ກ່ອນນີ້ 69 ປີ, ພັກກອມມູນິດຫວຽດນາມ ແລະ ທ່ານປະທານໂຮ່ຈິມິນໄດ້ປຸກລະດົມທົ່ວປວງຊົນດຳເນີນການລຸກຮື້ຂຶ້ນຂະໜາດໃຫຍ່, ໂຄນລົ້ມລະບອບ ລ່າເມືອງຂຶ້ນ, ສັກດີນາ, ຍາດເອົາອຳນາດການປົກຄອງໃນທົ່ວປະເທດ, ສ້າງຕັ້ງປະເທດສາທາລະນະລັດປະຊາທິປະໄຕຫວຽດນາມ ຊຶ່ງແມ່ນລັດກຳມະກອນຊາວນາລັດທຳອິດຢູ່ອາຊີຕາເວັນອອກສ່ຽງໃຕ້. ໄຊຊະນະນີ້ແມ່ນໜຶ່ງໃນບັນດາຫຼັກໝາຍທີ່ຮຸ່ງເຮືອງເຫຼືອງເຫຼື້ອມທີ່ສຸດໃນປະຫວັດສາດຂອງຊາດຫວຽດນາມ, ເຮັດໃຫ້ຊາຕາກຳຂອງຊາດປ່ຽນແປງໄປ, ໄຂສັງກາດເອກະລາດແຫ່ງຊາດຕິດພັນກັບລັດທິສັງຄົມນິຍົມ. ຜົນສຳເລັດຂອງການປະຕິວັດເດືອນສິງຫາໄດ້ສ້າງເປັນບັນດາບົດຮຽນອັນລ້ຳຄ່າໃນການສ້າງສາ ແລະ ປົກປັກຮັກສາປະເທດຊາດຂອງຊາດຫວຽດນາມໃນ 70 ປີທີ່ຜ່ານມາ.
(ພາບເອກະສານ) |
ໂດຍປະຕິບັດຕາມຄຳສັ່ງການທະຫານເລກ 1 ຂອງຄະນະກຳມະການລຸກຮື້ຂຶ້ນ ຊຶ່ງໄດ້ອອກຄ່ຳຄືນວັນທີ 13/8/1945 ມີເນື້ອໃນດັ່ງນີ້: “ຈຸດເວລາທຳການລຸກຮື້ຂຶ້ນໄດ້ມາຮອດແລ້ວ! ນີ້ແມ່ນກາລະໂອກາດພຽງໜຶ່ງດຽວໃຫ້ແກ່ກອງທັບ ແລະ ປະຊາຊົນຫວຽດນາມເພື່ອລຸກຮື້ຂຶ້ນຍາດເອົາເອກະລາດຂອງປະເທດຊາດ”, ຈາກຮ່າໂນ້ຍຕະຫຼອດຮອດທົ່ວທຸກເຂດບ້ານນາຫວຽດນາມ ຈົ່ງພ້ອມກັນລຸກຂຶ້ນ, ເຕົ້າໂຮມ ແລະ ຈັດຕັ້ງບັນດາກຳລັງລຸກຮື້ຂຶ້ນເພື່ອ ຍາດເອົາອຳນາດການປົກຄອງ. ການລຸກຮື້ຂຶ້ນຂະໜາດໃຫຍ່ຖືກດຳເນີນໃນເວລາອັນສັ້ນໆ, ອັນໄດ້ຍາດເອົາໄຊຊະນະທີ່ຍິ່ງໃຫຍ່ ແລະ ບໍ່ຖືກເສຍສະຫຼະເລືອດເນື້ອຫຍັງຫຼາຍ. ວັນທີ 2/9/1945, ທ່ານປະທານໂຮ່ຈິມິນມີຄວາມເປັນກຽດຖະແຫຼງກັບທົ່ວໂລກກ່ຽວກັບການກຳເນີດຂອງລັດຫວຽດນາມເອກະລາດ, ອິດສະຫຼະພາບ ແລະ ຢືນຢັນວ່າ ທົ່ວທັງຊາດຫວຽດນາມຕັດສິນໃຈອຸທິດສ່ວນຈິດໃຈ ແລະ ກຳລັງ, ຊີວິດອິນຊີ ແລະ ວັດຖຸສິ່ງຂອງຕົນເພື່ອປົກປັກຮັກສາພື້ນຖານອິດສະຫຼະພາບ, ເອກະລາດນັ້ນ.
ຄວາມໝາຍປະຫວັດສາດອັນຍິ່ງໃຫຍ່
ການປະຕິວັດເດືອນສິງຫາແມ່ນໄຊຊະນະທຳອິດໃນຍຸກສະໄໝໃໝ່, ຂະນະທີ່ຊາດໜຶ່ງທີ່ອ່ອນດ້ອຍສາມາດປົດປ່ອຍຕົນເອງໃຫ້ຫຼຸດພົ້ນອອກຈາກແອກຄອບຄອງຂອງພວກລ່າເມືອງຂຶ້ນ. ການປະຕິວັດເດືອນສິງຫາປະສົບຜົນສຳເລັດ, ປະເທດຫວຽດນາມຈາກປະເທດຫົວເມືອງຂຶ້ນໄດ້ເປັນປະເທດເອກະລາດ. ປະຊາຊົນຫວຽດນາມຈາກເປັນຖານະເປັນຂ້າທາດໄດ້ກາຍເປັນປະຊາຊົນທີ່ມີຄວາມເອກະລາດ, ອິດສະຫຼະພາບ, ເປັນເຈົ້າປະເທດຊາດ. ທ່ານພົນເອກ ຫງວຽນກວຽດ ອະດີດລາຂາຄະນະພັກນະຄອນຮ່າໂນ້ຍໃນຄາວນັ້ນ ໃຫ້ຮູ້ວ່າ :
“ ໂລກໄດ້ຕີລາຄາວ່າ ນີ້ ແມ່ນເຫດການປະຫວັດສາດທີ່ສຳຄັນທີ່ສຸດ, ການປະຕິວັດເດືອນສິງຫາແມ່ນເຫດການປ່ຽນຊີວິດໃໝ່ຂອງຊາດຫວຽດນາມ ແມ່ນຕ້ານຈັກກະພັດ, ຕ້ານບັນດາຊົນຊັ້ນກົດຂີ່ຂຸດຮີດ. ນີ້ບໍ່ພຽງແຕ່ມີຄວາມໝາຍຕໍ່ຫວຽດນາມເທົ່ານັ້ນ,ຫາກຍັງມີຄວາມໝາຍຕໍ່ຍຸກສະໄໝອີກດ້ວຍ”
ບົດຮຽນອັນລ້ຳຄ່າຂອງການປະຕິວັດເດືອນສິງຫາ ໄດ້ສ້າງເປັນກຳລັງແຮງໃຫ້ແກ່ປະຊາຊົນຫວຽດນາມສືບຕໍ່ສ້າງບັນດາໜ້າປະຫວັດສາດໃໝ່ທີ່ສະຫງ່າອົງອາດ. ນັ້ນແມ່ນໄຊຊະນະຂອງການຕໍ່ຕ້ານຕ້ານພວກລ່າເມືອງຂຶ້ນຝະລັ່ງ ສິ້ນສຸດໄລຍະ 9 ປີແຫ່ງການຕໍ່ຕ້ານອັນຍືດເຍື້ອຍາວນານດ້ວຍໄຊຊະນະດ້ຽນບຽນຝູທີ່ລື່ຊາຜາກົດ ເຮັດໃຫ້ໂລກສັ່ນສະເທືອນ. ນັ້ນແມ່ນໄຊຊະນະຂອງການຕໍ່ຕ້ານຕ້ານພວກຈັກກະພັດອາເມລິກາທີ່ແກ່ຍາວເປັນເວລາ 21 ປີເພື່ອທ້ອນໂຮມປະເທດຊາດເປັນເອກະພາບ. ນັ້ນແມ່ນໄຊຊະນະອັນຍິ່ງໃຫຍ່ ແລະ ມີຄວາມໝາຍປະຫວັດສາດພາຍຫຼັງເກືອບ 30 ປີແຫ່ງການປ່ຽນແປງໃໝ່ໂດຍພັກກອມມູນິດຫວຽດນາມເປັນຜູ້ລິເລີ່ມ ແລະ ນຳພາ, ອັນໄດ້ນຳປະເທດຊາດນັບມື້ນັບມີທີ່ຕັ້ງບົດບາດບົນເວທີ່ສາກົນ.
ບັນດາບົດຮຽນອັນລ້ຳຄ່າ.
ໄຊຊະນະຂອງ ການປະຕິວັດເດືອນສິງຫາ ກ່ອນອື່ນໝົດແມ່ນຍ້ອນມີພັກປະຕິວັດນຳໜ້າຢ່່າງແທ້ຈິງ, ໄດ້ຮັບເອົາ ແລະ ໝູນໃຊ້ລັດທິມາກ-ເລນິນຢ່າງມີຫົວຄິດປະດິດສ້າງ, ໄດ້ຮັບການເຍື່ອງທາງຈາກແນວຄິດໂຮ່ຈິມິນ; ຍາມໃດກໍກຳແໜ້ນສະພາວະຂອງແຕ່ລະໄລຍະປະຕິວັດ, ວາງອອກແນວທາງການປະຕິວັດອັນຖືກຕ້ອງ, ຮູ້ຈັກວິທີຍາດແຍ່ງກາລະໂອກາດ, ກໍ່ສ້າງ ແລະ ນຳໃຊ້ກຳລັງຢ່າງທັນເວລາ ແລະ ຖືກກັບເປົ້າໝາຍ; ສົມທົບກຳລັງແຮງແຫ່ງຊາດກັບກຳລັງແຮງຍຸກສະໄໝເພື່ອຊັກຈູງມະຫາຊົນກ້າວຂຶ້ນຍາດເອົາ ແລະ ປົກປັກຮັກສາອຳນາດການປົກຄອງ. ການປະຕິວັດເດືອນສິງຫາຍັງແມ່ນໄຊຊະນະຂອງກຳລັງແຮງມະຫາສາມັກຄີທົ່ວປວງຊົນທັງຊາດ, ນ້ຳໃຈຮັກຊາດຢ່າງລົ້ນເຫຼືອ, ເຈດຈຳນົງສ້າງຄວາມເຂັ້ມແຂງດ້ວຍຕົນເອງຂອງທັງຊາດ ໂດຍພາຍໃຕ້ການຊີ້ນຳນຳພາຂອງພັກກອມມູນິດຫວຽດນາມ ແລະ ທ່ານປະທານໂຮ່ຈິມິນ. ທ່ານສາດສະດາຈານ ດຣ ໂງດັງຈີ ເນັ້ນໜັກວ່າ :
“ຮ່າໂນ້ຍດຳເນີນ ການລຸກຮື້ຂຶ້ນຢ່າງມີໄຊ, ອັນໄດ້ສ້າງເປັນກຳລັງແຜ່ຂະຫຍາຍ ທີ່ສະດວກໃຫ້ແກ່ບັນດາທ້ອງຖິ່ນໃນທົ່ວປະເທດ. ຂ້າພະເຈົ້າຍັງຈືດີຄຳເວົ້າຂອງສາດສະດາຈານ ເຈີນວັນເຢົາ, ເລຂາຄະນະພັກເຂດພາກໃຕ້ທີ່ວ່າ : ເຖິງວ່າພວກຂ້າພະເຈົາຍັງບໍ່ທັນໄດ້ຮັບຄຳສັ່ງໂດຍກົງກໍຕາມ, ແຕ່ເມື່ອໄດ້ຍິນຂ່າວ ຮ່າໂນ້ຍທຳ ການລຸກຮື້ຂຶ້ນຂະໜາດໃຫຍ່ຢ່າງມີໄຊ, ຍາດເອົາອຳນາດການປົກຄອງນັ້ນ, ຄະນະພັກເຂດພາກໃຕ້ໃນທັນທີ່ກໍໄດ້ ລຸກຮື້ຂຶ້ນທຳການການລຸກຮື້ຂຶ້ນຂະໜາດໃຫຍ່ເພື່ອ ຍາດເອົາອຳນາດການປົກຄອງຢູ່ໄຊງ່ອນ”
ໂດຍໝູນໃຊ້ບົດຮຽນຈາກ ການປະຕິວັດເດືອນສິງຫາກ່ຽວກັບການເສີມຂະຫຍາຍກຳລັງແຮງສັງລວມຂອງທັງຊາດ, ສົມທົບກັບກຳລັງແຮງຂອງຍຸກສະໄໝນັ້ນ, ຫວຽດນາມໄດ້ເປັນເຈົ້າການກວ່າໃນການຜັນຂະຫຍາຍປະຕິບັດແນວທາງການຕ່າງປະເທດເປີດກ້ວາງ, ເອກະລາດ, ເປັນເຈົ້າຕົນເອງ , ຜ່ານຜ່າທຸກຄວາມຫຍຸ້ງຍາກ, ສິ່ງທ້າທາຍ, ປະຕິບັດ 2 ໜ້າທີ່ຍຸດທະສາດ ນັ້ນແມ່ນກໍ່ສ້າງ ແລະ ປັກປັກຮັກສາປະເທດຊາດ; ຍູ້ແຮງພາລະກິດຫັນປະເທດຊາດເປັນອຸດສາຫະກຳ ແລະ ທັນສະໄໝ, ຮັບປະກັນໃຫ້ແກ່ກິດຈະການປ່ຽນແປງໃໝ່ສືບຕໍ່ຍາດເອົາບັນດາໄຊຊະນະໃໝ່ .