(vovworld) – ໃນລະຫວ່າງວັນທີ 3 – 5/5, ອິດສະຮາແອນໄດ້ບຸກໂຈມຕີດິນແດນຂອງຊີຮີ 2 ຄັ້ງ. ການບຸກໂຈມຕີພຽງຝ່າຍດຽວຂອງອິດສະຮາແອນ ໄດ້ເຮັດໃຫ້ປະຊາຄົມໂລກວິຕົກກັງວົນກ່ຽວກັບການລະເມີດອະທິປະໄຕ, ເຮັດໃຫ້ເສິກກາງເມືອງຢູ່ຊີຮີສັບສົນຍິ່ງຂຶ້ນ, ແລະ ອາດຈະກໍ່ໃຫ້ເກີດການປະທະກັນໃນທົ່ວພາກພື້ນ.
ທະຫານອິດສະຮາແອນ ເຝິກແອບມໍ່ກັບເຂດຊາຍແດນລະຫວ່າງອິດສະຮາແອນ ແລະ ຊີຮີ
(ພາບ: Reuters)
ການບຸກໂຈມຕີທາງອາກາດລ້າສຸດຂອງອິດສະຮາແອນ ແມ່ນໃນວັນທີ 5/5 ເພື່ອເລັ່ງໃສ່ເຂດຖານທີ່ໝັ້ນ Jamraya ຢູ່ເຂດທາງທິດຕາເວັນຕົກສ່ຽງເໜືອຂອງນະຄອນຫຼວງ Damascus. ນີ້ບໍ່ແມ່ນເຫດທີ່ເກີດຂຶ້ນໂດຍບັງເອີນ ເມື່ອກ່ອນນີ້ 4 ເດືອນ, ອິດສະຮາແອນ ກໍ່ໄດ້ບຸກໂຈມຕີທາງອາກາດໃສ່ເຂດດັ່ງກ່າວແລ້ວ. ເພື່ອອະທິບາຍໃຫ້ແກ່ການກະທຳຂອງຕົນ, ເຈົ້າໜ້າທີ່ຜູ້ໜຶ່ງຂອງ ອິດສະຮາແອນ ໄດ້ເປີດເຜີຍວ່າ, ການບຸກໂຈມຕີທາງອາກາດເຫຼົ່ານັ້ນ ພຽງແຕ່ເລັ່ງໃສ່ສາງອາວຸດຂອງອຳນາດການປົກຄອງຊີຮີ ທີ່ຄາດວ່າຈະມອບສົ່ງໃຫ້ກຳລັງ Hezbollah ຢູ່ Lebanon, ເຊິ່ງແມ່ນກຳລັງຄັດຄ້ານກັບອິດສະຮາແອນ. ອາວຸດເຊິ່ງອິດສະຮາແອນເຕື້ອງເຖິງນັ້ນແມ່ນ ລູກສອນໄພ Fatech – 110, ໂດຍອີຮານ ຜະລິດ ເພື່ອແນໃສ່ສະໜອງໃຫ້ກຳລັງ Hezbollah, ເຊິ່ງສາມາດຍິງເຖິງເຂດໃຈກາງຂອງອິດສະຮາແອນ ໄດ້.
ພາຍຫຼັງເຫດບຸກໂຈມຕີດັ່ງກ່າວ, ຊີຮີຖະແຫຼງວ່າ ຈະສະໜອງ ອາວຸດປະເພດໃໝ່ທີ່ມີຄູນນະພາບໃຫ້ແກ່ຂະບວນການອິດສາລາມ Hezbollah ຢູ່ Lebanon. ລັດຖະບານຊີຮີກໍ່ຖະແຫຼງວ່າ, ການບຸກໂຈມຕີຄັ້ງຕ່າງໆຂອງອິດສະຮາແອນ ໃສ່ດິນແດນປະເທດນີ້ ແມ່ນການກະທຳລະເມີດກົດໝາຍສາກົນຢ່າງບັງອາດ, ອັນໄດ້ເຮັດໃຫ້ທັງເຂດຕາເວັນອອກກາງມີຄວາມອັນຕະລາຍກວ່າ. ໃນການປະຊຸມດ່ວນ, ຄະນະລັດຖະບານຊີຮີ ປະກາດວ່າ ຈະມີການກະທຳໂຕ້ຕອບການບຸກໂຈມຕີທາງອາກາດຂອງອິດສະຮາແອນ. ຊ້ຳບໍ່ໜຳ, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຊີຮີ Faisal al Mekdad ກໍ່ໄດ້ຢັ້ງຢືນວ່າ, ດ້ວຍການບຸກໂຈມຕີທາງອາກາດນີ້, ອິດສະຮາແອນ ໄດ້ປະກາດສົງຄາມກັບອຳນາດການປົກຄອງ Damascus. ຊີຮີ ກໍ່ໄດ້ຮ້ອງຟ້ອງຂຶ້ນຕໍ່ສະຫະປະຊາຊາດ ກ່ຽວກັບເຫດການດັ່ງກ່າວ.
ການກະທຳຂອງອິດສະຮາແອນ ກໍ່ປະສົບກັບການຄັດຄ້ານຢ່າງແຮງຈາກປະຊາຄົມໂລກ. ທ່ານເລຂາທິການໃຫຍ່ສະຫະປະຊາຊາດ Ban Ki-moon ສະແດງຄວາມວິຕົກກັງວົນຢ່າງເລິກເຊິ່ງຕໍ່ການບຸກໂຈມຕີທາງອາກາດຂອງອິດສະຮາແອນເຂົ້າດິນແດນຂອງຊີຮີ ແລະ ຮຽກຮ້ອງຕ້ອງເຄົາລົບຜືນແຜ່ນດິນ ແລະ ອະທິປະໄຕຢ່າງຄົບຖ້ວນຂອງທຸກປະເທດໃນເຂດຕາເວັນອອກກາງ, ປະຕິບັດມະຕິທັງໝົດທີ່ກ່ຽວຂ້ອງເຖິງສະພາຄວາມໝັ້ນຄົງ ສະຫະປະຊາຊາດ. ໃນຂະນະນັ້ນ, ສະຫະພັນອາຮັບ (AL) ກໍ່ໄດ້ຮຽກຮ້ອງໃຫ້ສະພາຄວາມໝັ້ນຄົງຈົ່ງມີການກະທຳໃນທັນທີ ເພື່ອຢຸດຕິການບຸກໂຈມຕີຂອງອິດສະຮາແອນ ໃສ່ຊີຮີ. ສ່ວນຈີນ ແລະ ລັດເຊຍ ກໍ່ໄດ້ອອກຖະແຫຼງຄັດຄ້ານການນຳໃຊ້ກຳລັງອາວຸດ, ພ້ອມທັງຖືວ່າ ອະທິປະໄຕຂອງບໍ່ວ່າປະເທດໃດກໍ່ຕ້ອງໄດ້ຮັບການເຄົາລົບ. ລັດຖະມົນຕີວ່າການການຕ່າງປະເທດອັງອິດ ກໍ່ກ່າວເຕືອນວ່າ ການກະທຳຂອງອິດສະຮາແອນ ອາດຈະພາໃຫ້ເກີດການໃຊ້ຄວາມຮຸນແຮງຢູ່ຊີຮີ ໃນທົ່ວພາກພື້ນ. ນັກສັງເກດການຝ່າຍຕາເວັນຕົກຈຳນວນໜຶ່ງກໍ່ຕີລາຄາວ່າ ດ້ວຍການບຸກໂຈມຕີທາງອາກາດຂອງຕົນ, ອິດສະຮາແອນ ພວມເປັນເຈົ້າການເຮັດໃຫ້ຄວາມເຄັ່ງຕຶງເພີ່ມຂຶ້ນ.
ເລື່ອງອິດສະຮາແອນ ບຸກໂຈມຕີຊີຮີ ຢ່າງລຽນຕິດໃນຊຸມມື້ຜ່ານມາ, ບໍ່ພຽງແຕ່ເພື່ອສະກັດກັ້ນການສະໜອງອາວຸດໃຫ້ຝ່າຍ Hezbollah ຄືເຈົ້າໜ້າທີ່ອິດສະຮາແອນຜູ້ໜຶ່ງໄດ້ຍອມຮັບເທົ່ານັ້ນ. ຫາກການກະທຳນີ້ຍັງເພື່ອຈຸດປະສົງອື່ນຂອງຜູ້ກຳອຳນາດອິດສະຮາແອນອີກ. ກ່ອນອື່ນໝົດ, ການກະທຳນີ້ ແມ່ນເພື່ອໜູນຊ່ວຍ, ສ້າງການໜູນຫຼັງໃຫ້ພວກລຸກຮຶ້ຂຶ້ນຢູ່ຊີຮີ. ເພາະວ່າ, ພາຍຫຼັງການບຸກໂຈມຕີທາງອາກາດຂອງອິດສະຮາແອນ. ທະຫານລຸກຮຶ້ຂຶ້ນ ໄດ້ຍິງປືນຄົກໃສ່ສູນຄົ້ນຄ້ວາຢູ່ Jamraya ແລະ ດຳເນີນການບຸກໂຈມຕີໃສ່ຖານທີ່ໝັ້ນຂອງທະຫານປ້ອງກັນນະຄອນຫຼວງ. ຝ່າຍຊີຮີ ກ່າວປະນາມເລື່ອງອິດສະຮາແອນ ບຸກໂຈມຕີໃສ່ບັນດາເປົ້າໝາຍຢູ່ Damascus ແມ່ນເພື່ອສົ່ງເສີມຈິດໃຈຂອງທະຫານແຕກທັບ, ພາຍຫຼັງການປະລາໄຊຕ່າງໆຫວ່າງແລ້ວນີ້ໃນສະໜາມຮົບ. ຈຸດໝາຍທີສອງແມ່ນ ອິດສະຮາແອນ ໄດ້ປຸກລຸກການກະທຳດ້ານການທະຫານຂອງກອງທັບຊີຮີ ເພື່ອກໍ່ສົງຄາມ ແລະ ກໍ່ເຫດຜົນທີ່ເໝາະສົມ ເພື່ອພາໄປເຖິງການແຊກແຊງດ້ານການທະຫານຂອງຕ່າງປະເທດ. ສິ່ງດັ່ງກ່າວກໍ່ຖືກກັບຄວາມປາຖະໜາຂອງຝ່າຍຄ້ານຢູ່ຊີຮີ ເມື່ອກຳລັງນີ້ ເຄີຍໄດ້ຮຽກຮ້ອງໃຫ້ຕ່າງປະເທດຍື່ນມືດ້ານການທະຫານເຂົ້າເສິກກາງເມືອງ, ດ້ວຍສາຍເຫດປ້ອງກັນສາມັນຊົນ.
ເສິກກາງເມືອງທີ່ແກ່ຍາວໃນ 2 ກວ່າປີທີ່ຜ່ານມາຢູ່ຊີຮີ ໄດ້ເຮັດໃຫ້ 70.000 ກວ່າຄົນເສຍຊີວິດ ແລະ 1,2 ລ້ານຄົນ ຕ້ອງຍ້າຍອອກຈາກເຮືອນຢູ່. ປະຈຸບັນ, ການບຸກໂຈມຕີທາງອາກາດຄັ້ງຕ່າງໆຂອງອິດສະຮາແອນ ໃສ່ ປະເທດຕາເວັນອອກກາງນີ້ນັບມື້ນັບສັບສົນຍິ່ງຂຶ້ນ. ສະພາບການດັ່ງກ່າວຮຽກຮ້ອງໃຫ້ອຳນາດການປົກຄອງຂອງປະທານາທິບໍດີ Bashar al Assad ຕ້ອງຄິດໄລ່ໃນການເລືອກເຟັ້ນບັນດາມາດຕະການຮັບມື, ພ້ອມທັງກ່າວເຕືອນປະຊາຄົມໂລກ ຈົ່ງຍົກອອກບັນດາມາດຕະການຢ່າງແຮງ ກ່ອນທີ່ສະພາບການຢູ່ຊີຮີ ຮ້າຍແຮງຍິ່ງຂຶ້ນ, ເຮັດໃຫ້ຕາເວັນອອກກາງຕົກເຂົ້າສູ່ສະພາບຂາດສະຖຽນລະພາບຄັ້ງໃໝ່.