(vovworld)-ໂດຍປະຕິບັດກົດໝາຍວ່າດ້ວຍການອະໄພຍະໂທດ ຊື່ງໄດ້ຮັບການຮັບຮອງເອົາຈາກສະພາແຫ່ງຊາດເມື່ອປີ 2007, ໃນຫລາຍປີຜ່ານມາ, ເນື່ອງໃນໂອກາດດຳເນີນເຫດການສຳຄັນ ຫລືງານບຸນໃຫຍ່ຂອງປະເທດຊາດ ມີນັກໂທດນັບໝື່ນໆຄົນໄດ້ຮັບການອະໄພຍະໂທດ ເພື່ອກັບຄືນເຊື່ອມຕົວເຂົ້າກັບວົງຄະນາຍາດ. ໃນຊຸມມື້ນີ້, ນັບໝື່ນຄອບຄົວ ມີຄວາມປິຕິຊົມຊື່ນພວມລໍຖ້າຍາດຕິພີ່ນ້ອງຂອງຕົນທີ່ມີການກະທຳຜິດໄດ້ກັບຄືນເຕົ້າໂຮມກັບຄອບຄົວ ຍ້ອນມີນະໂຍບາຍອະໄພຍະໂທດ, ປ່ອຍຕົວກ່ອນກຳນົດເວລາ ເນື່ອງໃນໂອກາດສະເຫລີມສະຫລອງ 70 ປີແຫ່ງວັນຊາດ ຫວຽດນາມ. ການອະໄພຍະໂທດຄັ້ງນີ້ໄດ້ຮັບຖືວ່າແມ່ນຄັ້ງໃຫຍ່ສຸດນັບແຕ່ກ່ອນມາຮອດປະຈຸບັນ, ອີກຄັ້ງຫນຶ່ງໄດ້ຢັ້ງຢືນໃຫ້ເຫັນນະໂຍບາຍມະນຸດສະທຳຂອງພັກ, ລັດ ຫວຽດນາມ, ສະແດງໃຫ້ເຫັນຄຸນນະທາດດີເລີດຂອງລະບອບ.
ພາບປະກອບ:daidoanket.vn
|
ການອະໄພຍະໂທດຄັ້ງນີ້ ຄາດວ່າ ຈະມີນັກໂທດ ປະມານ 18.000 ຄົນໄດ້ຮັບການອະໄພຍະໂທດ, ປ່ອຍຕົວກ່ອນກຳນົດເວລາ, ຊື່ງແມ່ນຈຳນວນຫລາຍສຸດນັບແຕ່ກ່ອນມາຮອດປະຈຸບັນ. ພາຍຫລັງມີຂໍ້ຕົກລົງຂອງທ່ານປະທານປະເທດ, ບັນດາພາກສ່ວນກ່ຽວຂ້ອງທັງໝົດຄື: ກະຊວງຕຳຫລວດ, ໄອຍະການ, ສານປະຊາຊົນສູງສຸດ, ກະຊວງຍຸຕິທຳ… ລ້ວນແຕ່ຮີບເຮັ່ງຜັນຂະຫຍາຍການປະຕິບັດວຽກງານອະໄພຍະໂທດ ເພື່ອຮັບປະກັນໃຫ້ວຽກງານອະໄພຍະໂທດປີ 2015 ໄດ້ຮັບການປະຕິບັດຖືກກັບເປົ້າໝາຍ, ເຄົາລົບບັນດາຂໍ້ກຳນົດຂອງກົດໝາຍ.
ຄວາມໂປ່ງໃສ, ປະຊາທິປະໄຕ, ຍຸຕິທຳໃນວຽກງານອະໄພຍະໂທດປີ 2015
ວຽກງານອະໄພຍະໂທດປີ 2015 ໂດຍທ່ານຮອງນາຍົກລັດຖະມົນຕີ ຫງວຽນຊວນຟຸກ, ປະທານສະພາອະໄພຍະໂທດສູນກາງ ຕິດຕາມກວດກາ, ຊີ້ນຳຢ່າງໃກ້ຊິດ ນັບແຕ່ໄລຍະຕົ້ນ. ຕາມນັ້ນແລ້ວ, ບັນດາອົງການກ່ຽວຂ້ອງທັງໝົດ ໄດ້ສົມທົບກັນຢ່າງແຫນ້ນແຟ້ນນຳກັນ, ປະກາດໃຊ້ບັນດາເອກະສານແນະນຳທີ່ຈຳເປັນຢ່າງຄົບຖ້ວນ. ຕາມພົນຈັດຕະວາ ຫງວຽນງອກບັ່ງ, ຫົວຫນ້າກົມໃຫຍ່ປະຕິບັດຄຳຕັດສິນຂອງສານສຳລັບຄະດີອາຍາ ແລະ ການຫນູນຊ່ວຍຕຸລາການ, ສັງກັດກະຊວງຕຳຫລວດ ແລ້ວ, ຍ້ອນມີການຊີ້ນຳນຳພາຢ່າງໃກ້ຊິດ ແລະ ການສົມທົບນຳກັນຢ່າງມີປະສິດທິຜົນ ສະນັ້ນ ວຽກງານອະໄພຍະໂທດປີນີ້ ຮັບປະກັນລັກສະນະເຂັ້ມງວດ, ເຄັ່ງຄັດ, ເປີດເຜີຍ, ໂປ່ງໃສ, ປະຊາທິປະໄຕ, ຍຸຕິທຳ, ຖືກກັບເປົ້າໝາຍ, ບໍ່ຈຳແນກຊາວຫວຽດນາມຫລືຊາວຕ່າງປະເທດ.
“ຄາດໝາຍຂອງການອະໄພຍະໂທດຄັ້ງນີ້ ນັ້ນແມ່ນ ນັກໂທດໄດ້ຮັບອະໄພຍະໂທດແມ່ນບັນດາຜູ້ທີ່ມີເງື່ອນໄຂພຽງພໍຕາມມາດຕະຖານ ແລະ ເດັດຂາດບໍ່ອະນຸຍາດໃຫ້ບັນດາກໍລະນີບໍ່ມີເງື່ອນໄຂຢ່າງຄົບຖ້ວນໄດ້ຮັບອະໄພຍະໂທດ. ຕາມວິວັດການແລ້ວ, ພວກຂ້າພະເຈົ້າຈະພິຈາລະນາແຕ່ລະເປົ້າໝາຍ, ສ້າງບັນຊີລາຍຊື່ເພື່ອສົ່ງໃຫ້ສະພາໃຫ້ຄຳປຶກສາການອະໄພຍະໂທດ ກວດກາ, ພິຈາລະນາ ແລະ ສົ່ງເຖິງທ່ານປະທານປະເທດໃຫ້ຄຳຕັດສິນ. ໃນການອະໄພຍະໂທດ ຄັ້ງນີ້ ມີທັງຊາວຕ່າງປະເທດ ເພາະວ່າ ຕາມກົດໝາຍຂອງຫວຽດນາມ, ບໍ່ວ່າຊາວຫວຽດນາມ ຫລືຊາວຕ່າງປະເທດ ລ້ວນແຕ່ຕ້ອງປະຕິບັດຕາມກົດໝາຍ. ສະນັ້ນ ບັນດານັກໂທດຊື່ງແມ່ນຊາວຕ່າງປະເທດ ຖ້າມີເງື່ອນໄຂຄົບຖ້ວນ ກໍໄດ້ຮັບການອະໄພຍະໂທດ ຄືດັ່ງຊາວຫວຽດນາມ.”
ການອະໄພຍະໂທດມີຄວາມໝາຍສັງຄົມວັດທະນະທຳມະນຸດ
ອາດຈະຢືນຢັນໄດ້ວ່າ ວຽກງານອະໄພຍະໂທດ ນຳມາເຊິ່ງບັນດາປະສິດທິຜົນຕັ້ງຫນ້າ. ຖ້າເວົ້າເຖິງດ້ານສັງຄົມ, ການອະໄພຍະໂທດສຳລັບບັນດານັກໂທດ ມີເງື່ອນໄຂຕາມການກຳນົດມີຄຸນປະໂຫຍດສົ່ງເສີມນັກໂທດ ຕັ້ງຫນ້າໃນການຮ່ຳຮຽນ, ອອກແຮງງານ, ປະຕິບັດບັນດາຂໍ້ກຳນົດ, ກົດລະບຽບຂອງຄ້າຍຄຸມຂັງ, ສ້າງຜົນງານເພື່ອຮັບການອະໄພຍະໂທດ ແລະ ໄດ້ກັບຄືນເຊື່ອມຕົວເຂົ້າກັບຄອບຄົວ ແລະ ວົງຄະນາຍາດໂດຍໄວ. ຕາມຕົວເລກຂອງກະຊວງຕຳຫລວດແລ້ວ, ຜ່ານການຕິດຕາມການອະໄພຍະໂທດ ໃນໄລຍະມໍ່ໆມານີ້, ປີ 2013, ອັດຕາສ່ວນນັກໂທດທີ່ໄດ້ຮັບການອະໄພຍະໂທດ ລະເມີດກົດໝາຍຄືນໃຫມ່ກວມອັດຕາສ່ວນຫນ້ອຍ 0,73%. ສະນັ້ນ ເຖິງວ່າ ຈຳນວນຜູ້ໄດ້ຮັບອະໄພຍະໂທດຢ່າງຫລວງຫລາຍ ແຕ່ສະພາບຄວາມສະຫງົບປອດໄພ, ສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມຢູ່ບັນດາທ້ອງຖິ່ນ ຍັງຄົງໄດ້ຮັບປະກັນ. ວຽກງານອະໄພຍະໂທດ ໄດ້ປະກອບສ່ວນປັບປຸງຄວາມໄວ້ເນື້ອເຊື່ອໃຈຂອງປະຊາຊົນຕໍ່ນະໂຍບາຍອະນຸໂລມ, ມະນຸດສະທຳຂອງພັກ ແລະ ລັດ.
ກ່ຽວກັບດ້ານເສດຖະກິດ, ການອະໄພຍະໂທດ ປ່ອຍຕົວກ່ອນກຳນົດເວລາ ໄດ້ປະກອບສ່ວນຫລຸດຜ່ອນລາຍຈ່າຍງົບປະມານແຫ່ງລັດ,ຫລຸດຜ່ອນກຳລັງດັນໃຫ້ບັນດາຄ້າຍຄຸມຂັງ. ກ່ຽວກັບດ້ານການເມືອງ, ເລື່ອງເປີດເຜີຍ, ໂປ່ງໃສ, ປະຊາທິປະໄຕໃນການປະຕິບັດບັນດາຂັ້ນຕອນພິຈາລະນາການອະໄພຍະໂທດ, ເລື່ອງແຈ້ງຂໍ້ມູນຂ່າວໃຫ້ບັນດາອົງການສື່ມວນຊົນຢູ່ພາຍໃນ ແລະ ຕ່າງປະເທດຢ່າງຄົບຖ້ວນ ແລະ ການຈັດຕັ້ງການຢ້ຽມຢາມ, ສຳຫລວດກວາກາຢູ່ບັນດາຄ້າຍຄຸມຂັງ ແມ່ນຊ່ວຍໃຫ້ບັນດາອົງການສິດທິມະນຸດສາກົນເຂົ້າໃຈແຈ້ງກ່ຽວກັບນະໂຍບາຍມະນຸດສະທຳ, ການອະນຸໂລມຂອງພັກ, ລັດ ຫວຽດນາມ ສຳລັບຜູ້ລະເມີດກົດໝາຍ.
ຫນູນຊ່ວຍນັກໂທດເຊື່ອມຕົວເຂົ້າກັບວົງຄະນາຍາດຄືນໃຫມ່
ນະໂຍບາຍມະນຸດສະທຳໃນວຽກງານອະໄພຍະໂທດຂອງພັກ, ລັດ ຫວຽດນາມ ບໍ່ພຽງແຕ່ແມ່ນການອະໄພຍະໂທດກ່ອນກຳນົດເວລາເທົ່ານັ້ນ ຫາກຍັງສະແດງໃຫ້ເຫັນໃນການສ້າງເງື່ອນໄຂເພື່ອໃຫ້ຜູ້ໄດ້ຮັບອະໄພຍະໂທດເຊື່ອມຕົວເຂົ້າກັບວົງຄະນາຍາດຄືນໃຫມ່ອີກດ້ວຍ. ພົນຈັດຕະວາ ຫງວຽນງອກບັ່ງ, ຫົວຫນ້າກົມໃຫຍ່ກົມປະຕິບັດຄຳຕັດສິນຂອງສານສຳລັບຄະດີອາຍາ ແລະ ຫນູນຊ່ວຍຕຸລາການ, ກະຊວງຕຳຫລວດ ຫວຽດນາມ ໄດ້ຢືນຢັນວ່າ:
“ໃນການຊີ້ນຳຂອງປະທານສະພາໃຫ້ຄຳປຶກສາ ການອະໄພຍະໂທດ ສູນກາງ ກໍຮຽກຮ້ອງບັນດາທ້ອງຖິ່ນ ຕ້ອງຮັບຕ້ອນບັນດານັກໂທດໄດ້ຮັບອະໄພຍະໂທດກັບຄືນເມືອທ້ອງຖິ່ນ ສ້າງວຽກເຮັດງານທຳ ແລະ ສ້າງເງື່ອນໄຂສະດວກທີ່ສຸດໃຫ້ເຂົາເຈົ້າເຊື່ອມຕົວເຂົ້າກັບວົງຄະນາຍາດ ເພື່ອໃຫ້ເຂົາເຈົ້າບໍ່ປົ່ມດ້ອຍ ແລະ ບໍ່ລະເມີດກົດໝາຍຄືນໃຫມ່.”
ຄວາມຈິງໃຫ້ເຫັນວ່າ ນັກໂທດໄດ້ຮັບອະໄພຍະໂທດສ່ວນຫລາຍແມ່ນເຊື່ອມຕົວເຂົ້າກັບວົງຄະນາຍາດວ່ອງໄວ, ຊີວິດການເປັນຢູ່ກັບຄືນສູ່ສະພາບເປັນປົກກະຕິ, ມີຫລາຍຄົນທຳມາຫາກິນ, ດຳເນີນທຸລະກິດເປັນຢ່າງດີ ແລະ ຕັ້ງຫນ້າເຂົ້າຮ່ວມການເຄື່ອນໄຫວກຸສົນ ແລະ ໄດ້ຮັບການຕີລາຄາສູງຈາກສັງຄົມ.
ເນື່ອງໃນໂອກາດ ສະເຫລີມສະຫລອງ 70ປີແຫ່ງວັນຊາດຫວຽດນາມ ທີ 2 ກັນຍາ, ມີນັກໂທດ 18.000 ຄົນຈະໄດ້ຮັບການເຊື່ອມຕົວເຂົ້າກັບວົງຄະນາຍາດ. ນະໂຍບາຍອະນຸໂລມ, ມະນຸດສະທຳຂອງລັດຫວຽດນາມ ຈະເປີດກາລະໂອກາດໃຫ້ເຂົາເຈົ້າກັບຄືນສູ່ຊີວິດ, ກາຍເປັນພົນລະເມືອງມີປະໂຫຍດໃຫ້ສັງຄົມ.