(vovworld)- ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ຫາກໍສິ້ນສຸດການຢ້ຽມຢາມສະຫະລັດອາເມລິກາ ຢ່າງເປັນທາງການ ຕາມຄຳເຊີນຂອງອຳນາດການປົກຄອງປະທານາທິບໍດີ Barack Obama. ດ້ວຍທິດນຳ “ປີດອະດີດຕະການ, ຜ່ານຜ່າຄວາມແຕກຕ່າງ, ເສີມຂະຫຍາຍຈຸດທີ່ຄ້າຍຄືກັນ, ມຸ່ງໄປສູ່ອະນາຄົດ.. ເພື່ອເພີ່ມທະວີຄວາມເຂົ້າອົກເຂົ້າໃຈ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະກັນ, ການຢ້ຽມຢາມ ອາເມລິກາ ຢ່າງເປັນທາງການຂອງທ່ານເລຂາທິການໃຫຍ່ ຫງວຽນຟູຈ້ອງ ແມ່ນການຢ້ຽມຢາມຄັ້ງປະຫວັດສາດ ນຳການພົວພັນລະຫວ່າງສອງປະເທດພັດທະນານັບມື້ນັບຮອບດ້ານ ແລະ ແທດຈິງ. ບົດຂຽນຂອງນັກຂ່າວ ຫວູຢີ ລວບລວມການຢ້ຽມຢາມອາເມລິກາ ຂອງທ່ານເລຂາທິການໃຫຍ່ ຫງວຽນຟູຈ້ອງ.
ທ່ານເລຂາທິການໃຫຍ່ ຫງວຽນຟູຈ້ອງ ພົບປະກັບທ່ານເລຂາທິການໃຫຍ່ ສປຊ Ban Ki Moon
ພາບ:AFP
|
ນັບແຕ່ເມື່ອໄດ້ຮັບຂ່າວວ່າ ທ່ານເລຂາທິການໃຫຍ່ ຫງວຽນຟູຈ້ອງ ຈະໄປຢ້ຽມຢາມອາເມລິກາ ຢ່າງເປັນທາງການ, ຫາງສຽງຢູ່ພາຍໃນປະເທດ ແລະ ສາກົນ ໄດ້ສະຫງວນຄວາມສົນໃຈພິເສດ ເພາະວ່າ ນີ້ເປັນຄັ້ງທຳອິດໃນປະຫວັດສາດ, ເລຂາທິການໃຫຍ່ພັກກອມມູນິດຫວຽດນາມ ໄປຢ້ຽມຢາມ ອາເມລິກາ ແລະ ກົງກັບໂອກາດສະເຫລີມສະຫລອງ 20 ປີແຫ່ງການສ້າງການພົວພັນລະຫວ່າງສອງປະເທດ ເປັນປົກກະຕິ. ຮູບພາບປະທານາທິບໍດີ ອາເມລິກາ B. Obama ຈັບມືທ່ານເລຂາທິການໃຫຍ່ ຫງວຽນຟູຈ້ອງ ຢູ່ ຫ້ອງຮັບແຂກຂອງທຳນຽບຂາວ ໄດ້ຮັບການລົງພິມໃນຫນ້າທຳອິດຂອງບັນດາຫນັງສືພິມສຳຄັນຂອງໂລກ ໄດ້ສະແດງໃຫ້ເຫັນວ່າ ນີ້ກາຍເປັນເຫດການສື່ສານສາກົນ.
ການເຈລະຈາເພື່ອອະນາຄົດ
ການເຈລະຈາລະຫວ່າງ ທ່ານເລຂາທິການໃຫຍ່ ຫງວຽນຟູຈ້ອງ ແລະ ປະທານາທິບໍດີ ອາເມລິກາ B.Obama ຢູ່ ທຳນຽບຂາວຕາມແຜນການແມ່ນດຳເນີນໃນເວລາ 45-60 ນາທີ ແຕ່ຄວາມຈິງໄດ້ແກ່ຍາວເຖິງ 95 ນາທີ ແລະ ຄະນະຜູ້ແທນອາເມລິກາ ເຂົ້າຮ່ວມການເຈລະຈາ ລ້ວນແຕ່ແມ່ນເຈົ້າຫນ້າທີ່ຂັ້ນສູງ ສິ່ງພິເສດແມ່ນກ່ອນນີ້ບໍ່ເຄີຍມີ. ການນຳສອງທ່ານ ໄດ້ແລກປ່ຽນກ່ຽວກັບການພົວພັນສອງຝ່າຍ, ນັບທັງບັນດາບັນຫາຍັງມີຄວາມແຕກຕ່າງຢ່າງເປີດເຜີຍ, ຈິງໃຈ ແລະ ແທດຈິງ. ຖະແຫລງກັບວົງການສື່ສານພາຍຫລັງການເຈລະຈາ, ທ່ານປະທານາທິບໍດີ ອາເມລິກາ B.Obama ໄດ້ເວົ້າວ່າ: “ນີ້ແມ່ນກາລະໂອກາດດີເລີດ ເພື່ອໃຫ້ຫວຽດນາມ ແລະ ອາເມລິກາ ເຈລະຈາ ກ່ຽວກັບວິໄສທັດ ໃນສາຍພົວພັນຮ່ວມມືຮອບດ້ານຢ່າງຍາວໄກກວ່າ. ສ່ວນທ່ານເລຂາທິການໃຫຍ່ ຫງວຽນຟູຈ້ອງ ໄດ້ຢືນຢັນ:
“ອະດີດຕະການບໍ່ມີໃຜສາມາດປ່ຽນແປງໄດ້ ແຕ່ອະນາຄົດແມ່ນຂຶ້ນກັບຄວາມຮັບຜິດຊອບຂອງພວກເຮົາ. ບົນພື້ນຖານຫວນຄືນຢ່າງຮອບດ້ານການພົວພັນລະຫວ່າງສອງປະເທດໃນໄລຍະຜ່ານມາ, ເປັນຕົ້ນໃນ 20 ປີມໍ່ໆມານີ້, ພວກຂ້າພະເຈົ້າໄດ້ແລກປ່ຽນຢ່າງເລິກເຊິ່ງ, ກວ້າງຂວາງ ແລະ ຮອບດ້ານກ່ຽວກັບທິດທາງຈະມາເຖິງຂອງສອງປະເທດ ຕ້ອງສືບຕໍ່ພັດທະນາການພົວພັນລະຫວ່າງສອງຝ່າຍໃຫ້ດີງາມກວ່າ, ມຸ້ງໄປເຖິງການພົວພັນທີ່ມີຄຸນນະພາບກວ່າ, ເຮັດໃຫ້ການພົວພັນຮອບດ້ານເລິກເຊິ່ງກວ່າ.”
ເລື່ອງບັນລຸໄດ້ຖະແຫຼງການກ່ຽວກັບວິໄສທັດຮ່ວມ ຫວຽດນາມ - ອາເມລິກາ ແມ່ນພະຍານຫຼັກຖານສະແດງໃຫ້ເຫັນຄວາມຕັດສິນໃຈຂອງການນຳ 2 ປະເທດໃນການກຳນົດທິດທາງພົວພັນໃນ 20 ປີຈະມາເຖິງໃນທຸກໆຂົງເຂດ. ເອກະສານ 15 ສະບັບໄດ້ຮັບການລົງນາມໃນການຢ້ຽມຢາມຂອງທ່ານເລຂາທິການໃຫຍ່ ຫງວຽນຟູ໋ຈ້ອງ, ໃນນັ້ນມີສັນຍາກ່ຽວກັບການເກັບພາສີຊ້ອນ, ເປັນເອກະພາບກ່ຽວກັບການຊຸກຍູ້ວິວັດການເຈລະຈາເພື່ອສາມາດ, ເຊັນສັນຍາຄູ່ຮ່ວມມືຂ້າມ ປາຊີຟິກ (TPP) ໂດຍໄວ, ແກ້ໄຂຮົ້ວກີດຂວາງດ້ານການຄ້າ. ທ່ານລັດຖະມົນຕີວ່າການກະຊວງອຸດສາຫະກຳ - ການຄ້າ ຫວູຮູຍຮ່ວາງ ໃຫ້ຮູ້ວ່າ:
“ໃນຖະແຫຼງການວິໄສທັດຮ່ວມ ຫວຽດນາມ - ອາເມລິກາ, 2 ຝ່າຍຢັ້ງຢືນສົມທົບກັນກັບຝ່າຍຕ່າງໆທີ່ກ່ຽວຂ້ອງຢ່າງແໜ້ນແຟ້ນເພື່ອສິ້ນສຸດສັນຍາ TPP ໂດຍໄວ ແລະ ປະຕິບັດບັນດາການປະຕິຮູບເພື່ອຕອບສະໜອງຄວາມຮຽກຮ້ອງຕ້ອງການສູງ ແລະ ລັກສະນະຮອບດ້ານຂອງ TPP. ແນ່ນອນວ່າ ພາຍຫຼັງການຢ້ຽມຢາມຄັ້ງປະຫວັດສາດນີ້, ການພົວພັນດ້ານເສດຖະກິດ, ການຄ້າ, ການລົງທຶນລະຫວ່າງ 2 ປະເທດຈະມີບາດກ້າວພັດທະນາໃໝ່”
ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ຜ່ານຜ່າບັນດາຄວາມແຕກຕ່າງກັນ
20 ປີແມ່ນໄລຍະເວລາບໍ່ຍາວໃນປະຫວັດສາດແຫ່ງການພົວພັນລະຫວ່າງປະເທດຕ່າງໆ. ແຕ່ໃນໄລຍະ 20 ປີນັ້ນ, ໂດຍຜ່ານຜ່າບັນດາຄວາມແຕກຕ່າງກັນ ແລະ ອະດີດຕະການ, 2 ປະເທດ ຫວຽດນາມ ແລະ ອາເມລິກາ ໄດ້ສ້າງຄວາມໄວ້ເນື້ອເຊື່ອໃຈດ້ານການເມືອງເທື່ອລະກ້າວ. ຈາກນັ້ນ, ຊຸກຍູ້ການພົວພັນອື່ນພັດທະນາ, ໃນນັ້ນມີຂົງເຂດປ້ອງກັນຊາດ - ປ້ອງກັນຄວາມສະຫງົບ. ພົນໂທ ຫງວຽນຈີ໋ວີ້ງ, ລັດຖະມົນຕີຊ່ວຍວ່າການກະຊວງປ້ອງກັນປະເທດ ເວົ້າເຖິງການຢ້ຽມຢາມ ອາເມລິກາ ຄັ້ງນີ້ຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ວ່າ:
“ໃນຖະແຫຼງການຮ່ວມຂອງ 2 ປະເທດ, ກໍຄືເນື້ອໃນການເຈລະຈາລະຫວ່າງປະມຸກລັດ 2 ທ່ານ ກໍໄດ້ເຕື້ອງເຖິງການພົວພັນດ້ານປ້ອງກັນຊາດຢ່າງເລິກເຊິ່ງ, ພິເສດແມ່ນຢັ້ງຢືນຄືນໃໝ່ເລື່ອງຈະປະຕິບັດບົດບັນທຶກຊ່ວຍຈຳດ້ານປ້ອງກັນຊາດປີ 2011 ຢ່າງຄົບຖ້ວນ, ກໍຄືແມ່ນວິໄສທັດຮ່ວມກ່ຽວກັບການພົວພັນດ້ານປ້ອງກັນຊາດ ເຊິ່ງລັດຖະມົນຕີວ່າການກະຊວງການປ້ອງກັນປະເທດ ຫາກໍລົງນາມເມື່ອເດືອນ 6 ຜ່ານມາຢູ່ ຮ່າໂນ້ຍ. ສິ່ງດັ່ງກ່າວໄດ້ສະແດງໃຫ້ເຫັນການພົວພັນດ້ານປ້ອງກັນປະເທດ ມີການປະກອບສ່ວນໃນການເພີ່ມທະວີການພົວພັນລະຫວ່າງ 2 ປະເທດຢ່າງແທດຈິງ, ພິເສດແມ່ນສ້າງຄວາມໄວ້ເນື້ອເຊື່ອໃຈ.”
ທ່ານເລຂາທິການໃຫຍ່ ຫງວຽນຟູຈ້ອງ ພົບປະກັບ ການນຳບັນດາສາສະຫນາ ອາເມລິກາ
|
ກ່ຽວກັບບັນດາບັນຫາຍັງມີຄວາມແຕກຕ່າງ, ໃນການຢ້ຽມຢາມອາເມລິກາ ຄັ້ງນີ້, ບົນຈິດໃຈກົງໄປກົງມາ, ທ່ານເລຂາທິການໃຫຍ່ ຫງວຽນຟູຈ້ອງ ໄດ້ແລກປ່ຽນກັບບັນດານັກຮຽນຮູ້ຂອງສູນຄົ້ນຄ້ວາຍຸດທະສາດ ແລະ ສາກົນ ອາເມລິກາ, ການນຳບັນດາສາສະຫນາ ອາເມລິກາ ກ່ຽວກັບບັນຫາປະຊາທິປະໄຕ, ມະນຸດສະທຳ, ສາສະຫນາ ຢູ່ ຫວຽດນາມ. ຊື່ງແມ່ນສະມາຊິກຂອງຄະນະຜູ້ແທນສາສະຫນາ ຮ່ວມເດີນທາງກັບເລຂາທິການໃຫຍ່ ຫງວຽນຟູຈ້ອງ, ພະອາຈານ ທິກຈີທ້ຽນ ຕີລາຄາສູງການຈັດຕັ້ງບັນດາການໂອ້ລົມສົນທະນາຄືດັ່ງກ່າວ.
“ທ່ານເລຂາທິການໃຫຍ່ ຫງວຽນຟູຈ້ອງໄດ້ຕອບຄຳຖາມຂອງບັນດານັກຮຽນຮູ້, ການນຳສາສະຫນາອາເມລິກາ ຢ່າງຈິງໃຈ, ຍົກອອກສານກ່ຽວກັບການດຳເນີນຊີວິດທາງສາສະຫນາຢ່າງຈະແຈ້ງ. ການດຳເນີນຊີວິດທາງສາສະຫນາຢູ່ ຫວຽດນາມ ບໍ່ມີຄວາມຂັດແຍ້ງ, ປະທະກັນ ເຊິ່ງໄດ້ສະແດງໃຫ້ເຫັນຜ່ານສະມາຊິກຄະນະຜູ້ແທນສາສະຫນາທີ່ຮ່ວມເດີນທາງກັບທ່ານເລຂາທິການໃຫຍ່ ລວມມີ: ສາສະຫນາພຸດ, ຂ່າວປະເສີດ. ຜ່ານນັ້ນ ບັນດາຫລວງພໍ່ຂອງອາເມລິກາ ມີຄວາມປິຕິຊົມຊື່ນເມື່ອຮູ້ບັນດາຂ່າວຄາວລະອຽດ.”
ແງ່ຫວັງໃຫມ່ກ່ຽວກັບນ້ຳໃຈມິດຕະພາບອັນດີງາມ, ຍາວນານ
ໃນການຢ້ຽມຢາມ, ທ່ານເລຂາທິການໃຫຍ່ ຫງວຽນຟູຈ້ອງ ກໍໄດ້ມີການພົບປະກັບວົງຄະນາຍາດຊາວຫວຽດນາມ ອາໄສຢູ່ ອາເມລິກາ. ຮູບພາບທ່ານເລຂາທິການໃຫຍ່ ຫງວຽນຟູຈ້ອງ ພ້ອມກັບພໍ່ແມ່ຊາວຫວຽດນາມ ອາໄສຢູ່ ອາເມລິກາ ຮ້ອງເພງ ໄດ້ສ້າງຂີດໝາຍອັນດີງາມ, ສະແດງໃຫ້ເຫັນຈິດໃຈສາມັກຄີ, ປ່ອງດອງຊາດ, ເປັນເອກະພາບຂອງຊາດຫວຽດນາມ. ທີ່ນະຄອນ ນິວຢອກ, ທ່ານເລຂາທິການໃຫຍ່ ຫງວຽນຟູຈ້ອງ ໄດ້ມີການພົບປະກັບທ່ານເລຂາທິການໃຫຍ່ ສປຊ Ban Ki Moon ທີ່ສຳນັກງານ ສປຊ. ທີ່ການພົບປະຄັ້ງນີ້, ອີກຄັ້ງຫນຶ່ງ ຜູ້ນຳອົງການ ສປຊ ໄດ້ຢ້ຳຄືນທັດສະນະກ່ຽວກັບບັນຫາທະເລຕາເວັນອອກ, ນັ້ນແມ່ນການສະຫນັບສະຫນູນການແກ້ໄຂ ບັນດາຄວາມຂັດແຍ້ງໂດຍສັນຕິໃຫ້ສອດຄ່ອງກັບ ກົດບັດ ສປຊ ແລະ ກົດໝາຍສາກົນ, ໃນນັ້ນ ມີສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລປີ 1982.
ກ່ອນນີ້ເກືອບ 70 ປີ, ໃນຈົດໝາຍສົ່ງເຖິງ ປະທານາທິບໍດີ Truman ເມື່ອວັນທີ 16/2/1946, ທ່ານປະທານ ໂຮ່ຈິມີນ ໄດ້ຊີ້ແຈ້ງ ຈຸດໝາຍຂອງ ຫວຽດນາມ ແມ່ນ “ເອກະລາດຢ່າງສົມບູນ ແລະ ຮ່ວມມືຮອບດ້ານກັບ ອາເມລິກາ”. ປະຈຸບັນ, ສອງປະເທດ ໄດ້ ແລະ ພວມປະຕິບັດຄວາມມຸ່ງຫວັງນີ້ໃຫ້ປະກົດຜົນເປັນຈິງ. ການຢ້ຽມຢາມ ອາເມລິກາຄັ້ງນີ້ ຂອງທ່ານເລຂາທິການໃຫຍ່ ຫງວຽນຟູຈ້ອງ ໄດ້ສ້າງພື້ນຖານຢ່າງໝັ້ນຄົງໃຫ້ການພົວພັນລະຫວ່າງ ຫວຽດນາມ ແລະ ອາເມລິກາ ມີບັນດາບາດກ້າວບຸກທະລຸ, ຂຶ້ນສູ່ລະດັບສູງໃຫມ່ໃນໄລຍະຈະມາເຖິງ. /.