(vovworld) - “ສັນຍາກ່ຽວກັບການຢຸດຕິສົງຄາມ, ສ້າງສັນຕິພາບຢູ່ ຫວຽດນາມ ຄືນໃຫມ່” ໄດ້ຮັບການລົງນາມເມື່ອວັນທີ 27/1/1973 ຢູ່ ປາຣີ (ຫລືເອີ້ນຫຍໍ້ວ່າ ສັນຍາປາຣີ) ພາຍຫລັງບໍ່ທັນຮອດ 1 ເດືອນ ນັບແຕ່ເມື່ອ ອາເມລິກາ ຢຸດຕິການຖີ້ມລູກລະເບີດໃສ່ນະຄອນຫລວງ ຮ່າໂນ້ຍ ແລະ ບັນດາແຂວງທາງພາກເຫນືອ ຫວຽດນາມ ດ້ວຍເນື້ອໃນຕົ້ນຕໍແມ່ນບັງຄັບອາເມລີກາ ຕ້ອງຢຸດຕິສົງຄາມ, ຖອນກຳລັງທະຫານທັງໝົດອອກຈາກພາກໃຕ້ ຫວຽດນາມ.
ໃນປະຫວັດສາດແຫ່ງການຕໍ່ສູ້ຕ້ານສັດຕູຜູ້ຮຸກຮານຂອງປະຊາຊົນ ຫວຽດນາມ, ບໍ່ທັນມີການເຈລະຈາໃດທີ່ຖືກແກ່ຍາວຄືດັ່ງກອງປະຊຸມ ປາຣີ. ໃນໄລຍະເກືອບ 5 ປີ, ດ້ວຍວາລະປະຊຸມເປີດເຜີຍ 202 ຄັ້ງ ແລະ ການພົບປະສະເພາະ 24 ຄັ້ງ, ການເຈລະຈາ ປາຣີ ແມ່ນການຕໍ່ສູ້ທາງພູມປັນຍາລະຫວ່າງສອງພື້ນຖານການທູດ ນັ້ນແມ່ນ: ຫວຽດນາມ ແລະ ອາເມລິກາ. ຫວນຄືນບົດບາດທີ່ຕັ້ງຂອງຫວຽດນາມ ນັບແຕ່ເມື່ອກ້າວເຂົ້າສູ່ການເຈລະຈາຈົນເຖິງເວລາ ອາເມລິກາ ລົງນາມໃນສັນຍາປາຣີ, ຮັບຮູ້ເອກະລາດ, ອະທິປະໄຕ, ເອກະພາບ, ຜືນແຜນດິນອັນຄົບຖ້ວນຂອງ ຫວຽດນາມຢ່າງສົມບູນ ແມ່ນມີຄວາມແຕກຕ່າງກັນຫລາຍຢ່າງ.ຈາກປະເທດຖືກສົງຄາມທຳລາຍຢ່າງຮ້າຍແຮງ, ສິ່ງທີ່ຫວຽດນາມ ນຳມາສູ່ກອງປະຊຸມເຈລະຈາ ນັ້ນແມ່ນຈິດໃຈສູ້ຮົບເພື່ອຍາດເອົາໄຊຊະນະ, ເຈດຈຳນົງອົງອາດກ້າຫານ, ຕໍ່ສູ້ເພື່ອຮັກສາສັດຈະທຳ, ຍາດເອົາເອກະລາດ ເສລີພາບມາໃຫ້ປະເທດຊາດ. ບັນດາໄຊຊະນະອັນສະຫງ່າລາສີຢູ່ສະຫນາມຮົບ ຫວຽດນາມ, ພິເສດ ແມ່ນການຕໍ່ສູ້ຄັ້ງປະຫວັດສາດ ໃນ 12 ວັນ ແລະ ຄືນຂອງບັ້ນຮົບ “ດ້ຽນບຽນຝູ ທາງອາກາດ” ເປັນການຕັດສິນຊີ້ຂາດ ເຮັດໃຫ້ອາເມລິກາ ຕ້ອງເຊັນສັນຍາຢຸດຕິສົງຄາມຢູ່ ຫວຽດນາມ. ໂດຍແມ່ນສະມາຊິກຂອງຄະນະເຈລະຈາ, ທ່ານ ຫງວຽນຄັກຮູ່ນ (Nguyễn Khắc Huỳnh), ອະດີດເອກອັກຄະລັດຖະທູດ, ສະມາຊິກຄະນະຜູ້ແທນ ສາທາລະນະລັດ ປະຊາທິປະໄຕ ຫວຽດນາມ ທີ່ການເຈລະຈາ ປາຣີ ກ່ຽວກັບ ຫວຽດນາມ ຖືວ່າ:
“ການເຈລະຈາ ປາຣີ ແມ່ນຍືດເຍື້ອຍາວນານ ແລະ ລຳບາກກາກກຳ ຍ້ອນມັນອີງໃສ່ສະພາບການຢູ່ສະຫນາມຮົບ. ກອງທັບ ຫວຽດນາມ ຢູ່ ພາກໃຕ້ຕ້ອງຕີເອົາຊະນະອາເມລິກາ ການເຈລະຈາຈຶ່ງປະສົບຜົນສຳເລັດໄດ້. ການເຈລະຈາດັ່ງກ່າວແມ່ນການຕໍ່ສູ້ທາງພູມປັນຍາ. ”
ກອງປະຊຸມເຈລະຈາສັນຍາ ປາຣີ
ພາບ:qdnd.vn
|
ໃນປະຫວັດສາດແຫ່ງການປົກປັກຮັກສາປະເທດ ຫວຽດນາມ, ນີ້ບໍ່ເປັນຄັ້ງທຳອິດ, ທີ່ການເຈລະຈາທາງການທູດ ຫວຽດນາມ ໄດ້ຮັບໄຊຊະນະ. ຖ້າທຽບໃສ່ກັບສົນທິສັນຍາເມື່ອວັນທີ 6/3/1946 ຫລື ສັນຍາ ເຊີແນວ, ສັນຍາ ປາຣີ ສະແດງໃຫ້ເຫັນໄຊຊະນະທີ່ຍິ່ງໃຫຍ່ ແລະ ທ່າອ່ຽງຂອງການຕໍ່ສູ້ຂອງປະຊາຊົນ ຫວຽດນາມ ໃນສະພາບສາກົນໃນຄາວນັ້ນ. ການເຈລະຈາ, ການຕໍ່ສູ້ເພື່ອພາໄປເຖິງການເຊັນສັນຍາປາຣີ ໄດ້ສ່ອງແສງໃຫ້ເຫັນການຊີ້ນຳນຳພາທີ່ປີຊາສາມາດຂອງພັກກອມມູນິດ ຫວຽດນາມ, ຂອງປະທານໂຮ່ຈິມິນ ແລະ ພູມປັນຍາຂອງພື້ນຖານການທູດປະຕິວັດ ຫວຽດນາມ ຢ່າງຄົບຖ້ວນ ໂດຍອີງໃສ່ຄວາມເປັນທຳ. ຫວຽດນາມ ຍາດແຍ່ງການຫນູນຊ່ວຍຈາກ ອະດີດໂຊຫວຽດ, ຈີນ, ບັນດາປະເທດສັງຄົມນິຍົມ, ບັນດາປະເທດບໍ່ຮ່ວມກຸ່ມ, ປະຊາຊົນໂລກ ແລະ ຄວາມຈິງແມ່ນ ສ້າງ “ແນວໂຮມປະຊາຊົນໂລກສະຫນັບສະຫນູນ ຫວຽດນາມ ຕ້ານອາເມລິກາຜູ້ຮຸກຮານ”. ທ່ານ ຫວໍວັນຊຸງ, ອະດີດຜູ້ຊ່ວຍວຽກລັດຖະມົນຕີການຕ່າງປະເທດ ຫວຽດນາມ, ອະດີດເອກອັກຄະລັດຖະທູດ ຫວຽດນາມ ປະຈຳ ຝລັ່ງ ຖືວ່າ:
“ໄຊຊະນະຂອງສັນຍາ ປາຣີ ມີສອງບັນຫາສຳຄັນ. ທີຫນຶ່ງ ກ່ຽວກັບດ້ານການພົວພັນຕ່າງປະເທດ ຕ້ອງປືກສາຫາລື, ປະຕິບັດໃຫ້ຖືກຕ້ອງ, ເຮັດໃຫ້ປະເທດເຈົ້າພາບຂອງສັນຍາປາຣີ ແມ່ນປະເທດຝລັ່ງ ຕ້ອງເຫັນດີເຫັນພ້ອມກັບ ຫວຽດນາມ, ສະຫນັບສະຫນູນ ຫວຽດນາມ. ທີສອງ ເຮັດແນວໃດເພື່ອໃຫ້ປະຊາຊົນໃນໂລກສະຫນັບສະຫນູນ ຫວຽດນາມ. ພິເສດ, ໃນ 12 ວັນ ແລະ ຄືນຂອງການບຸກໂຈມຕີທາງອາກາດທີ່ຮ້າຍແຮງນັ້ນ ມື້ໃດ ທ່ານລັດຖະມົນຕີການຕ່າງປະເທດ ຝລ່ັງ ກໍມາພົບປະກັບຄະນະຜູ້ແທນ ຫວຽດນາມ ເກັບກຳຂ່າວຄາວເພື່ອມີທັດສະນະຖືກຕ້ອງ.”
ໂດຍແມ່ນສະມາຊິກໃນຄະນະເຈລະຈາໃນຄາວນັ້ນ, ເມື່ອແລກປ່ຽນກັບນັກຂ່າວ ວິທະຍຸກະຈາຍສຽງ ຫວຽດນາມ ເນື່ອງໃນໂອກາດສະເຫລີມສະຫລອງ 40 ປີແຫ່ງວັນເຊັນສັນຍາປາຣີ, ທ່ານ ຫງວຽນຄັກຮູ່ນ ໄດ້ຢຶນຢັນວ່າ: ສັນຍາປາຣີ ແມ່ນໄຊຊະນະສັງລວມຂອງການທູດປະຊາຊົນ ພາຍໃຕ້ການນຳພາຂອງພັກກອມມູນິດ ຫວຽດນາມ ແລະ ການສະຫນັບສະຫນູນຂອງເພື່ອນມິດສາກົນ.
“ສັນຍາປາຣີ ແລະ ການເຈລະຈາ ປາຣີ ໄດ້ຍົກລະດັບຄວາມຮູ້ຂອງການທູດ ຫວຽດນາມ ຂຶ້ນທັດທຽມກັບລະດັບສາກົນ, ປະກອບສ່ວນພັດທະນາການທູດ ຫວຽດນາມ ທັດທຽບກັບຍຸກປະຈຸບັນ. ພາຍຫລັງກອງປະຊຸມປາຣີ, ການທູດ ຫວຽດນາມ ເຂັ້ມແຂງກວ່າອີກ. ”
40 ປີພາຍຫລັງມື້ເຊັນສັນຍາປາຣີ, ປະຈຸບັນ ຫວຽດນາມ ມີການພົວພັນທາງການທູດກັບ 180 ປະເທດ ແລະ ເຂດແຄ້ວນ, ແມ່ນຄູ່ຮ່ວມມືກັບຫລາຍປະເທດຢ່າງສະເໝີພາບ, ແມ່ນສະມາຊິກຕັ້ງຫນ້າ ແລະ ມີຄວາມຮັບຜິດຊອບຂອງຫລາຍອົງການຈັດຕັ້ງຮ່ວມມືຫລາຍຝ່າຍ. ການພົວພັນ ລະຫວ່າງຫວຽດນາມ ແລະ ອາເມລິກາ ໄດ້ກັບຄືນສູ່ຄວາມເປັນປົກກະຕິ ແລະ ພວມກ້າວເຂົ້າສູ່ເສັ້ນທາງຮ່ວມມືຍາວນານ. ບັນດາບົດຮຽນກ່ຽວກັບເຈດຈຳນົງປົກປັກຮັກສາເອກະລາດ, ອະທິປະໄຕແຫ່ງຊາດ ແລະ ນ້ຳໃຈສາມັກຄີສາກົນທີ່ການເຈລະຈາສັນຍາປາຣີຄາວນັ້ນ ມາຮອດປະຈຸບັນຍັງຄົງຮັກສາຄຸນຄ່າເໝືອນເດີມ ຍາມໃດຄົນລຸ້ນຫລັງສືບທອດ, ເສີມຂະຫຍາຍ ແລະ ສ້າງເປັນແນວຄິດການທູດສັນຕິພາບ ແລະ ມິດຕະພາບໃນເງື່ອນໄຂໃຫມ່.