(vovworld)- ປະທານາທິບໍດີ ເບລາຣຸດ Aleksandr Grigorievich Lukashenko ພວມຢ້ຽມຢາມທາງລັດຖະກິດເຖິງຫວຽດນາມ ໃນວັນທີ 8-9/12/2015. ການຢ້ຽມຢາມແມ່ນເຫດການການເມືອງສຳຄັນໃນການພົວພັນລະຫວ່າງຫວຽດນາມ ແລະ ເບລາຣຸດ ເພື່ອຊຸກຍູ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືສອງຝ່າຍໃນຫລາຍຂົງເຂດ.
ທ່ານເລຂາທິການໃຫຍ່ຫງວຽນຟູຈ້ອງແລະປະທານາທິບໍດີ
ເບລາຣຸດ Aleksandr Grigorievich Lukashenko
ພາບ:TTXVN
|
ຫວຽດນາມ ແລະ ເບລາຣຸດ ໄດ້ສ້າງຕັ້ງສາຍພົວພັນທາງການທູດ ເມືື່ອວັນທີ 24/1/1992. ປີ 1998, ເບລາຣຸດ ເປີດສະຖານທູດ ປະຈຳຫວຽດນາມ. ເດືອນ 10/2003, ຫວຽດນາມ ເປີດສະຖານທູດ ປະຈຳ ເບລາຣຸດ ແລະ ສົ່ງເອກອັກຄະລັດຖະທູດ ຜູ້ທຳອິດ ໄປປະຈຳຢູ່ປະເທດນີ້ ໃນເດືອນ 3/2005.
ການພົວພັນດ້ານການເມືອງຢ່າງດີງາມ
ໂດຍສືບທອດການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານ ເຊິ່ງມີມາແຕ່ສະໄຫມໂຊວຽດ ເກົ່າ (ສະຫະພັນລັດເຊຍ ປະຈຸບັນ), ການພົວພັນລະຫວ່າງ ຫວຽດນາມ ແລະ ເບລາຣຸດ ພວມພັດທະນາຢ່າງດີງາມ. ສາຍພົວພັນຢ່າງດີງາມນີ້ນັບມື້ນັບໄດ້ຮັບການຍົກສູງຂຶ້ນ ດ້ວຍການຢ້ຽມຢາມ ເບລາຣຸດ ໃນໄລຍະມໍ່ໆມານີ້ ຂອງທ່ານເລຂາທິການໃຫຍ່ ຫງວຽນຟູຈ້ອງ ເມື່ອເດືອນ 11/2014, ການຢ້ຽມຢາມຂອງທ່ານນາຍົກລັດຖະມົນຕີ ຫງວຽນເຕີນຢູງ ເມື່ອເດືອນ 5/2013. ປະທານາທິບໍດີ ເບລາຣຸດ ກໍໄດ້ມາຢ້ຽມຢາມຫວຽດນາມ ຢ່າງເປັນທາງການເມື່ອປີ 1997 ແລະ 2008. ປະທານສະພາຕ່ຳ ເບລາຣຸດ ມາຢ້ຽມຢາມຫວຽດນາມ ໃນປີ 2010. ຫວຽດນາມ ແລະ ເບລາຣຸດ ໄດ້ລົງນາມໃນສັນຍາແມ່ກ່ຽວກັບການຮ່ວມມືເສດຖະກິດ, ການຄ້າ, ການທູດ, ການສຶກສາ, ການບິນ, ກະສິກຳ, ທະນາຄານ, ການຮ່ວມມືລະຫວ່າງບັນດາທ້ອງຖິ່ນ. ເບລາຣຸດ ຖືການພົວພັນ ແລະ ທີ່ຕັ້ງບົດບາດຂອງຫວຽດນາມເປັນສຳຄັນ, ຖືຫວຽດນາມ ແມ່ນຄູ່ຮ່ວມມືໄວ້ເນື້ອເຊື່ອໃຈຂອງ ເບລາຣຸດ ໃນເວທີສາກົນ. ສອງປະເທດ ໄດ້ສົມທົບກັນດຳເນີນງານຢ່າງແຫນ້ນແຟ້ນ ແລະ ສະຫນັບສະຫນູນເຊິ່ງກັນ ແລະ ກັນ ທີ່ ສປຊ ແລະ ບັນດາເວທີປາໄສສາກົນ.
ການຮ່ວມມືດ້ານເສດຖະກິດ ການຄ້າໄດ້ຮັບການເປີດກວ້າງຢ່າງບໍ່ຢຸດຢັ້ງ
ປີ 2011, ວົງເງິນການຄ້າສອງສົ້ນ ຫວຽດນາມ - ເບລາຣຸດ ບັນລຸເກືອບ 211 ລ້ານ USD. ປີ 2014, ບັນລຸກວ່າ 107 ລ້ານ USD. ໃນ 8 ເດືອນຕົ້ນປີ 2015, ວົງເງິນການຄ້າສອງສົ້ນ ແມ່ນ 95,8 ລ້ານ USD. ຫວຽດນາມ ສົ່ງອອກສິນຄ້າໄປຍັງ ເບລາຣຸດ ສ່ວນຫລາຍແມ່ນ: ສິນໃນນ້ຳ, ສິນທະເລ, ເຄື່ອງເຟີນີເຈີ, ເຄື່ອງຕ່ຳແຜ່ນຕັດຫຍິບ, ເກີບຫນັງ, ເຂົ້າສານ, ຢາງພາລາ, ໝາກພິກໄທ, ຊາ. ສ່ວນບັນດາປະເພດສິນຄ້າຂອງເບລາຣຸດ ສົ່ງໄປຂາຍຢູ່ຫວຽດນາມ ແມ່ນ ຟຸ່ນເຄມີ, ກົນຈັກ, ອຸປະກອນ, ເຄື່ອງອາໄຫລ່ລົດໂອໂຕ, ເຄມີ…
ຫວຽດນາມ ແລະ ພັນທະມິດພາສີ ຊື່ງລວມມີ ລັດເຊຍ, ເບລາຣຸດ ແລະ ກາຊັກສະຖານ ໄດ້ດຳເນີນການເຈລະຈາສັນຍາການຄ້າເສລີ 8 ຄັ້ງ. ວັນທີ 15/12/2014, ຢູ່ ຫວຽດນາມ ສອງຝ່າຍໄດ້ຈັດຕັ້ງພິທີຖະແຫລງກ່ຽວກັບການສິ້ນສຸດການເຈລະຈາສັນຍາການຄ້າເສລີ ໂດຍພື້ນຖານ. ເດືອນ 5/2015, ຫວຽດນາມ ແລະ ບັນດາປະເທດສະມາຊິກ ພັນທະມິດເສດຖະກິດ ອາຊີ ເອີລົບ ໄດ້ລົງນາມໃນສັນຍາການຄ້າເສລີ ຢ່າງເປັນທາງການ.
ຂົງເຂດການສຶກສາບຳລຸງສ້າງ ກໍແມ່ນຂົງເຂດຮ່ວມມືຕົ້ນຕໍ ລະຫວ່າງ ຫວຽດນາມ ແລະ ເບລາຣຸດ. ເບລາຣຸດ ໄດ້ຊ່ວຍຫວຽດນາມ ບຳລຸງສ້າງພະນັກງານ, ຜູ້ຊ່ຽວຊານມີລະດັບວິຊາສະເພາະສູງ ຫລາຍຄົນ. ປະຈຸບັນ ມີນັກສຶກສາຫວຽດນາມ ປະມານ 70 ຄົນພວມຮ່ຳຮຽນ ຢູ່ ເບລາຣຸດ.
ການຮ່ວມມືດ້ານວິທະຍາສາດເຕັກໂລໂລຊີ ລະຫວ່າງສອງປະເທດ ໄດ້ຮັບການຮັກສາ ແລະພັດທະນາໃນຫລາຍປີຜ່ານມາ. ບັນດາອົງການຈັດຕັ້ງວິທະຍາສາດ ແລະ ເຕັກໂນໂລຊີສອງປະເທດ ໄດ້ຜັນຂະຫຍາຍຫລາຍໂຄງການຮ່ວມມື ແລະ ບັນລຸໝາກຜົນອັນດີງາມ. ຄະນະກຳມະການຮ່ວມມືກ່ຽວກັບວິທະຍາສາດ ແລະ ເຕັກນິກ ຫວຽດນາມ - ເບລາຣຸດ ໄດ້ດຳເນີນກອງປະຊຸມເປັນ 8 ສະໄຫມແລ້ວ.
ການຮ່ວມມືແຮງງານ ແມ່ນທິດທາງການຮ່ວມມືໃຫມ່ລະຫວ່າງສອງປະເທດ. ບັນດາວິສາຫະກິດ ຫວຽດນາມໄດ້ ລົງນາມໃນສັນຍາກັບບໍລິສັດກໍ່ສ້າງຂອງ ເບລາຣຸດ ສົ່ງຄົນງານຫວຽດນາມ ໄປເຮັດວຽກຢູ່ກິດຈະກຳກໍ່ສ້າງສູນກິລາບັນເທິງຢູ່ ນະຄອນຫລວງ Minsk. ສັນຍາລະຫວ່າງລັດຖະບານ ກ່ຽວກັບການເຮັດວຽກໂດຍມີການກຳນົດເວລາຂອງພົນລະເມືອງສອງປະເທດ ໃນເຂດດິນແດນຂອງສອງປະເທດໄດ້ຮັບການລົງນາມເມື່ອປີ 2011 ແລະ ມີຜົນສັກສິດນັບແຕ່ວັນທີ 6/6/2013 ເປັນຕົ້ນໄປ.
ແງ່ຫວັງຊຸກຍູ້ການພົວພັນສອງຝ່າຍ
ການຢ້ຽມຢາມທາງລັດຖະກິດເຖິງຫວຽດນາມ ຂອງປະທານາທິບໍດີ ເບລາຣຸດ ເພື່ອຊຸກຍູ້ການພົວພັນມິດຕະພາບທີ່ເປັນມູນເຊື້ອ, ການຮ່ວມມືຫລາຍດ້ານ ລະຫວ່າງຫວຽດນາມ ແລະ ເບລາຣຸດ ຕອບສະຫນອງຄວາມຮຽກຮ້ອງຕ້ອງການພັດທະນາຂອງແຕ່ລະປະເທດ, ຮັກສາການແລກປ່ຽນຄະນະຜູ້ແທນຂັ້ນສູງ ເພື່ອປັບປຸງການພົວພັນດ້ານການເມືອງທີ່ໄວ້ເນື້ອເຊື່ອໃຈລະຫວ່າງການນຳສອງປະເທດ. ສິ່ງດັ່ງກ່າວຈະສ້າງເງື່ອນໄຂສະດວກ ຊຸກຍູ້ການຮ່ວມມືສອງຝ່າຍໃນຫລາຍຂົງເຂດ, ພິເສດ ແມ່ນຂົງເຂດເສດຖະກິດ ການຄ້າ ພາຍຫລັງສັນຍາການຄ້າເສລີ ຫວຽດນາມ -ພັນທະມິດເສດຖະກິດ ອາຊີ ເອີລົບ ມີຜົນສັກສິດ.