(vovworld)- ເພີ່ມທະວີການຮ່ວມມືໃນອາຊຽນ ກໍຄື ອາຊຽນກັບຈີນ ໃນວຽກງານຊອກຫາ ແລະ ກູ້ໄພສຳລັບ ມະນຸດ ແລະ ເຮືອກຳປັ່ນເຄື່ອນໄຫວຢູ່ທະເລທີ່ປະສົບເຄາະຮ້າຍບົນທະເລຕາເວັນອອກ ແມ່ນສ່ວນຫນຶ່ງໃນແຜນການຜັນຂະຫຍາຍຂໍ້ກຳນົດແນະນຳການປະຕິບັດຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຊື່ງໄດ້ຮັບການຮັບຮອງເອົາແຕ່ປີ 2011. ຕໍ່ຫນ້າສະພາບທະເລຕາເວັນອອກໃນປະຈຸບັນ ຍັງຄົງເກີດຄວາມສ່ຽງ, ຄວາມສັບສົນ, ອາຊຽນ ພວມຍູ້ໄວການສ້າງບັນດານະໂຍບາຍ ແລະ ມາດຕະການຮ່ວມມືໃນຂົງເຂດນີ້ ແລະ ຖືວ່າ ທັງແມ່ນມາດຕະການມີຄວາມໝາຍດ້ານມະນຸດສະທຳ ແລະ ສ້າງຄວາມໄວ້ເນື້ອເຊື່ອໃຈ, ປະກອບສ່ວນປັບປຸງສະພາບແວດລ້ອມແຫ່ງສັນຕິພາບ, ສະຖຽນລະພາບ ແລະ ຄວາມເປັນລະບຽບຮຽບຮ້ອຍຢູ່ທະເລຕາເວັນອອກ.
ທະເລຕາວັນອອກ ແມ່ນເຂດທະເລສຳຄັນທີ່ມີຕໍ່ຊີວິດການເປັນຢູ່ຂອງປະຊາຊົນບັນດາປະເທດໃນພາກພື້ນນັບພັນປີແຕ່ປະຈຸບັນພວມນັບມື້ນັບຊ້ອນແຝງຄວາມສ່ຽງຫລາຍຢ່າງສຳລັບມະນຸດ ແລະ ເຮືອກຳປັ່ນພວມເຄື່ອນໄຫວຢູ່ທີ່ນີ້. ສາຍເຫດນັ້ນແມ່ນ ຍ້ອນການພົວພັນແລກປ່ຽນການຄ້າພວມເພີ່ມຂຶ້ນສູງ. ທະເລຕາເວັນອອກ ແມ່ນເສັ້ນທາງເດີນທະເລສຳຄັນ, ກວມ 2/3 ຈຳນວນສິນຄ້າແລກປ່ຽນຄ້າຂາຍຢູ່ໃນໂລກ, ຊາວປະມົງເຄື່ອນໄຫວບົນທະເລນັບມື້ນັບຫລາຍໃນເວລາຫລາຍມື້ ໃນຂະນະນັ້ນ ອຸປະກອນທ່ີເຂົາເຈົ້ານຳໃຊ້ຂາດຄວາມປອດໄພ, ອຸປະກອນສື່ສານກໍ່ບໍ່ຄົບຖ້ວນ.
ໃນໄລຍະຜ່ານມາ, ມີກອງປະຊຸມສຳມະນາ, ກອງປະຊຸມຫລາຍຄັ້ງລະຫວ່າງສອງຝ່າຍ ອາຊຽນ ແລະ ຈີນ ຖືກຈັດຂຶ້ນ, ຜ່ານນັ້ນ ໄດ້ສ່ອງແສງສ່ວນໃດຫນຶ່ງກ່ຽວກັບຄວາມມານະພະຍາຍາມຂອງບັນດາຝ່າຍໃນການຮ່ວມມືກູ້ໄພກູ້ຊີບບົນທະເລ, ເປັນຕົ້ນແມ່ນຄວາມໄວ້ເນື້ອເຊື່ອໃຈ, ເລີ່ມຕົ້ນຈາກການແລກປ່ຽນບັນດາຂົງເຂດຄື: ການຄົ້ນຄ້ວາສະພາບແວດລ້ອມຊີວະພາບທະເລ, ຊີວະນາໆພັນທະເລ … ໃຫ້ສອດຄ່ອງກັບເນື້ອໃນຈິດໃຈຂອງຖະແຫລງການ DOC. ແລະ ຫວ່າງແລ້ວນີ້, ເມື່ອເດືອນ 6/2013, ຫວຽດນາມ ໄດ້ຈັດຕັ້ງກອງປະຊຸມສຳມະນາ ອາຊຽນ - ຈີນ ກ່ຽວກັບການຊອກຫາ ແລະ ກູ້ໄພກູ້ຊີບມະນຸດ ແລະ ເຮືອກຳປັ່ນທີ່ປະສົບເຄາະຮ້າຍບົນທະເລຕາເວັນອອກ. ທີ່ກອງປະຊຸມດັ່ງກ່າວ, ທ່ານຮອງລັດຖະມົນຕີການຕ່າງປະເທດ ຫວຽດນາມ ຟ້າມກວາງວີງ ໃຫ້ຮູ້ວ່າ:
“ຫວ່າງແລ້ວນີ້ ອາຊຽນ ແລະ ຈີນ ໄດ້ປະຕິບັດການແລກປ່ຽນຄຳເຫັນ ແລະ ກອງປະຊຸມສຳມະນາ, ຜ່ານນັ້ນ ບັນດາຝ່າຍສາມາດເຂົ້າໃຈເຊິ່ງກັນ ແລະ ກັນໄດ້, ຫລັງຈາກນັ້ນ ຈຶ່ງມີບັນດາມາດຕະການເພື່ອສະເຫນີຕໍ່ຂັ້ນລັດຖະບານສອງຝ່າຍເພື່ອພ້ອມກັນຮ່ວມມື. ເພາະສະນັ້ນ ອາຊຽນ ແລະ ຈີນ ໄດ້ປຶກສາຫາລືນຳກັນວ່າ: ບັນດາມາດຕະການສ້າງຄວາມໄວ້ເນື້ອເຊື່ອໃຈສາມາດຊ່ວຍໃຫ້ສອງຝ່າຍເຂົ້າໃຈກັນກວ່າ, ເພື່ອສາມາດຊອກຫາບັນດາມາດຕະການເໝາະສົມ, ເຂົ້າຮ່ວມການຮ່ວມມືນຳກັນເທື່ອລະກ້າວ”
ກອງປະຊຸມສຳມະນາລະຫວ່າງສອງຝ່າຍ ອາຊຽນ ແລະ ຈີນໃນການຮ່ວມມືກູ້ໄພກູ້ຊີບບົນທະເລ
|
ດ້ວຍບັນດາຄວາມມານະພະຍາຍາມລວມ, ມາຮອດປະຈຸບັນ ອາຊຽນ ແລະ ຈີນ ໄດ້ເປັນເອກະພາບຫລາຍມາດຕະການລະອຽດ. ເປັນຫນ້າສົນໃຈ ນັ້ນແມ່ນ ອາຊຽນ ແລະ ຈີນ ເຫັນດີສ້າງບັນຊີລາຍຊື່ບັນດາອົງການຮັບຜິດຊອບວຽກງານກູ້ໄພກູ້ຊີບໃນທົ່ວພາກພື້ນ, ເປັນເອກະພາບນຳໃຊ້ພາສາອັງກິດໃນການພົວພັນລະຫວ່າງບັນດາສູນກູ້ໄພກູ້ຊີບ, ສ້າງຫນ້າເວັບກູ້ໄພກູ້ຊີບ ອາຊຽນ - ຈີນ ເພື່ອຮັບຂໍ້ມູນຂ່າວເປັນປະຈຳ, ເພີ່ມທະວີຄວາມຮັບຮູ້ ແລະ ການເຂົ້າຮ່ວມຂອງຊາວປະມົງ, ນຳໃຊ້ພື້ນຖານດ້ານວັດຖຸຂອງບັນດາກຳລັງພົນລະເຮືອນອື່ນໆຢູ່ທະເລຄື: ນ້ຳມັນອາຍແກສເຂົ້າໃນວຽກງານກູ້ໄພກູ້ຊີບ. ເຖິງຢ່າງໃດກໍຕາມ, ເພື່ອໃຫ້ວຽກງານນີ້ມີປະສິດທິຜົນຢ່າງແທ້ຈິງຍັງຕ້ອງອີງໃສ່ບາງຫລັກການພື້ນຖານ.
“ທີຫນຶ່ງ ຕ້ອງປະຕິບັດດ້ວຍຈຸດປະສົງມະນຸດສະທຳ. ສຳລັບ ຊາວປະມົງ ແລະ ເຮືອກຳປັ່ນທີ່ປະສົບເຄາະຮ້າຍບົນທະເລ, ເຂົາເຈົ້າແມ່ນປະຊາຊົນຜູ້ບໍລິສຸດ ບໍ່ປະໃຫ້ສິ່ງທີ່ເກີດຂຶ້ນໃນພາກພື້ນສົ່ງຜົນສະທ້ອນເຖິງຈຸດປະສົງກູ້ຊ່ວຍມະນຸດສະທຳ. ທີສອງ ບັນດາຝ່າຍຕ້ອງແບ່ງປັນນະໂຍບາຍນຳກັນເພື່ອເຮັດແນວໃດມີກົນໄກປະສານສົມທົບ. ທີສາມ ຕ້ອງກຳນົດອົງການຮັບຜິດຊອບວຽກງານດັ່ງກ່າວຢູ່ແຕ່ລະປະເທດໃນພາກພື້ນ ເພື່ອມີເຫດການເກີດຂຶ້ນສາມາດຕິດຕໍ່ໂດຍກົງໄດ້. ແລະ ແຕ່ລະປະເທດເມື່ອເຂົ້າຮ່ວມຂໍ້ຕົກລົງຮ່ວມມືດັ່ງກ່າວ ໃນຂອບເຂດຄວາມສາມາດຂອງຕົນ ຄວນມີມາດຕະການຫນູນຊ່ວຍທີ່ຈຳເປັນ ແລະ ສຸດທ້າຍເຮັດແນວໃດສ້າງໄດ້ກົນໄກຮ່ວມມືໃນພາກພື້ນ.”
ໂດຍແມ່ນປະເທດຢູ່ແຄມທະເລ, ດ້ວຍຄວາມປາດຖະຫນາ ແລະ ເຈດຕະນາດີຢາກຊຸກຍູ້ການສ້າງຄວາມໄວ້ເນື້ອເຊື່ອໃຈ ແລະ ການຮ່ວມມືພາກພື້ນເພື່ອສັນຕິພາບ, ສະຖຽນລະພາບລວມຢູ່ທະເລຕາວັນອອກ, ຫວຽດນາມ ມີຄວາມເອົາໃຈໃສ່ທີ່ສຸດເຖິງການຊຸກຍູູ້ການຮ່ວມມືພາກພື້ນກ່ຽວກັບການຊອກຫາ ແລະ ກູ້ໄພກູ້ຊີບມະນຸດ ແລະ ເຮືອກຳປັ່ນທີ່ປະສົບເຄາະຮ້າຍຢູ່ທະເລ. ຕາມການສະຖິຕິແລ້ວ,ໃນສອງສາມປີມານີ້ ອັດຕາກູ້ໄພຊາວປະມົງທີ່ປະສົບເຄາະຮ້າຍຢູ່ທະເລຂອງຫວຽດນາມສຳເລັດ ບັນລຸກວ່າ 47%, ໃນນັ້ນ ບັນດາມາດຕະການນຳໃຊ້ກຳລັງຢູ່ກັບທີ່ກວມກວ່າ 50%. ຜ່ານນັ້ນ ສາມາດຢັ້ງຢືນໄດ້ວ່າ ການຊອກຫາຢູ່ກັບທີ່ ແລະ ຫນູນຊ່ວຍຂອງບັນດາກຳລັງກູ້ໄພແມ່ນສຳຄັນທີ່ສຸດ, ບໍ່ພຽງແຕ່ສັບລັບຫວຽດນາມເທົ່ານັ້ນ ຫາກນັບທັງບັນດາປະເທດແຄມທະເລອື່ນອີກດ້ວຍ . ເຖິງວ່າ ຈະແມ່ນບັນດາປະເທດມີການປະກອບອຸປະກອນໄດ້ດີ ແລະ ກຽມພ້ອມຢ່າງລຽບລ້ອຍຄືແນວໃດກໍຈຳເປັນຕ້ອງມີການຮ່ວມມືສາກົນເພື່ອຮັບມືຢ່າງວ່ອງໄວກວ່າ, ມີປະສິດທິຜົນກວ່າເມື່ອເກີດບັນດາເຫດອັນຮີບດ່ວນ ຈາກນັ້ນຈຶ່ງສາມາດກູ້ໄພກູ້ຊີບຢ່າງທັນການໄດ້.
ອາຊຽນ ແລະ ຈີນ ໄດ້ຜ່ານຜ່າໄລຍະຍາວ ດ້ວຍຄວາມຫຍຸ້ງຍາກ, ສິ່ງທ້າທາຍບໍ່ແມ່ນຫນ້ອຍເພື່ອບັນລຸໄດ້ຖະແຫລງການ DOC ແລະ ໄລຍະມໍ່ໆມານີ້ ອາຊຽນ ແລະ ຈີນ ໄດ້ຮັບຮອງເອົາຖະແຫລງການ 6 ຂໍ້ ກ່ຽວກັບທະເລຕາເວັນອອກ. ສອງຝ່າຍພວມລໍຖ້າການເຈລະຈາຢ່າງເປັນທາງການໂດຍໄວ ເພື່ອບັນລຸປະມວນຂໍ້ກຳນົດການປະພຶດຂອງບັນດາຝ່າຍຢູ່ທະເລຕາເວັນອອກ (COC). ການຮ່ວມມື ອາຊຽນ - ຈີນ ໃນຂົງເຂດກູ້ໄພກູ້ຊີບບົນທະເລແມ່ນສ່ວນຫນຶ່ງໃນຄວາມມານະພະຍາ ຍາມລວມ. ຊາວປະມົງແມ່ນເປົ້າໝາຍເຄື່ອນໄຫວຕົ້ນຕໍຢູ່ທະເລ ສະນັ້ນຄວນໄດ້ຮັບປະກັນຄວາມປອດໄພກ່ຽວກັບຊີວິດອີນຊີ ແລະ ຊັບສິນ, ນີ້ກໍແມ່ນຄວາມເອົາໃຈໃສ່ລວມຂອງທຸກປະເທດໃນພາກພື້ນ.