(vovworld) – ວັນທີ 26/2 ຈະມາເຖິງ, ຢູ່ ສ Kazakhstanຈະດຳເນີນການເຈລະຈາລະຫວ່າງອີຮານ ແລະ ກຸ່ມ P5+1 (ເຊິ່ງລວມມີ 5 ປະເທດກຳມະການປະຈຳສະພາຄວາມໝັ້ນຄົງສະຫະປະຊາຊາດ ແລະ ເຢັຍລະມັນ) ກ່ຽວກັບໂຄງການນິວຄະເລຍ ທີ່ກໍ່ຄວາມໂຕ້ຖຽງກັນຂອງອີຮານ. ເຖິງຢ່າງໃດກໍ່ຕາມ, ກ່ອນທີ່ດຳເນີນເຫດການນີ້ 1 ສັບປະດາ, ຄຳຖະແຫຼງຕ່າງໆເຊິ່ງສອງຝ່າຍໄດ້ຍົກອອກມາໄດ້ສະແດງໃຫ້ເຫັນວ່າ, ຍາກທີ່ຈະມີການບຸກທະລຸທີ່ການເຈລະຈາຄັ້ງນີ້ໄດ້.
ເຕເຮຮານ ດຳເນີນການທົດລອງອາວຸດໃໝ່ຫຼາຍຄັ້ງເຮັດໃຫ້ວິກິດການນິວຄະເລຍມີຄວາມເຄັ່ງຕຶງຍິ່ງຂຶ້ນ
(ພາບອິນເຕີແນດ)
ກ່ອນທີ່ຈັດການເຈລະຈາ, ບັນດາຄຳຖະແຫຼງຂອງອີຮານທີ່ກ່ຽວຂ້ອງເຖິງບັນຫານິວຄະເລຍຍັງຄົງສະແດງໃຫ້ເຫັນທັດສະນະແຂງກະດ້າງຂອງປະເທດ ສ ອີດສະລາມນີ້ຢູ່. ກ່າວຄວາມເຫັນທາງໂທລະພາບ, ການນຳດ້ານຈິດໃຈສູງສຸດຂອງອີຮານ ທ່ານ Ayatokkah Ali Khamenei ໄດ້ປະຕິເສດເລື່ອງ ອີຮານມີມີແນວຄວາມຄິດພັດທະນາອາວຸດນິວຄະເລຍປະເພດຕ່າງໆ. ເຖິງຢ່າງໃດກໍ່ຕາມ, ຈະບໍ່ມີອິດທິກຳລັງໃດສາມາດກີດຂວາງເລື່ອງອີຮານ ຜະລິດອາວຸດປະເພດນີ້ໄດ້. ການນຳດ້ານຈິດໃຈສູງສຸດ Ali Khamenei ກໍ່ໄດ້ຊີ້ແຈ້ງຫຼັກໝັ້ນຂອງອີຮານ ທີ່ມີຕໍ່ອາວຸດລ້າງຜານ, ນັ້ນແມ່ນບໍ່ຂຶ້ນກັບເຈດຈຳນົງຂອງອາເມລິກາ ແລະ ຝ່າຍຕາເວັນຕົກ, ຫາກອີງໃສ່ຄຸນຄ່າ ດ້ານຄຸນສົມບັດ ແລະ ການເຊື່ອຖືເພື່ອສະຫຼຸບວ່າ ອາວຸດນິວຄະເລຍແມ່ນໂທດກຳລ້າງຜານມະນຸດ. ໃນຂະນະນັ້ນ, ປະທານຄະນະກຳມະການ ນະໂຍບາຍການຕ່າງປະເທດ ແລະ ປ້ອງກັນຄວາມສະຫງົບແຫ່ງຊາດອີຮານ Alaeddin Boroujerdi ພັດຢືນຢັນວ່າ ເຕເຮຮານ ຈະບໍ່ປິດບັນດາຮາກຖານເສີມທາດ Uranium Fordow. ຄຳຖະແຫຼງດັ່ງກ່າວຖືກຍົກອອກມາ ພາຍຫຼັງທີ່ສື່ມວນຊົນຂອງຝ່າຍຕາເວັນຕົກໃຫ້ຂ່າວວ່າ ໃນການເຈລະຈາຢູ່ Almaty, Kazakhstan ຈະມາເຖິງ, ກຸ່ມ P5+1 ຈະສະເໜີຍົກເລີກຄຳສັ່ງລົງໂທດທີ່ເລັ່ງໃສ່ທຸລະກຳຄຳ ແລະ ໂລຫະທີ່ມີຄ່າປະເພດອື່ນໆຂອງອີຮານ ເພື່ອໃຫ້ປະເທດນີ້ປິດບັນດາຮາກຖານນິວຄະເລຍ Fordow. ສັນຍານທີ່ດີຂອງການເຈລະຈາຍິ່ງມີຄວາມສັບສົນກວ່າ ເມື່ອວັນທີ 18/2, ໂຄສົກກະຊວງການຕ່າງປະເທດອີຮານ Ramin Mehmanparast ໄດ້ຢືນຢັນຄືນໃໝ່ວ່າ, ການເຈລະຈາກ່ຽວກັບນິວຄະເລຍລະຫວ່າງອີຮານ ແລະ ກຸ່ມ P5+1 ພຽງແຕ່ບັນລຸໄດ້ໝາກຜົນ ຖ້າຫາກ ກຸ່ມ P5+1 ຮັບຮູ້ສິດຜະລິດນີວຄະເລຍຂອງອີຮານ ເທົ່ານັ້ນ. ນີ້ແມ່ນເງື່ອນໄຂຢ່າງຈະແຈ້ງທີ່ສາມາດນຳມາເຊິ່ງໝາກຜົນຢ່າງວ່ອງໄວໃຫ້ແກ່ການເຈລະຈາ.
ສຳລັບກຸ່ມ P5+1 , ມາຮອດປະຈຸບັນ, ທັດສະນະຂອງເຂົາເຈົ້າຍັງຄົງແມ່ນ ຮຽກຮ້ອງໃຫ້ເຕເຮຮານ ຢຸດຕິວິວັດການເສີມທາດ Uranium ໃນລະດັບ 20%, ແມ່ນລະດັບທີ່ອາດສາມາດຜະລິດຫົວລະເບີດນິວຄະເລຍ. ກຸ່ມ P5+1 ຢາກໃຫ້ອີຮານ ຍ້າຍສາງ Uranium ທີ່ໄດ້ເສີມໃນລະດັບ 20% ອອກຈາກປະເທດນີ້ ພ້ອມທັງຮຽກຮ້ອງໃຫ້ປະເທດອິດສະລາມນີ້ຕ້ອງປິດຮາກຖານນິວຄະເລຍ Fordow, ເຊິ່ງແມ່ນແຫ່ງທີ່ ອີຮານນຳໃຊ້ເພື່ອເສີມທາດ Uranium ໃນລະດັບ 20%. ເມື່ອ ອີຮານປະຕິບັດຕາມຄຳຮຽກຮ້ອງນີ້, ກຸ່ມ P5+1 ຈຶ່ງຮັບຮູ້ການປຶກສາຫາລືກ່ຽວກັບຄວາມສາມາດຫຼຸດຜ່ອນບັນດາມາດຕະການລົງໂທດທີ່ມີຕໍ່ຂະແໜງນ້ຳມັນ ແລະ ທຸລະກຳດ້ານການເງິນຂອງອີຮານ. ປະຈຸບັນ, ຄຳສັ່ງລົງໂທດຂອງຝ່າຍຕາເວັນຕົກ, ພິເສດແມ່ນອາເມລິກາ ໄດ້ເຮັດໃຫ້ຊີວິດຂອງຊາວອີຮານປະສົບກັບຄວາມຫຍຸ້ງຍາກ. ລາຍຮັບຈາກການສົ່ງອອກນ້ຳມັນຂອງອີຮານໃນປີ 2012 ຫຼຸດລົງ 40 ຕຶ້ USD. ປະລິມານຜະລິດນຳ້ມັນຂອງອີຮານ ໃນເດືອນ 1 ຜ່ານມາໄດ້ຫຼຸດລົງເຫຼືອພຽງ 2,65 ລ້ານຖັງ/ວັນ ເມື່ອທຽບໃສ່ລະດັບ 3,7 ລ້ານຖັງ/ວັນເມື່ອທ້າຍປີ 2011, ກ່ອນທີ່ບັນດາມາດຕະການລົງໂທດຂອງອາເມລິກາ ແລະ ສະຫະພາບເອີລົບ (EU) ມີຜົນສັກສິດ. ການຈຳກັດສິດເຂົ້າຮ່ວມລະບົບທະນາຄານສາກົນ ກໍ່ໄດ້ເຮັດໃຫ້ສະກູນເງິນ Rial ຂອງອີຮານ ຕົກລາຄາລົງ 45% ເມື່ອທຽບໃສ່ປີ 2012.
ປີ 2012, ອີຮານ ແລະ ກຸ່ມ P5+1 ໄດ້ດຳເນີນການເຈລະຈາເຖິງ 3 ຄັ້ງ, ແລະ ສິ້ນສຸດການເຈລະຈາຄັ້ງສຸດທ້າຍເຊິ່ງຈັດຂຶ້ນຢູ່ ລັດເຊຍເມື່ອເດືອນ 6/2012 ກໍ່ບໍ່ໄດ້ຮັບຜົນ. ສາຍເຫດແມ່ນຍ້ອນສອງຝ່າຍບໍ່ຍອມຜ່ອນສັ້ນຜ່ອນຍາວກ່ຽວກັບບັນຫານິວຄະເລຍຂອງອີຮານ. ຄວາມວິຕົກກັງວົນຕົ້ນຕໍຂອງບັນດາປະເທດຝ່າຍຕາເວັນຕົກນັ້ນແມ່ນ ຄວາມສາມາດເສີມທາດ Uranium ຂອງອີຮານ ບັນລຸໄດ້ລະດັບ 20%. ເຊິ່ງແມ່ນລະດັບທີ່ສາມາດນຳໃຊ້ໃຫ້ແກ່ຈຸດປະສົງເພື່ອສັນຕິພາບ, ແຕ່ກໍ່ສາມາດຮັບໃຊ້ໃຫ້ແກ່ການຜະລິດລະເບີດນິວຄະເລຍໄດ້. ມາຮອດປະຈຸບັນ, ບັນດາປະເທດຝ່າຍຕາເວັນຕົກຍັງຄົງສົງໃສວ່າ ອີຮານພັດທະນາລະເບີດນິວຄະເລຍ ຜ່ານໂຄງການນິວຄະເລຍພົນລະເຮືອນ, ສ່ວນ ເຕເຮຮານພັດປະຕິເສດສິ່ງດັ່ງກ່າວ, ແລະ ຢືນຢັນວ່າພຽງແຕ່ເສີມທາດ Uranium ເພື່ອຮັບໃຊ້ໃຫ້ບັນດາໂຄງການວິທະຍາສາດ ແລະ ສາທາລະນະສຸກເທົ່ານັ້ນ, ນີ້ແມ່ນສິດຜົນປະໂຫຍດເຊິ່ງປະເທດອື່ນໆລ້ວນແຕ່ໄດ້ຊົມໃຊ້ເທົ່ານັ້ນ.
ກ່ອນການເຈລະຈາ ທີ່ຈະມາເຖິງ, ມາຮອດປະຈຸບັນ, ຍັງບໍ່ທັນມີຝ່າຍໃດມີຄຳສະເໜີໃໝ່. ເບິ່ງຄືວ່າ, ອີຮານ ແລະ ກຸ່ມ P5+1 ຍາກທີ່ຈະຫຍັບມໍ່ເຂົ້າກັນໃນການເຈລະຈາເຊິ່ງຈະຈັດຕັ້ງໃນວັນທີ 26/2 ຈະມາເຖິງໄດ້, ສິ່ງດັ່ງກ່າວໝາຍຄວາມວ່າ ການຮ່ວມມືເພື່ອສັນຕິພາບຈະຖືກພາດໂອກາດອີກຄັ້ງໜຶ່