(vovworld)- ການປະຕິວັດເດືອນສິງຫາ (19/8/1945) ແມ່ນເຫດການສຳຄັນຍິ່ງໃນປະຫວັດສາດການແຫ່ງການຕໍ່ສູ້ ສ້າງສາ ແລະ ປົກປັກຮັກສາປະເທດຊາດທີ່ຍິ່ງໃຫຍ່ຂອງຊາດຫວຽດນາມ. ໂດຍໄດ້ດຳເນີນໄປ ແລະ ຍາດໄດ້ໄຊຊະນະໃນໄລຍະສັ້ນ, ການປະຕິວັດເດືອນສິງຫາປີ 1945 ໄດ້ເປັນບົດຮຽນອັນລ້ຳຄ່າຫລາຍຢ່າງ, ໃນນັ້ນ ມີບົດຮຽນກ່ຽວກັບການເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ. ບົດຮຽນນີ້ ສືບຕໍ່ໄດ້ໝູນໃຊ້ໃນການຕໍ່ຕ້ານຕ້ານລ່າເມືອງຂຶ້ນຝລັ່ງ ແລະ ຈັກກະພັດ ອາເມລິກາ, ສ້າງສາປະເທດຊາດໃນໄລຍະປ່ຽນແປງໃຫມ່ ແລະ ເຊື່ອມໂຍງ.
ທ່ານປະທານໂຮ່ຈິມີນ
ພາບເອກະສານ
|
ໃນຊຸມມື້ນີ້, ປະຊາຊົນຢູ່ທຸກແຖບຖິ່ນຂອງປະເທດ ຫວຽດນາມ ພວມເຈືອຈານເຂົ້າກັບບັນດາຍາກາດສະເຫລີມສະຫລອງວັນປະຕິວັດເດືອນສິງຫາ ກ່ອນນີ້ 70 ປີ. ຜູ້ໃດກໍມີຄວາມເອກອ້າງທະນົງໃຈກ່ຽວກັບໄຊຊະນະອັນຍິ່ງໃຫຍ່ຂອງການປະຕິວັດຄັ້ງທຳອິດໃນປະຫວັດສາດຂອງຊາດ.
ມະຫາສາມັກຄີເພື່ອຍາດໄຊຊະນະ
ທ່ານ ຫວູແອງ, ອາຍຸກວ່າ 90 ປີແລ້ວ, ອະດີດກຳມະການກົມການເມືອງ, ອະດີດເລຂາຄະນະພັກສູນກາງ ຊຸດທີ 6, ອະດີດຫົວຫນ້າຄະນະຜູ້ແທນນັກປະຕິວັດ ຮ່າໂນ້ຍ ໄປເຂົ້າຮ່ວມ “ກອງປະຊຸມໃຫຍ່ຜູ້ແທນປະຊາຊົນທົ່ວປະເທດ” ຢູ່ ເຕີນຈ່າວ ຕີລາຄາສູງໝາກຜົນຂອງການປະຕິວັດເດືອນສິງຫາປີ 1945. ດ້ວຍສະມາຊິກພັກພຽງ 5000 ຄົນ, ແຕ່ຜ່ານແນວໂຮມຫວຽດມີງ, ພັກກອມມູນິດຫວຽດນາມ ໄດ້ເຕົ້າໂຮມປະຊາຊົນກວ່າ 20 ລ້ານຄົນ ເຂົ້າຮ່ວມການປະຕິວັດທີ່ບໍ່ເຄີຍມີມາກອ່ນໃນປະຫວັດສາດ. ຮູບພາບມະຫາສາມັກຄີທົ່ວປວງຊົນທັງຊາດແມ່ນສະແດງອອກຢ່າງຈະແຈ້ງໃນກອງປະຊຸມໃຫຍ່ຜູ້ແທນປະຊາຊົນທົ່ວປະເທດ ໂດຍປະທານໂຮ່ຈິມີນ ເປັນປະທານ, ພຽງ 2 ມື້ກ່ອນທີ່ດຳເນີນການລຸກຮຶ້ຂຶ້ນທົ່ວປະເທດເດືອນສິງຫາ. ຢູ່ທີ່ນີ້ ຜູ້ແທນບັນດາພັກການເມືອງ, ອົງການຈັດຕັ້ງມະຫາຊົນ, ບັນດາເຜົ່າ, ສາສະຫນາ, ມີຜູ້ແທນສາມພາກ: ພາກເຫນືອ, ພາກກາງ ແລະ ພາກໃຕ້ ແລະ ຜູ້ແທນຂອງຊາວຫວຽດນາມ ອາໄສຢູ່ຕ່າງປະເທດ. ກອງປະຊຸມໃຫຍ່ຜູ້ແທນປະຊາຊົນທົ່ວປະເທດ ໄດ້ຊົມເຊີຍແຜນນະໂຍບາຍການລຸກຮຶ້ຂຶ້ນທົ່ວປະເທດຂອງພັກ ແລະ ແຕ່ງຕັ້ງ ຄະນະກຳມະການປົດປ່ອຍຊາດຫວຽດນາມ, ລັດຖະບານຊົ່ວຄາວຂອງສາທາລະນະລັດ ປະຊາທິປະໄຕຫວຽດນາມ ໂດຍ ປະທານໂຮ່ຈິມີນ ເປັນປະທານ. ທ່ານ ຫວູແອງ ເນັ້ນຫນັກວ່າ:
“ກອງປະຊຸມຜູ້ແທນປະຊາຊົນທົ່ວປະເທດຢູ່ ເຕີນຈ່າວ ແມ່ນກອງປະຊຸມແຫ່ງຄວາມສາມັກຄີ, ມະຫາສາມັກຄີ ທົ່ວປວງຊົນທັງຊາດ. ນອກຈາກ ຮ່າໂນ້ຍ ແລ້ວ, ທ້ອງຖິ່ນໃດກໍມີຂະບວນການສົ່ງຜູ້ແທນເຂົ້າຮ່ວມ, ໃນນັ້ນ ທັງຊາວຫວຽດນາມ ອາໄສຢູ່ຕ່າງປະເທດ. ທ່ານປະທານໂຮ່ຈິມີນ ໄດ້ເຕົ້າໂຮມຜູ້ແທນ, ຍົກບັນຫາມະຫາສາມັກຄີເພື່ອຍາດໄຊຊະນະ.”
ໄຊຊະນະຂອງການປະຕິວັດເດືອນສິງຫາປີ 1945 ເປັນຂີດໝາຍບາດລ້ຽວປະຫວັດສາດ ແມ່ນໄຊຊະນະອັນຍິ່ງໃຫຍ່ຂອງພາລະກິດປົດປ່ອຍຊາດ, ປົດປ່ອຍມະນຸດ ພາຍໃຕ້ການຊີ້ນຳນຳພາຂອງພກ ແລະ ປະທານໂຮ່ຈິມີນ. ໄຊຊະນະນີ້ໄດ້ສະແດງໃຫ້ເຫັນສິລະປະການຊີ້ນຳນຳພາທີ່ປີຊາສາມາດຂອງພັກ ແລະ ປະທານໂຮ່ຈິມີນ. ພິເສດແມ່ນ ພັກກອມມູນິດຫວຽດນາມ ໄດ້ກໍ່ສ້າງ ແລະ ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ. ນັ້ນແມ່ນ ກຸ່ມກ້ອນມະຫາສາມັກຄີທົ່ວປວງຊົນ, ຫລັກແຫລ່ງແກ່ນສານແມ່ນພັນທະມິດກຳມະກອນ - ຊາວນາ- ປັນຍາຊົນ, ບົນພື້ນຖານຜົນປະໂຫຍດ, ຄວາມຕ້ອງການ, ຄວາມມຸ້ງມາດປາດຖະຫນາຂອງປະຊາຊົນ ເພື່ອຈັດຕັ້ງ, ເຕົ້າໂຮມເຂົາເຈົ້າລຸກຂຶ້ນຕໍ່ສູ້ “ໃຊ້ກຳລັງແຮງຂອງພວກເຮົາເພື່ອປົດປ່ອຍໃຫ້ພວກເຮົາ”. ສະນັ້ນ ການປະຕິວັດເດືອນສິງຫາ ໄດ້ສ້າງຂະບວນການປະຕິວັດຢ່າງກ້ວາງຂວາງ, ເຂັ້ມແຂງທີ່ບໍ່ເຄີຍມີມາກ່ອນ ດ້ວຍກຳລັງເຂົ້າຮ່ວມເປັນຈຳນວນຫລວງຫລາຍ, ບໍ່ຈຳແນກຊົນເຜົ່າ, ສາສະຫນາ, ຊົນຊັ້ນໃນທົ່ວປະເທດ. ການລຸກຮຶ້ຂຶ້ນທົ່ວປະເທດ ແມ່ນແບບຢ່າງໃຫ້ກຳລັງແຮງຂອງຊາດ ແລະ ກຸ່ມກ້ອນມະຫາສາມັກຄີທົ່ວປວງຊົນທັງຊາດ. ຮອງສາດສະດາຈານ, ນາຍຄູປະຊາຊົນ ເລເມົ້າຫານ ຖືວ່າ:
“ພາຍຫລັງຍີ່ປຸ່ນລັດຖະປະຫານ ຝລັ່ງ, ຂະບວນການປະຕິວັດແມ່ນພັດທະນາຢ່າງແຮງ. ປະທານໂຮ່ຈິມີນ ໄດ້ຕິດຕາມກວດກາ ການຂົນຂວາຍສາມັກຄີທົ່ວປວງຊົນທັງຊາດ ຢ່າງໃກ້ຊິດ. ໃນວິວັດການຂົນຂວາຍພາຍໃຕ້ຄັນທຸງຂອງແນວໂຮມ ຫວຽດມີງ, ຂອງພັກກອມມູນິດ ຈາກນັ້ນ ຕັ້ງບັນຫາການປະຕິວັດຕ້ອງປຸກລະດົມໃນທົ່ວປວງຊົນ, ເຊີດຊຸຄັນທຸງຊາດ, ລະດົມກຳລັງແຮງທົ່ວປວງຊົນເພື່ອເຂົ້າຮ່ວມການເຄື່ອນໄຫວກູ້ຊາດຂອງຫວຽດມີງ.”
ສາມັກຄີເພື່ອສ້າງສາ ແລະ ປົກປັກຮັກສາປະເທດຊາດ
ທ່ານຟ້າມເທຢວຽດ, ອະດີດປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຖືວ່າ: ພາຍໃຕ້ການຊີ້ນຳນຳພາຂອງພັກ ແລະ ປະທານໂຮ່ຈິມີນ, ທົ່ວປວງຊົນທັງຊາດ ນັບທັງປະຊາຊົນທຸກຊັ້ນວັນນະ, ຊົນຊັ້ນໄດ້ສາມັກຄີກັນ ສ້າງກຳລັງແຮງສັງລວມຍາດເອົາໄຊຊະນະຈາກການປະຕິວັດເດືອນສິງຫາປີ 1945, ການຕໍ່ຕ້ານຕ້ານລ່າເມືອງຂຶ້ນຝລັ່ງ ແລະ ຈັກກະພັດອາເມລິກາ. ໃນກິດຈະການສ້າງສາສັງຄົມນິຍົມ, ຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ ແລະ ເຊື່ອມໂຍງເຂົ້າກັບສາກົນປະຈຸບັນ, ຫວຽດນາມ ທັງມີກາລະໂອກາດ, ຄວາມສະດວກ, ຄວາມຫຍຸ້ງຍາກ, ສິ່ງທ້າທາຍ. ໃນນັ້ນ ເປັນຫນ້າສົນໃຈ ແມ່ນບັນດາກຳລັງທີ່ເປັນປໍລະປັກໄດ້ຕ້ານທຳລາຍຢ່າງຂ້ຽວຂາດດ້ວຍຍຸດທະສາດ ການຜັນແປໂດຍສັນຕິ, ສວຍໃຊ້ບັນດາບັນຫາສິດທິມະນຸດ, ຊົນເຜົ່າ, ສາສະຫນາ ເພື່ອແບ່ງແຍກກຸ່ມກ້ອນມະຫາສາມັກຄີທົ່ວປວງຊົນທັງຊາດ. ສິ່ງດັ່ງກ່າວໄດ້ຮຽກຮ້ອງການກໍ່ສ້າງກຸ່ມກ້ອນມະຫາສາມັກຄີແມ່ນເສີມຂະຫຍາຍກຳລັງແຮງທົ່ວປວງຊົນທັງຊາດເພື່ອປົກປັກຮັກສາປະເທດຊາດ. ທ່ານ ຟ້າມເທຢວຽດ ຢືນຢັນວ່າ: ພັກ ແລະ ລັດ ຫວຽດນາມ ຄວນສືບຕໍ່ເຊີດຊູຍຸດທະສາດມະຫາສາມັກຄີທົ່ວປວງຊົນທັງຊາດ.
“ຂ້າພະເຈົ້າຄິດວ່າ ຖ້າເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດ ພັກຕ້ອງສາມັກຄີ, ການນຳສູນກາງຕ້ອງສາມັກຄີ, ຕ້ອງເປັນແບບຢ່າງໃຫ້ຂັ້ນລຸ່ມ. ປະຊາຊົນຮຽກຮ້ອງພັກກອມມູນິດຫວຽດນາມ ຕ້ອງປະຕິບັດໃຫ້ໄດ້ແນວທາງ, ມະຕິທີ່ໄດ້ວາງອອກ, ປະຕິບັດສິ່ງດັ່ງກ່າວໃຫ້ດີພວກເຮົາສືບຕໍ່ເສີມຂະຫຍາຍກຳລັງແຮງມະຫາສາມັກຄີເພື່ອປະຕິບັດພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ ແລະ ຍາດແຍ່ງການຮ່ວມມືຈາກບັນດາປະເທດໃນໂລກ.”
70 ປີຜ່ານມາ, ຍາມໃດ ການປະຕິວັດເດືອນສິງຫາ ກໍໄປຄຽງຄູ່ກັບປະຫວັດສາດແຫ່ງການສ້າງສາ ແລະ ປົກປັກຮັກສາປະເທດຊາດຫວຽດນາມ. ໄຊຊະນະຂອງການປະຕິວັດເດືອນສິງຫາ, ໄຊຊະນະຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ມີຄວາມໝາຍເລິກເຊິ່ງກ່ຽວກັບທິດສະດີ ແລະ ພຶດຕິກຳຕົວຈິງ ສຳລັບບັນດາໄລຍະແຫ່ງາກນພັດທະນາຕໍ່ໄປຂອງການປະຕິວັດຫວຽດນາມ.