ທ່ານລັດຖະມົນຕີການຕ່າງປະເທດລັດເຊຍ Sergei Lavrov ຫາກໍສິ້ນສຸດການຢ້ຽມຢາມປັກກິງ ແລະ ພົບປະກັບຄູ່ຕຳແໜ່ງ ທ່ານຫວາງອີ. ເຖິງວ່າ ໄດ້ປະກາດວ່າ ນີ້ພຽງແຕ່ແມ່ນການເຄື່ອນໄຫວທາງການທູດເພື່ອກະກຽມໃຫ້ແກ່ການຢ້ຽມຢາມຂອງປະທານາທິບໍດີລັດເຊຍ Vladimir Putin ໃນເດືອນໜ້ານີ້, ແຕ່ການຢ້ຽມຢາມນີ້ພັດດຶງດູດຄວາມສົນໃຈເປັນພິເສດຈາກວົງການນັກໄຈ້ແຍກການເມືອງສາກົນ ເພາະວ່າມັນໄດ້ດຳເນີນກົງກັບຈຸດເວລາທີ່ການພົວພັນລະຫວ່າງ ມົດສະກູ ແລະ ຝ່າຍຕາເວັນຕົກພວມເກີດຄວາມເຄັ່ງຕຶງທີ່ສຸດຊຶ່ງກ່ຽວຂ້ອງເຖິງບັນຫາຢູກແຣນ. ແລະ ບັນດາການເຄື່ອນໄຫວທາງການທູດຂອງມົດສະກູແມ່ນຊ້ອນແຝງບັນຫາຫຼາຍຢ່າງ, ຫາກບໍ່ພຽງແຕ່ແມ່ນເພື່ອ ປັບປຸງການພົວພັນ 2 ຝ່າຍເທົ່ານັ້ນ.
ທ່ານລັດຖະມົນຕີການຕ່າງປະເທດ ລັດເຊຍ Sergei Lavrov
|
ທີ່ການເຈລະຈາກັບຄູ່ຕຳແໜ່ງຈີນ, ທ່ານລັດຖະມົນຕີການຕ່າງປະເທດ ລັດເຊຍ Sergei Lavrov ໄດ້ຢືນຢັນວ່າ ການພົວພັນຄູ່ຮ່ວມມືຍຸດທະສາດ ລັດເຊຍ-ຈີນ ແມ່ນພວມມີຄວາມໄວ້ເນື້ອເຊື່ອໃຈກັນໃນລະດັບສູງສຸດ. 2 ຝ່າຍໄດ້ເຫັນດີເປັນເອກະສັນຕີລາຄາວ່າ ຂົງເຂດທີ່ປະສົບຜົນສຳເລັດທີ່ສຸດໃນການພົວພັນ 2 ຝ່າຍແມ່ນການຮ່ວມມືທາງດ້ານການຄ້າ. ໂດຍບໍ່ຫົວຊາຕໍ່ສະພາບການເສດຖະກິດໂລກບໍ່ສະດວກໃນປີ 2013, ວົງເງິນການຄ້າ ລັດເຊຍ-ຈີນຍັງຄົງບັນລຸ 88,8 ຕື້ USD ດ້ວຍທ່າອຽງລົງທຶນທີ່ນັບມື້ນັບເພີ່ມຂຶ້ນ, ພິເສດແມ່ນ ການສົ່ງນ້ຳມັນຂອງລັດເຊຍໄປຂາຍໃຫ້ຈີນ ແລະ ການລົງທຶນຂອງຈີນເຂົ້າຂົງເຂດຂຸດຄົ້ນອາຍແກັສຢູ່ເຂດໄຫຼ່ທະວີບຂອງລັດເຊຍ. ບັນດາຂົງເຂດສັງຄົມ, ການທະຫານ, ການປ້ອງກັນຄວາມສະຫງົບກໍພັດທະນາຢ່າງແຂງແຮງ.
ເຖິງຢ່າງໃດກໍຕາມ, ບັນດາຜູ້ຊ່ຽວຊານໃຫ້ຂໍ້ສັງເກດວ່າ ຈຸດປະສົງຕົ້ນຕໍ່ຂອງ ການເດີນທາງຢ້ຽມຢາມແມ່ນມົດສະກູພວມຮູ້ແຮງບັນດາການເຄືອນໄຫວທາງການທູດມຸ່ງໄປສູ່ທາງຕາເວັນອອກ, ພິເສດແມ່ນຈີນໃນສະພາວະໃນສະພາບການທີ່ການພົວພັນລັດເຊຍ-ຝ່າຍຕາເວັນຕົກພວມຕົກເຂົ້າສູ່ສົງຄາມເຢັນຄັ້ງໃໝ່ພາຍຫຼັງບັນດາເຫດການຢູ່ຢູກະແຣນ.
ຄວາມມານະພະຍາຍາມຍາດເອົາການສົ່ງຜົນສະທ້ອນ
ວິກິດການຢູກະແຣນ ໄດ້ຍູ້ລັດເຊຍ, ອາເມລິກາຕົກເຂົ້າສູ່ສົງຄາມເຢັນຄັ້ງໃໝ່ ແລະ ການພົວພັນລະຫວ່າງ 2 ປະເທດຖືກຕົກເຂົ້າສູ່ສະພາບສູ້ຢັນກັນຢ່າງຮ້າຍແຮງທີ່ສຸດນັບແຕ່ ສະຫະພາບໂຊຫວຽດຖືກພັງທະລາຍເມືອ່ປີ 1991. ກໍເຊັ່ນດຽວກັນກັບການສູ້ຢັນກັນລະຫວ່າງອາເມລິກາ - ສະຫະພາບໂຊຫວຽດເມື່ອກ່ອນນີ້, ຈີນໄດ້ກາຍເປັນປະເທດທີ 3 ທີ່ສຳຄັນ ແລະ ເລື່ອງຈີນເລືອກເຟັ້ນຢືນຢູ່ຝ່າຍໃດ ກໍແມ່ນສິ່ງທີ່ທັງອາເມລິກາ ແລະ ລັດເຊຍມີຄວາມສົນໃຈກ່ວາໝູ່. ເພາະສະນັ້ນ, ໜຶ່ງໃນບັນດາໜ້າທີສຳຄັນຂອງທ່ານລັດຖະມົນຕີການ ຕ່າງປະເທດລັດເຊຍ Sergei Lavrov ຢູ່ປັກກິງ, ນັ້ນແມ່ນເພື່ອຊອກຫາການສະໜັບສະໜູນຈາກຈີນ.
ຕາມຂໍ້ສັງເກດແລ້ວ, ໃນຄວາມມານະພະຍາຍາມຍາດແຍ່ງເອົາການສົ່ງຜົນສະທ້ອນນີ້, ມົດສະກູມີທ່າດີຫຼາຍກ່ວາເພາະມົດສະກູ ແລະ ປັກກິງມີຫຼາຍຈຸດທີ່ຄ້າຍຄືກັນທາງດ້ານເສດຖະກິດ, ທັດສະນະການເມືອງ ແລະ ຫຼັກໝັ້ນທີ່ມີຕໍ່ຝ່າຍຕາເວັນຕົກ. 2 ປະເທດກຳມະການປະຈຳສະພາຄວາມໝັ້ນຄົງ ສ.ປ.ຊ ນີ້ແມ່ນປະເທດພັນທະມິດຂອງກັນໃນຫຼາຍບັນຫາທີ່ເຄັ່ງຮ້ອນຂອງໂລກຄື ຊີຣີ, ອີຣານ, ສປປເກົາຫຼີ... ມີທ່າໄດ້ປຽບອີກອັນໜຶ່ງຂອງລັດເຊຍໃນທ່າສະໜາມຮົບນີ້ ແມ່ນການພົວພັນຄູ່ແຂ່ງ - ຄູ່ຮ່ວມມື, ການພົວພັນຮ່ວມມື - ລະງັບໃຈຊຶ່ງກັນ ແລະ ກັນລະຫວ່າງຈີນ - ອາເມລິກາ.
ໃນຕົວຈິງ, ບັນດາປະຕິກິລິຍາຂອງຈີນທີ່ມີຕໍ່ສະພາບການຢູກະແຣນເມື່ອມໍ່ໆມານີ້ ແມ່ນເປັນໜ້າໃສ່ໃຈ. ນັບຕັ້ງແຕ່ເມື່ອວິກິດການເລີ່ມລະເບີດຂຶ້ນເມື່ອທ້າຍປີ 2013, ສົງການສື່ສານຈີນມີແນວໂນ້ມຕຳໜິຕິຕຽນຝ່າຍຕາເວັນຕົກ ຊຶ່ງໄດ້ກໍ່ຄວາມວຸ່ນວາຍຢູ່ ຢູກະແຣນ ແລະ ຖືວ່າຄວາມຕັດສິນໃຈຂອງທ່ານປະທານາທິບໍດີ Putin ແນໃສ່ປົກປ້ອງຜົນປະໂຫຍດຂອງປະຊາຊົນລັດເຊຍ ແມ່ນເຂົ້າໃຈງ່າຍຢ່າງສິ້ນເຊິ່ງ. ພາຍຫຼັງທີ່ມັດສະກູສົ່ງກຳລັງທະຫານເຂົ້າ Crimea ນັ້ນ, ຈີນພຽງແຕ່ອອກສຽງ ກະຕຸກຊຸກຍູ້ບັນດາຝ່າຍທີ່ກ່ຽວຂ້ອງຈົ່ງແກ້ໄຂການພິພາດກັນໂດຍສັນຕິວິທີ ຕາມລະບຽບກົດໝາຍ. ບັດຂາວຂອງຈີນທີ່ມີຕໍ່ມະຕິຂອງ ສະພາຄວາມໝັ້ນຄົງ ສ.ປ.ຊ ເມື່ອເດືອນ 3 ທີ່ຜ່ານມາກ່ຽວກັບການໂຮມເອົາ Crimea ເຂົ້າດິນແດນສະຫະພັນລັດເຊຍນັ້ນ, ສ່ວນໃດສ່ວນໜຶ່ງກໍໄດ້ສະແດງທ່າທີ, ທັດສະນະຂອງຈີນຕໍ່ບັນຫາ ຢູກະແຣນ. ບັດຂາວນີ້ ແມ່ນຍາກທີ່ຈະຖືວ່າແມ່ນການກະທຳຄັດຄ້ານລັດເຊຍ.
ດັ່ງນັ້ນ, ໃນການເດີນທາງຢ້ຽມຢາມປັກກິງຄັ້ງນີ້, ທ່ານລັດຖະມົນຕີການ ຕ່າງປະເທດລັດເຊຍ Sergei Lavrov ກໍບໍ່ລັ່ງເລໃຈເມື່ອໄດ້ຕີລາຄາສູງຫຼັກໝັ້ນພາວະວິໄສ ແລະ ສ້າງຄວາມກ້ຳເກິ່ງຂອງຈີນກ່ຽວກັບບັນຫາ ໂຮມ Crimea ເຂົ້າດິນແດນສະຫະພັນລັດເຊຍ ແລະ ຖືວ່າປັກກິງໄດ້ສະແດງໃຫ້ເຫັນຄວາມເຂົ້າໃຈຢ່າງຮອບດ້ານກ່ຽວກັບບັນດາປັດໄຈ, ພິເສດແມ່ນປັດໄຈປະຫວັດສາດໃນວິທີຕີລາຄາວິກິດການຢູ່ ຢູກະແຣນ.
ສ້າງຄວາມເປັນລະບຽບຮຽບຮ້ອຍຂອງໂລກໃໝ່
ວິກິດການ ຢູກະແຣນ ໃນປະຈຸບັນພວມກ້າວໄປສູ່ບັນດາການຜັນແປທີ່ສັບສົນທີ່ສຸດ. ເຖິງວ່າຍາກທີ່ຈະໄປສູ່ສົງຄາມກໍຕາມ, ແຕ່ບັນຫາຂາດສະຖຽນລະພາບຢູ່ ຢູກະແຣນ ອາດຈະກາຍເປັນບາດກ້າວຫັນປ່ຽນໃຫຍ່ມຸ່ງໄປສູ່ການ ສ້າງຄວາມເປັນລະບຽບຮຽບຮ້ອຍຂອງໂລກໃໝ່. ຄວາມມານະພະຍາຍາມເຮັດມຫ້ລັດເຊຍຕົກຢູ່ໂດດດຽວຂອງອາເມລິກາ ແລະ ຝ່າຍຕາເວັນຕົກຈະຍູ້ມົດສະກູ ແລະ ຈີນຫຍັບມໍ່ເຂົ້າກັນ, ຊຶ່ງແມ່ນສິ່ງທີ່ອາເມລິກາບໍ່ມຸ່ງຫວັງແຕ່ຢ່າງໃດ.
ຈາກບັນດາການຜັນແປດັ່ງກ່າວ ແມ່ນອາດຈະເຫັນວ່າການເດີນທາງຢ້ຽມຢາມຈີນຂອງທ່ານລັດຖະມົນຕີການຕ່າງປະເທດລັດເຊຍ Sergei Lavrov ໄດ້ບັນລຸຜົນສຳເລັດບໍ່ຫຼາຍກໍໜ້ອຍ. ເຖິງວ່າບໍ່ສະໜັບສະໜູນຢ່າງເປີດເຜີຍກໍຕາມ, ແຕ່ທ່າທີບໍ່ຄັດຄ້ານຂອງປັກກິງ ອາດຈະເຮັດໃຫ້ມົດສະກູມີຄວາມເພິ່ງພໍໃຈ, ສ້າງເງື່ອນໄຂສະດວກໃຫ້ແກ່ລັດເຊຍກ້າວເຂົ້າສູ່ການເຈລະຈາ 4 ຝ່າຍຢູ່ເຊີແນວປະເທດສະວິດໃນວັນທີ 17/4 ເພື່ອຊອກຫາວິທີແກ້ໄຂດ້ານການເມືອງຢູ່ ຢູກະແຣນ