(vovworld)- ວັນທີ 20/7 ຜ່ານມາແມ່ນຂີດໝາຍຫນ້າປະຫວັດສາດໃຫມ່ໃນປະຫວັດສາດການພົວພັນລະຫວ່າງ ອາເມລິກາ ແລະ ກູບາ ເມື່ອເປັນຄັ້ງທຳອິດ ພາຍຫລັງ 54 ປີ, ທຸງຊາດ ກູບາ ປິ່ວສະບັດຕໍ່ຫນ້າປະຕູສຳນັກງານສະຖານທູດປະເທດນີ້ຢູ່ນະຄອນຫລວງ ວໍຊີງຕັນ. ເກືອບຄືວ່າໃນຈຸດເວລາດຽວກັນ, ຢູ່ ລາຮາວານ ປ້າຍຫນັງສືເຮັດດ້ວຍທອງທີ່ມີຊື່ວ່າ: ຫ້ອງການຕາງຫນ້າສິດຜົນປະໂຫຍດອາເມລິກາ” ຖືກແກ້ອອກແທນທີ່ນັ້ນແມ່ນປ້າຍແຖວຫນັງສື “ສະຖານທູດ ອາເມເລິກາ”. ເລື່ອງເປີດປະຕູສະຖານທູດກູບາ ຢູ່ ວໍຊິງຕັນ ແລະ ສະຖານທູດ ອາເມລິກາ ຢູ່ ລາຮາວານ ຄືນໃຫມ່ ເປັນຂີດໝາຍໃນການພົວພັນສອງຝ່າຍ ແລະ ສາກົນ.
ປະທານາທິບໍດີ B.Obama ແລະ ປະທານ ກູບາ Raul Castro
ພາບ:internet
|
ຕອນເຊົ້າວັນທີ 20/7 ໄດ້ກາຍເປັນຈຸດເວລາປະຫວັດສາດ ເມື່ອທຸງຊາດ ກູບາ ຊັກຂຶ້ນຢູ່ໃຈກາງທຸງຊາດຂອງຫລາຍປະເທດພັນທະມິດຂອງອາເມລິກາ ຕໍ່ຫນ້າປະຕູສຳນັກງານສະຖານທູດຂອງລາຮາວານ ຊື່ງຫາກໍໄດ້ຮັບການຍົກລະດັບ ຢູ່ ວໍຊິງຕັນ. ເຂົ້າຮ່ວມພິທີຊັກທຸງ ມີເຈົ້າຫນ້າທີ່ເກືອບ 5000 ທ່ານ, ໃນນັ້ນ ມີການນຳຂັ້ນສູງຫລາຍປະເທດ. ໃນຂະນະນັ້ນ, ໃນວັນດຽວກັນ, ຢູ່ ລາຮາວານ, ສະຖານທູດ ອາເມລິກາ ໄດ້ຮັບການເປີດປະຕູຄືນໃຫມ່ ແຕ່ພິທີຊັກທຸງ ສອງຝ່າຍເປັນເອກະພາບຈະດຳເນີນໃນເດືອນ 8, ເມື່ອລັດຖະມົນຕີວ່າການກະຊວງການຕ່າງປະເທດ ອາເມລິກາ John Kerry ໄປຢ້ຽມຢາມ ກູບາ.
ດ້ວຍບາດກ້າວເປັນສັນຍາລັກ ແລະ ມີລັກສະນະຕັດສິນຊີ້ຂາດດັ່ງກ່າວ, ອາດຈະເຫັນໄດ້ວ່າ ວິວັດທະນາການສ້າງການພົວພັນລະຫວ່າງ ອາເມລິກາ ແລະ ກູບາ ໄດ້ກ້າວເຂົ້າສູ່ໄລຍະສຸດທ້າຍ. ນີ້ແມ່ນເຫດການມີຄວາມໝາຍສຳຄັນ ບໍ່ພຽງແຕ່ໃນການພົວພັນລະຫວ່າງສອງປະເທດເທົ່ານັ້ນ ຫາກນັບທັງຊີວິດດ້ານການເມືອງສາກົນ, ແມ່ນການພິສູດໃຫ້ເຫັນການແກ້ໄຂການພົວພັນທີ່ເປັນປໍລະປັກ ແລະ ສູ້ຢັນທີ່ແກ່ຍາວໃນເວລາຫລາຍປີ ສຳເລັດຜົນ ໄດ້ກາຍເປັນຄູ່ຮ່ວມມື ຄູ່ເຈລະຈາ ເພື່ອສັນຕິພາບ ແລະ ພັດທະນາ, ສອດຄອ່ງກັບທ່າອ່ຽງຍຸກສະໄຫມ.
ນະໂຍບາຍຫລ້າຫລັງຖືກປະລາໄຊ
ຫາງສຽງສາກົນ ເປັນຕົ້ນແມ່ນຢູ່ ພາກພື້ນ ອາເມລິກາ ລາຕີນ ແລະ ຜູ້ຮັກຫອມສັນຕິພາບໃນໂລກ ລ້ວນແຕ່ຊົມເຊີຍເຫດການນີ້ ແລະ ຖືວ່າ ນີ້ແມ່ນຈຸດເວລາເປັນຂີດໝາຍການລົບລ້າງຫນຶ່ງໃນບັນດາຮ່ອງຮອຍຍັງຄົງຄ້າງຂອງສົງຄາມເຢັນ.
ເພາະຄວາມຈິງ, ການພົວພັນລະຫວ່າງ ກູບາ ແລະ ອາເມລິກາ ໃນຫລາຍສີບປີຜ່ານມາ ຍາມໃດກໍແມ່ນຈຸດສຸມໃນການພົວພັນສາກົນ. ນະໂຍບາຍເປັນປໍລະປັກ, ປິດລ້ອມຂວ້ຳບາດທີ່ແກ່ຍາວໃນຫລາຍປີ ໄດ້ກີດຂວາງການພັດທະນາຂອງກູບາ ໄດ້ສົ່ງຜົນສະທ້ອນຢ່າງແຮງເຖິງປະຊາຊົນສອງປະເທດ. ເຖິງຢ່າງໃດກໍຕາມ, ໃນກວ່າ 5 ທົດສະວັດຜ່ານມາ, ໂດຍບໍ່ຫົວຊາຕໍ່ການປິດລ້ອມ, ຂວ້ຳບາດຈາກ ອຳນາດການປົກຄອງ ອາເມລິກາ, ປະຊາຊົນ ກູບາ ຜູ້ຮັກຫອມສັນຕິພາບ, ເສລິພາບ ແລະ ຍຸຕິທຳ ຍັງຄົງສາມັກຄີເປັນຈິດຫນຶ່ງໃຈດຽວ ພາຍໃຕ້ການນຳພາຂອງພັກກອມມູນິດ ກູບາ ໂດຍທ່ານຜູ້ນຳ Fidel Catro ເປັນຫົວຫນ້າ. ພັກ, ລັດ ແລະ ປະຊາຊົນ ກູບາ ໄດ້ຜ່ານຜ່າຄວາມຫຍຸ້ງຍາກ, ສິ່ງທ້າທາຍຫລາຍຢ່າງ, ປົກປັກຮັກສາໝາກຜົນການປະຕິວັດຢ່າງໝັ້ນຄົງ ແລະ ນຳປະເທດຊາດສືບຕໍ່ກ້າວຂຶ້ນຕາມເສັ້ນທາງທີ່ໄດ້ເລືອກເຟັ້ນ. ສິ່ງດັ່ງກ່າວສະແດງໃຫ້ເຫັນນະໂຍບາຍເປັນປໍລະປັກຂອງອາເມລິກາ ເພື່ອແນໃສ່ເຮັດໃຫ້ກູບາ ຕົກຢູ່ໂດດດ່ຽວ ຄວາມຈິງບໍ່ນຳມາເຊິ່ງຄຸນປະໂຫຍດຄືດັ່ງຄວາມຫວັງຂອງ ວໍຊີງຕັນ ໃນເບື້ອງຕົ້ນ. ຊ້ຳບໍ່ໜຳ ຍັງກໍ່ຄຸນປະໂຫຍດກົງກັນຂ້າມ ແລະ ນັບມື້ນັບສະແດງໃຫ້ເຫັນຄວາມຫລ້າຫລັງໃນຊີວິດຂອງສາກົນຍຸກປະຈຸບັນ.
ເມື່ອຂຶ້ນກຳອຳນາດໃນປີ 2008, ອຳນາດການປົກຄອງ ປະທານາທິບໍດີ B.Obama ໄດ້ຍອມຮັບວ່າ ນະໂຍບາຍຂວ້ຳບາດຂອງ ອາເມລິກາ ຕ້ານ ກູບາ ໃນຫລາຍທົດສະວັດຜ່ານມາ ບໍ່ບັນລຸຄາດໝາຍ ຊື່ງວໍຊີງຕັນ ມຸ້ງຫວັງ. ປະທານາທິບໍດີ B.Obama ຍັງພ້ອມແລ້ວຈະເຈລະຈາກັບ ລາຮາວານ ເພື່ອປົວແປງການພົວພັນສອງຝ່າຍ. ພ້ອມກັບນະໂຍບາຍເຈລະຈາຂອງ ປະທານາທິບໍດີ B.Obama, ບັນດານະໂຍບາຍປ່ຽນໃຫມ່ການປະຕິຮູບຢ່າງແຮງຢູ່ ກູບາ ແລະ ການກະທົບ, ສະຫນັບສະຫນູນຢ່າງແຮງຈາກປະຊາຄົມສາກົນ, ສອງປະເທດ ໄດ້ມີກຳລັງຫນູນຢ່າງແຮງເພື່ອລົບລ້າງການເປັນປໍລະປັກ,ສູ້ຢັນ ເພື່ອພ້ອມກັນຮ່ວມມືພັດທະນາຢ່າງຍຸຕິທຳ.
ຍັງມີຄວາມຫຍຸ້ງຍາກຫລາຍຢ່າງ ໃນຕໍ່ຫນ້າ
ອາດຈະຢັ້ງຢືນໄດ້ວ່າ ການພົວພັນລະຫວ່າງ ອາເມລິກາ ແລະ ກູບາ ໄດ້ເປີດຫນ້າປະຫວັດສາດໃຫມ່ ພາຍຫລັງວັນທີ 20/7/2015. ເຖິງຢ່າງໃດກໍຕາມ, ທັງສອງປະເທດ ລ້ວນແຕ່ມີຄວາມລະມັດລະວັງ ເມື່ອເນັ້ນຫນັກວ່າ ທັງໝົດພຽງແຕ່ແມ່ນຈຸດເລີ່ມຕົ້ນ. ເລື່ອງຜ່ານຜ່າຫລາຍທົດສະວັດທີ່ເປັນປໍລະປັກ ດ້ວຍຄວາມເຈັບປວດບໍ່ແມ່ນຫນ້ອຍ ແມ່ນສິ່ງບໍ່ແມ່ນງ່າຍດາຍ. ຈາກການພົວພັນເປັນປົກກະຕິ ຕະຫລອດຮອດຍົກເລີກການຂວ້ຳບາດ, ນັ້ນແມ່ນວິວັດການຫຍຸ້ງຍາກ ແລະ ສັບສົນ. ສິ່ງກີດຂວາງ ນັ້ນແມ່ນ ສະພາແຫ່ງຊາດ ອາເມລິກາ. ເພາະວ່າ ກົດໝາຍຂ້ວຳບາດ ໂດຍສະພາແຫ່ງຊາດ ອາເມລິກາ ຮັບຮອງເອົາ ປະຈຸບັນ ຢາກຍົກເລີກ ຕ້ອງມີການຮັບຮອງເອົາຈາກສະພາແຫ່ງຊາດ. ຄວາມຫຍຸ້ງຍາກທີ່ສຸດໃນໄລຍະນີ້ ນັ້ນແມ່ນ ເລື່ອງປະທານາທິບໍດີ ອາເມລິກາ ມີພຽງອີກ 2 ປີ ຈະສິ້ນສຸດອາຍຸການ. ເຖິງຢ່າງໃດກໍຕາມ ດ້ວຍການປະຕິບັດນະໂຍບາຍການຕ່າງປະເທດໃນໄລຍະມໍ່ໆມານີ້ຂອງອຳນາດການປົກຄອງ ອາເມລິກາ, ໃນນັ້ນ ມີເລື່ອງນຳ ກູບາ ອອກຈາກບັນຊີລາຍຊື່ບັນດາປະເທດອຸປະຖຳກໍ່ການຮ້າຍ, ເງື່ອນໄຂຕັດສິນເບື້ອງຕົ້ນໃນວິວັດທະນາການເຈລະຈາສ້າງການພົວພັນດ້ານການທູດເປັນປົກກະຕິ, ປະຊາຊົນ ກູບາ ແລະ ອາເມລິກາ ມີຄວາມປະເອີບໃຈກ່ຽວກັບຄວາມຄືບຫນ້າຂອງການພົວພັນລະຫວ່າງສອງປະເທດໃນຊຸມມື້ຈະມາເຖິງ. ເຖິງຢ່າງໃດກໍຕາມ ຍັງມີຄວາມຫຍຸ້ງຍາກຫລາຍຢ່າງ ເພາະວ່າ ບາດກ້າວປິດລ້ອມຂວ້ຳບາດ ກູບາ ຄືແນວໃດ, ການແກ້ໄຂສິ່ງກີດຂວາງກໍຈະຖືກດຳເນີນໄປຕາມລຳດັບ ຫາກບໍ່ສາມາດວ່ອງໄວ ແລະ ມີບາດກ້າວບຸກທະລຸຜິດປົກກະຕິໄດ້.
ເລື່ອງ ອາເມລິກາ ແລະ ກູບາ ຟື້ນຟູ ການພົວພັນດ້ານການທູດ ບໍ່ພຽງແຕ່ສິ້ນສຸດສົງຄາມເຢັນຊື່ງແບ່ງແຍກໂລກເປັນສອງຝ່າຍ ຢ່າງເປັນທາງການເທົ່ານັ້ນ ຫາກຍັງເປີດຫນ້າປະຫວັດສາດໃຫມ່ໃຫ້ສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ກໍຄືໃນໂລກ. ສອງປະເທດທີ່ເປັນປໍລະປັກໃນສະໄຫມສົງຄາມເຢັນ, ສອງຊາດມີຄວາມແຕກຕ່າງກັນກ່ຽວກັບແນວຄິດ, ສອງປະເທດນຳຫນ້າສອງກຸ່ມມີແນວຄິດກົງກັນຂ້າມ, ການຟື້ນຟູການພົວພັນພາຍຫລັງເຄິ່ງສັດຕະວັດຖືກຢຸດສະຫງັກ ໄດ້ສົ່ງສານປະຫວັດສາດຢ່າງແຮງ. ນັ້ນແມ່ນ ການເຈລະຈາແທນທີ່ການສູ້ຢັນ, ດຳລົງຊີວິດໃນສັນຕິພາບ ແລະ ເຄົາລົບຄວາມແຕກຕ່າງຂອງກັນ ແມ່ນທ່າອ່ຽງລວມ ແລະ ແມ່ນບັນຫາຕົ້ນຕໍຂອງຍຸກສະໄຫມ.