ການພົວພັນບໍ່ດີລະຫວ່າງອາເມລິກາ - ອາບການິສະຖານ
(ພາບ: google.com.vn)
|
(vovworld) - ການພົວພັນຍຸດທະສາດລະຫວ່າງອາເມລິກາ - ອາບການິສະຖານພວມຜັນແປໄປຢ່າງສັບສົນ. ພາຍຫຼັງກໍລະນີທະຫານໃນອົງການ (NATO) ຈູດປື້ມຄຳພີໂກຮານ ໃນຖານທີ່ໝັ້ນການທະຫານອາເມລິກາ ຢູ່ອາບການິສະຖານ ເມື່ອທ້າຍເດືອນ 2/2012, ແລະ ການກະທຳຍິງປືນໃສ່ປະຊາຊົນຜູ້ບໍລິສຸດ 16 ຄົນ, ເຊິ່ງຕົ້ນຕໍ່ແມ່ນແມ່ຍິງ ແລະ ເດັກນ້ອຍ, ຂອງທະຫານອາເມລິກາຜູ້ໜຶ່ງໃນ ວັນທີ 11/3 , ສິ່ງດັ່ງກ່າວໄດ້ເຮັດໃຫ້ການພົວພັນຍຸດທະສາດລະຫວ່າງສອງປະເທດນັບມື້ນັບຊົ່ວຮ້າຍລົງ.
ເຖິງວ່າ, ພາຍຫຼັງເຫດການດັ່ງກ່າວ, ປະທານາທິບໍດີອາເມລິກາ Barack Obama ໄດ້ໂທລະສັບຫາຜູ້ຮ່ວມຕ່ຳແໜ່ງອາບການິສະຖານ ທ່ານ Hamid Karzai ແລະ ໝັ້ນໝາຍຈະສືບສວນກໍລະນີເຂັ່ນຂ້ານີ້ໂດຍໄວ. ແລະ ວັນທີ 12/3, ໂຄສົກທຳນຽບຂາວທ່ານ Jay Carney ໄດ້ຖະ ແຫຼງວ່າ, ບັນດາຈຸດໝາຍຍຸດທະສາດຂອງອາເມລິກາ ຢູ່ອາບການິສະຖານ ຈະບໍ່ມີການປ່ຽນແປງ… ແຕ່ເຖິງຢ່າງໃດກໍ່ຕາມ, ເຫດການດັ່ງກ່າວໄດ້ສົ່ງຜົນສະທ້ອນບໍ່ດີເຖິງການພົວພັນເຊິ່ງອາເມລິກາ ແລະ ບັນດາປະເທດຝ່າຍຕາເວັນຕົກພວມທານະພະຍາຍາມສ້າງຂຶ້ນຢູ່ປະເທດອາຊີໃຕ້ນີ້.
ພາຍຫຼັງເກີດເຫດການພຽງມື້ໜຶ່ງ, ຄວາມຄຽດແຄ້ນໄດ້ແຜ່ຂະຫຍາຍໄປທົ່ວປະເທດອາບການິສະຖານ. ວັນທີ 12/3, ສະພາແຫ່ງຊາດປະເທດນີ້ ໄດ້ຖະແຫຼງວ່າ, ຊາວອາບການິສະຖານ ບໍ່ສາມາດອົດທົນຕໍ່ການກະທຳຂອງທະຫານຕ່າງປະເທດຢູ່ປະເທດນີ້ໄດ້. ສ່ວນປະທານາທິບໍດີ Hamid Karzai ພັດຖືວ່າ ນີ້ບໍ່ຕ່າງຫຍັງກັບ ”ການກະທຳເຂັ່ນຂ້າ ແລະ ກໍ່ການຮ້າຍ” ນີ້ແມ່ນການກະທຳທີ່ ”ບໍ່ອາດອະໄພ”ໄດ້. ໃນວັນດຽວກັນ, ພວກກະບົດ ຕາລີບານ ຢູ່ອາບການິສະຖານ ໄດ້ສາບານຈະລົງໂທດ ”ທະຫານອາເມລິກາ ຜູ້ໂຫດຮ້າຍສາມານ”. ໃນຖະແຫຼງໜຶ່ງທີ່ສະເໜີທາງເວັບໄຊອິດສະລາມ, ຕາລີບານໄດ້ຖະແຫຼງຈະ ”ລົງໂທດພວກຮຸກຮານ ແລະ ເຂັ່ນຂ້າຄົນຢ່າງໂຫດຮ້າຍສາມານ”. ເຈົ້າໜ້າທີ່ທ່ານໜຶ່ງຂອງລັດຖະບານອາບການິສະຖານ ໃຫ້ຮູ້ວ່າ, ເຫດການດັ່ງກ່າວອາດຈະສົ່ງຜົນສະທ້ອນບໍ່ດີເຖິງຄວາມມານະພະຍາຍາມເພື່ອແນໃສ່ບັນລຸໄດ້ຂໍ້ຕົກລົງຍຸດທະສາດກັບກາບູນ ນັ້ນແມ່ນອະນຸຍາດໃຫ້ຄົນອາເມລິກາມີໜ້າຢູ່ປະເທດນີ້ໃນໄລຍະຍາວ.
(ພາບ: google.com.vn)
|
ສາຍເຫດທີ່ພາໃຫ້ເກີດເຫດໃນວັນທີ 13/3 ຜ່ານມາ, ນັ້ນແມ່ນຍ້ອນທະຫານອາເມລິກາຄົນໜຶ່ງອອກຈາກຖານທີ່ໝັ້ນທະຫານຢູ່ Kandahar ແລະ ຍິງປືນໃສ່ປະຊາຊົນໃນໝູ່ບ້ານAlokozai ແລະ Garrambai ເຮັດໃຫ້ມີຜູ້ເສຍຊີວິດຢ່າງໜ້ອຍສຸດ 16 ຄົນ, ສ່ວນຫຼາຍແມ່ນແມ່ຍິງ ແລະ ເດັກນ້ອຍ. ກຳລັງໜູນຊ່ວຍປ້ອງກັນຄວາມສະຫງົບສາກົນ (ISAF) ໂດຍ NATO ເປັນຫົວໜ້າ ໄດ້ຈັບຕົວທະຫານອາເມລິກາຜູ້ນີ້ແລ້ວ. ນາຍພົນ John Allen, ຜູ້ບັນຊາການບັນດາກຳລັງສາກົນຢູ່ອາບການິສະຖານ, ກໍ່ໄດ້ຢັ້ງຢືນວ່າ, ຜູ້ກໍ່ໂທດໃນເຫດການດັ່ງກ່າວໄດ້ຖືກລົງໂທດຢ່າງສົມເຫດສົມຜົນ. ແຕ່ສຳຫຼັບຫາງສຽງແລ້ວ, ເຫດການນີ້ໄດ້ກໍ່ຄວາມຄຽດແຄ້ນໃຫ້ແກ່ປະຊາຊົນຢູ່ທີ່ນີ້. ເພາະວ່າ, ພາຍຫຼັງ 10 ປີທີ່ອາເມລິກາ ແລະ ຝ່າຍຕາເວັນຕົກດຳເນີນການໂຄ່ນລົ້ມລະບອບຕາລີບານຢູ່ອາບການິສະຖານ, ແຕ່ຄວາມໝັ້ນຄົງຢູ່ປະເທດນີ້ຍັງບໍ່ທັນໄດ້ຮັບການຟື້ນຟູເທື່ອ. ເຄືອຂ່າຍກໍ່ການຮ້າຍ Al-Qaeda ໄດ້ແຜ່ຂະຫຍາຍອອກຢ່າງກວ້າງຂວາງ, ບໍ່ພຽງແຕ່ຈາກອາບການິສະຖານ ໄປຍັງປະເທດບ້ານໄກ້ເຮືອນຄຽງປາກິສະຖານ ເທົ່ານັ້ນ, ຫາກຍັງແຜ່ຂະຫຍາຍໄປເຖິງບັນດາປະເທດຕາເວັນອອກກາງ, ອາຟະລິກາ, ແລະ ອາຊີຕາເວັນອອກສຽງໃຕ້ ອີກດ້ວຍ. ສຳຫຼັບທາງດ້ານເສດຖະກິດ, ຕາມການຄາດຄະເນແລ້ວ, ອາບການິສະຖານຕ້ອງການເງິນປະມານ 10 ຕຶ້USD ເພື່ອປະຕິບັດສຳເລັດພາລະກິດສ້າງສາປະເທດຊາດຄື: ຍູ້ແຮງການຂຸດຄົ້ນແຮ່ທາດ, ແລະ ເປີດກວ້າງການສົ່ງອອກ, ຄຸ້ມຄອງດ້ານການເງິນ ແລະ ຕ້ານໄພສໍ້ລາດບັງຫຼວງພາຍໃນປະເທດ. ຕາມໝາກຜົນແຫ່ງການຄົ້ນຄ້ວາຫວ່າງມໍ່ໆມານີ້ແລ້ວ, ທະນາຄານໂລກຄາດຄະເນວ່າ, ພາຍຫຼັງປີ 2014, ງົບປະມານປະຈຳປີຂອງອາບການິສະຖານ ຈະຂາດປະມານ 7 ຕຶ້ USD. ກອງທັບຂອງປະເທດນີ້ຈະບໍ່ສາມາດສູ້ຮົບໄດ້ຖ້າຫາກບໍ່ມີການຊ່ວຍເຫຼືອຈາກຕ່າງປະເທດຢ່າງແນ່ນອນ. ໃນຂະນະນັ້ນ, ປະເທດນີ້ພວມກາຍເປັນແຫ່ງມີໄພຢາເສບຕິດຂອງໂລກ.
ປະຈຸບັນ, ເຫດການດັ່ງກ່າວໄດ້ສົ່ງຜົນສະທ້ອນບໍດີເຖິງຄວາມມານະພະຍາຍາມເພື່ອບັນລຸໄດ້ຂໍ້ຕົກລົງກ່ຽວກັບການພົວພັນຄູ່ຮ່ວມມືຍຸດທະສາດລະຫວ່າງອາເມລິກາ - ອາບການິສະຖານ. ກ່ອນໜ້ານັ້ນຄືຕົ້ນເດືອນ 3 ນີ້, ການນຳສອງປະເທດ ໄດ້ເຕື້ອງເຖິງບັນຫາຈຳນວນໜຶ່ງທີ່ກ່ຽວຂ້ອງເຖິງຜົນປະໂຫຍດສອງຝ່າຍຄື: ການເຈລະຈາຕ່າງໆກ່ຽວກັບການພົວພັນຄູ່ຮ່ວມມືຍຸດທະສາດ, ວິວັດການໄກ່ເກ່ຍປ່ອງດອງຊາດຂອງ Kabul , ເລື່ອງທະຫານຕ່າງປະເທດຢູ່ອາບການິສະຖານມອບໂອນພາລະໜ້າທີ່ຮັບປະກັນຄວາມປອດໄພໃຫ້ແກ່ກຳລັງອາບການິສະຖານ. ຄວາມເຄັ່ງຕຶງໄດ້ບັນເທົາໄວ້ຊົ່ວຄາວ, ພາຍຫຼັງເຫດທະຫານອາເມລິກາຈູດປື້ມຄຳພີ ໂກຮານ, ເມື່ອວໍຊິງຕັນລົງນາມໃນຂໍ້ຕົກລົງມອບໂອນຄຸກ Bagram, ເຊິ່ງແມ່ນແຫ່ງຄຸ້ມຂັງຜູ້ທີ່ຖືກສົງໄສວ່າແມ່ນພວກກໍ່ການຮ້າຍ Al-Qaeda ແລະ ຕາລີບານ ຂອງອາເມລິກາ ໃຫ້ແກ່ອຳນາດການປົກຄອງອາບການິສະຖານ ໃນວັນທີ 9/3 ຜ່ານມາ. ແຕ່ເຫດການຍິງປືນໃສ່ປະຊາຊົນຜູ້ບໍລິສຸດດັ່ງກ່າວພັດເປັນການກະທົບບໍ່ດີເຖິງການພົວພັນລະຫວ່າງອາເມລິກາ - ອາບການິສະຖານ. ຕາມຫາງສຽງແລ້ວ, ການພົວພັນລະຫວ່າງສອງປະເທດໃນອະນາຄົດໄກ້ໆນີ້ແມ່ນບໍ່ດີຢ່າງແນ່ນອນ. ຄວາມຄຽດແຄ້ນຂອງປະຊາຊົນທີ່ມີຕໍ່ທະຫານຕ່າງປະເທດແມ່ນບໍ່ສາມາດບັນເທົາໃນທັນທີໄດ້. ສິ່ງທີ່ອັນຕະລາຍກວ່າ, ນັ້ນແມ່ນ, ເຫດການດັ່ງກ່າວພວມຖືກກຳລັງຕາລີບານ ສວຍໃຊ້ເພື່ອປຸກປັ່ນຊາວອາບການິສະຖານ ຕ້ານຄືນອາເມລິກາ. ດັ່ງນັ້ນ, ເມື່ອການພົວພັນລະຫວ່າງອາເມລິກາ - ອາບການິສະຖານນັບມື້ນັບຊົ່ວຮ້າຍລົງນັ້ນ, ຈະເຮັດໃຫ້ອາບການິສະຖານຕົກເຂົ້າສູ່ສະພາບຍາກທີ່ຈະຄວບຄູມໄດ້.