Ryan C. Fogle ຖືກຈັບຕົວຢູ່ອົງການປ້ອງ
ກັນຄວາມສະຫງົບລັດເຊຍ
(ພາບ: baomoi.com)
|
ການພົວພັນລະຫວ່າງລັດເຊຍ-ອາເມລິກາ ທີ່ຫາກໍມີສັນຍານກ່ຽວກັບຄວາມປາດຖະໜາຢ່າງຕັ້ງໜ້າພາຍຫຼັງເກືອບ 2 ທົດສະວັດແຫ່ງສົງຄາມເຢັນ, ພັດພວມຢືນຢູ່ຕໍ່ໜ້າສິ່ງທ້າທາຍໃໝ່ພາຍຫຼັງທີ່ອົງການສືບລາຊະການລັບແຫ່ງລັດເຊຍຫາກໍຈັບຕົວ ແລະ ເນລະເທດພາລະກອນ CIA ເຮັດວຽກຢູ່ສະຖານທູດອາເມລິກາປະຈຳມົດສະກູຍ້ອນສົງໄສວ່າ ບຸກຄົນນີ້ໄດ້ໃຊ້ເງິນກ້ອນໃຫຍ່ເພື່ອຈາຍຄ່າໄຖ່ໃຫ້ນັກສືບລັດເຊຍ.
ວັນທີ 14/5, ບັນດາພາຫະນະສື່ມວນຊົນລັດເຊຍ ໄດ້ພ້ອມກັນໃຫ້ຂ່າວວ່າ ປະເທດນີ້ໄດ້ຈັບຕົວ ນັກສືບສອດແນມ CIA ຄົນໜຶ່ງທີ່ເຄື່ອນໄຫວໃນນາມເປັນນັກການທູດຢູ່ ສະຖານທູດອາເມລິກາປະຈຳມົດສະກູ. ບຸກຄົນນີ້ມີຊື່ວ່າ Ryan Fogle ຖືກກ່າວຫາມີກົນອຸບາຍຄັດເລືອກນັກສືບລາຊະການລັບລັດເຊຍ. ໃນທັນທີ່, ກະຊວງການຕ່າງປະເທດລັດເຊຍໄດ້ຮຽກຕົວເອກອັກຄະລັດຖະທູດອາເມລິກາປະຈຳມົດສະກູ ທ່ານ Michael McFaul ແລະ ໄດ້ອອກຂໍ້ຕົກລົງເນລະເທດ Ryan Fogle ອອກຈາກປະເທດລັດເຊຍ.
ກໍລະນີໄດ້ເກີດຂຶ້ນກົງກັບຈຸດເວລາທີ່ສະດຸ້ງໄວ ຂະນະທີ່ທັງມົດສະກູ ແລະ ວໍຊິງຕັນ ພວມມີບັນດາບາດກ້າວເດີນທີ່ລະມັດລະວັງເພື່ອປົວແປງການພົວພັນ 2 ຝ່າຍພາຍຫຼັງເກີດສົງຄາມເຢັນເປັນໄລຍະຍາວນານ. ເຖິງວ່າ 2 ຝ່າຍພ້ອມກັນຖະແຫຼງມີຄວາມຕັດສິນໃຈເຊື່ອມຕໍ່ການພົວພັນຄືນໃໝ່ກໍຕາມ, ແຕ່ບັນດາຄວາມບໍ່ລົງລອຍກັນຍັງຄົງເປັນສິ່ງກີດຂວາງການພົວພັນ 2 ຝ່າຍ. ສິ່ງທີ່ພົ້ນເດັ່ນໃນບັນດາຄວາມບໍ່ລົງລອຍກັນ ນັ້ນແມ່ນຍຸດທະສາດການກໍ່ສ້າງລະບົບ້ປອງກັນລູກສອນໄຟ NMD ຂອງອາເມລິກາຢູ່ເອີລົບ, ໂຄງການນິວເຄຼຍຂອງອີຣານ, ລູກສອນໄຟຂອງ ສ.ປ.ປ.ເກົາຫຼີ, ການຜັນແປຂອງຂະບວນການ“ ລະດູບານໃໝ່ອາຣັບ ” ...
ປີ 2012, ຖືກຖືວ່າ ແມ່ນປີທີ່ສັບສົນທີ່ສຸດໃນການພົວພັນ ອາເມລິກາ-ລັດເຊຍ ຍ້ອນບັນດາກໍລະນີໂຕ້ຕອບຊຶ່ງກັນແລະກັນ ຄື ມົດສະກູຢຸດຕິການເຄື່ອນໄຫວຂອງອົງການພັດທະນາສາກົນອາເມລິກາ (USAID)ຢູ່ລັດເຊຍ, ສະພາແຫ່ງຊາດ ອາເມລິກາຮັບຮອງເອົາກົດໝາຍ Magnitsky. ຫຼັງຈາກນັ້ນ ໃນທັນທີ່, ເພື່ອໂຕ້ຕອບຄືນ, ສະພາແຫ່ງຊາດລັດເຊຍ ກໍໄດ້ ຮັບຮອງເອົາກົດໝາຍເກືອດຫ້າມຊາວ ອາເມລິກາຮັບລູກລ້ຽງຈາກລັດເຊຍ. ໃນມໍ່ໆມານີ້, ອຳນາດການປົກຄອງປະທານາທິບໍດີ Barak Obama ໄດ້ຂຶ້ນບັນຊີລາຍຊື່ເຈົ້າໜ້າທີ່ລັດເຊຍ 18 ທ່ານ ຊຶ່ງຖືວ່າໄດ້ລະເມີດສິດທິມະນຸດ ແລະ ຖືກຫ້າມເຂົ້າເມືອງອາເມລິກາ ແລະ ບັນດາຊັບສົມບັດຂອງເຂົາເຈົ້າຢູ່ອາເມລິກາຈະຖືກປິດລ້ອມ. ເພື່ອໂຕ້ຕອບຄືນ, ໃນທັນທີ່, ມົດສະກູໄດ້ປະກາດບັນຊີລາຍຊື່ເຈົ້າໜ້າທີ່ອາເມລິກາ 18 ທ່ານຖືກ ຫ້າມເຂົ້າເມືອງລັດເຊຍ. ພ້ອມກັນນັ້ນ, ໃນໄລຍະມໍ່ໆມານີ້, ຄວາມບໍ່ລົງລອຍກັນ ໃນການແກ້ໄຂວິກິດການດ້ານການເມືອງຢູ່ຊີຣີ ຍິ່ງເຮັດໃຫ້ ການພົວພັນອາເມລິກາ-ລັດເຊຍ ຍາກທີ່ຈະມີບາດກ້າວປົວແປງໃດໆ.
ດ້ວຍກໍລະນີຈັບຕົວ ນັກສືບສອດແນມອາເມລິກາຄັ້ງນີ້, ຫາງສຽງມີຄວາມ ວິຕົກກັງວົນວ່າ ກໍລະນີນີ້ຈະນາບຂູ່ຕໍ່ການພົວພັນຄູ່ຮ່ວມມືລະຫວ່າງ 2 ປະເທດທີ່ ຫາກໍມີສັນຍານດຳເນີນການກໍ່ສ້າງຫຼືບໍ່. ທີ່ຈິງແລ້ວ, ບັນດາສັນຍານໃນປະຈຸບັນ ໄດ້ສະແດງໃຫ້ເຫັນວ່າ 2 ປະເທດພວມມີບັນດາປະຕິກິລີຍາທາງການທູດທີ່ລະງັບໃຈ ແທນທີ່ການກະທຳເພີ່ມທະວີຄວາມເຄັ່ງຕຶງ. ພະຍານຫຼັກຖານແມ່ນມາຮອດປະຈຸບັນ, ອຳນາດການປົກຄອງອາເມລິກາຍັງບໍ່ທັນມີບໍ່ວ່າຄຳວິຈານໃດໆກ່ຽວກັບເລື່ອງລັດເຊຍຈັບຕົວພາລະກອນການທູດຂອງຕົນ.ໂຄສົກກະຊວງການຕ່າງປະເທດອາເມລິກາ ທ່ານ Patrick Ventrell ເຖິງວ່າໄດ້ເນັ້ນໜັກການກະທຳຂອງລັດເຊຍແມ່ນ “ ເກາະຜິດ ແລະ ບໍ່ສອດຄ່ອງໃນການຊຸກຍູ້ການເພີ່ມທະວີຄວາມໄວ້ເນື້ອເຊື່ອໃຈລະຫວ່າງ 2 ປະເທດ ” ກໍຕາມ, ແຕ່ກໍຢືນຢັນວ່າ ກໍລະນີນີ້ຈະບໍ່ສົ່ງຜົນສະທ້ອນເຖິງ ການພົວພັນ ອາເມລິກາ-ລັດເຊຍ. ນັກໄຈ້ແຍກການເມືອງຫຼາຍທ່ານຖືວ່າ ກົງກັນຂ້າມກັບທຳນຽມຈາກທາງຝ່າຍອຳນາດການປົກຄອງອາເມລິກາ ແມ່ນການກະທຳໂຕ້ຕອບໃນທັນທີ່ ຄືເນລະເທດຜູ້ໃດຜູຸ້ໜຶ່ງໃນຈຳນວນບັນດານັກການທູດລັດເຊຍ, ວິທີການປະພຶດທີ່ມິດງຽບ ແລະ ລະມັດ ລະວັງໃນຄັ້ງນີ້ ກໍແມ່ນສັນຍານທີ່ຕັ້ງໜ້າ ສະແດງໃຫ້ເຫັນວ່າ ທຳນຽບຂາວພ້ອມແລ້ວປັດເຂ່ຍຄວາມປັນປວນ ເພື່ອສືບຕໍ່ຮ່ວມມືກັບ Kremli . ເບິ່ງຄືວ່າ ຜົນຮ້າຍຢ່ອນຫຼັງທີ່ຫຍໍ້ທໍ້ຂອງເຫດວາງລະເບີດກໍ່ການຮ້າຍຢູ່ Boston ແມ່ນບົດຮຽນພາໃຫ້ວໍຊິງຕັນບໍ່ຢາກເຮັດໃຫ້ບັນຫາເພີ່ມຄວາມສັບສົນ ແລະ ເຄັ່ງຕຶງຂຶ້ນຕື່ມ. ຍ້ອນ ການພົວພັນບໍ່ສະໜິດແໜ້ນລະຫວ່າງກຳລັງປ້ອງກັນຄວາມສະຫງົບອາເມລິກາ -ລັດເຊຍ ໄດ້ສ້າງກາລະໂອກາດເພື່ອອາຊະຍາກອນກໍ່ການຮ້າຍເພີ່ມທະວີການເຄື່ອນໄຫວ, ຍົກຕົວຢ່າງຄືກໍລະນີ ອ້າຍນ້ອງ Tamerlan ດຳເນີນເຫດວາງລະເບີດກໍ່ການຮ້າຍຢູ່ Boston ຫວ່າງແລ້ວນີ້ເປັນຕົ້ນ. ເພາະສະນັ້ນ, ເຫດການ Boston ແມ່ນກາລະໂອກາດເພື່ອໃຫ້ ອາເມລິກາ-ລັດເຊຍ ຫຍັບມໍ່ເຂົ້າກັນເພືອ່ເພີ່ມທະວີການຮ່ວມມືດ້ານການປ້ອງກັນຄວາມສະຫງົບ. ສິ່ງດັ່ງກ່າວແມ່ນນຳມາເຊິ່ງຜົນປະໂຫຍດໃຫ້ແກ່ທັງ 2 ຝ່າຍ.
ເຖິງວ່າມີຫຼາຍຄຳຄິດຄຳເຫັນຖືວ່າ ການປັນປວນດ້ານນັກສືບສອດແນມຄັ້ງນີ້ ບໍ່ສົ່ງຜົນກະທົບຢ່າງໃຫຍ່ຫຼວງຕໍ່ ການພົວພັນ ອາເມລິກາ-ລັດເຊຍ ກໍຕາມ, ແຕ່ແນ່ນອນວ່າ ມັນເປັນບາດກ້າວຖອຍຫຼັງໃນຄວາມມານະພະຍາຍາມສ້າງຄວາມເຊື່ອໝັ້ນລະຫວ່າງມົດສກູ ແລະ ວໍຊິງຕັນ. ເພື່ອມ້າງຮື້, ແກ້ໄຂສິ່ງກີດຂວາງຕໍ່ການພົວພັນລະຫວ່າງ 2 ປະເທດນັ້ນ, ແມ່ນຈະຕ້ອງໃຊ້ເວລາຫຼາຍເພາະລະຫວ່າງທັງ 2 ຝ່າຍຍັງຄົງບໍ່ລົງລອຍກັນຢ່າງເລິກເຊິ່ງກ່ຽວກັບທັດສະນະ ແລະ ຍັງແກ່ງແຍ້ງ ຢ່າງຮຸນແຮງທາງດ້ານຜົນປະໂຫຍດ .