ຮ່າງກົດໝາຍວ່າດ້ວຍການລົງປະຊາມະຕິພວມຖືກນຳມາປຶກສາຫາລືຢູ່ທີ່ກອງປະຊຸມສະໄໝສາມັນສະພາແຫ່ງຊາດຫວຽດນາມຊຸດທີ 13. ກົດໝາຍວ່າດ້ວຍການລົງປະຊາມະຕິໄດ້ຮັບການສ້າງຂຶ້ນເພື່ອແນໃສ່ເສີມຂະຫຍາຍປະຊາທິປະໄຕ ແລະ ສິດເປັນເຈົ້າຂອງປະຊາຊົນ. ການສ້າງກົດໝາຍກໍແມ່ນເພື່ອແນໃສ່ຫັນລັດຖະທຳມະນູນປີ 2013 ເປັນລະອຽດ ແລະ ສ້າງລະບົບກົດໝາຍຂອງຫວຽດນາມໃຫ້ສົມບູນແບບ.
ປະຊາຊົນໄປປ່ອນບັດ |
ການລົງປະຊາມະຕິແມ່ນແບບວິທີເພື່ອໃຫ້ປະຊາຊົນສະແດງເຈດຈຳນົງ, ຄວາມມຸ່ງມາດປາດຖະໜາ ແລະ ສິດອຳນາດຂອງຕົນທີ່ມີຕໍ່ບັນດາບັນຫາທີ່ສຳຄັນຂອງປະເທດຊາດໃນແຕ່ລະໄລຍະລະອຽດ. ການລົງປະຊາມະຕິແມ່ນຮູບການທີ່ສຳຄັນໃນການປະຕິບັດປະຊາທິປະໄຕຂອງປະຊາຊົນ, ແມ່ນບາດກ້າວຂອງພື້ນຖານປະຊາທິປະໄຕ, ຮ່າງກົດໝາຍວ່າດ້ວຍການລົງປະຊາມະຕິມີບາງບັນຫາໄດ້ຮັບຄວາມສົນໃຈນຳມາປຶກສາຫາລືຈາກບັນດາສະມາຊິກສະພາແຫ່ງຊາດເຊັ່ນ: ເນື້ອໃນຂອງການລົງປະຊາມະຕິ; ຂອບເຂດຂອງການລົງປະຊາມະຕິ; ອົງການສຳນັກງານຮັບຜິດຊອບການລົງປະຊາມະຕິ; ການແກ້ໄຂຕໍ່ການຮ້ອງທຸກກ່ຽວກັບ ຜົນຂອງການລົງປະຊາມະຕິ.
ເສີມຂະຫຍາຍສິດປະຊາທິປະໄຕຂອງປະຊາຊົນ
ເສີມຂະຫຍາຍປະຊາທິປະໄຕ ແລະ ສິດເປັນເຈົ້າຂອງປະຊາຊົນ, ເປີດກ້ວາງບັນດາຮູບການປະຊາທິປະໄຕໃຫ້ແກ່ປະຊາຊົນໂດຍກົງ ແມ່ນຫຼັກການພື້ນຖານໃນຮ່າງກົດໝາຍວ່າດ້ວຍການລົງປະຊາມະຕິ. ຫຼັກການທີ່ສຳຄັນອີກອັນໜຶ່ງຖືກຊີ້ແຈ້ງໃນຮ່າງກົດໝາຍແມ່ນເຊີດຊູສິດອຳນາດຂອງປະຊາຊົນ, ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເພີ່ມທະວີຄວາມເຫັນດີເຫັນພ້ອມໃນສັງຄົມ. ບັນດາສະມາຊິກສະພາແຫ່ງຊາດເນັ້ນໜັກວ່າ ເຊີດຊູສິດອຳນາດຂອງປະຊາຊົນ ໝາຍຄວາມວ່າ ເຈດຈຳນົງຂອງປະຊາຊົນແມ່ນສູງສຸດ. ແຕ່ເມື່ອເຊີດຊູສິດອຳນາດຂອງປະຊາຊົນນັ້ນ ຍັງຄົງຕ້ອງຕິດພັນກັບຄວາມເຫັນດີເຫັນພ້ອມຂອງສັງຄົມ. ທ່ານຟຸ່ງຄັກດັງ ສະມາຊິກສະພາແຫ່ງຊາດແຂວງເຊີນລາມີຄຳເຫັນດັ່ງນີ້ :
“ການລົງປະຊາມະຕິແມ່ນບາດກ້າວສຳພັດ ແລະ ເປີດກ້ວາງສິດປະຊາທິປະໄຕທີ່ມີ່ຕໍ່ປະຊາຊົນ. ຮ່າງກົດໝາຍວ່າດ້ວຍການລົງປະຊາມະຕິໄດ້ອະນຸຍາດໃຫ້ປະຊາຊົນມີສິດປະຊາທິປະໄຕຂອງຕົນຕໍ່ໜ້າບັນດາບັນຫາທີີ່ສຳຄັນຍິ່ງຂອງປະເທດຊາດ. ສິດປະຊາທິປະໄຕຂອງປະຊາຊົນໄດ້ຮັບການຮັບປະກັນ. ປະຊາຊົນມີສິດເຂົ້າຮ່ວມການຕັດສິນບັນດາບັນຫາທີ່ສຳຄັນຂອງປະເທດຊາດ ”
ທິດນຳ “ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ” ພວມນັບມື້ນັບໄດ້ຮັບການປະຕິບັດຢ່າງກ້ວາງຂວາງໃນຊີວິດສັງຄົມຫວຽດນາມ. ເພາະສະນັ້ນ, ການສ້າງ ກົດໝາຍວ່າດ້ວຍການລົງປະຊາມະຕິກໍເປັນການປະກອບສ່ວນຢ່າງແທດຈິງເຂົ້າໃນການສ່ອງແສງ, ເສີມຂະຫຍາຍຄຸນຄ່າດ້ານແນວຄິດ ແລະ ມູນເຊື້ອອັນດີງາມນັ້ນ. ນັ້ນແມ່ນເຄົາລົບນັບຖືປະຊາຊົນ, ຖືປະຊາຊົນເປັນກົກ ແລະ ເສີມຂະຫຍາຍສິດເປັນເຈົ້າຂອງປະຊາຊົນໃນການເຂົ້າຮ່ວມສ້າງ ແລະ ຕັດສິນບັນດາບັນຫາທີ່ສຳຄັນຍິ່ງຂອງປະເທດຊາດ.
ຈັດຕັ້ງການລົງປະຊາມະຕິໃນຂອບເຂດທົ່ວປະເທດ
ໃນການປຶກສາຫາລືທີ່ກອງປະຊຸມສະພາແຫ່ງຊາດ, ບັນດາສະມາຊິກສະພາແຫ່ງຊາດໄດ້ເຫັນດີເປັນເອກະສັນຢ່າງສູງຕໍ່ການກຳນົດວ່າ ການລົງປະຊາມະຕິຖືກຈັດຕັ້ງ ແລະ ປະຕິບັດໃນຂອບເຂດທົ່ວປະເທດສຳລັບບັນດາບັນຫາສຳຄັນພິເສດຂອງປະເທດຊາດ. ຕາມລັດຖະທຳມະນູນປີ 2013 ແລະ ກົດໝາຍວ່າດ້ວຍສະພາແຫ່ງຊາດ, ສິດດຳເນີນການລົງປະຊາມະຕິແມ່ນຂຶ້ນກັບສະພາແຫ່ງຊາດ. ບັນດາບັນຫາທີ່ນຳມາລົງປະຊາມະຕິ ແມ່ນບັນຫາກ່ຽວກັບລັດຖະທຳມະນູນ ແລະ ບັນຫາສຳຄັນຂອງປະເທດຊາດມີຄວາມໝາຍລະດັບຊາດ. ທ່ານ ຢາດຸກ, ສະມາຊິກສະພາແຫ່ງຊາດແຂວງເລີມດົງມີຄຳເຫັນວ່າ:
“ການລົງປະຊາມະຕິແມ່ນວຽກງານຂອງສະພາແຫ່ງຊາດເພື່ອໃຫ້ພົນລະເມືອງປ່ອນປັດໂດຍກົງເພື່ອຕັດສິນກ່ຽວກັບບັນດາບັນຫາສຳຄັນພິເສດຂອງປະເທດຊາດທີ່ນຳມາລົງປະຊາມະຕິ. ນັ້ນແມ່ນບັນດາບັນຫາໃຫຍ່, ລະດັບຊາດ, ໄດ້ຮັບການຈັດຕັ້ງປະຕິບັດໃນຂອບເຂດທົ່ວປະເທດໂດຍສະພາແຫ່ງຊາດຕັດສິນ. ສຳລັບບັນດາບັນຫາທີ່ສົ່ງຜົນສະທ້ອນເຖິງໜຶ່ງຫຼືບາງທ້ອງຖິ່ນ, ທ້ອງຖິ່ນເຫຼົ້ານັ້ນບໍ່ຈັດຕັ້ງ ການລົງປະຊາມະຕິ, ແຕ່ນຳໃຊ້ຮູບການຮັບເອົາຄຳເຫັນປະກອບຂອງປະຊາຊົນຕາມລະບຽບກົດໝາຍພວມປະຕິບັດໃນປະຈຸບັນ ”
ເມື່ອຈັດຕັ້ງການລົງປະຊາມະຕິ, ບັນດາສະມາຊິກສະພາແຫ່ງຊາດຄວນສະໜອງຂໍ້ມູນຂ່າວສານຢ່າງຄົບຖ້ວນກ່ຽວກັບບັນດາບັນຫາທີ່ນຳມາດຳເນີນການລົງປະຊາມະຕິເພື່ອໃຫ້ປະຊາຊົນເຂົ້າໃຈແຈ້ງກ່ຽວກັບເນື້ອໃນ ແລະ ຄວາມໝາຍຂອງບັນຫາ; ສິດ, ຄວາມຮັບຜິດຊອບ, ພັນທະຂອງຕົນໃນການເຂົ້າຮ່ວມ ການລົງປະຊາມະຕິ. ຜ່ານນັ້ນ, ປະຊາຊົນສະແດງທັດສະນະຂອງຕົນຢ່າງພາວະວິໄສ, ມີວິທີເລືອກເຟັ້ນທີ່ດີທີ່ສຸດ, ນຳມາເຊິ່ງຜົນປະໂຫຍດທີ່ແທດຈິງໃຫ້ແກ່ປະເທດຊາດ.
ຫັນລັດຖະທຳມະນູນປີ 2013 ເປັນລະບອບກົດໝາຍ
ກົດໝາຍວ່າດ້ວຍການລົງປະຊາມະຕິແມ່ນມີທີ່ຕັ້ງສຳຄັນເພາະມັນໄດ້ເລີ່ມມາຈາກຂໍ້ກຳນົດຂອງລັດຖະທຳມະນູນປີ 2013 ທີ່ວ່າ ລັດແມ່ນຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ. ທ່ານນາງ ໂຮ່ທິເກີມດາວ ສະມາຊິກສະພາແຫ່ງຊາດແຂວງ ຊອກຈັງ ໃຫ້ຮູ້ວ່າ :
“ ການປະກາດໃຊ້ກົດໝາຍວ່າດ້ວຍການລົງປະຊາມະຕິແມ່ນຈຳເປັນເພື່ອແນໃສ່ຫັນລັດຖະທຳມະນູນປີ 2013 ເປັນລະອຽດ ແລະ ສ້າງລະບົບກົດໝາຍຂອງຫວຽດນາມໃຫ້ສົມບູນແບບ. ການລົງປະຊາມະຕິແມ່ນສ້າງເງື່ອນໄຂໃຫ້ທຸກໆຄົນໄດ້ເຂົ້າຮ່ວມ ແລະ ຕັດສິນບັນດາວຽກງານຂອງລັດ ແລະ ສັງຄົມ, ເໝາະສົມກັບທາດແທ້ຂອງປະຊາທິປະໄຕ, ປະກອບສ່ວນສ້າງລັດແຫ່ງອຳນາດນິຕິບັນຍັດສັງຄົມນິຍົມ, ຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ”
ໃນສະພາວະທີ່ຫວຽດນາມພວມເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ກ້ວາງຂວາງນັ້ນ, ການປະກາດໃຊ້ກົດໝາຍວ່າດ້ວຍການລົງປະຊາມະຕິແມ່ນຈຳເປັນ, ແມ່ນບາດກ້າວຂະຫຍາຍຕົວຂອງກົດໝາຍຫວຽດນາມ. ຜ່ານນັ້ນ, ກໍໄດ້ສ້າງເງື່ອນໄຂເພື່ອໃຫ້ທຸກໆຄົນສາມາດເຂົ້າຮ່ວມຢ່າງມີປະຊາທິປະໄຕໃນທຸກໆບັນຫາທີ່ສຳຄັນຂອງປະເທດຊາດ, ປະກອບສ່ວນຮັບປະກັນລັກສະນະເປັນເອກະພາບ, ຄົບຊຸດຂອງລະບົບກົດໝາຍຂອງລັດຫວຽດນາມ.