ບັນດາຜູ້ສະໜັບສະໜູນທ່ານ Mohamed Mursi ໄດ້ລົງຖະໜົນສະແດງກຳລັງໃຈຢູ່ Alexandria ເມື່ອ 22/5.
(ພາບ: AFP)
|
ໃນວັນທີ 23 ແລະ 24/5, ຜູ້ມີສິດເລືອກຕັ້ງອີຢີບ ນັບລ້ານໆຄົນໄດ້ໄປປ່ອນບັດເລືອກຕັ້ງປະທານາທິບໍດີ. ນີ້ແມ່ນຄັ້ງທຳອິດທີ່ປະຊາຊົນອີຢີບ ເຂົ້າຮ່ວມການເລືອກຕັ້ງປະທານາທິບໍດີໂດຍເສລີ ນັບແຕ່ອະດີດປະທານາທິບໍດີ Hosni Mubarak ຖືກໂຄ່ນລົ້ມໃນການລຸກຮື້ຂຶ້ນລະດູບານໃໝ່ອາຣັບ ກ່ອນນີ້ 15 ເດືອນ. ແຕ່ເຖິງຢ່າງໃດກໍ່ຕາມ, ຫາງສຽງຄາດຄະເນວ່າ, ຜູ້ອອກສະໝັກຮັບເລືອກຕັ້ງ 12 ທ່ານ ລ້ວນແຕ່ຍາກທີ່ຈະສາມາດຍາດໄດ້ໄຊຊະນະຢ່າງຂາດຂັ້ນໃນຮອບທີ 1..
ວົງການນັກໄຈ້ແຍກຖືວ່າ: ບໍ່ອາດປະຕິເສດວ່າ ການເລືອກຕັ້ງຄັ້ງນີ້ ມີຄວາມໝາຍຕັດສິນຊິ້ຂາດຕໍ່ອະນະຄົດຂອງອີຢີບ. ທີ 1 ແມ່ນ, ຜູ້ມີສິດເລືອກຕັ້ງຈະເລືອກຕັ້ງປະທານາທິບໍດີທ່ານ 1 ໃຫ້ແກ່ປະເທດອາຟຼິກກາເໜືອ ພາຍຫຼັງເວລາ 1 ປີທີ່ປະທານາທິບໍດີ Hosni Mubarak ຖືກໂຄ່ນລົ້ມ. ທີ 2 ແມ່ນ, ໝາກຜົນແຫ່ງການເລືອກຕັ້ງຈະສີ້ນສຸດໄລຍະຂ້າມຜ່ານ, ຊື່ງແມ່ນການກະທຳຢຸດຕິສິດອຳນາດຂອງສະພາການທະຫານກຳອຳນາດ ໂດຍໄດ້ຮັບການລໍຄອຍຈາກທຸກໆຝ່າຍ. ການເລືອກຕັ້ງປະທານາທິບໍດີຄັ້ງນີ້ ຍັງສະແດງໃຫ້ເຫັນວິວັດທະນາການປະຊາທິປະໄຕຢູ່ອີຢີບ ພວມມີບັນດາບາດກ້າວເດີນທຳອິດ. ນັບແຕ່ປີ 1952 ມາຮອດປະຈຸບັນ, ອີຢີບ ໄດ້ຜ່ານການນຳພາຂອງປະທານາທິບໍດີ 4 ສະໄໝແລ້ວ ແຕ່ມີພຽງບັນດາການລົງປະຊາມະຕິກ່ຽວກັບຄວາມໄວ້ເນື້ອເຊື່ອໃຈຂອງຜູ້ນຳລັດເທົ່ານັ້ນ. ໃນການເລືອກຕັ້ງຄັ້ງນີ້, ຜູ້ມີສິດເລືອກຕັ້ງມີໂອກາດຄັດເລືອກການນຳຂອງຕົນ ແລະ ບັນດາຜູ້ອອກສະໝັກຮັບເລືອກຕັ້ງມີຄວາມສະເໝີພາບພໍສົມຄວນ ດ້ວຍເລື່ອງໃຫ້ຄຳໝັ້ນສັນຍາຈະກະຕຸກຊຸກຍູ້ພື້ນຖານເສດຖະກິດດ້ວຍການລົງທຶນເຂົ້າບັນດາຂະແໜງອຸດສາຫະກຳ, ພະລັງງານ, ກະສິກຳ ກໍຄືຍູ້ແຮງ ບັນດາໂຄງການລຽບຕາມຄອງ Suez ເພື່ອດຶງດູດການສະໜັບ ສະໜູນຂອງມະຫາຊົນ.
ເຖິງວ່າໄດ້ດຳເນີນໄປໃນສະພາບສະດວກສະບາຍພໍສົມຄວນກໍ່ຕາມ ແຕ່ການເລືອກຕັ້ງປະທານາທິບໍດີຄັ້ງນີ້ ພັດຍາກທີ່ຈະເລືອກໄດ້ການນຳຂອງປະເທດຊາດໃນການປ່ອນບັດຮອບທຳອິດ. ໝາກຜົນໃນການຢັ່ງຫາງສຽງກ່ອນການເລືອກຕັ້ງໃຫ້ເຫັນວ່າ ມີເຖິງ 37% ໃນຈຳນວນຜູ້ມີສິດເລືອກຕັ້ງອີຢີບ 50 ລ້ານຄົນບໍ່ທັນຕັດສິນໃຈຈະປ່ອນບັດໃຫ້ແກ່ຜູ້ອອກສະໝັກຮັບເລືອກຕັ້ງທ່ານໃດ. ຕາມຂໍ້ໃຫ້ສັງເກດຂອງວົງການນັກໄຈ້ແຍກແລ້ວ, ຈະບໍ່ມີຜູ້ອອກສະຫມັກຮັບເລືອກຕັ້ງທ່ານໃດ ໃນຈຳນວນ 12 ທ່ານຍາດໄດ້ບັດສະໜັບສະໜູນຫຼາຍກ່ວາ 50% ເພື່ອຍາດໄດ້ໄຊຊະນະໃນຮອບທີ 1 ຂອງການເລືອກ. ຖ້າສິ່ງດັ່ງກ່າວເກີດຂຶ້ນ, ຜູ້ອອກສະໝັກຮັບເລືອກຕັ້ງ 2 ທ່ານ ຍາດໄດ້ບັດສະໜັບສະໜູນຫຼາຍກ່ວາໝູ່ຈະກ້າວເຂົ້າສູ່ຮອບທີ 2 ຊື່ງຄາດວ່າຈະດຳເນີນໄປໃນວັນທີ 16-17/6 ທີ່ຈະມາເຖິງ.
ໃນບັນຊີລາຍຊື່ບັນດາຜູ້ສະໝັກຮັບເລືອກຕັ້ງທີ່ມີແງ່ຫວັງດີກ້າວສູ່ຮອບ ທີ່ 2 ແມ່ນມີເຖິງ 4 ທ່ານ, ນັ້ນແມ່ນອະດີດເລຂາທິການໃຫຍ່ສະຫະພັນອາຣັບ ທ່ານ Amr Moussa, ອະດີດນາຍົກລັດຖະມົນຕີ Ahmed Shafip, ອະດີດສະມາຊິກອົງການ“ອ້າຍນ້ອງມຸດສະລິມ” ທ່ານ Abul Fotouh ແລະ ປະທານພັກເສລີ ແລະ ຍຸຕິທຳ ທ່ານ Mohamed Mursi. ເມື່ອສັງເກດຕີລາຄາກ່ຽວກັບບັນຊີລາຍຊື່ດັ່ງກ່າວ ແມ່ນອາດຈະເຫັນວ່າ ໃນການເລືອກຕັ້ງຄັງນີ້, ຈະເກີດມີການແຂ່ງຂັນລະຫວ່າງ ຝ່າຍອິດສະລາມ ແລະຝ່າຍສືບທອດ ກໍຄືບັນດາບຸກຄົນໃນສະໄໝ ປະທານາທິບໍດີ Hosni Mubarak. ສິ່ງດັ່ງກ່າວໄດ້ເຮັດໃຫ້ທ່ານ Diaa Rashwan ຜູ້ອຳນວຍການສູນຄົ້ນຄ້ວາການເມືອງ ແລະ ຍຸດທະສາດ AlAhram ມີຂໍ້ສັງເກດຢ່າງຂາດຄວາມເຊື່ອໝັ້ນວ່າ ເຖິງວ່າຜູ້ໃດຍາດໄດ້ໄຊຊະນະໃນການເລືອກຕັ້ງກໍຕາມ, ສິດອຳນາດຍັງບໍ່ອາດຂຶ້ນກັບຝ່າຍໃດຝ່າຍໜຶ່ງ.
ໃນຂະນະທີ່ຜົນການເລືອກຕັ້ງປະທານາທິບໍດີຍາກທີ່ຈະທຳນາຍໄດ້ນັ້ນ, ຫາງສຽງກໍເຫັນໄດ້ເຖິງບັນດາຄວາມຫຍຸ້ງຍາກທີ່ ປະທານາທິບໍດີຄົນໃໝ່ຕ້ອງປະເຊີນໜ້າ. ນັບແຕ່ທ່ານ Hosni Mubarak ຖືກອອກຈາກຕ່ຳແໜ່ງເປັນເວລາ 15 ເດືອນ, ບັນດາການແຫ່ຂະບວນປະທ້ວງ, ໃຊ້ຄວາມຮຸ່ນແຮງຍັງຄົງສືບຕໍ່ເກີດຂຶ້ນ ແລະ ພື້ນຖານເສດຖະກິດໄດ້ຊຸດໂຊມລົງຢ່າງເຫັນໄດ້ຊັດ, ອັນໄດ້ເຮັດໃຫ້ນັກລົງທຶນທໍ້ຖອຍໃຈ. ນັ້ນແມ່ນຍັງບໍ່ທັນເວົ້າເຖິງການແບ່ງແຍກ ແລະ ເກີດຄວາມບໍ່ລົງລອຍກັນລະຫວ່າງບັນດາຝ່າຍໃນໄລຍະທີ່ຜ່ານມາ, ຊຶ່ງໄດ້ເຮັດໃຫ້ປະເທດນີ້ຍັງບໍ່ອາດມີລັດຖະທຳມະນູນໃໝ່ໄລຍະຫຼັງຂອງທ່ານ Hosni Mubarak.
ກ່ອນນີ້ກວ່າ 1 ປີ, ຊາວອີຢິບນັລລ້ານຄົນໄດ້ລົງສູ່ຖະໜົນໂຄ່ນລົ້ມ ປະທານາທິບໍດີ Hosni Mubarakດ້ວຍຄວາມຫວັງເປີດໄລຍະປະຊາທິປະໄຕ, ສັນຕິພາບ ແລະ ພັດທະນາ. ປະຈຸບັນຜູ້ມີສິດເລືອກຕັ້ງສາມາດເລືອກຕັ້ງຜູ້ນຳຂອງປະເທດຊາດ, ແຕ່ເບິ່ງຄືວ່າ ນີ້ກໍແມ່ນ ການເລືອກຕັ້ງທີ່ຫຍຸ້ງຍາກ.