ການເຈລະເຈລະຫວ່າງ ອິດສະຣາແອນ-ປາແລດຕີນຫາກໍຖືກ
ດຳເນີນຢູ່ນະຄອນຫຼວງວໍຊິງຕັນ ດ້ວຍການເປັນກາງຂອງອາເມລິກາ
(ພາບ : AP)
|
ຫວ່າງແລ້ວນີ້, ການເຈລະເຈລະຫວ່າງ ອິດສະຣາແອນ-ປາແລດຕີນຫາກໍສິ້ນສຸດລົງຢູ່ນະຄອນຫຼວງວໍຊິງຕັນພາຍຫຼັງດຳເນີນມາເປັນເວລາ 2 ວັນ. ເຖິງວ່າ ຍັງປະສົບກັບຄວາມຫຍຸ້ງຍາກບົນເສັ້ນທາງ ຊອກຫາວິທີການແກ້ໄຂດ້ວຍການຄົງຕົວ 2 ລັດໃນສັນຕິພາບ, ແຕ່ການເຈລະເຈຄັ້ງນີ້, ສ່ວນໃດ ສ່ວນໜຶ່ງໄດ້ນຳຄວາມ ຫວັງມາສູ່ຊາວອິດສະຣາແອນ, ປາແລດຕີນ ແລະ ນັບທັງປະຊາຄົມໂລກກ່ຽວກັບ ພື້ນຖານສັນຕິພາບທີ່ແທ້ຈິງຢູ່ຕາເວັນອອກກາງ.
ພາຍຫຼັງສິ້ນສຸດການເຈລະເຈ ຊຶ່ງມີການເຂົ້າຮ່ວມຂອງ 2 ຫົວໜ້າຄະນະເຈລະຈາ, ລັດຖະມົນຕີກະຊວງຍຸຕິທຳອິດສະຣາແອນ ທ່ານ Tzipi Livni ແລະນັກເຈລະຈາອາວຸໂສຂອງປາແລດຕີນ ທ່ານ Saeb Erakat, ລັດຖະມົນຕີການຕ່າງປະເທດອາເມລິກາ ທ່ານ Jonh Kerry ໄດ້ປະກາດວ່າການເຈລະເຈໄດ້ບັນລຸໝາກຜົນຢ່າງຕັ້ງໜ້າໃນທ່າມກາງບັນຍາກາດກົງໄປກົງມາ ແລະ ສ້າງສັນ. 2 ຝ່່າຍໄດ້ເປັນເອກະສັນກັນດຳເນີນການເຈລະຈາກ່ຽວກັບທຸກໆບັນຫາທີ່ກ່ຽວຂ້ອງເຖິງສັນຍາສັນຕິພາບ ແລະ ບັນດາບັນຫາພື້ນຖານອື່ນໆ. ລະອຽດແມ່ນ ໃນຮອບ 2 ອາທິດຂ້າງໜ້າ, ອິດສະຣາແອນ ແລະ ປາແລດຕີນ ເຫັນດີພົບປະກັນເພື່ອເລີ່ມ ດຳເນີນການເຈລະເຈຢ່າງເປັນທາງການ, ພ້ອມກັນນັ້ນ, ກໍຢືນຢັນວ່າ ຈະມານະພະຍາຍາມບັນລຸສັນຍາສັນຕິພາບຮອບດ້ານໃນຮອບເວລາ 9 ເດືອນອີກ.
ເຖິງວ່າການພົບປະເປັນເວລາ 2 ວັນພຽງແຕ່ແມ່ນບາດກ້າວລິເລີ່ມເພື່ອຂຶ້ນແຜນການໃຫ້ແກ່ບັນດາຮອບເຈລະຈາທີ່ໃຫຍ່ກ່ວາໃນຂັ້ນຕໍ່ໄປ, ແຕ່ຕາມບັນດານັກໄຈ້ແຍກແລ້ວ, ມີສັນຍານຫຼາຍຢ່າງທີ່ປະເອີບໃຈຕໍ່ຄວາມຄືບໜ້າກ່ຽວກັບສັນຕິພາບໃນພາກພື້ນ. ກ່ອນອື່ນໝົດ, ກ່ອນທີ່ດຳເນີນການເຈລະຈາ, ທັງອິດສະ ຣາແອນ ແລະ ປາແລດຕີນ ລ້ວນແຕ່ມີບັນດາບາດກ້າວເດີນດ້ວຍເຈດຕະນາດີຊຶ່ງສະແດງໃຫ້ເຫັນຄວາມຫວັງພ້ອມແລ້ວທີ່ຈະຊອກຫາກາລະໂອກາດສັນຕິພາບ. ພ້ອມກັບຄຳຖະແຫຼງຂອງຜູ້ນາຍົກລັດຖະມົນຕີອິດສະຣາແອນ Benjamin Netanyahu ທີ່ວ່າ ການເຊື່ອມຕໍ່ການເຈລະເຈກັບປາແລດຕີນຄືນໃໝ່ ແມ່ນຄວາມ“ ເປັນຕາຍ ” ຂອງອິດສະຣາແອນ, ອຳນາດການປົກຄອງ ແທນອາວີບ ກໍຍິນຍອມປ່ອຍຕົວນັກໂທດຊາວປາແລດຕີນ 100 ກ່ວາຄົນ. ອິດສະຣາແອນຍັງສະແດງເຈດຈຳນົງຈະບໍ່ອອກໜັງສືອະນຸຍາດເພື່ອກໍ່ສ້າງບັນດາເຂດຕັ້ງຖິ່ນຖານຄົງທີ່ຂອງຊາວຢິວທີ່ເຂດຝັ່ງຕາເວັນຕົກແມ່ນ້ຳຈໍແດນຂອງຊາວປາແລດຕີນ, ຊຶ່ງແມ່ນໜຶ່ງໃນັບນດາການກະທຳທຳລາຍຄວາມເຊື່ອໝັ້ນລະຫວ່າງ 2 ຝ່າຍ. ສຳລັບທາງຝ່າຍປາແລດຕີນ ຈະບໍ່ເດີນຕາມບັນດາການກະທຳທາງການທູດຕ້ານອິດສະ ຣາແອນ ຢູ່ໃນບໍ່ວ່າອົງການຈັດຕັ້ງສາກົນໃດໆ ແນໃສ່ຕອບສະໜອງຄວາມເປັນຫ່ວງກັງວົນຂອງແທນອາວີບ. ພ້ອມກັນນັ້ນ, ປາແລດຕີນກໍຫຼຸດຜ່ອນຄຳຮຽກຮ້ອງກ່ຽວກັບການຢຸດກໍ່ສ້າງເຂດຕັ້ງຖິ່ນຖານຄົງທີ່ກໍຄືເລື່ອງອິດສະຣາແອນ ຕ້ອງຍອມຮັບຕໍ່ການຂີດຂັ້ນຊາຍແດນກ່ອນປີ 1967 ເພື່ອເປັນພື້ນຖານດຳເນີນການເຈລະຈາກ່ຽວກັບເສັ້ນຊາຍແດນ. ສັນຍານທີ່ 2 ຊຶ່ງໄດ້ເຮັດໃຫ້ຫາງສຽງມີຄວາມປະເອີບໃຈ ນັ້ນແມ່ນບໍ່ຄ້າຍຄືກັບປີ 2010, ຊຶ່ງແມ່ນຈຸດເວລາທີ່ການເຈລະເຈສຸດທ້າຍລະຫວ່າງອິດສະຣາແອນ-ປາແລດຕີນພັງທະລາຍ, ການເຈລະເຈຄັ້ງນີ້ ແມ່ນມີໄລຍະໜຶ່ງທີ່ແກ່ຍາວພໍສົມຄວນ ເພື່ອໃຫ້ບັນດາຝ່າຍຜ່ອນສັ້ນຜ່ອນຍາວ. ກ່ອນນີ້ 3 ປີ, ທ່ານ Mahmoud Abbas ພຽງແຕ່ກັບຄືນສູ່ການເຈລະຈາໃນຈຸດເວລາໃກ້ຈະໝົດກຳນົດເວລາ 10 ເດືອນຂອງທ່ານ Benjamin Netanyahu ກ່ຽວກັບການຢຸດການກໍ່ສ້າງ ເຂດຕັ້ງຖິ່ນຖານຄົງທີ່ໂດຍຊົ່ວຄາວ. ບັນດາການເຈລະເຈໃນຄາວນັ້ນ ກໍໄດ້ສິ້ນສຸດລົງຢ່າງວ່ອງໄວ. ໃນປະຈຸບັນ, ບັນດາຝ່າຍໄດ້ໝັ້ນໝາຍສະຫງວຽນເວລາ 9 ເດືອນໃຫ້ແກ່ ການເຈລະເຈ, ຊຶ່ງແມ່ນໄລຍະເວລາພຽງພໍເພື່ອໃຫ້ຄວາມມານະພະຍາຍາມຂອງທຸກຝ່າຍໄປສູ່ການບັນລຸສັນຍາ ສັນຕິພາບ. ພ້ອມກັນນັ້ນ, 2 ຝ່າຍໝັ້ນໝາຍປຶກສາຫາລືທຸກໆບັນຫາສຳຄັນຢ່າງເຂັ້ມງວດ ຊຶ່ງແມ່ນການກະທຳບໍ່ເຄີຍມີມາເມື່ອກ່ອນນີ້. ສຸດທ້າຍ, ບໍ່ອາດບໍ່ເນັ້ນໜັກເຖິງບົດບາດເປັນກາງຂອງອາເມລິກາ, ບັນດາການເຈລະເຈລະຫວ່າງ ອິດສະຣາແອນ-ປາແລດຕີນ ເຄີຍຖືກຢຸດສະງັກ ແລ້ວກໍຖືກເຊື່ອມຕໍ່ຄືນໃໝ່ມາຫຼາຍຄັ້ງແລ້ວໃນຫຼາຍທົດສະວັດທີ່ຜ່ານມາ. ການເຈລະຈາເກືອບຄືວ່າ ຖືກພັງທະລາຍນັບແຕ່ເດືອນ 9 ປີ 2010 ຂະນະທີ່ ອິດສະຣາແອນປະຕິເສດຕໍ່ການຢຸດການເຄືອ່ນໄຫວກໍ່ສ້າງເຂດຕັ້ງຖິ່ນຖານຄົງທີ່ບົນດິນແດນຂອງຊາວ ປາແລດຕີນ. ເພາະສະນັ້ນ, ການເຈລະຈາຮອບໃໝ່ດ້ວຍບັນດາໝາກຜົນທີ່ຕັ້ງໜ້າ ໄດ້ນຳຄວາມຫວັງແຫ່ງສັນຕິພາບມາສູ່ພາກພື້ນຕາເວັນອອກກາງ. ບັນລຸໄດ້ຜົນສຳເລັດດັ່ງກ່່າວ ແມ່ນຕ້ອງເນັ້ນໜັກເຖິງຄວາມມານະພະຍາຍາມຢ່າງບໍ່ຮູ້ອິດຮູ້ເມື່ອຍຂອງ ລັດຖະມົນຕີການຕ່າງປະເທດອາເມລິກາ ທ່ານ Jonh Kerry. ດ້ວຍບັນດາຜົນສະທ້ອນຢ່າງແຮງໃນພາກພື້ນ, ພິເສດແມ່ນກັບປະເທດພັນທະມິດ ອິດສະຣາແອນ ທີ່ໃກ້ຊິດນັ້ນ, ກໍມີຫຼາຍເຫດຜົນເພື່ອເຊື່ອໝັ້ນວ່າ ອຳນາດການປົກຄອງຂອງ ປະທານາທິບໍດີ Barack Obama ຈະບໍ່ຢຸດຕິການຟື້ນຟູສັນຍາສັນຕິພາບເທົ່ານັ້ນ, ຫາກຍັງມີຄວາມມານະພະຍາຍາມຫຼາຍຢ່າງເພື່ອສ້າງສະຖຽນລະພາບຢູ່ເຂດດິນທີ່ຕິດພັນກັບຜົນປະໂຫຍດຂອງອາເມລິກາອີກດ້ວຍ.
ແຕ່ຫາງສຽງຖືວ່າ ການຫັນປ່ຽນຄັ້ງປະຫວັດສາດທີ່ຫາກໍບັນລຸໄດ້ນັ້ນ, ແມ່ນຍັງບໍ່ທັນແມ່ນເປົ້າໝາຍສຸດທ້າຍເພື່ອນຳມາເຊິ່ງສັນຕິພາບ ແລະ ທຸກຝ່າຍຄວນມີຄວາມມານະພະຍາຍາມຕື່ມອີກ. ຍັງມີສິ່ງທ້າທາຍຫຼາຍຢ່າງທີ່ຈະຕ້ອງຜ່ານຜ່າ. ນັ້ນແມ່ນບໍ່ພຽງແຕ່ຄວາມແບ່ງແຍກຢ່າງເລິກເຊິ່ງຢູ່ພາຍໃນປາແລດຕີນເທົ່ານັ້ນ, ຫາກຍັງແມ່ນຄວາມວິຕົກກັງວົນກ່ຽວກັບການຄິດໄລສະແຫວງຫາຜົນປະໂຫຍດ ສ່ວນຕົວຂອງຝ່າຍຕ່າງໆເມື່ອເຊື່ອມຕໍ່ການເຈລະຈາຄືນໃໝ່. ເຖິງຢ່າງໃດກໍຕາມ, ຫາງສຽງຍັງຝາກຄວາມຫວັງຕໍ່ບັນດາຜົນສຳເລັດຂອງວິວັດທະນາການ ສັນຕິພາບ ຊຶ່ງຫາກໍໄດ້ຮັບການເຊື່ອມຕໍ່ຄືນໃໝ່ໂດຍພາຍໃຕ້ການເປັນກາງຂອງ ອາເມລິກາ. ພາຍຫຼັງຖືກປົກຄຸມດ້ວຍເງົາມືດມາເປັນເວລາຫຼາຍປີ, ກາລະໂອກາດເພື່ອພື້ນຖານສັນຕິພາບແບບຖາວອນຢູ່ຕາເວັນອອກກາງ ໄດ້ມີສັນຍານທີ່ສະຫວ່າງສະໄຫວຢູ່.