(vovworld)- ກ່າວຄຳເຫັນທີ່ສະຖາບັນພົວພັນສາກົນຝະລັ່ງ ຢູ່ນະຄອນຫຼວງປາຣີ ເມື່ອວັນທີ 24/9, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ຢືນຢັນວ່າ: ການພົວພັນຮ່ວມມືລະຫວ່າງ ຫວຽດນາມ ແລະ ຝະລັ່ງ ໄດ້ສຳເລັດຜົນດ້ວຍເລື່ອງການນຳສອງປະເທດພ້ອມກັນປະກາດສ້າງການພົວພັນຄູ່ຮ່ວມມືຍຸດທະສາດ ຫວຽດນາມ-ຝະລັ່ງ.
(ພາບ: baodatviet.vn)
ໃນຂອບເຂດການຢ້ຽມຢາມ ສ.ຝະລັ່ງ ຢ່າງເປັນທາງການ, ວັນທີ 24/9, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ໄດ້ໄປຢ້ຽມຢາມ ແລະ ມີບົດກ່າວປາໄສສຳຄັນທີ່ສະຖາບັນພົວພັນສາກົນຝະລັ່ງ ຢູ່ນະຄອນຫຼວງປາຣີ. ຕໍ່ໜ້າບັນດານັກການເມືອງ, ນັກຮຽນຮູ້ ແລະ ນັກຄົ້ນຄ້ວາທີ່ມີອິດທິພົນຊື່ສຽງເປັນຈຳນວນຫຼວງຫຼາຍ, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ໄດ້ເວົ້າກ່ຽວກັບ ການພົວພັນລະຫວ່າງປະເທດຫວຽດນາມ ແລະ ຝະລັ່ງ ວ່າ: ເຖິງວ່າ, ຈະຜ່ານຜ່າຄວາມຫຍູ້ງຍາກ, ສິ່ງທ້າທາຍຫຼາຍຢ່າງກໍ່ຕາມ ແຕ່ ການພົວພັນລະຫວ່າງສອງປະເທດບັນລຸໄດ້ຜົນສຳເລັດອັນຈົບງາມ.
ແບບຢ່າງໃຫ້ແກ່ການພົວພັນລະຫວ່າງຕາເວັນອອກ-ຕາເວັນຕົກ
ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ຢືນຢັນວ່າ: ໃນ 40 ປີຜ່ານມາ, ດ້ວຍຄວາມມານະພະຍາຍາມເພີ່ມພູນຄູນສ້າງຈາກທັງສອງຝ່າຍ, ສະເໝີພາບ ແລະ ເຄົາລົບນັບຖືຊື່ງກັນ ແລະ ກັນ, ການພົວພັນລະຫວ່າງຫວຽດນາມ ແລະ ຝະລັ່ງ ບັນລຸໄດ້ຜົນງານສຳຄັນທີ່ເຕັມໄປດ້ວຍຄວາມໝາຍ ຊື່ງສະແດງອອກຢ່າງເລິກເຊິ່ງກ້ວາງຂວາງຜ່ານບັນດາການຢ້ຽມຢາມຂອງການນຳຂັ້ນສູງ ແລະ ການພົບປະແລກປ່ຽນເປັນປະຈຳຂອງບັນດາອົງການ, ທ້ອງຖິ່ນ, ອົງການຈັດຕັ້ງສັງຄົມ. ມາຮອດປະຈຸບັນ, ສອງປະເທດໄດ້ລົງນາມໃນສັນຍາ, ຂໍ້ຕົກລົງສຳຄັນຫຼາຍສະບັບ, ສ້າງຕັ້ງ ແລະ ຮັກສາບັນດາກົນໄກໂອ້ລົມສົນທະນາ, ຮ່ວມມືດ້ານເສດຖະກິດ, ການປ້ອງກັນຊາດປ້ອງກັນຄວາມສະຫງົບ, ວັດທະນະທຳ, ການພົບປະແລກປ່ຽນ ປຊຊ ເປັນປະຈຳ ແລະ ມີປະສິດທິຜົນ. ປະຈຸບັນ, ການພົວພັນລະຫວ່າງຫວຽດນາມ ແລະ ຝະລັ່ງ ໄດ້ກາຍເປັນແບບຢ່າງໃຫ້ແກ່ການພົວພັນລະຫວ່າງຕາເວັນອອກ-ຕາເວັນຕົກ, ລະຫວ່າງປະເທດອຸດສາຫະກຳອັນດັບໜຶ່ງຢູ່ເອີລົບ ແລະ ປະເທດໜຶ່ງພວມພັດທະນາຢ່າງຂະຫຍັນຂັນເຄື່ອນຢູ່ອາຊີຕາເວັນອອກສ່ຽງໃຕ້.
ຍ້ອນເຫດນັ້ນ, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ຢືນຢັນວ່າ: ການພົວພັນຄູ່ຮ່ວມມືຍຸດທະສາດຫາກໍ່ໄດ້ຮັບການສ້າງຕັ້ງນັ້ນ ສະແດງໃຫ້ເຫັນຄວາມສຸກງ່ອມຂອງການພົວພັນໃນຫຼາຍຂົງເຂດ ແລະ ໃນຫຼາຍລະດັບ, ເປີດໄລຍະຮ່ວມມືໃໝ່ແຫ່ງຄວາມສັດຊື່, ໄວ້ເນື້ອເຊື່ອໃຈ. ເຄົາລົບນັບຖືຊື່ງກັນ ແລະ ກັນ ແລະ ຮ່ວມມືຮອບດ້ານໃນບັນດາຂົງເຂດ: ການເມືອງ-ການທູດ, ເສດຖະກິດ, ວັດທະນະທຳ, ວິທະຍາສາດເຕັກໂນໂລຊີ, ການປ້ອງກັນຊາດປ້ອງກັນຄວາມສະຫງົບ, ພ້ອມກັນແບ່ງປັນຜົນປະໂຫຍດເພື່ອສັນຕິພາບ, ຄວາມ ຈະເລີນຮຸ່ງເຮືອງຂອງ ປຊຊ ສອງປະເທດ.
ທ່ານຫງວຽນເຕິນຢຸງກ່າວປາໄສທີ່ສະຖາບັນພົວພັນສາກົນຝະລັ່ງ
(ພາບ: baomoi.com)
ເພື່ອບັນລຸໄດ້ຈຸດໝາຍດັ່ງກ່າວ, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ຖືວ່າ: ສອງປະເທດຕ້ອງພ້ອມກັນຮ່ວມມືດ້ວຍບັນດາຈິນຕະນາການໃໝ່, ວິທີປະຕິບັດທີ່ມີຫົວຄິດປະດິດສ້າງເພື່ອສືບຕໍ່ເພີ່ມພູນຄູນສ້າງໃຫ້ແກ່ສາຍພົວພັນສອງຝ່າຍແບບພິເສດນີ້ເຂົ້າສູ່ລວງເລິກ, ມີປະສິດທິຜົນ ແລະ ພັດທະນາຢ່າງແຮງ, ນຳມາເຊິ່ງຜົນປະໂຫຍດໃຫ້ແກ່ ປຊຊ ສອງປະເທດ. ກ່ອນອື່ນໝົດ, ພວກເຮົາຕ້ອງເອົາໃຈໃສ່, ມານະພະຍາຍາມຮ່ວມມືໃນບັນດາກຸ່ມຂົງເຂດຈຸດສຸມ, ລວມທັງຮ່ວມມືສອງຝ່າຍ ແລະ ຫຼາຍຝ່າຍໃນບັນດາເວທີປາໄສສາກົນ, ພາກພື້ນ ແລະ ທົ່ວໂລກ.
ຂົວຕໍ່ໃໝ່ໃນການພົວພັນລະຫວ່າວອາຊີ-ເອີລົບ
ໃນທ່າອ່ຽງຫັນເປັນໂລກາພິບັດດ້ວຍບັນດາການພົວພັນສາກົນນັ້ນ, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ສະແດງຄວາມປາດຖະໜາຢາກໃຫ້ການພົວພັນຄູ່ຮ່ວມມືຍຸດທະສາດ ຫວຽດນາມ-ຝະລັ່ງ ກາຍເປັນຂົວຕໍ່ໃຫ້ແກ່ການພັດທະນາການຮ່ວມມືລະຫວ່າງອາຊີ-ເອີລົບ ຊື່ງຈະປະກອບສ່ວນຊຸກຍູ້ການຮ່ວມມືຂອງສອງກຸ່ມເສດຖະກິດໃຫ່ຍ ເພື່ອແນໃສ່ສ້າງກຳລັງໜູນໃຫ້ແກ່ການພັດທະນາທົ່ວໂລກ. ໃນສະພາບຄວາມແກ່ງແຍ້ງດ້ານຜົນປະໂຫຍດຍຸດທະສາດນັບມື້ນັບຂ້ຽວຂາດນັ້ນ, ການສ້າງຄວາມໄວ້ເນື້ອເຊື່ອໃຈຍຸດທະສາດລະຫວ່າງປະເທດຄູ່ຮ່ວມມືຕ່າງໆແມ່ນຈຳເປັນທີ່ສຸດ ແລະ ການພົວພັນຄູ່ຮ່ວມມືຍຸດທະສາດ ຫວຽດນາມ-ຝະລັ່ງ ຕ້ອງໄດ້ຮັບການເສີມຂະຫຍາຍ, ປະກອບສ່ວນສ້າງສະພາບແວດລ້ອມແຫ່ງສັນຕິພາບ, ການຮ່ວມມື, ພັດທະນາໃນສອງທະວີບອາຊີ-ເອີລົບ. ບໍ່ພຽງແຕ່ພ້ອມກັນປະກອບສ່ວນສະກັດກັ້ນສະພາບຂາດຄວາມສະເໝີພາບ, ສະກັດກັ້ນການສະແດງກຳລັງແຮງພຽງລຳພັງຝ່າຍດຽວ, ຄວາມຮຽກຮ້ອງໄຮ້ເຫດຜົນ, ບັນດາການກະທຳລະເມີດກົດໝາຍສາກົນທີ່ມີລັກສະນະຈັດວາງ ແລະ ການເມືອງກຳອຳນາດ. ທຸກສິ່ງທຸກຢ່າງເພື່ອສັນຕິພາບ, ຄວາມສະຫງົບປອດໄພ, ການຮ່ວມມືພັດທະນາ ແລະ ວັດທະນາຖາວອນຢູ່ໃນໂລກ.
ສຸດທ້າຍ, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ ຖືວ່າ: ເລື່ອງສອງປະເທດສ້າງຕັ້ງການພົວພັຍຮູ່ຮ່ວມມືຍຸດທະສາດພຽງແຕ່ແມ່ນບາດກ້າວທຳອິດເທົ່ານັ້ນ, ໃນຕໍ່ໜ້າຍັງມີບັນດາກາລະໂອກາດ ແລະ ສິ່ງທ້າທາຍບໍ່ແມ່ນໜ້ອຍ ແຕ່ດ້ວຍຄວາມຕັດສິນໃຈ, ແນ່ນອນວ່າ, ສອງຝ່າຍຈະຊອກຫາບັນດາມາດຕະການທີ່ເໝາະສົມ, ວິທີປະຕິບັດທີ່ດີ, ມີຫົວຄິດປະດິດສ້າງໄດ້ ເພື່ອນຳການພົວພັນຄູ່ຮ່ວມມືຍຸດທະສາດ ຫວຽດນາມ-ຝະລັ່ງ ໃຫ້ນັບມື້ນັບ ພັດທະນາສົມກັບຄວາມປາດຖະໜາ, ເພື່ອຜົນປະໂຫຍດຂອງປຊຊ ສອງປະເທດ ແລະ ເພື່ອການພົວພັນອັນດີງາມລະຫວ່າງປະເທດຕ່າງໆໃນໂລກ./.