ວັນທີ 17/9, ທ່ານປະທານປະເທດຈີນ ສີຈີນຜີງ ໄດ້ເລີ່ມຕົ້ນການຢ້ຽມຢາມ ອິນເດຍຢ່າງເປັນທາງການນັບຕັ້ງແຕ່ເຂົ້າດຳລົງຕຳແໜ່ງນີ້. ການຢ້ຽມຢາມອິນເດຍແມ່ນກາລະໂອກາດເພື່ອໃຫ້ 2 ປະເທດບ້ານໃກ້ເຮືອນຄຽງຊຸກຍູ້ການຮ່ວມມືດ້ານເສດຖະກິດ, ແຕ່ຍັງບໍ່ອາດຮັດແຄບຄວາມບໍ່ລົງລອຍກັນທີ່ຍັງຄົງຄ້າງໃນການພົວພັນ 2 ຝ່າຍ.
ທ່ານປະທານປະເທດຈີນ ສີຈີນຜີງ
|
ແຫ່ງຢ້ຽມຢາມທຳອິດຂອງທ່ານປະທານປະເທດຈີນ ສີຈີນຜີງ ໃນຂອບເຂດການຢ້ຽມຢາມ ອິນເດຍຢ່າງເປັນທາງການ, ນັ້ນແມ່ນລັດ Gujarat ບ້ານເກີດຂອງທ່ານນາຍົກລັດຖະມົນຕີອິນເດຍ Narendra Modi. ນາຍົກລັດຖະມົນຕີອິນເດຍ Narendra Modi ໄດ້ຕ້ອນຮັບ ທ່ານປະທານປະເທດຈີນ ສີຈີນຜີງຢູ່ທີ່ນີ້ ກ່ອນທີ່ດຳເນີນການເຈລະຈາ ແລະ ບັນດາການເຮັດວຽກທີ່ສຳຄັນຢູ່ນະຄອນຫຼວງນິວເດລີໃນ 2 ວັນຕໍ່ໄປ.
ເສດຖະກິດແມ່ນຈຸດໃຈກາງຂອງການຢ້ຽມຢາມ.
ຕາມໜັງສືພິມ “ The Hindu ” ໃນການຢ້ຽມຢາມອິນເດຍຂອງ ທ່ານປະທານ ປະເທດຈີນ ສີຈີນຜີງ, 2 ຝ່າຍຄາດວ່າຈະລົງນາມໃນສັນຍາ ແລະ ບົດບັນທຶກຊົງຈຳປະມານ 20 ສະບັບ, ໃນນັ້ນມີບັນດາສັນຍາທີ່ກ່ຽວຂ້ອງເຖິງການພັດທະນາໂຄງລ່າງ, ສ້າງຕັ້ງບັນດານະຄອນອຸດສາຫະກຳ ແລະ ຮ່ວມມືດ້ານວັດທະນະທຳ. ພ້ອມກັນນັ້ນ, ບັນຫາຂາດຄວາມດູນດ່ຽງດ້ານການຄ້າ, ການລົງທຶນຂອງຈີນເຂົ້າໃນລະບົບພື້ນຖານໂຄງລ່າງຂອງອິຍເດຍຈະຖືກນຳມາປຶກສາຫາລື.
ຫົວໜ້າສະຖານກົງສູນໃຫຍ່ຈີນປະຈຳນະຄອນມຸມບາຍ ລິວອິວຟາ ໃຫ້ຮູ້ວ່າ ໃນການຢ້ຽມຢາມອິນເດຍຂອງ ທ່ານປະທານ ປະເທດຈີນ ສີຈີນຜີງ, ຈີນຈະໃຫ້ຄຳໝັ້ນສັນຍາລົງທຶນ 100 ຕື້ USD ເຂົ້າອິນເດຍ, ເພີ່ມຂຶ້ນທົບ 3 ເທົ່າເມື່ອທຽບໃສ່ຈຳນວນເງິນລົງທຶນຊຶ່ງຍີປຸ່ນໄດ້ໝັ້ນໝາຍໃນການຢ້ຽມຢາມຍີປຸ່ນຂອງ ທ່ານນາຍົກລັດຖະມົນຕີ Modi ເມື່ອບໍ່ດົນມານີ້.
ບັນດາບ້ວງເງິນລົງທຶນຂອງຈີນຈະຖືກສະຫງວນແກ່ການສ້າງຕັ້ງບັນດາເຂດອຸດສາຫະກຳ, ກໍ່ສ້າງເປັນທັນສະໄໝສຳລັບລະບົບສາຍທາງລົດໄຟ, ທາງຫຼວງ, ທ່າກຳປັ່ນ, ການສົ່ງໄຟຟ້າ, ການປຸ່ງແຕ່ງອາຫານ ແລະ ອຸດສາຫະກຳຕຳແຜ່ນ. ຈີນກໍ່ຍັງຕັ້ງໜ້າພິຈາລະນາການລົງທຶນເຂົ້າໃນບັນດາແຜນການທີ່ມີລັກສະນະມັກໃຫຍ່ໃຝ່ສູງຂອງອິນເດຍໃນການກໍ່ສ້າງບັນດາສາຍທາງລົດໄຟຄວາມໄວສູງ.
ເພື່ອເປັນການຜັນຂະຫຍາຍລົງນາມໃນບັນດາເນື້ອໃນຮ່ວມມືເສດຖະກິດນີ້, ຕິດຕາມ ທ່ານປະທານປະເທດຈີນ ສີຈີນຜີງນັ້ນ, ນອກຈາກວົງການເຈົ້າໜ້າທີ່ແລ້ວ, ກໍຍັງມີຄະນະນຳບັນດາວິສາຫະກິດລວມມີກວ່າ 100 ຄົນ, ໃນນັ້ນມີບໍລິສັດໃຫຍ່ ແລະ ທະນາຄານຫຼາຍແຫ່ງຂອງຈີນ.
ຕອບສຳພາດນັກຂ່າວ ກ່ອນການເດີນທາງຢ້ຽມຢາມຂອງທ່ານປະທານ ປະເທດຈີນ ສີຈີນຜີງ, ທ່ານນາຍົກລັດຖະມົນຕີອິນເດຍ Narendra Modi ໃຫ້ຮູ້ວ່າ ນີ້ແມ່ນການເດີນທາງຢ້ຽມຢາມທີ່ມີຄວາມໝາຍສຳຄັນທີ່ມີຕໍ່ການພົວພັນລະຫວ່າງ 2 ປະເທດຈີນ-ອິນເດຍ. ຕາມທ່ານນາຍົກລັດຖະມົນຕີອິນເດຍ Narendra Modi ແລ້ວ, ຈຳນວນປະຊາກອນຂອງ 2 ປະເທດ ຈີນ-ອິນເດຍແມ່ນກວມເອົາປະມານ 35% ຈຳນວນປະຊາກອນທົ່ວໂລກ, ຖ້າຫາກ 2 ປະເທດເພື່ອນບ້ານໃກ້ຄຽງ ຮ່ວມມືພັດທະນາເສດຖະກິດນັ້ນ, ແມ່ນບໍ່ພຽງແຕ່ຈະຍົກສູງລະດັບຄອງຊີບໃຫ້ແກ່ປະຊາຊົນ 2 ປະເທດເທົ່ານັ້ນ, ຫາກຍັງມີຄວາມໝາຍສຳຄັນທີ່ມີຕໍ່ບັນດາປະເທດອ້ອມຂ້າງອີກດ້ວຍ.
ຄວາມຈິງໄດ້ສະແດງໃຫ້ເຫັນວ່າ ການພົວພັນເສດຖະກິດລະຫວ່າງ 2 ປະເທດ ຈີນ-ອິນເດຍ ແມ່ນຍັງບໍ່ທັນມີສັນຍານທີ່ດີໃນຊຸມປີທີ່ຜ່ານມາ. ຕາມຕົວເລກສະຖີຕິແລ້ວ, ປີກາຍນີ້, ບ້ວງເງິນລົງທຶນອອກສູ່ຕ່າງປະເທດຂອງຈີນ ແມ່ນລືນກາຍລະດັບ 90 ຕື້ USD, ແຕ່ການລົງທຶນຂອງປະເທດນີ້ຢູ່ອິນເດຍ ແມ່ນຖືກຈຳກັດຢູ່, ບັນລຸພຽງ 400 ລ້ານ USD ເທົ່ານັ້ນ. ເພາະສະນັ້ນ, ໃນເທືອ່ນີ້, ຈີນຕົກລົງລົງທຶນເຂົ້າອິນເດຍຫຼາຍກ່ວານັ້ນ, ຈະເປັນການປົວແປງການປະກົດຕົວຂອງຈີນຢູ່ປະເທດ ເພື່ອນບ້ານໃກ້ຄຽງນີ້.
ນອກຈາກຈຸດປະສົງດ້ານເສດຖະກິດແລ້ວ, ວົງການນັກສັງເກດການຖືວ່າ ການຢ້ຽມຢາມອິນເດຍຂອງ ທ່ານປະທານ ປະເທດຈີນ ສີຈີນຜີງ ຍັງເພື່ອແນໃສ່ສ້າງຄວາມລຶ້ງແກວນກັບຄະນະນຳໃໝ່ຂອງອິນເດຍ, ຈຳກັດເລື່ອງນິວເດລີຮ່ວມສຳພັນກັບວໍຊິງຕັນ ແລະ ໂຕກຽວເພື່ອລະງັບຈີນ.
ການພິພາດຊາຍແດນແມ່ນຮົ້ວກີດຂວາງບໍ່ນ້ອຍໃນການພົວພັນ 2 ຝ່າຍ.
ກົງກັນຂ້າມກັບແງ່ຫວັງທີ່ສະຫວ່າງສະໄຫວໃນການຮ່ວມມືດ້ານເສດຖະກິດ, ເບິ່ງສັງລວມແລ້ວ, ການພົວພັນ 2 ຝ່າຍ ຈີນ-ອິນເດຍ ກໍບໍ່ຈົບງາມປານໃດຂະນະທີ່ຄວາມບໍ່ລົງລອຍກັນຍັງຄົງຕົວຢູ່.
ກ່ອນການຢ້ຽມຢາມຂອງ ທ່ານປະທານ ປະເທດຈີນ ສີຈີນຜີງເປັນເວລາ 1 ວັນ, ລັດຖະບານອິນເດຍຖະແຫຼງວ່າ ຈະປ້ອງກັນເສັ້ນຊາຍແດນກັບຈີນລວມຄວາມຍາວ 3.500 ກມຢ່າງເຄັ່ງຄັດ. ໂຄສົກກະຊວງການຕ່າງປະເທດອິນເດຍທ່ານ Akbaruddin ໄດ້ຢືນຢັນວ່າ ບັນຫາສຳຄັນນີ້ ຈະຖືກນຳມາປຶກສາຫາລືກັບ ທ່ານປະທານປະເທດຈີນ ສີຈີນຜີງ.
ນອກຈາກການພິພາດເຂດດິນແດນແລ້ວ, ການພົວພັນລະຫວ່າງ 2 ປະເທດຍັງປະສົບກັບສິ່ງກີດຂວາງ ຂະນະທີ່ໃນຊຸມປີທີ່ຜ່ານມາ, ປັກກິງເພີ່ມທະວີການກໍ່ສ້າງບັນດາຂົວໃຫ້ເຮືອເຂົ້າມຽບທ່າ, ຖານທີ່ໝັ້ນຢູ່ພາກພື້ນອາຊີໃຕ້ຄື ປາກິດສະຖານ, ສີລັງກາ, ອັນໄດ້ເຮັດໃຫ້ເກີດກະແສຟອງວິຕົກກັງວົນຕໍ່ເລື່ອງຈີນພວມຊອກຫາວິທີປິດລ້ອມອິນເດຍ.
ບໍ່ອາດປະຕິເສດການຢ້ຽມຢາມອິນເດຍຄັ້ງນີ້ຂອງ ທ່ານປະທານປະເທດຈີນ ສີຈີນຜີງ ຊຶ່ງຈະສ້າງກາລະໂອກາດໃຫຍ່ໃນການຮ່ວມມືເສດຖະກິດລະຫວ່າງ 2 ປະເທດທີ່ມີຈຳນວນປະຊາກອນຫຼາຍກ່ວາໝູ່ໃນໂລກ. ແຕ່ການພົວພັນດ້ານເສດຖະກິດພັດທະນາຢ່າງແຮງນັ້ນ ກໍ່ຍັງບໍ່ອາດຫັນເປັນການພົວພັນ 2 ຝ່າຍທີ່ດີໃນທຸກດ້ານໄດ້.