(vovworld) - ການພົວພັນລະຫວ່າງ 3 ປະເທດ ອາຊີຕາເວັນອອກສ່ຽງເໜືອ ນັ້ນແມ່ນ ຈີນ, ສ. ເກົາຫຼີ ແລະ ຍີ່ປຸ່ນ ມີຄວາມສັບສົນຄືນໃໝ່ ເມື່ອຫວ່າງແລ້ວນີ້, ສະມາຊິກສະພາແຫ່ງຊາດ ຍີ່ປຸ່ນ ປະມານ 85 ທ່ານໄດ້ໄປໄວ້ອາໄລຢູ່ວິຫານ Yasukuni ເນື່ອງໃນໂອກາດງານບຸນລະດູໃບໄມ້ຫຼົ່ນທີ່ເປັນມູນເຊື້ອຂອງປະເທດນີ້. ກໍ່ຄືກັບການໄວ້ອາໄລຄັ້ງກ່ອນນັ້ນ, ການໄປໄວ້ອາໄລໃນຄັ້ງນີ້ຂອງບັນດານັກການເມືອງ ຍີ່ປຸ່ນ ໄດ້ກໍ່ຄວາມບໍ່ພໍໃຈອັນໃຫຍ່ຫຼວງໃຫ້ແກ່ 2 ປະເທດບ້ານໃກ້ເຮືອນຄຽງ ຈີນ ແລະ ສ. ເກົາຫຼີ. ບົດຂຽນ “ການພົວພັນ ຈີນ - ຍີ່ປຸ່ນ - ສ. ເກົາຫຼີ: ຍັງຄົງເປັນທ່າອ່ຽງການຮ່ວມມືທີ່ສຳຄັນ” ຂອງບັນນາທິການແອ໋ງຮ່ວຽນ.
ການຢ້ຽມຢາມວິຫານຂອງບັນດາສະມາຊິກສະພາແຫ່ງຊາດ, ທີ່ຂຶ້ນກັບພັກການເມືອງຕ່າງໆຂອງ ຍີ່ປຸ່ນ, ຖືກດຳເນີນພາຍຫຼັງທ່ານນາຍົກລັດຖະມົນຕີ ຍີ່ປຸ່ນ Shinzo Abe ຝາກເຄື່ອງຂອງບູຊາເຖິງວິຫານ Yassukuni ພຽງ 1 ວັນ, ໄດ້ກໍ່ໃຫ້ເກີດປະຕິກິລິຍາຢ່າງແຮງຈາກ ສ. ເກົາຫຼີ ແລະ ຈີນ.
ລັດຖະມົນຕີການຕ່າງປະເທດ 3 ປະເທດ ຈີນ, ຍີ່ປຸ່ນ ແລະ ສ. ເກົາຫຼີ
(ພາບ: AFP/TTXVN)
|
ຄວາມບໍ່ລົງລອຍກັນມີລັກສະນະປະຫວັດສາດ
ໜຶ່ງໃນບັນດາປະຕິກິລິຍາຢ່າງແຮງພາຍຫຼັງເຫດການດັ່ງກ່າວ, ນັ້ນແມ່ນໂຄສົກກະຊວງການຕ່າງປະເທດ ຈີນ ໄດ້ຊີ້ແຈ້ງວ່າ: ປັກກິ່ງຄັດຄ້ານເລື່ອງຖະຫວາຍເຄື່ອງຂອງບູຊາ ແລະ ຮຽກຮ້ອງໃຫ້ ໂຕກຽວ ຕ້ອງນຶກຄິດກ່ຽວກັບອະດິດຕະການທີ່ຂະມຶງຂະມັງ ແລະ ຍົກອອກບັນດາມາດຕະການລະອຽດເພື່ອສ້າງຄວາມໄວ້ເນື້ອເຊື່ອໃຈຂອງບັນດາປະເທດບ້ານໃກ້ເຮືອນຄຽງ ອາຊີ ແລະ ປະຊາຄົມໂລກຄືນໃໝ່. ສ່ວນ ສ. ເກົາຫຼີ ໄດ້ສະແດງ “ຄວາມວິຕົກວັງວົນຢ່າງເລິກເຊິ່ງ ແລະ ຄວາມເສຍຫວັງ” ຕໍ່ການກະທຳດັ່ງກ່າວຂອງກຸ່ມສະມາຊິກສະພາແຫ່ງຊາດ ຍີ່ປຸ່ນ. ໃນຖະແຫຼງການໃນວັນດຽວກັນ, ລັດຖະມົນຕີການຕ່າງປະເທດ ສ. ເກົາຫຼີ ໄດ້ຊີ້ແຈ້ງວ່າ: ລັດຖະບານ ສ. ເກົາຫຼີ ຮຽກຮ້ອງໃຫ້ບັນດານັກການເມືອງ ຍີ່ປຸ່ນ ຮັບຮູ້ຢ່າງຖືກຕ້ອງກ່ຽວກັບບັນຫາປະຫວັດສາດ ແລະ ສະແດງຄວາມກິນແໜງ, ມີຄວາມນຶກຄິດຢ່າງເຂັ້ມງວດກ່ຽວກັບປະຫວັດສາດ, ອະດິດຕະການດ້ວຍບັນດາການກະທຳຕົວຈິງເພື່ອສ້າງຄວາມໄວ້ເນື້ອເຊື່ອໃຈຕໍ່ບັນດາປະເທດບ້ານໃກ້ເຮືອນຄຽງ ກໍ່ຄືປະຊາຄົມສາກົນຄືນໃໝ່ ແລະ ມຸ່ງໄປເຖິງອະນາຄົດ.
ວິຫານ Yassukuni ໄດ້ບູຊານັກຮົບ ຍີ່ປຸ່ນ 2,5 ລ້ານຄົນທີ່ໄດ້ເສຍສະຫຼະຊີວິດເພື່ອປະເທດຊາດແຕ່ກາງສະຕະວັດທີ 19. ແຕ່ປີ 1978, ຊື່ຂອງ 14 ຄົນທີ່ຮັບຖືວ່າແມ່ນນັກໂທດສົງຄາມ (ຫຼືຍັງເອີ້ນວ່ານັກໂທດສົງຄາມລະດັບ A), ທີ່ຖືກພັນທະມິດຕັດສິນລົງໂທດພາຍຫຼັງສົງຄາມໂລກຄັ້ງທີ 2, ກໍ່ໄດ້ນຳເຂົ້າບູຊາຢູ່ວິຫານແຫ່ງນີ້. ນັບແຕ່ນັ້ນເປັນຕົ້ນມາ, ການຖົກຖຽງກັນທາງການທູດໄດ້ເກີດຂຶ້ນເປັນປະຈຳຍ້ອນບັນດາປະເທດບ້ານໃກ້ເຮືອນຄຽງແມ່ນ ສ. ເກົາຫຼີ ແລະ ຈີນ ຖືການກະທຳນີ້ຂອງຍີ່ປຸ່ນ ແມ່ນການອາໄລຫາບັນດານັກໂທດສົງຄາມ. ຈີນ ແລະ ສ. ເກົາຫຼີ ຍາມໃດກໍ່ຖືວິຫານ Yassukuni ແມ່ນສັນຍາລັກຂອງລັດທິຂຸນເສິກ ຍີ່ປຸ່ນ ໃນສະໄໝສົງຄາມ. ດັ່ງນັ້ນ, ການໄປຢ້ຽມຢາມວິຫານ Yassukuni ຂອງທ່ານນາຍົກລັດຖະມົນຕີ ຍີ່ປຸ່ນ ແລະ ບັນດາເຈົ້າໜ້າທີ່ລັດຖະບານ ຍີ່ປຸ່ນ ຍາມໃດກໍ່ເຮັດໃຫ້ປະຊາຊົນ ສປປ ເກົາຫຼີ ຄຽດແຄ້ນ, ລັດຖະບານ ສ. ເກົາຫຼີ ໄດ້ຄັດຄ້ານຢ່າງແຮງ, ສື່ມວນຊົນ ສ. ເກົາຫຼີ ໄດ້ກ່າວປະນາມ ຍີ່ປຸ່ນ, ການແຫ່ຂະບວນຄັດຄ້ານ ຍີ່ປຸ່ນ ໄດ້ເກີດຂຶ້ນຫຼາຍຄັ້ງ. ການຢ້ຽມຢາມວິຫານຂອງບັນດາເຈົ້າໜ້າທີ່ ຍີ່ປຸ່ນ ໄດ້ເກີດຄວາມບໍ່ພໍໃຈຢູ່ ປັກກິ່ງ, ການຄັດຄ້ານຂອງກະຊວງການຕ່າງປະເທດ ແລະ ບາງເທື່ອແມ່ນບັນດາການແຫ່ຂະບວນຄັດຄ້ານຂອງປະຊາຊົນຢູ່ຕາມຖະໜົນ. ຢູ່ພາຍໃນປະເທດ ຍີ່ປຸ່ນ ເອງ, ການໄປຢ້ຽມຢາມວິຫານຂອງຜູ້ນຳລັດຖະບານກໍ່ເຄີຍເກີດການຖົກຖຽງກັນຢ່າງແຮງລະຫວ່າງຝ່າຍຊ້າຍ ແລະ ຝ່າຍຂວາ.
ການຂັດແຍ້ງຢ່າງຂຽວຂາດກ່ຽວກັບພູມສາດຍຸດທະສາດ
ນີ້ບໍ່ແມ່ນເທື່ອທຳອິດທີ່ການພົວພັນລະຫວ່າງ 3 ປະເທດອາຊີຕາເວັນອອກສ່ຽງເໜືອເກີດຄວາມເຄັ່ງຕຶງ. ນອກຈາກບັນຫາຄວາມຂັດແຍ້ງກັນທີ່ມີລັກສະນະປະຫວັດສາດທີ່ກ່ຽວຂ້ອງເຖິງວິຫານ Yassukuni ແລ້ວ, ການພົວພັນລະຫວ່າງ 3 ປະເທດ ຍີ່ປຸ່ນ, ຈີນ ແລະ ສ. ເກົາຫຼີ ທີ່ກ່ຽວຂ້ອງເຖິງການຂັດແຍ້ງກັນດ້ານຜືນແຜ່ນດິນຍັງມີຄວາມສັບສົນຢູ່. ໃນຊຸມປີມໍ່ໆມານີ້, ປະຊາຄົມສາກົນໄດ້ເຫັນປະຈັກຕາບັນດາຄວາມບໍ່ລົງລອຍກັນ ແລະ ການຟ້ອງຮ້ອງເຊິ່ງກັນ ແລະ ກັນເປັນຫຼາຍຄັ້ງລະຫວ່າງບັນດາການພົວພັນຂອງ 3 ປະເທດ.
ນັ້ນແມ່ນການພົວພັນ ຍີ່ປຸ່ນ - ຈີນ ທີ່ກ່ຽວຂ້ອງເຖິງໝູ່ເກາະທີ່ພວມຂັດແຍ້ງກັນ Senkaku/ຕຽວອີ ເຊິ່ງທັງ 2 ປະເທດລ້ວນແຕ່ປະກາດມີອະທິປະໄຕ. ຈາກນັ້ນ, ແມ່ນການຖົກຖຽງກັນຢ່າງຕໍ່ເນື່ອງລະຫວ່າງ ຍີ່ປຸ່ນ ແລະ ສ. ເກົາຫຼີ ກ່ຽວກັບບັນຫາປະເທດໃດມີກຳມະສິດຢ່າງແທ້ຈິງກ່ຽວກັບໝູ່ເກາະ 2 ແຫ່ງດ້ວຍເນື້ອທີ່ທັງໝົດ 18 ha ທີ່ມີຊື່ວ່າ Takeshima ແລະ ຝ່າຍ ສ. ເກົາຫຼີ ເອີ້ນວ່າ Dokdo. ເຖິງວ່າ, ມູນຄ່າດ້ານເສດຖະກິດຂອງໝູ່ເກາະ 2 ແຫ່ງດັ່ງກ່າວແມ່ນບໍ່ມີຫຼາຍ, ແຕ່ມັນພັດມີຄວາມໝາຍສຳຄັນກ່ຽວກັບດ້ານອະທິປະໄຕ. ທັງ 2 ປະເທດລ້ວນແຕ່ຖືວ່າ ໝູ່ເກາະ 2 ແຫ່ງນີ້ແມ່ນພາກສ່ວນໜຶ່ງໃນຜືນແຜ່ນດິນຂອງເຂົາເຈົ້ານັບແຕ່ກ່ວາໜຶ່ງສະຕະວັດຜ່ານມາ. ນອກຈາກນັ້ນ, ການພົວພັນ 2 ຝ່າຍລະຫວ່າງ ສ. ເກົາຫຼີ ແລະ ຈີນ ກໍ່ຖືກຜົນສະທ້ອນຢ່າງໜັກໜ່ວງທີ່ກ່ຽວຂ້ອງເຖິງເລື່ອງ ອາເມລິກາ, ສຳພັນທະມິດສຳຄັນຂອງ ສ. ເກົາຫຼີ, ອາດສາມາດຜັນຂະຫຍາຍລູກສອນໄພ THAAD (ລະບົບປ້ອງກັນລູກສອນໄຟນຳວິຖີໄລຍະສູງ) ຂອງອາເມລິກາ ໃນເຂດດິນແດນສ.ເກົາຫຼີ.
ທ່າອ່ຽງຮ່ວມມືຍັງຄົງມີຄວາມສຳຄັນ
ການຖົກຖຽງກັນນັ້ນ ທີ່ເກີດມາຈາກການແກ່ງແຍ້ງກັນຂ້ຽວຂາດແຮງກ່ຽວກັບພູມສາດຍຸດທະສາດລະຫວ່າງຍີ່ປຸ່ນ ປະເທດຢາກຢືນຢັນທີ່ຕັ້ງເປັນປະເທດມະຫາອຳນາດໃນພາກພື້ນ, ກັບຈີນ ເຊິ່ງແມ່ນປະເທດທີ່ພວມພົ້ນເດັ່ນຂຶ້ນ ແລະ ສ.ເກົາຫຼີ ປະເທດທີມີບັນດານະໂຍບາຍທີ່ແຂງກະດ້າງ. ເຖິງຢ່າງໃດກໍ່ຕາມ, ຍິງກວ່າອັນໃດໝົດ, ທ່າອ່ຽງຮ່ວມມືຍັງຄົງມີຄວາມສຳຄັນໃນການພົວພັນດ້ານການເມືອງຢູ່ພາກພື້ນອາຊີຕາເວັນອອກສ່ຽງເໜືອ ດ້ວຍຈຸດພົ້ນເດັ່ນແມ່ນການຮ່ວມມືດ້ານເສດຖະກິດ ແລະ ການຄ້າ. ໃນຕົວຈິງ, 3 ປະເທດນີ້ໄດ້ສະໜິດຕິດພັນນຳກັນ ຢ່າງແໜ້ນແຟ້ນ ດ້ວຍການພົວພັນດ້ານເສດຖະກິດນຳກັນ ແລະ ທັງໂຕກຽວ, ປັກກິງ ແລະ ເຊີອຸ່ນ ລ້ວນຮັບຮູ້ແຈ້ງ ຖ້າຫາກທຳລາຍສິ່ງນັ້ນແມ່ນບໍ່ມີຜົນປະໂຫຍດໃຫ້ບໍ່ວ່າຝ່າຍໃດ.
ໂດຍແມ່ນປະເທດທີ 3 ທີ່ມີຜົນທະທ້ອນທີ່ສຸດໃນພາກພື້ນອາຊີຕາເວັນອອກສ່ຽງເໜືອ, ການພົວພັນລະຫວ່າງຈີນ, ຍີ່ປຸ່ນ, ສ.ເກົາຫຼີ ມີຜົນສະທ້ອນສຳຄັນ ແລະ ເລິກເຊິ່ງເຖິງສະພາບການຢູ່ພາກພື້ນ. ເຮັດແນວໃດເພື່ອຄວບຄຸມຄວາມບໍ່ລົງລອຍກັນ, ເກັບຮັກສາຄວາມຮັບຮູ້ລວມ ແລະ ຊຸກຍູ້ການຮ່ວມມື, ແມ່ນມີຄວາມໝາຍສຳຄັນພິເສດໃນການປະຕິບັດຄວາມໝັ້ນຄົງ, ສະຖຽນລະພາບ ແລະ ຄວາມວັດທະນາຖາວອນຂອງພາກພື້ນອາຊີຕາເວັນອອກສ່ຽງເໜືອ. ສະນັ້ນ, ບັນດາຄວາມເຄັ່ງຕຶງໃນປະຈຸບັນທີ່ກ່ຽວຂ້ອງເຖິງບັນຫາຄວາມບໍ່ລົງລອຍກັນທາງດ້ານປະຫວັດສາດນີ້, ຕາມບັນດານັກຊ່ຽວຊານແລ້ວ, ພຽງແມ່ນບັນດາບາດກ້າວຖອຍຫຼັງຊົ່ວຄາວໃນທ່າຮັບດ້ານການທູດ, ເມື່ອທັງຮ່ວມມື, ທັງແກ່ງແຍ້ງ ຍາມໃດກໍ່ແມ່ນການຊ່ວງເສງທີ່ເຕັມໂປດ້ວຍຄວາມສັບສົນ ແລະ ແຕ່ລະປະເທດກໍ່ມີບັນດາສາຍເຫດສະເພາະເພື່ອປົກປັກຮັກສາຜົນປະໂຫຍດຂອງຕົນ.