ທ່ານນາງລັດຖະມົນຕີການຕ່າງປະເທດ ອາເມລິກາ Hillary Clinton ແລະ ທ່ານລັດຖະມົນຕີການຕ່າງປະເທດ ອິນເດຍ Somanahalli Mallaiah Krishna
(ພາບ: Internet )
|
ການສົນທະນາຍຸດທະສາດຄັ້ງທີ່ 3 ລະຫວ່າງ ອາເມລິກາ ແລະ ອິນເດຍໄດ້ຖືກຈັດຂຶ້ນຢູ່ ວໍຊິງຕັນແຫ່ງສະຫະລັດອາເມລິກາໃນວັນທີ 13/6. ລັດຖະມົນຕີການຕ່າງປະເທດ ອາເມລິກາ Hillary Clinton ຄູ່ຕ່ຳແໜ່ງຂອງອິນເດຍ ທ່ານ Somanahalli Mallaiah Krishna ໄດ້ເຫັນດີເປັນເອກະສັນກັນ ເພີ່ມທະວີການຮ່ວມມືໃນຫຼາຍຂົງເຂດທີ່ສຳຄັນ, ຊຶ່ງເປັນການນຳເອົາຖະແຫຼງການຂອງປະທານາທິບໍດີອາເມລິກາ Barac Obama ເມື່ອເດືອນ 1/2012 ຂະນະທີ່ໄດ້ຢືນຢັນອິນເດຍແມ່ນຄູ່ຮ່ວມມືທີ່ສຳຄັນທີ່ສຸດຂອງ ອາເມລິກາຢູ່ອາຊີປາຊີຟິກ ເຂົ້າປະຕິບັດໃນພາກຕົວຈິງ.
ທີ່ການສົນທະນາຍຸດທະສາດຄັ້ງທີ່ 3 ລະຫວ່າງ ອາເມລິກາ ແລະ ອິນເດຍ, ທາງຝ່າຍອາເມລິກາ ໄດ້ສະແດງຄວາມເພິງພໍໃຈຕໍ່ຂໍ້ຕົກລົງໃນເບື້ອງຕົ້ນໂດຍບໍລິສັດເຄື່ອງອຸປະກອນຈັກນິວເຄຼຍ Westinghouse ຂອງອາເມລິກາ ແລະ ກຸ່ມບໍລິສັດພະລັງງານນິວເຄຼຍອິນເດຍ ຫາກໍລົງນາມ ແນໃສ່ກໍ່ສ້າງບັນດາເຕົານິວເຄຼຍ ຢູ່ອິນເດຍ. ລັດຖະມົນຕີການຕ່າງປະເທດ ອາເມລິກາ Hillary Clinton ຖືວ່າ ນີ້ແມ່ນບາດກ້າວທີ່ສຳຄັນໃນຄວາມມານະພະຍາຍາມຊຸກຍູ້ການຮ່ວມມື ແລະ ຜັນຂະຫຍາຍປະຕິບັດສັນຍາວ່າດ້ວຍການຮ່ວມມືດ້ານພະລັງງານນິວເຄຼຍພົນລະເຮືອນລະຫວ່າງ 2 ປະເທດ ທີ່ໄດ້ລົງນາມເມືອ່ປີ 2008. ໃນຂົງເຂດເສດຖະກິດ, ລັດຖະມົນຕີການຕ່າງປະເທດ ອາເມລິກາ ໃຫ້ຂໍ້ສັງເກດວ່າ ການແລກປ່ຽນການຄ້າ ແລະ ການລົງທຶນ 2 ຝ່າຍອາເມລິກາ - ອິນເດຍອາດຈະລືນກາຍຕົວເລກ ຄາດໝາຍ100 ຕື້ USD ໃນປີນີ້, ເພີ່ມຂຶ້ນ 40% ນັບແຕ່ປີ 2009. ນີ້ແມ່ນໝາກຜົນທີ່ໜ້າປະທັບໃຈຊຶ່ງ 2 ປະເທດຄວນຮັກສາໄວ້, ພ້ອມກັນນັ້ນ, ວໍຊິງຕັນ ກໍຄ່ອຍຖ້າ ນິວເດລີ ຈະຫຼຸດຜ່ອນບັນດາບັນດາຮົ້ວພາສີອາກອນກ່ຽວກັບການຄ້າ ແລະ ການລົງທຶນໃນຂົງເຂດຕ່າງໆ ຄື ຂາຍຍ່ອຍສິນຄ້າ. ໃນການຮ່ວມມືທາງດ້ານການປ້ອງກັນຊາດ, ລັດຖະມົນຕີການຕ່າງປະເທດ ອາເມລິກາ Hillary Clinton ໃຫ້ຮູ້ວ່າ ວົງເງິນການແລກປ່ຽນຄ້າຂາຍໃນຂົງເຂດປ້ອງກັນຊາດລະຫວ່າງ 2 ປະເທດ ບັນລຸກ່ວາ 8 ຕື້ USD ໃນ 5 ປີທີ່ຜ່ານມາ ແລະ ນີ້ແມ່ນບາດກ້າວອັນໃຫຍ່ຫຼວງທີ່ສຸດ.
ດ້ວຍການຮັບຮູ້ບັນດາໝາກຜົນທີ່ຕັ້ງໜ້າຂອງການສົນທະນາ, ລັດຖະມົນຕີການຕ່າງປະເທດອິນເດຍ ທ່ານ Somanahalli Mallaiah Krishna ໄດ້ຖືວ່າ 2 ປະເທດໄດ້ສ້າງບັນດາມາດຖານທີ່ສຳຄັນກ່ວາ, ນັ້ນແມ່ນນ້ຳໃຈມິດຕະພາບ, ເຈດຕະນາດີ, ຄວາມເຊື່ອໝັ້ນ ແລະ ຄວາມໄວ້ເນື້ອເຊື່ອໃຈຊຶ່ງກັນ ແລະ ກັນໃນສາຍພົວພັນຄູ່ຮ່ວມມື. ລັດຖະມົນຕີການຕ່າງປະເທດອິນເດຍ ກໍຍອມຮັບວ່າ ການສົນທະນາຍຸດທະສາດ ແມ່ນກາລະໂອກາດອັນໜຶ່ງອັນດຽວເພືອ່ປຶກສາຫາລືການຮ່ວມມືໃນທຸກຂົງເຂດ, ອັນໄດ້ຊ່ວຍສ້າງຄວາມສາມາດຮ່ວມມືຢ່າງໃຫຍ່ຫຼວງທີ່ສຸດໃນການພົວພັນຄູ່ຮ່ວມມືລະຫວ່າງ 2 ປະເທດ. ລັດຖະມົນຕີການຕ່າງປະເທດອິນເດຍ Somanahalli Mallaiah Krishna ຍັງໃຫ້ຮູ້ວ່າ ອິນເດຍມີແຜນການລົງທຶນ 1000 ຕື້ USD ເພື່ອກໍ່ສ້າງພື້ນຖານໂຄງລ່າງໃນ 5 ປີທີ່ຈະເຖິງ ແລະ ສິ່ງນີ້ກໍເປັນການສ້າງກາລະໂອກາດເຄື່ອນໄຫວດຳເນີນທຸລະກິດຢ່າງໃຫຍ່ຫຼວງໃຫ້ແກ່ບັນດາບໍລິສັດອາເມລິກາ.
ອາດເວົ້າໄດ້ວ່າ ໝາກຜົນຂອງການສົນທະນາ ໄດ້ສະແດງໃຫ້ເຫັນລັກສະນະທີ່ກ້ວາງໃຫຍ່ຂອງສາຍພົວພັນລະຫວ່າງ ອາເມລິກາ - ອິນເດຍ ແລະ ສ່ວນໃດສ່ວນໜຶ່ງໄດ້ຫັນຄວາມຫວັງຂອງ ວໍຊິງຕັນ ກ່ອນທີ່ກ້າວເຂົ້າສູ່ການສົນທະນາໃຫ້ປະກົດຜົນເປັນຈິງ. ທ່ານນາງ ລັດຖະມົນຕີການຕ່າງປະເທດ ອາເມລິກາ Hillary Clinton ເຄີຍຢືນຢັນວ່າ ສາຍພົວພັນລະຫວ່າງ ອາເມລິກາ - ອິນເດຍ ຈະກາຍເປັນໜຶ່ງໃນບັນດາສາຍພົວພັນຄູ່ຮ່ວມມືທີ່ສຳຄັນໃນສະຕະວັດທີ່ 21. ທ່ານນາງ Hillary Clinton ປາດທະໜາວ່າ ນິວເດລີ ພ້ອມແລ້ວຈະໃຫ້ການຮ່ວມມືເພື່ອເຮັດໃຫ້ ສາຍພົວພັນລະຫວ່າງ ອາເມລິກາ - ອິນເດຍ ນັບມື້ນັບແຂງແຮງກ່ວາອີກ. ທ່ານ Robert Blake ຜູ້ຊ່ວຍວຽກລັດຖະມົນຕີການຕ່າງປະເທດອາເມລິກາ ຮັບຜິດຊອບພາກພື້ນອາຊີໃຕ້ ແລະ ອາຊີກາງ ໃຫ້ຮູ້ວ່າ ອາເມລິກາໄດ້ສະຫງວນເວລາ ແລະ ກຳລັງເຫື່ອແຮງເພື່ອຊຸກຍູ້ການພົວພັນກັບ ອິນເດຍ ຍ້ອນວ່າ ອາເມລິກາມີຄວາມເຊື່ອໝັ້ນວ່າ ປະເທດນີ້ອາດສາມາດກາຍເປັນປະເທດມະຫາອຳນາດໃນໂລກ.
ຕາມບັນດານັກໄຈ້ແຍກແລ້ວ, ບໍ່ແມ່ນເລື່ອງບັງເອີນທີ່ ສາຍພົວພັນ ລະຫວ່າງອາເມລິກາ - ອິນເດຍກາຍເປັນ ສາຍພົວພັນທີ່ສະໜິດຕິດພັນຄືໃນປະຈຸບັນ. ທັງ 2 ປະເທດຕ່າງກໍເຫັນໄດ້ເຖິງບັນດາຜົນປະໂຫຍດອັນໃຫຍ່ຫຼວງເມື່ອເພີ່ມທະວີການຮ່ວມມື. ສຳລັບອາເມລິກາແລ້ວ, ເມື່ອເພີ່ມທະວີການຮ່ວມມືກັບອິນເດຍ, ອາເມລິກາຈະສາມາດປົກປັກຮັກສາບັນດາສາຍທາງທະເລເພື່ອຂົນສົ່ງນ້ຳມັນຈາກຕາເວັນອອກກາງໄປຍັງ ຍີປຸ່ນ, ສ.ເກົ່າຫຼີ ແລະ ອື່ນໆ ກໍຄືສາມາດເຂົ້າເຄື່ອນໄຫວກັບຕະຫຼາດໃຊ້ສອຍທີ່ໃຫຍ່ຫຼວງຂອງອິນເດຍ ດ້ວຍຈຳນວນປະຊາ ກອນ 1,2 ຕື້ຄົນ, ບົດບາດຂອງອິນເດຍຄືດັ່ງຄວາມສາມາດສູ້ຢັນທີ່ສົມດຸນກັບຈີນ ແລະ ແມ່ນຕະຫຼາດເຄິ່ງເຕັກໂນໂລຢີການທະຫານ. ສ່ວນທາງຝ່າຍອິນເດຍ, ແມ່ນຕ້ອງການຮ່ວມມືກັບ ອາເມລິກາເພື່ອສະແຫວງຫາແຫຼ່ງທຶນ ແລະ ເຕັກໂນໂລຢີນິວເຄຼຍ, ຍານອາວະກາດ ແລະ ຊອກຫາຕະຫຼາດສົ້ນອອກໃຫ້ແກ່ຂົງເຂດເຕັກໂນໂລຢີຂໍ້ມູນຂ່າວສານ, ການຢາ, ເຄື່ອງຕຳແຜ່ນຕັດຫຍິບ.......
ໂດຍອີງໃສ່ບັນດາຜົນປະໂຫຍດຍຸດທະສາດເຊັ່ນນັ້ນ, ອາດຈະເວົ້າໄດ້ວ່າສາຍພົວພັນລະຫວ່າງ ອາເມລິກາ - ອິນເດຍ ຍັງຈະສະໜິດຕິດພັນຍິ່ງກວ່າອີກເມື່ອທຽບໃສ່ກ່ອນນີ້. ແລະ ໝາກຜົນຂອງການສົນທະນາຍຸດທະສາດຄັ້ງທີ່ 3 ຊຶ່ງແມ່ນໜຶ່ງໃນບັນດາເຫດການພົວພັນທາງການທູດຢ່າງລຽນຕິດລະຫວ່າງ 2 ປະເທດໃນ 1 ເດືອນທີ່ຜ່ານມາ ໄດ້ເປັນການປະກອບສ່ວນສຳຄັນເພື່ອເພີ່ມພະລັງແຮງໃຫ້ແກ່ສາຍພົວພັນລະຫວ່າງ ອາເມລິກາ - ອິນເດຍໃນອະນາຄົດ