ການພິພາດອະທິປະໄຕຢູ່ໝູ່ເກາະ Senkaku ລະຫວ່າງຍີ່ປຸ່ນ - ຈີນ
Huyen -
(vovworld) - ພາຍຫຼັງຄຳຖະແຫຼງທີ່ຂັນແຂງຫວ່າງແລ້ວນີ້ສຳຫຼັບອະທິປະໄຕໝູ່ເກາະ Senkaku, ມື້ນີ້ລັດຖະບານຍີ່ປຸ່ນໄດ້ຮັບຮອງເອົາເລື່ອງໂອນເກາະ 3 ແຫ່ງທີ່ຂຶ້ນກັບໝູ່ເກາະນີ້ເປັນຂອງລັດ. ການກະທຳດັ່ງກ່າວຂອງ ໂຕກຽວ ໄດ້ເຮັດໃຫ້ຫາງສຽງວິຕົກກັງວົນຕໍ່ການພົວພັນທີ່ນັບມື້ນັບເຄັ່ງຕຶງລະຫວ່າງສອງປະເທດບ້ານໃກ້ເຮືອນຄຽງຢູ່ເຂດອາຊີຕາເວັນອອກສຽງເໜືອນີ້.
ຫົວໜ້າຫ້ອງວ່າການລັດຖະບານຍີ່ປຸ່ນ Osamu Fujimura
(ພາບຈາກອີນເຕີແນດ)
ຂ່າວທີ່ວ່າ ລັດຖະບານຍີ່ປຸ່ນໄດ້ຮັບຮອງເອົາເລື່ອງໂອນເກາະ 3 ແຫ່ງທີ່ຂຶ້ນກັບໝູ່ເກາະ Senkaku ເປັນຂອງລັດນັ້ນ ຖືກຍົກອອກມາຢ່າງເປັນທາງການໃນວັນທີ 10/9, ພາຍຫຼັງກອງປະຊຸມຂອງບັນດາລັດຖະມົນຕີ ຍີ່ປຸ່ນ. ຫົວໜ້າຫ້ອງວ່າການລັດຖະບານຍີ່ປຸ່ນ Osamu Fujimura ໃຫ້ຮູ້ວ່າ ລັດຖະບານປະເທດນີ້ຈະຊື້ເກາະໃຫຍ່ 5 ແຫ່ງທີ່ຂຶ້ນກັບໝູ່ເກາະ Senkaku ຈາກເຈົ້າກຳມະສິດເອກະຊົນຂອງປະເທດນີ້ ດ້ວຍລາຄາເກືອບ 26 ລ້ານ USD ແລະ ສັນຍາຊື້ຂາຍສະບັບນີ້ຈະໄດ້ຮັບການປະຕິບັດໂດຍໄວ.
ເຖິງວ່າ, ຕາມການອະທິບາຍຈາກຝ່າຍຍີ່ປຸ່ນແລ້ວ, ແຜນການໂອນເກາະ ເຫຼົ່ານັ້ນເປັນຂອງລັດ ແມ່ນເພື່ອແນໃສ່ ”ຮັກສາສະຖຽນລະພາບ ແລະ ຄວາມສະຫງົບ”, ເຮັດໃຫ້ຄວາມເຄັ່ງຕຶງລະຫວ່າງສອງປະເທດຜ່ອນຄາຍລົງ. ແຕ່ຄວາມຈິງແລ້ວຂໍ້ຕົກລົງນີ້ໄດ້ກໍ່ຄວາມຄຽດແຄ້ນໃຫ້ແກ່ປັກກິງ. ວັນທີ 10/9, ທ່ານນາຍົກລັດຖະມົນຕີຈີນ ເວີນເຈຍປາວໄດ້ຖະແຫຼງວ່າ ປັກກິງຈະ ”ບໍ່ຍອມຖອຍຫຼັງ” ໃນການພິພາດອະທິປະໄຕຢູ່ໝູ່ເກາະ Senkaku ກັບຍີ່ປຸ່ນ. ກະຊວງການຕ່າງປະເທດຈີນກໍ່ໃຫ້ຮູ້ວ່າ ຈີນໄດ້ຮຽກຕົວເອກອັກຄະລັດຖະທູດຍີ່ປຸ່ນເຂົ້າພົບເພື່ອ ”ຄັດຄ້ານຢ່າງແຮງ” ຕໍ່ການກະທຳຂອງໂຕກຽວ ໃນການໂອນເກາະເຫຼົ່ານັ້ນເປັນຂອງລັດ. ກ່ອນໜ້ານັ້ນ, ທີ່ການພົບປະກັບທ່ານນາຍົກລັດຖະມົນຕີຍີ່ປຸ່ນ Yoshihiko Noda ຢູ່ນອກກອງປະຊຸມສຸດຍອດ APEC ທີ່ Vladivostok , ສະຫະພັນລັດເຊຍ, ທ່ານປະທານປະເທດຈີນ ຫູຈີນເທົາ ກໍ່ໄດ້ຕື້ອງຄືນທັດສະນະຂອງອຳນາດການປົກຄອງປັກກິງ ແມ່ນຄັດຄ້ານເລື່ອງຍີ່ປຸ່ນຊື້ໝູ່ເກາະດັ່ງກ່າວ ແລະ ໃຫ້ຮູ້ວ່າຈີນຈະນຳໃຊ້ບັນດາມາດຕະການອັນຈຳເປັນເພື່ອແນໃສ່ຖອນອະທິປະໄຕຜືນແຜນດິນຄືນ.
Senkaku ແມ່ນໝູ່ເກາະບໍ່ມີຄົນຢູ່, ປະຈຸບັນຍີ່ປຸ່ນພວມຄວບຄຸມຢູ່ທະເລ ຮົວຕຸງ ມີທີ່ຕັ້ງຍຸດທະສາດທາງດ້ານຄົມທະນາຄົມເດີນທະເລ ເຊິ່ງນອນຢູ່ລະຫວ່າງກາງໄຫຼ່ທະວີບຈີນ ກັບແຂວງ Okinawa ຂອງຍີ່ປຸ່ນ. Senkaku ຍັງນອນໃນເຂດທີ່ມີຄວາມສາມາດບົ່ມຊ້ອນດ້ານນ້ຳມັນເຊື້ອໄຟ, ແມ່ນເຂດຫາປາທີ່ອຸດົມສົມບຸນ. ຍ້ອນເຫດນັ້ນ, ທັງປັກກິງ ແລະ ໂຕກຽວລ້ວນແຕ່ຖະແຫຼງປະກາດອະທິປະໄຕຢູ່ໝູ່ເກາະແຫ່ງນີ້. ການພິພາດນີ້ ແມ່ນສາຍເຫດຕົ້ນຕໍທີ່ເຮັດໃຫ້ສາຍພົວພັນລະຫວ່າງສອງປະເທດບ້ານໃກ້ເຮືອນຄຽງນີ້ມີຄວາມເຄັ່ງຕຶງໃນຫຼາຍທົດສະວັດທີ່ຜ່ານມາ. ວິກິດການໃໝ່ຫຼ້າສຸດໃນການພົວພັນລະຫວ່າງສອງປະເທດນັ້ນແມ່ນເຫດການເມື່ອວັນທີ 15/8, ໃນຂະນະທີ່ບັນດານັກເຄື່ອນໄຫວຈີນໜ່ວຍໜຶ່ງບຸກເຂົ້າ ແລະ ປັກທຸງຊາດຂອງຈີນຢູ່ ໝູ່ເກາະ Senkaku ດ້ວຍຈຸດປະສົງ ”ຢັ້ງຢືນອະທິປະໄຕຂອງຈີນ” ສຳຫຼັບເຂດດິນແດນນີ້. ຝ່າຍຍີ່ປຸ່ນໄດ້ມີການກະທຳໂຕ້ຕອບໃນທັນທີ ດ້ວຍເລື່ອງເຈຕະນາ ຕຳ ແລະ ຍິງໃສ່ກຳ່ປັ່ນຂອງຈີນລຳນັ້ນ . ຍີ່ປຸ່ນຍັງດຳເນີນການຈັບຕົວນັກເຄື່ອນໄຫວຈີນ 14 ຄົນ ແລະ ຫຼັງຈາກນັ້ນ, ຍີ່ປຸ່ນກໍ່ມີການກະທຳໂຕ້ຕອບດ້ວຍເລື່ອງຍົກພົນ ແລະ ປັກທຸງຊາດຂຶ້ນເກາະ Senkaku ກໍ່ຄືດຳເນີນການຊ້ອມຮົບຮ່ວມກັບອາເມລິກາ. ການກະທຳຂອງຍີ່ປຸ່ນໄດ້ປະສົບກັບການຄັດຄ້ານຢ່າງແຮງຈາກຈີນ. ໃນຂະນະທີ່ລັດຖະບານຈີນພວມຕຳນິຕິຕຽນຍີ່ປຸ່ນນັ້ນ, ປະຊາຊົນຈີນກໍ່ໄດ້ລົງຖະໜົນແຫ່ຂະບວນ, ທຳລາຍບັດດາລົດໃຫຍ່ ແລະ ພັດຕະຄານຂອງຢີ່ປຸ່ນ. ນາຍພົນທະຫານຂອງຈີນຍັງຮຽກຮ້ອງໃຫ້ປະເທດນີ້ຈັດສົ່ງກຳປັ່ນນັບຮ້ອຍລຳໄປປົກປັກຮັກສາໝູ່ເກາະ Senkaku . ທ້າຍເດືອນ 8, ລົດຂອງທ່ານເອກອັກຄະລັດຖະທູດຍີ່ປຸ່ນປະຈຳຈີນກໍ່ຖືກພວກຫົວຮຸນແຮງບຸກໂຈມຕີຢູ່ນະຄອນຫຼວງປັກກິງ.
( ລັດຖະບານປະເທດນີ້ຈະຊື້ເກາະໃຫຍ່
5 ແຫ່ງທີ່ຂຶ້ນກັບໝູ່ເກາະ Senkaku )
ຕໍ່ໜ້າຄຳຖະແຫຼງ ແລະ ການຂົ່ມຂູ່ທີ່ແຂງກະດ້າງຈາກຝ່າຍປັກກິງ. ໂຕກຽວກໍ່ບໍ່ຜ່ອນສັ້ນຜ່ອນຍາວຕໍ່ບັນຫາອະທິປະໄຕສຳຫຼັບໝູ່ເກາະແຫ່ງນີ້. ດ້ວຍເລື່ອງດຳເນີນການໂອນເອົາບັນດາເກາະຢູ່ໝູ່ເກາະ Senkaku ເປັນຂອງລັດນັ້ນ, ໂຕກຽວໄດ້ສົ່ງສານຢ່າງຈະແຈ້ງວ່າ ” Senkaku ແມ່ນດິນແດນພາກສ່ວນໜຶ່ງຂອງຍີ່ປຸ່ນ” ວົງການນັກວິເຄາະຖືວ່າ ຍີ່ປຸ່ນມີຄຳຖະ
ແຫຼງຢ່າງຂັນແຂງຄືດັ່ງກ່າວແມ່ນຍ້ອນປະເທດນີ້ພວມມີທ່າສະດວກໃນການຕັດສິນອະທິປະໄຕຂອງໝູ່ເກາະແຫ່ງນີ້. ຖ້າຫາກການໂອນເອົາບັນດາເກາະດັ່ງກ່າວເປັນຂອງລັດສຳເລັດຜົນ, ຈີນຈະຕ້ອງຮັບຮູ້ການຂີດຂັ້ນໄຫຼ່ທະວີບຢູ່ທະເລຮົວຕຸງຕາມເງື່ອນໄຂຂອງອຳນາດການປົກຄອງໂຕກຽວ. ຊ້ຳບໍ່ໜຳ, ບັນຫາຍິ່ງມີຄວາມສັບສົນກວ່າສຳຫຼັບປັກກິງ ເມື່ອກອງກຳລັງທະຫານປະສົມອາເມລິກາ - ຍີ່ປຸ່ນເພີ່ມທະວີການມີໜ້າຢູ່ຝັ່ງຕາເວັນຕົກຂອງເຂດດັ່ງກ່າວ, ອັນເປັນການຂົ່ມຂູ່ໂດຍກົງເຖິງຄວາມສະຫງົບປອດໄພຂອງຈີນ.
ດ້ວຍການຜັນແປຄືດັ່ງກ່າວ, ພາກພື້ນອາຊີຕາເວັນອອກສຽງເໜືອ ພວມດຶງດູດຄວາມສົນໃຈຈາກປະຊາຄົມໂລກ. ບໍ່ມີໃຜຢາກໃຫ້ສະພາບການໃນພາກພື້ນມີຄວາມເຄັ່ງຕຶງຂຶ້ນຕື່ມ, ໃນຂະນະທີ່ໂລກພວມຜ່ານການຜັນແປຫຼາຍຢ່າງ, ການປະທະກັນຢູ່ຫຼາຍແຫ່ງຍັງບໍ່ທັນສິ້ນສຸດລົງ. ເຖິງຢ່າງໃດກໍ່ຕາມ, ສະພາບການຜັນແປເຫລົ່ານັ້ນບໍ່ນຳມາເຊິ່ງຄວາມປະເອີບໃຈໃດໆໃຫ້ແກ່ບັນດານັກສັງເກດການ.
Huyen