(VOVWORLD) -ໄລຍະພັດທະນາ ແຕ່ປີ 2021 – 2030, ວິໄສທັດຮອດປີ 2045, ພັກ ແລະລັດ ຫວຽດນາມ ຕັ້ງຫລາຍຄວາມຫວັງຕໍ່ບົດບາດພື້ນຖານດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳ, ຖືວ່າ ນີ້ແມ່ນ “ບຸກທະລຸຍຸດທະສາດ”, “ກຳລັງຫນູນຕົ້ນຕໍ” ເພື່ອສ້າງບາດກ້າວກະໂດດຂັ້ນກ່ຽວກັບສະມັດຕະພາບ, ຄຸນນະພາບ, ປະສິດທິຜົນ ແລະ ກຳລັງແກ້ງແຍ່ງຂອງພື້ນຖານເສດຖະກິດ. ສະນັ້ນ ບັນດານັກວິທະຍາສາດ ແລະ ປະຊາຄົມວິສາຫະກິດ ໄດ້ພ້ອມກັນມານະພະຍາຍາມພັດທະນາວິທະຍາສາດເຕັກນິກ ແລະ ນະວັດຕະກຳ ຕິດພັນກັບບັນດາເປົ້າໝາຍພັດທະນາແບບຍືນຍົງຂອງປະເທດຊາດ. ຂະບວນການແຂ່ງຂັນນີ້ແມ່ນສືບທອດເນື້ອໃນຈິດໃຈ 75 ປີ (11/6/1948-11/6/2023) ແຫ່ງວັນປະທານໂຮ່ຈີມິນ ອອກຄຳຮຽກຮ້ອງແຂ່ງຂັນຮັກຊາດ, ໄດ້ສ້າງເປັນກຳລັງຫນູນເຕີບໂຕໃຫມ່ຂອງປະເທດຊາດ.
 ພາບປະກອບ: Bộ Công thương |
ໄລຍະຜ່ານມາ,ບັນດານັກວິທະຍາສາດ, ວິສາຫະກິດ, ກຳລັງວິທະຍາສາດເຕັກໂນໂລຊີ ຫວຽດນາມ ໄດ້ມານະພະຍາຍາມຢ່າງບໍ່ຢຸດຢັ້ງເພື່ອເຕີບໃຫຍ່, ເຂົ້າຮ່ວມຂະບວນການແຂ່ງຂັນພັດທະນາວິທະຍາສາດເຕັກໂນໂລຊີ ແລະ ນະວັດຕະກຳ ຢ່າງຕັ້ງຫນ້າ ເພື່ອຍູ້ແຮງພາລະກິດປ່ຽນແປງໃຫມ່ຂອງປະເທດຊາດ.
ແຂ່ງຂັນເປັນເຈົ້າວິທະຍາສາດເຕັກໂນໂລຊີ
ຢູ່ ສູນວິເຄາະຖານຂໍ້ມູນ Viettel Telecom, ມີຫລາຍໂຄງການສຳຄັນ ໄດ້ ແລະ ພວມໄດ້ຮັບການປະຕິບັດ, ຊ່ວຍແກ້ໄຂຫລາຍມາດຕະການດຳເນີນທຸລະກິດ ຂອງ Viettel ຢູ່ ຫວຽດນາມ ແລະ ບັນດາຕະຫລາດຕ່າງປະເທດຄື: ລາວ, ກຳປູເຈຍ, ເປຣູ, ມຽນມາ. ທ່ານ ຫງວຽນເຈີນງອັກລິງ, ຜູ້ອຳນວຍການສູນດັ່ງກ່າວ ພ້ອມກັບໝູ່ຄະນະລັດຖະກອນ ພວມພ້ອມກັນແຂ່ງຂັນມຸ່ງໄປເຖິງເປົ້າໝາຍກໍ່ສ້າງສູນວິເຄາະຖານຂໍ້ມູນ Bigdata ລະດັບສາກົນ.
“ນີ້ແມ່ນການກຳນົດທິດຂອງ ກຸ່ມບໍລິສັດ ຕະຫລອດຮອດບໍລິສັດໃຫຍ່ ແລະ ພວກຂ້າພະເຈົ້າແມ່ນຄະນະຜູ້ອຳນວຍການຂອງສູນ. ກຸ່ມບໍລິສັດ Viettel ຍາມໃດກໍ່ປຸກລະດົມຂະບວນການ Startup, ຊອກຫາສິ່ງໃຫມ່ອ່ຽມ. ພວກຂ້າພະເຈົ້າບໍ່ມີຄວາມເພິ່ງພໍໃຈຕໍ່ບັນດາຜະລິດຕະພັນ, ຄວາມຮູ້, ເຕັກໂນໂລຊີທີ່ຕົນເອງພວມມີ ຫາກຍັງຕ້ອງອັບເດດພູມປັນຍາໃຫມ່ຈາກໂລກອີກດ້ວຍ”
ສຸມໃສ່ພັດທະນາເຕັກໂນໂລຊີໃຫມ່ຂອງການປະຕິວັດອຸດສາຫະກຳຄັ້ງທີ 4, ທ່ານ ປອ ຫງວຽນຟີເລ ແລະ ຜູ້ຮ່ວມງານຢູ່ສູນສາກົນຄົ້ນຄ້ວາກ່ຽວກັບປັນຍາປະດິດ, ມະຫາວິທະຍາໄລສັບພະວິຊາ ຮ່າໂນ້ຍ ພວມແຂ່ງຂັນຄົ້ນຄ້ວາການໝູນໃຊ້ປັນຍາປະດິດເພື່ອເກັບກຳຂໍ້ມູນ ແລະ ພະຍາກອນຄຸນນະພາບຂອງອາກາດ.
 ທ່ານ ບຸ່ຍເທຢູຍ, ຮອງລັດຖະມົນຕີກະຊວງອຸດສາຫະກຳ ແລະການຄ້າ ຫວຽດນາມ. ພາບ: Trí thức trẻ |
ສ້າງກຳລັງຫນູນການເຕີບໂຕໃຫມ່ໃຫ້ແກ່ປະເທດຊາດ
ບົດລາຍງານດັດຊະນີນະວັດຕະກຳທົ່ວໂລກ ໂດຍອົງການຊັບສິນທາງປັນຍາໂລກ(WIPO), ປະກາດປີ 2022 ໃຫ້ເຫັນວ່າ: ຫວຽດນາມ ສືບຕໍ່ຮັກສາລະດັບສູງໃນຕາຕະລາງຈັດອັນດັບປີ 2022, ແມ່ນຢູ່ອັນດັບ 48/132 ປະເທດ, ພື້ນຖານເສດຖະກິດ ແລະ ຂຶ້ນກັບກຸ່ມປະເທດບັນລຸຄວາມກ້າວຫນ້າໃຫຍ່ສຸດໃນທົດສະວັດຜ່ານມາ. ຫວຽດນາມ ໄດ້ຮັບການຮັບຮູ້ວ່າແມ່ນຫນຶ່ງໃນບັນດາປະເທດມີການເຕີບໂຕ TFP ເປັນບວກ ແລະຂຶ້ນກັບກຸ່ມບັນດາປະເທດ TFP ເພີ່ມຂຶ້ນສູງທີ່ສຸດ ດ້ວຍລະດັບສະເລ່ຍແມ່ນ 1,4%/ປີ. ບັນລຸໝາກຜົນຄືດັ່ງກ່າວແມ່ນຍ້ອນມີການປະກອບສ່ວນບໍ່ແມ່ນຫນ້ອຍຈາກນັກວິທະຍາສາດ ແລະ ວິສາຫະກິດຜະລິດດຳເນີນທຸລະກິດ.
ເຖິງແນວນັ້ນກໍຕາມ, ຫວຽດນາມ ຄວນມີບັນດາກຳລັງຫນູນໃຫມ່ໃຫ້ແກ່ການເຕີບໂຕເສດຖະກິດ ເພື່ອບັນລຸເປົ້າໝາຍໃຫ້ກາຍເປັນພື້ນຖານເສດຖະກິດທີ່ມີລາຍຮັບສູງໃນປີ 2045, ໃນນັ້ນ ວິທະຍາສາດ, ນະວັດຕະກຳ ແມ່ນພື້ນຖານຕົ້ນຕໍໃນການຍົກສູງລາຍຮັບ ແລະ ປັບປຸງຄຸນນະພາບການເຕີບໂຕ. ທ່ານ ບຸ່ຍເທຢີ ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ຫວຽດນາມ ໃຫ້ຮູ້ວ່າ: ອົງການນີ້ ໄດ້ຜັນຂະຫຍາຍຫລາຍໂຄງການ, ກໍ່ສ້າງ, ປັບປຸງບັນດານະໂຍບາຍເພື່ອແນໃສ່ສ້າງເງື່ອນໄຂສະດວກເພື່ອໃຫ້ບັນດານັກວິທະຍາສາດເສີມຂະຫຍາຍກຳລັງຄວາມສາມາດການປະດິດສ້າງ.
“ໄລຍະຜ່ານມາ, ພວກຂ້າພະເຈົ້າ ໄດ້ມີການດັດປັບຫລາຍຢ່າງໃນການຜັນຂະຫຍາຍບັນດານະໂຍບາຍກ່ຽວກັບ ວິທະຍາສາດ, ນະວັດຕະກຳ, ພິເສດໄລຍະຈະມາເຖິງ ພວກຂ້າພະເຈົ້າມີຫລາຍນະໂຍບາຍ, ໂຄງການຫນູນຊ່ວຍວິສາຫະກິດກໍຄືຫນູນຊ່ວຍການເຊື່ອມຕໍ່ວິສະຫາກິດກັບບັນດາສະຖາບັນຄົ້ນຄ້ວາ, ມະຫາວິທະຍາໄລກໍຄືຊຸກຍູ້ຫລາຍໂຄງການ ເພື່ອຊ່ວຍວິສາຫະກິດປະຕິບັດການເຄື່ອນໄຫວນະວັດຕະກຳ”
ຫວຽດນາມ ສູ້ຊົນຮອດປີ 2030 ແມ່ນປະເທດພວມພັດທະນາ ມີອຸດສາຫະກຳທັນສະໄຫມ, ລາຍຮັບສະເລ່ຍສູງ; ຮອດປີ 2045 ກາຍເປັນປະເທດພັດທະນາມີລາຍຮັບສູງ. ເປົ້າໝາຍນີ້ແມ່ນພາໃຫ້ບັນດານັກວິທະຍາສາດມີກາລະໂອກາດ ແລະ ກໍ່ປະສົບກັບສິ່ງທ້າທາຍໃນການປ່ຽນໃຫມ່ ເພື່ອໃຫ້ວິທະຍາສາດເຕັກໂນໂລຊີ ຫວຽດນາມພັດທະນາວ່ອງໄວກວ່າ, ແທດຈິງກວ່າ ແລະໝັ້ນຄົງກວ່າ. ດ້ວຍບັນດາການປ່ຽນໃຫມ່ໃນການຄົ້ນຄ້ວາ ແລະ ໝູນໃຊ້ວິທະຍາສາດເຕັກໂນໂລຊີເຂົ້າໃນການຜະລິດ, ເປັນທີ່ຈະແຈ້ງແລ້ວວ່າ ບັນດານັກວິທະຍາສາດ ແລະ ປະຊາຄົມວິສາຫະກິດ ໄດ້ ແລະ ພວມປະຕິບັດການແຂ່ງຂັນຮັກຊາດຢ່າງຖືກຕ້ອງຕາມເນື້ອໃຈຈິດໃຈ ຄຳຮຽກຮ້ອງແຂ່ງຂັນຮັກຊາດຂອງປະທານໂຮ່ຈີມິນ ກ່ອນນີ້ 75 ປີ. ການແຂ່ງຂັນຮັກຊາດໃນຂົງເຂດການຄົ້ນຄ້ວາ ແລະ ໝູນໃຊ້ວິທະຍາສາດເຕັກໂນໂລຊີເຂົ້າໃນການຜະລິດ ໄດ້ສ້າງກຳລັງຫນູນເຕີບໂຕໃຫມ່ໃນການພັດທະນາເສດຖະກິດສັງຄົມ, ປະກອບສ່ວນສ້າງສາປະເທດ ຫວຽດນາມ ໃຫ້ນັບມື້ນັບຮັ່ງມີເຂັ້ມແຂງ.