ຫວ່າງແລ້ວນີ້, ໝາກຜົນສຸດທ້າຍຂອງການເລືອກຕັ້ງ ສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆອາຍຸການ 2016-2021 ຫາກໍຖືກປະກາດໃຫ້ຜູ້ມີສິດເລືອກຕັ້ງທົ່ວປະເທດ ແລະ ເພື່ອນມິດສາກົນຮັບຊາບຢ່າງທົ່ວເຖິງໃນຕອນບ່າຍວັນທີ 9/6. ປະຊາທິປະໄຕ, ລະບຽບວິໄນ, ຖືກຕ້ອງຕາມກົດໝາຍແມ່ນການຕີລາຄາກ່ຽວກັບຜົນຂອງການເລືອກຕັ້ງຄັ້ງນີ້.
ທ່ານນາງປະທານສະພາແຫ່ງຊາດ, ປະທານສະພາເລືອກຕັ້ງແຫ່ງຊາດ ຫງວຽນທິກິມເງີນ ປະຕິບັດສິດ ແລະ ພັນທະພົນລະເມືອງຂອງຕົນ |
ກ່ອນທີ່ຈະດຳເນີນການປະຊຸມຂ່າວກ່ຽວກັບຜົນຂອງການເລືອກຕັ້ງນີ້, ທ່ານນາງປະທານສະພາແຫ່ງຊາດ, ປະທານສະພາເລືອກຕັ້ງແຫ່ງຊາດ ຫງວຽນທິກິມເງີນ ໄດ້ຢືນຢັນໃນວາລະປະຊຸມຄັ້ງທີ 6 ຂອງ ສະພາເລືອກຕັ້ງແຫ່ງຊາດເມື່ອວັນທີ 8/6 ວ່າ ການເລືອກຕັ້ງ ສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນຂັ້ນຕ່າງໆອາຍຸການ 2016-2021 ໄດ້ບັນລຸໝາກຜົນອັນຈົບງາມໃນທຸກດ້ານ.
ຈິດໃຈຮັບຜິດຊອບຂອງ ຜູ້ມີສິດເລືອກຕັ້ງຕິດພັນກັບພື້ນຖານການເມືອງທີ່ມີສະຖຽນລະພາບ
ຕາມບົດລາຍງານຂອງສະພາເລືອກຕັ້ງແຫ່ງຊາດ, 99,35% ຂອງຈຳນວນຜູ້ມີສິດເລືອກຕັ້ງໄດ້ໄປປ່ອນບັດເລືອກຕັ້ງໃນວັນທີ 22/5, ໃນນັ້ນ ມີບັນດາທ້ອງຖິ່ນ ຜູ້ມີສິດເລືອກຕັ້ງເກືອບທັງໝົດເຂົ້າຮ່ວມການປ່ອນບັດເລືອກຕັ້ງເຊັ່ນ: ເທື່ອທຽນເຫ້ວ, ອຽນບ້າຍ, ກວ່າງນາມ, ບີງຖ້ວນ, ລາຍເຈົາ, ຈາວິງ, ກອມຕຸມ, ເບັ້ນແຈ, ເຫົ້າຢາງ… ທ່ານຊູຊານໂຕ ຊາວອິນໂດເນເຊຍ ໄດ້ດຳລົງຊີວິດ ແລະ ເຮັດວຽກຢູ່ຮ່າໂນ້ຍເປັນເວລາຫຼາຍປີແລ້ວ ໃຫ້ຂໍ້ສັງເກດວ່າ :
“ຂ້າພະເຈົ້າຖືວ່າ ອັດຕາຜູ້ມີສິດເລືອກຕັ້ງໄປປ່ອນບັດໃນເວລາທີ່ຜ່ານມາ ແມ່ນສູງທີ່ສຸດ. ໂດຍໄດ້ສັງເກດການເລືອກຕັ້ງຜ່ານຫຼາຍຄັ້ງ, ຂ້າພະເຈົ້າເຫັນວ່າ ອັດຕາສ່ວນນີ້ເຄີຍສູງກວ່າ 95%. ເປັນທີ່ຈະແຈ້ງແລ້ວວ່າ ຢູ່ຫວຽດນາມ ເລື່ອງນີ້ແມ່ນທຳມະດາ, ແຕ່ເມື່ອສົມທຽບກັບປະເທດອື່ນໆ ແມ່ນສູງທີ່ສຸດ. ອັດຕາສ່ວນນີ້ ໄດ້ສ່ອງແສງສະຕິຕື່ນຕົວທາງດ້ານການເມືອງຂອງປະຊາຊົນທີ່ມີຕໍ່ລັດຂອງຕົນ. ເຂົາເຈົ້າຖືວ່າ ໄປປ່ອນບັດເລືອກຕັ້ງແມ່ນການປະຕິບັດສິດຜົນປະໂຫຍດ ແລະ ພັນທະທີີ່ມີຕໍ່ລັດຂອງຕົນ ”
ອັດຕາຜູ້ມີສິດເລືອກຕັ້ງໄປປ່ອນບັດສູງທີ່ສຸດ ແມ່ນສິ່ງທີ່ບໍ່ແມ່ນປະເທດໃດໃນໂລກກໍສາມາດປະຕິບັດໄດ້ ຖ້າຫາກວ່າ ບໍ່ມີພື້ນຖານການເມືອງມີສະຖຽນລະພາບ ແລະ ຜູ້ມີສິດເລືອກຕັ້ງມີຈິດໃຈຮັບຜິດຊອບສູງ. ທ່ານ ຫງວຽນກ໋ວກເທືອກ ອະດີດ ສ.ສ.ຊ ຫວຽດນາມຊຸດທີ 8,9,10 ຖືວ່າ ການເລືອກຕັ້ງໄດ້ຮັບໄຊຊະນະໃນສະພາວະຄວາມໝັ້ນຄົງມີການຜັນແປທີ່ສັບສົນ. ທ່ານ ຫງວຽນກ໋ວກເທືອກ ກ່າວວ່າ :
“ ໃນສະພາບການທີ່ກຸ່ມຄົນທີ່ບໍ່ດີຍຸຍົງສົ່ງເສີມ ກໍ່ຄວາມວຸ່ນວາຍ, ແຕ່ພວກເຮົາໄດ້ດຳເນີນການເລືອກຕັ້ງຢ່າງມີໄຊ. ຈາກຄວາມຈິງດັ່ງກ່າວ, ພວກເຮົາສາມາດສະຫຼຸບໄດ້ວ່າ ບໍ່ວ່າເຫດການໃດທີ່ປະຊາຊົນມີຄວາມສົນໃຈ ແລະ ໄດ້ຮັບຄວາມເອົາໃຈໃສ່ຈາກພັກ ແລະ ລັດນັ້ນ, ບໍ່ວ່າອິດທິກຳລັງໃດໆຫວັງມ້າງເພທຳລາຍ ກໍບໍ່ສາມາດປະຕິບັດໄດ້. ບັນຫາຕັດສິນຍັງຄົງແມ່ນປະຊາຊົນ ແລະ ຂ້າພະເຈົ້າຄິດວ່າ ນີ້ແມ່ນໄຊຊະນະຂອງການເລືອກຕັ້ງ. ”
ປະຖົມປັດໄຈເພື່ອສ້າງລັດແຫ່ງອຳນາດກົດໝາຍໃຫ້ສົມບູນແບບ
ຕາມການປະກາດຂອງສະພາເລືອກຕັ້ງແຫ່ງຊາດ, ໄດ້ມີຜູ້ແທນ 496 ຄົນໄດ້ຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ 14 ແລະ ຜູ້ແທນເກືອບ 4000 ຄົນໄດ້ຮັບການເລືອກຕັ້ງເປັນສະມາຊິກສະພາປະຊາຊົນຂັ້ນແຂວງ, ຜູ້ແທນກວ່າ 315.000 ຄົນໄດ້ຮັບການເລືອກຕັ້ງເປັນສະມາຊິກສະພາປະຊາຊົນຂັ້ນຕາແສງ. ທ່ານເລມິນທົ່ງ ຮອງປະທານກຳມາທິການກົດໝາຍຂອງສະພາແຫ່ງຊາດ, ຮອງຫົວໜ້າຫ້ອງການສະພາເລືອກຕັ້ງແຫ່ງຊາດ ຖືວ່າໝາຜົນຂອງການເລືອກຕັ້ງຄັ້ງນີ້ໄດ້ສ່ອງແສງບາດກ້າວຂະຫຍາຍຕົວກ່ຽວກັບປະຊາທິປະໄຕ. ທ່ານເລມິນທົ່ງ ຮອງປະທານກຳມາທິການກົດໝາຍຂອງສະພາແຫ່ງຊາດ, ຮອງຫົວໜ້າຫ້ອງການສະພາເລືອກຕັ້ງແຫ່ງຊາດ ກ່າວວ່າ :
“ ສິ່ງທີ່ພວກເຮົາຢັ້ງຢືນ ກ່ອນອື່ນໝົດແມ່ນພວກເຮົາໄດ້ເຄົາລົບເຈດຈຳນົງຂອງ ຜູ້ມີສິດເລືອກຕັ້ງ. ຜູ້ມີສິດເລືອກຕັ້ງໄດ້ເລືອກເຟັ້ນ ແລະ ພວກເຮົາໄດ້ເຄົາລົບໝາກຜົນນີ້. ຂະນະທີ່ສະຕິຂອງປະຊາຊົນນັບມື້ນັບສູງ, ຄວາມຮັບຜິດຊອບດ້ານການເມືອງຂອງປະຊາຊົນນັບມື້ນັບຖືກຍົກສູງຂຶ້ນນັ້ນ, ການທີ່ປະຊາຊົນບໍ່ໄວ້ວາງໃຈຜູ້ໃດຜູ້ໜຶ່ງໃນຈຳນວນບັນດາຜູ້ອອກສະໝັກຮັບເລືອກຕັ້ງນັ້ນ ກໍແມ່ນເລື່ອງທຳມະດາ. ມັນໄດ້ສະແດງໃຫ້ເຫັນວ່າ ລະດັບພັດທະນາກ່ຽວກັບປະຊາທິປະໄຕຂອງພວກເຮົາແມ່ນດີພໍສົມຄວນແລ້ວ ”
ໝາກຜົນການເລືອກຕັ້ງໄດ້ຮັບປະກັນໂດຍພື້ນຖານບັນດາຄວາມຮຽກຮ້ອງຕ້ອງການຂອງບັນດາອົງການຕົວແທນປະຊາຊົນຄື ພາກສ່ວນ, ໂຄງປະກອບ ສ.ສ.ຊ , ອັດຕາ ສ.ສ.ຊ ເປັນແມ່ຍິງ, ຊາວເຜົ່າສ່ວນໜ້ອຍ. ໝາກຜົນນີ້ຈະເປັນພື້ນຖານປະກອບສ່ວນສ້າງບັນດາອົງການສຳນັກງານຕົວແທນທີ່ມີຄວາມສາມາດເຄື່ອນໄຫວຢ່າງມີປະສິດທິຜົນ, ຖືກຕ້ອງກັບລັດຖະທຳມະນູນປີ 2013, ຕອບສະໜອງກິດຈະການສ້າງສາ ແລະ ປັກຮັກສາປະເທດຊາດໃນທ່າອຽງເຊື່ອມໂຍງເຂົ້າກັບສາກົນ.