໄດ້ຮັບຮອງເອົາຮ່າງກົດໝາຍລົງໂທດ Tehran. ຮ່າງກົດໝາຍນີ້ສະເໜີໃຫ້ຫຼຸດຜ່ອນຈຳນວນນ້ຳມັນສົ່ງອອກຂອງອີຮານລົງຕື່ມອີກ 1 ລ້ານຖັງ/ວັນ ໃນໄລຍະ 1 ປີ, ເພື່ອແນໃສ່ຫຼຸດຜ່ອນງົບປະມານໃຫ້ໂຄງການນິວຄະເລຍທີ່ເຄີຍກໍ່ຄວາມໂຕ້ຖຽງກັນ, ເຊິ່ງ Tehran ພວມຜັນຂະຫຍາຍ. ການກະທຳນີ້ເປັນການຢືນຢັນໃຫ້ເຫັນວ່າ ລະຫວ່າງ Tehran, ວໍຊິງຕັນ ແລະ ຝ່າຍຕາເວັນຕົກ ຍັງຄົງຄ້າງຫຼາຍສິ່ງຫຼາຍຢ່າງທີ່ແຕກຕ່າງກັນ.
ພ້ອມກັບຄວາມຫຍຸ້ງຍາກທາງດ້ານເສດຖະກິດ. ຍັງມີຄວາມຫຍຸ້ງຍາກໜຶ່ງອີກນັ້ນແມ່ນ ການແກ້ໄຂ ແລະ ຊຸກຍູ້ວິວັດການເຈລະຈາດ້ານນິວຄະເລຍລະຫວ່າງປະເທດນີ້ ແລະ ກຸ່ມ P5+1. ນີ້ກໍ່ແມ່ນວິທີເພື່ອໃຫ້ຝ່າຍຕາເວັນຕົກຍົກເລີກຄຳສັ່ງຂວ້ຳບາດສຳລັບອີຮານ. ໃນຖະແຫຼງການທຳອິດ ພາຍຫຼັງໄດ້ຮັບໄຊຊະນະໃນການເລືອກຕັ້ງປະທານາທິບໍດີ, ທ່ານ Hassan Rowhani ໃຫ້ຮູ້ວ່າ. ອາຍຸການຕໍ່ໜ້າຂອງລັດຖະບານແມ່ນຈະປະຕິບັດ 2 ບາດກ້າວໃນບັນຫານິວຄະເລຍ, ກ່ອນອື່ນໝົດແມ່ນຈະເຮັດແຈ້ງກວ່າເພື່ອພິສູດໃຫ້ເຫັນວ່າ ການເຄື່ອນໄຫວຕ່າງໆຂອງອີຮານ ລ້ວນແຕ່ນອນໃນຂອບເຂດບັນດາຂໍ້ກຳນົດຂອງສາກົນ ແລະ ຫຼັງຈາກນັ້ນແມ່ນເພີ່ມຄວາມໄວ້ເນື້ອເຊື່ອໃຈລະຫວ່າງອີຮານ ແລະ ໂລກ. ອຳນາດການປົກຄອງ Tehran ກໍ່ສະແດງຄວາມຫວັງວ່າ ຈະເຊື່ອມຕໍ່ການເຈລະຈາກັບກຸ່ມ P5+1 ກ່ຽວກັບມາດຕະການແກ້ໄຂໂຄງການນິວຄະເລຍທີ່ເຄີຍເກີດຄວາມໂຕ້ຖຽງກັນ.
ແຕ່ການຊອກຫາກົນໄກເພື່ອສ້າງຄວາມໄວ້ເນື້ອເຊື່ອໃຈ ແລະ ແກ້ໄຂຄວາມບໍ່ລົງລອຍກັນລະຫວ່າງສອງຝ່າຍພັດບໍ່ແມ່ນເລື່ອງງ່າຍ, ໃນຂະນະທີ່ບໍ່ວ່າທ່າທີປ່ຽນແປງໃດໆຂອງອີຮານທີ່ມີຕໍ່ຝ່າຍຕາເວັນຕົກ ກໍ່ລ້ວນແຕ່ໄດ້ໄດ້ຮັບການເຫັນດີຈາກການນຳສູງສຸດ Ayatollah Ali Khamenei, ຜູ້ທີ່ເຄີຍຮັກສາທັດສະນະຕ້ານຝ່າຍຕາເວັນຕົກ.
ອະຍຸການເປັນປະທານາທິບໍດີຂອງທ່ານ Hassan Rowhani ຖືກເລີ່ມຕົ້ນດ້ວຍຄວາມຫຍຸ້ງຍາກຫຼາຍຢ່າງ. ຫາງສຽງ ແລະ ຜູ້ມີສິດເລືອກຕັ້ງອີຮານ ພວມລໍຖ້າ ການຊີ້ນຳນຳພາປະເທດຊາດຂອງປະທານາທິບໍດີຄົນໃໝ່ Hassan Rowhani ເພື່ອນຳປະເທດນີ້ຜ່ານຜ່າວິກິດການ.