ລັດຖະມົນຕີການຕ່າງປະເທດອາເມລິກາ Hillary Clinton
ເຂົ້າຮ່ວມການສົນທະນາຈີນ-ອາເມລິກາ ເມື່ອປີກາຍ
(ພາບ: Intrenet)
|
ວັນທີ 3/5 ຢູ່ປັກກິງ, ອາເມລິກາ ແລະ ຈີນ ໄດ້ດຳເນີນການສົນທະນາກ່ຽວກັບຍຸດທະສາດ ແລະ ເສດຖະກິດຄັ້ງທີ່ 4 ຊຶ່ງແມ່ນ 1 ໃນບັນດາກົນໄກສົນທະນາປະຈຳປີທີ່ສຳຄັນທີ່ສຸດໃນສາຍພົວພັນຈີນ-ອາເມລິກາໃນປະຈຸບັນ. ໂດຍຖືກດຳເນີນໃນເວລາ 2 ວັນ, ການສົນທະນາມີຄວາມຫວັງຈະແກ້ໄຂ ບັນດາສິ່ງກິດຂວາງເທື່ອລະກ້າວໃນການພົວພັນລະຫວ່າງ 2 ພື້ນຖານເສດຖະກິດໃຫຍ່ກ່ວາໝູ່ໃນໂລກ, ແຕ່ຕາມບັນດານັກໃຈ້ແຍກແລ້ວ, ນິ້ີ້ແມ່ນສິ່ງທີ່ບໍ່ງ່າຍດາຍແຕ່ຢ່າງໃດເພາະວ່າ ທັງ ຈີນ ແລະ ອາເມລິກາ ຕ່າງກໍມີຜົນປະໂຫຍດຍຸດທະສາດສະເພາະຂອງຕົນ.
ການສົນທະນາຖືກດຳເນີນໂດຍພາຍໄຕ້ການເປັນປະທານຂອງຮອງນາຍົກ ລັດຖະມົນຕີຈີນ ຫວາງຈືຊານ , ກຳມະການໃນຄະນະລັດຖະບານຈີນ ຕາຍປີ້ງກົວ, ລັດຖະມົນຕີການຕ່າງປະເທດອາເມລິກາ Hillary Clinton ແລະ ລັດຖະມົນຕີການເງິນອາເມລິກາ Timothy Geithner . ນອກຈາກນັ້ນ, ໃນ ການເຂົາຮ່ວມການສົນທະນາ ຍັງມີບັນດາຜູ້ຕາງໜ້າຂອງ ກ່ວາ 20 ກະຊວງ, ຂະແໜງການຂອງແຕ່ລະປະເທດ. ເຖິງວ່າພຽງດຳເນີນໃນເວລາ 2 ວັນເທົ່ານັ້ນ, ແຕ່ ການສົນທະນາໄດ້ຮັບຂໍ້ສັງເກດວ່າ ແມ່ນມີຜົນກະທົບບໍ່ໜ້ອຍຕໍ່ການພັດທະນາການພົວພັນ ຈີນ-ອາເມລິກາ. ຕາມຂ່າວຄາວທີ່ 2 ຝ່າຍໄດ້ປະກາດແລ້ວ, ການສົນທະນາຄັ້ງນີ້ແມ່ນເລັ່ງໃສ່ບັນດາບັນຫາທີ່ຮ້ອນເຮັ່ງໃນ ການພົວພັນ ຈີນ-ອາເມລິກາ ປະຈຸບັນ, ນັບທັງດ້ານການເມືອງ ແລະ ເສດຖະກິດ. ທາງດ້ານການເມືອງ, ທ່ານຮອງລັດຖະມົນຕີການຕ່າງປະເທດຈີນ ຖິງທ່ຽນຂາຍໃຫ້ຮູ້ວ່າ : 2 ຝ່າຍຈະດຳເນີນປຶກສາຫາລືບັນດາບັນຫາຄວາມໝັ້ນຄົງຍຸດທະສາດທີ່ຕ່າງຝ່າຍມີຄວາມສົນໃຈ, ບັນຫາປ່ຽນແປງດິນຟ້າອາກາດ, ຄວາມໝັ້ນຄົງດ້ານພະລັງງານ, ບັນຫາຊູດັງ, ອາຊີໃຕ້... ນອກຈາກນັ້ນ ຕາມບັນດານັກວິຈານແລ້ວ, ສະພາບການໃນແຫຼມເກົາຫຼີ, ສະພາບການ ຊີຣີ ຫຼືເລື່ອງຈີນນຳເຂົ້ານ້ຳມັນຈາກ ອີຣານ, ຄວາມປອດໄພໃນການເດີນທະເລຢູ່ທະເລຕາເວັນອອກ... ແມ່ນອາດຈະຖືກຝ່າຍອາເມລິກາເຕື້ອງເຖິງໃນຂອບເຂດການສົນທະນາຍຸດທະສາດ 2 ຝ່າຍຄັ້ງນີ້. ທາງດ້ານເສດຖະກິດ, ການນຳ ຈີນ ແລະ ອາເມລິກາຈະປຶກສາຫາລືການຊຸກຍູ້ເສດຖະກິດເຕີບໂຕແບບຍືນຍົງ ແລະ ສ້າງຄວາມກ້ຳເກີງ, ແງ່ຫວັງນະໂຍບາຍການເງິນ ແລະ ເງິນຕາຂອງແຕ່ລະປະເທດ, ເປີດກ້ວາງກາລະໂອກາດແລກປ່ຽນການຄ້າ ແລະ ການລົງທຶນ, ສ້າງຄວາມສະຫງົບໝັ້ນທຽງ ແລະ ປະຕິຮູບຕະຫຼາດການເງິນ. ທ່ານຮອງລັດຖະມົນຕີການເງິນຈີນ ຈູກວາງຢິວໃຫ້ຮູ້ວ່າ ໃນຂອບເຂດ ການສົນທະນາ ຄັ້ງນີ້, 2 ຝ່າຍຍັງຖະແຫຼງຈະດຳເນີນການເຈລະຈາສັນຍາອາລັກຂາແກ່ການລົງທຶນ 2 ຝ່າຍ.
ດ້ວຍບັນດາບັນຫາທີ່ຮ້ອນເຮັ່ງດັ່ງກ່າວ, ການສົນທະນາໄດ້ຮັບຄວາມສົນໃຈຈາກຫາງສຽງ. ກ່ອນທີ່ດຳເນີນ ການສົນທະນາ, ວົງການນັກການເມືອງ ແລະ ຫາງສຽງອາເມລິກາໄດ້ມີຂໍ້ສັງເກດຢ່າງຕັ້ງໜ້າ ກໍຄືຄຳປາໄສສະແດງໃຫ້ເຫັນ ຄວາມປະເອີບໃຈຕໍ່ສາຍພົວພັນ ຈີນ-ອາເມລິກາ. ທ່ານ ລັດຖະມົນຕີການເງິນອາເມລິກາ Timothy Geithner ໄດ້ໃຫ້ຂໍ້ສັງເກດວ່າ ບໍ່ມີປະເທດໃດໃນໂລກພັດມີຫຼາຍກາລະໂອກາດ ແລະ ສິ່ງທ້າທາຍປະສານກັນໃນພາບດຽວຄືປະເທດຈີນ. ໃນໄລຍະທີ່ຜ່ານມາ, ອຳນາດການປົກຄອງຂອງປະທານາທິບໍດີ Barak Obama ໄດ້ບັນລຸບັນດາບາດກ້າວເດີນທີ່ສຳຄັນໃນຈຸດໝາຍຂອງຕົນ. ສ່ວນວົງການການນຳວິສາຫະກິດອາເມລິກາ ພັດຖືວ່າ ການສົນທະນາຄັ້ງທີ່ 4 ນີ້ ແມ່ນໂອກາດທີ່ດີທີ່ສຸດເພື່ອໃຫ້ຈີນຊຸກຍູ້ການປະຕິຮູບສະພາບແວດລ້ອມແຫ່ງການລົງທຶນ. ທ່ານປະທານສະພາທຸລະກິດ ອາເມລິກາ - ຈີນ John Frisbie ເວົ້າວ່າ ບັນດາບໍລິສັດຂອງອາເມລິກາປາດທະໜາວ່າ ຈີນຈະເຫັນດີເປີດການປຶກສາຫາລືກ່ຽວກັບສັນຍາລົງທຶນ 2 ຝ່າຍ, ຕາມນັ້ນແລ້ວ, ຈະອະນຸຍາດໃຫ້ບັນດາບໍລິສັດຂອງຕ່າງປະເທດສາມາດມີກຳມະສິດບໍລິຫານບັນດາວິສາຫະກິດຂອງຈີນ.
ພ້ອມກັບບັນດາຄຳໃຫ້ສັງເກດຢ່າງຕັ້ງໜ້າ ແລະ ບັນດາຄວາມຫວັງທີ່ດີນັ້ນ, ການສົນທະນາ ຍັງຕ້ອງປະເຊີນໜ້າກັບສິ່ງທ້າທາຍຫຼາຍຢ່າງ ທີ່ເປັນການນາບຂູ່ຈະສົ່ງຜົນສະທ້ອນເຖິງລະດັບຄວາມສຳເລັດຂອງກົນໄກຮ່ວມມື 2 ຝ່າຍນີ້. ກ່ອນທີ່ດຳເນີນ ການສົນທະນາ, ອາເມລິກາ ໄດ້ກະຕຸກຊຸກຍູ້ ຈີນປະຕິຮູບການເງິນເພື່ອຊ່ວຍສ້າງສະພາບແວດລ້ອມທີ່ຍຸດຕິທຳລະຫວ່າງ 2 ພື້ນຖານເສດຖະກິດ, ໃນນັ້ນສືບຕໍ່ເຕື້ອງເຖິງກະກູນເງິນຢວນຂອງຈີນ. ລັດຖະມົນຕີການເງິນອາເມລິກາ Timothy Geithner ຖືວ່າ ບັນດາການປະຕິຮູບກ່ຽວກັບອັດຕາແລກປ່ຽນເງິນຕາໃນມໍ່ໆມານີ້ຂອງ ປັກກິງ ຍັງບໍ່ພຽງພໍເທື່ອ. ແຕ່ຕາມບັນດານັກໃຈ້ແຍກແລ້ວ, ທ່ານ ລັດຖະມົນຕີການເງິນອາເມລິກາ Timothy Geithner ມີຄວາມສະຫຼາດສະຫຼຽວດ້ວຍເລື່ອງບໍ່ເຮັດບັນຫາອັດຕາແລກປ່ຽນເງິນຢວນຂອງຈີນກາຍເປັນບັນຫາທີ່ເຄັ່ງຮ້ອນໃນ ການສົນທະນາເພາະວ່າ ທີ່ 1 ການຂາດດູນການຄ້າຂອງອາເມລິກາ ແມ່ນບັນຫາຫຼາຍຝ່າຍ. ທີ່ 2 ແມ່ນ ກະກູນເງິນຢວນຂອງຈີນປະຈຸບັນໄດ້ຖີບຕົວຂຶ້ນເຖິງ 31,4% ເມື່ອທຽບໃສ່ ກະກູນເງິນ USD ນັບແຕ່ກາງປີ 2005. ທີ່ 3 ແມ່ນ ຕາມການຄົ້ນຄ້ວາ ໄດ້ສະແດງໃຫ້ເຫັນວ່າ ພຽງປະມານ 20% - 30% ປະລິມານສິນຄ້າສົ່ງອອກຂອງຈີນໄປຍັງຕະຫຼາດອາເມລິກາ ແມ່ນສ່ອງແສງດ້ານມຸນຄ່າເພີ່ມຢູ່ພາຍໃນປະເທດຈີນ. ເກືອບ 60% ປະລິມານສິນຄ້າສົ່ງອອກຂອງຈີນແມ່ນຂອງບັນດາວິສາຫະກິດທີ່ມີເງິນລົງທຶນຕ່າງປະເທດ. ດັ່ງນັ້ນ, ພື້ນຖານການຫັນການຜະລິດເປັນທົ່ວໂລກພວມສົ່ງຜົນສະທ້ອນເຖິງການຄ້າ 2 ຝ່າຍ ອາເມລິກາ - ຈີນ , ຫາກບໍ່ແມ່ນອັດຕາແລກປ່ຽນເງິນຕາ.
ໃນການພົວພັນສາກົນ, ກໍຍັງມີບັນດາສັນຍານທີ່ເປັນໜ້າວິຕົກກັງວົນ ທີ່ຈະສົ່ງຜົນສະທ້ອນເຖິງ ຜົນຂອງການສົນທະນາ. ນັ້ນແມ່ນການຢ້ຽມຢາມ ຟີລິບປິນ , ອີເດຍ ຂອງ ລັດຖະມົນຕີການຕ່າງປະເທດອາເມລິກາ Hillary Clinton ກ່ອນທີ່ໄປຍັງປັກກິງເຂົ້າຮ່ວມ ການສົນທະນາກ່ຽວກັບຍຸດທະສາດ ແລະ ເສດຖະກິດລະຫວ່າງ ຈີນ-ອາເມລິກາຄັ້ງທີ່ 4. ນີ້ແມ່ນບັນດາປະເທດທີ່ພວມມີຄວາມບໍ່ລົງລອຍກັນໃດໜຶ່ງກັບຈີນ.
ໃຫ້ຂໍ້ສັງເກດກ່ຽວກັບການ ສົນທະນາຍຸດທະສາດ ແລະ ເສດຖະກິດລະຫວ່າງ ຈີນ-ອາເມລິກາ ຄັ້ງນີ້, ຜູ້ຊ່ຽວຊານບາງຄົນຖືວ່າ ເຖິງວ່າການພົວພັນດ້ານເສດຖະກິດລະຫວ່າງ ອາເມລິກາ - ຈີນນັບມື້ນັບພັດທະນາກໍຕາມ, ແຕ່ການພົວພັນສັງລວມລະຫວ່າງ ອາເມລິກາ - ຈີນ ຍັງຄົງບໍ່ດຳເນີນໄປດ້ວຍດີຍ້ອນເກີດມີຫຼາຍບັນຫາທີ່ສັບສົນ ເຊິ່ງທັງ 2 ປະເທດບໍ່ສາມາດແກ້ໄຂໃນເວລາອັນສັ້ນໆໄດ້. ເບິ່ງຄືວ່າ ການສົນທະນາຄັ້ງນີ້ ຍັງຄົງແມ່ນບາດກ້າວເຊື່ອມຕໍ່ ເພື່ອໃຫ້ 2 ປະເທດສ້າງການພົວພັນທີ່ຕັ້ງໜ້າກ່ວາເກົ່າໃນອະນາຄົດ.