(vovworld)- ບົດບາດ ແລະ ຄວາມສຳຄັນຂອງວຽກງານສ້າງເຄື່ອງໝາຍທະເລ ຫວຽດນາມ ໄດ້ຮັບການຢັ້ງຢືນທີ່ເວທີປາໄສເຄື່ອງໝາຍທະເລຫວຽດນາມປີ 2013 ດ້ວຍຫົວຂໍ້ວ່າ: “ການສ້າງ ແລະ ພັດທະນາເຄື່ອງໝາຍເຂດພາກ ແລະ ເຄື່ອງໝາຍທະເລຫວຽດນາມ” ຫາກໍ່ດຳເນີນໄປຢູ່ ຮ່າໂນ້ຍ ເນື່ອງໃນໂອກາດສັບປະດາທະເລ ແລະ ໝູ່ເກາະ ຫວຽດນາມ ປີ 2013”. ບັນດາຄຳເຫັນລ້ວນແຕ່ເປັນເອກະພາບໂດຍຖືວ່າ: ເຄື່ອງໝາຍທະເລຫວຽດນາມຕ້ອງໄດ້ຮັບຮູ້ວ່າແມ່ນ“ສະມາຊິກ”ໃນຄອບຄົວເຄື່ອງໝາຍແຫ່ງຊາດ, ປະກອບສ່ວນສ້າງພາບພົດຂອງຫວຽດນາມໃນເວທີສາກົນ.
ທະເລ ຢູ່ ດາຫນັງ
ພາບ:internet
|
ຖ້າສັງເກດຈາກແງ່ມູມການພັດທະນາເສດຖະກິດທະເລ, ເຄື່ອງໝາຍທະເລແມ່ນການປະສົມປະສານລະຫວ່າງມະນຸດ ແລະ ບັນດາຜະລິດຕະພັນຈາກທະເລ. ຫວຽດນາມ ມີຝັ່ງທະເລຍາວກວ່າ 3.260 ກິໂລແມັດ, ດ້ວຍເຂດທະເລກວ້າງກວ່າ 1 ລ້ານຕາລາງກິໂລແມັດ. ດ້ວຍບັນດາຄວາມສາມາດບົ່ມຊ້ອນ, ທ່າໄດ້ປຽບດ້ານເສດຖະກິດທະເລ, ແຄມທະເລ, ການພັດທະນາເສດຖະກິດທະເລມີຄວາມໝາຍສຳຄັນພິເສດສຳລັບພາລະກິດແຫ່ງການພັດທະນາເສດຖະກິດສັງຄົມຂອງຫວຽດນາມ. ທີ່ການພົບປະສົນທະນາ, ບັນດາຄຳເຫັນລ້ວນແຕ່ເປັນເອກະພາບໂດຍຖືວ່າ: ເຄື່ອງໝາຍທະເລມີສາຍພົວພັນສະຫນິດແຫນ້ນກັບການພັດທະນາເສດຖະກິດທະເລ. ຄວາມສາມາດບົ່ມຊ້ອນ ແລະ ແຫລ່ງຜົນປະໂຫຍດຈາກທະເລຂອງຫວຽດນາມເມື່ອໄດ້ຮັບການຂຸດຄົ້ນຢ່າງເໝາະສົມ ແມ່ນປັດໄຈ ແລະ ການກະທົບສຳຄັນສຳລັບການພັດທະນາຂອງປະເທດຊາດ. ສິ່ງດ່ັງກ່າວສະແດງໃຫ້ເຫັນວ່າ, ເຄື່ອງໝາຍທະເລ ແມ່ນຫນຶ່ງໃນບັນດາຫນ້າທີ່ຮີບດ່ວນ. ການສ້າງ ເຄື່ອງໝາຍທະເລ ຕອ້ງຂຸດຄົ້ນຄວາມສາມາດບົ່ມຊ້ອນຂອງທະເລ, ເຂດແຄມທະລ, ຕ້ອງມີຍຸດທະສາດພັດທະນາບັນດາຂະແຫນງການທີ່ມີທ່າແຮງ, ມີຄວາມສາມາດແກ້ງແຍ້ງຄື: ການທ່ອງທ່ຽວ, ທ່າກຳປັ່ນ, ບໍລິການເດີນທະເລ, ຂຸດຄົ້ນຄວາມສາມາດບົ່ມຊ້ອນໃນທະເລ ພ້ອມທັງຕ້ອງຄິດໄລ່ເຖິງການພັດທະນາໄລຍະຍາວຜ່ານການຂຸດຄົ້ນຄວາມສາມາດບົ່ມຊ້ອນຢູ່ທະເລ, ເຂດເສດຖະກິດພິເສດ, ໄຫລ່ທະວີບ ແລະ ເຂດທະເລສາກົນ. ບັນດາຂະແຫນງເສດຖະກິດທະເລພັດທະນາຈະສ້າງບາດກ້າວບຸກທະລຸ ແລະ ເສົາຄ້ຳຫນູນຊ່ວຍພື້ນຖານເສດຖະກິດຂອງປະເທດຊາດ, ແມ່ນປະຖົມປັດໃຈໃນການສ້າງ ແລະ ພັດທະນາ ເຄື່ອງໝາຍທະເລ. ເລື່ອງສ້າງລະບົບພື້ນຖານໂຄງລ່າງເພື່ອຂຸດຄົ້ນບັນດາຄວາມສາມາດບົ່ມຊ້ອນຂອງທະເລແມ່ນຄວາມຮຽກຮ້ອງຕ້ອງການທີ່ຈຳເປັນເພື່ອສ້າງເຄື່ອງໝາຍທະເລມີຄຸນນະພາບ ແລະ ມີລັກສະນະຍາວນານ. ມຸ່ງໄປເຖິງຍຸດທະສາດພັດທະນາທະເລຫວຽດນາມຮອດປີ 2020, ການວາງແຜນພັດທະນາລະບົບທ່າກຳປັ່ນທະເລກໍໄດ້ຮັບຖືວ່າແມ່ນຫນຶ່ງໃນບັນດາຫນ້າທີ່ສຳຄັນໃນວິວັດທະນາການສ້າງ ເຄື່ອງໝາຍທະເລ ຫວຽດນາມ. ທ່ານ ຫງວຽນເຍີດເກື່ອງ, ຫົວຫນ້າກົມການເດີນທະເລຫວຽດນາມ ໃຫ້ຮູ້ວ່າ:
“ຂະແຫນງການເດີນທະເລຫວຽດນາມ ໄດ້ ແລະ ພວມສືບຕໍ່ປັບປຸງລະບອບການເດີນທະເລ, ແຜນລະບົບພັດທະນາທ່າກຳປັ່ນທະເລ, ເຕັກໂນໂລໂລຊີຕໍ່ກຳປັ່ນ, ບໍລິການຂົນສົ່ງທາງທະເລໃຫ້ສົມບູນແບບ ເພື່ອສ້າງກຳລັງຫນູນຊຸກຍູ້ບັນດາແລວເສດຖະກິດຕິດພັນກັບທະເລ.”
ເຄື່ອງໝາຍທະເລຫວຽດນາມແມ່ນພາກສ່ວນຫນື່ງທີ່ສຳຄັນໃນການສ້າງເຄື່ອງໝາຍແຫ່ງຊາດຫວຽດນາມ . ໃນຍຸດທະສາດທະເລຫວຽດນາມ ກໍໄດ້ວາງອອກຈຸດໝາຍລະອຽດ, ນັ້ນແມ່ນເຮັດໃຫ້ປະເທດຊາດຮັ່ງມີຈາກທະເລ. ສາຍພົວພັນລະຫວ່າງທະເລ ແລະ ດິນຕໍ່ແຜ່ນ, ລະຫວ່າງການຂຸດຄົ້ນຄວາມສາມາດບົ່ມຊ້ອນຂອງທະເລກັບຄວາມສາມາດບົ່ມຊ້ອນຂອງດິນຕໍ່ແຜ່ນ, ລະຫວ່າງເສດຖະກິດທະເລກັບການປ້ອງກັນຊາດ, ປ້ອງກັນຄວາມສະຫງົບ, ການປົກປັກຮັກສາອະທິປະໄຕຂອງປະເທດຊາດ ຮຽກຮ້ອງໃຫ້ມີການຕິດພັນນັບທັງຄວາມຮັບຜິດຊອບ ແລະ ແຫລ່ງກຳລັງໃຫ້ແກ່ການສ້າງ ແລະ ພັດທະນາເຄື່ອງໝາຍທະເລ ຫວຽດນາມ. ຕາມທ່ານ ຫງວຽນດັງດ້າວ, ຮອງຫົວຫນ້າກົມໃຫຍ່ທະເລ ແລະ ໝູ່ເກາະຫວຽດນາມ- ກະຊວງຊັບພະຍາກອນ ແລະ ສິ່ງແວດລ້ອມ ແລ້ວ, ສັດຕະວັດທີ 21 ແມ່ນສັດຕະວັດແຫ່ງມະຫາສະມຸດ, ຫວຽດນາມ ຢາກພັດທະນາຢ່າງແຮງຕ້ອງມີ 3 ປັດໄຈຄື: ການພັດທະນາເສດຖະກິດທະເລ, ກຳລັງຄວາມສາມາດດ້ານວິທະຍາສາດເຕັກໂນໂລຊີທະເລຢ່າງແຮງ ແລະ ສ້າງອົງການຄຸ້ມຄອງລັດສັງລວມກ່ຽວກັບທະເລຢ່າງແຮງ ແລະ ມີປະສິດທິຜົນເພື່ອປະຕິບັດຍຸດທະສາດນີ້.
ການສ້າງເຄື່ອງໝາຍທະເລບໍ່ພຽງແຕ່ແມ່ນການຂຸດຄົ້ນ, ນຳໃຊ້ທະເລຄືແນວໃດໃຫ້ເໝາະສົມ, ມີປະສິດທິຜົນ ແລະ ຍືນຍົງເທົ່ານັ້ນ ຫາກຍັງແມ່ນການຮ່ວມສຳພັນລະຫວ່າງບັນດາຂະແຫນງການ, ອາຊີບໃນການສ້າງເຄື່ອງໝາຍທີ່ມີລະດັບມະຫາພາກ. ຫວຽດນາມ ພວມຄົ້ນຄ້ວາເພື່ອສ້າງກົນໄກ, ສ້າງໂຄງປະກອບຂະແຫນງອາຊີບເສດຖະກິດທະເລຄືນໃຫມ່ຢ່າງເໝາະສົມເພື່ອໃຫ້ປະຊາຊົນຫວຽດນາມທຸກຄົນ ລ້ວນແຕ່ສາມາດເຂົ້າຮ່ວມການສ້າງ, ໂຄສະນາ ເຄື່ອງໝາຍທະເລ. ທ່ານ ເລດີງເຊີນ, ຮອງປະທານຄະນະກຳມະການປະຊາຊົນແຂວງ ຮ່າຕີ້ງ ໃຫ້ຮູ້ວ່າ:
“ແຂວງ ຮ່າຕີ້ງ ຫາກໍ່ສ້າງຕັ້ງຄະນະຊີ້ນຳ, ວາງແຜນກຳນົດກ່ຽວກັບການພັດທະນາເສດຖະກິດທະເລ. ໃນນັ້ນ ວຽກງານລ້ຽງປູກສິນໃນນ້ຳໄດ້ຮັບການວາງແຜນກຳນົດ, ມີກົນໄກນະໂຍບາຍສຳລັບອົງການຈັດຕັ້ງ ແລະ ສ່ວນບຸກຄົນ ພິເສດແມ່ນປະຊາຊົນດຳລົງຊີວິດຢູ່ແຄມທະເລເພື່ອໃຫ້ເຂົາເຈົ້າມີເງື່ອນໄຂເຂົ້າຮ່ວມການເຄື່ອນໄຫວເຮັດທຸລະກິດຢູ່ທ້ອງຖິ່ນ. ພ້ອມກັນນັ້ນ ພວກຂ້າພະເຈົ້າກໍ່ໄດ້ສ້າງຕັ້ງຄະນະຊີ້ນຳຂອງແຂວງ ແລະ ບັນດາເມືອງ ພ້ອມກັນເຂົ້າຮ່ວມການຄຸ້ມຄອງຢ່າງແຫນ້ນແຟ້ນໃນການປົກປັກຮັກສາສິ່ງແວດລ້ອມທະເລເພື່ອອະນຸລັກຮັກສາ ສ້າງເງື່ອນໄຂແກ່ການພັດທະນາເສດຖະກິດແບບຍືນຍົງໃນໄລຍະຈະມາເຖິງ.”
ການສ້າງ ເຄື່ອງໝາຍທະເລ ຫວຽດນາມ ປະກອບສ່ວນເຮັດໃຫ້ບັນດາຜະລິດຕະພັນເສດຖະກິດ, ວັດທະນະທຳ, ທ່ອງທ່ຽວຂອງຫວຽດນາມ ມີກຳລັງແກ້ງແຍ້ງກວ່າເມື່ອມຸ່ງໄປເຖິງຕະຫລາດສາກົນທີ່ກວ້າງກວ່າ. ເຄື່ອງໝາຍທະເລ ສະແດງໃຫ້ເຫັນພາບພົດຂອງປະເທດຊາດ ບໍ່ພຽງແຕ່ຮັ່ງມີກ່ຽວກັບຊັບພະຍາກອນທະເລເທົ່ານັ້ນ ຫາກຍັງມີປະຫວັດສາດ, ວັດທະນະທຳທະເລທີ່ມີມາແຕ່ດົນນານ, ພວມຢັ້ງຢືນທີ່ຕັ້ງບົດບາດຂອງຕົນຕໍ່ປະຊາຄົມໂລກເທື່ອລະກ້າວອີກດ້ວຍ.