ການແຂ່ງຂັນເພື່ອກາຍເປັນປະທານາທິບໍດີຄົນທີ 45 ຂອງອາເມລິກາໃນປີ 2016 ພວມເຄັ່ງຮ້ອນຂຶ້ນ. ພ້ອມກັບເລື່ອງປະກາດອອກຫາສຽງເລືອກຕັ້ງຢ່າງເປັນທາງການ, ບັນດາຜູ້ສະໝັກຮັບເລືອກຕັ້ງກໍພວມມານະພະຍາຍາມທຸ່ມເຫື່ອເທແຮງເພື່ອຜ່ານຜ່າ ຜູ້ສະໝັກຮັບເລືອກຕັ້ງຄົນອື່ນໆເພື່ອຍາດເອົາສິດເຂົ້າຮ່ວມການຫາສຽງເລືອກຕັ້ງປະທານາທິບໍດີອາເມລິກາປີ 2016 ໃຫ້ແກ່ສະມາຊິກຂອງພັກຕົນ. ການແຂ່ງຂັນເພື່ອເລືອກເອົາຜູ້ສືບທອດປະທານາທິບໍດີ Barak Obama ເມື່ອວັນທີ 8/11/2016, ຄາດຄະເນວ່າ ຈະມີການຜັນແປຫຼາຍຢ່າງທີ່ບໍ່ອາດຄາດຄິດລ່ວງໜ້າ.
ການຊອກຫາຜູ້ສະໝັກຮັບເລືອກຕັ້ງທີ່ດີເດັ່ນຂອງທັງພັກປະຊາທິປະໄຕ ແລະ ພັກສາທາລະນະ ໄດ້ເລີ່ມດຳເນີນນັບແຕ່ຕົ້ນປີນີ້, ຊຶ່ງມີການເຂົ້າຮ່ວມຂອງນັກການເມືອງຫຼາຍທ່ານ. ແຕ່ພາຍຫຼັງທີ່ອະດີດລັດຖະມົນຕີການຕ່າງປະເທດອາເມລິກາ Hillary Clinton ປະກາດອອກຫາສຽງເລືອກຕັ້ງປະທານາທິບໍດີອາເມລິກາພຽງ 2-3 ວັນເທົ່ານັ້ນ, ໄດ້ເຮັດໃຫ້ການແຂ່ງຂັນຫາສຽງເລືອກຕັ້ງເຄັ່ງຮ້ອນຂຶ້ນ
ຊອກຫາຜູ້ສະໝັກຮັບເລືອກຕັ້ງທີ່ດີເດັ່ນ
ນັກການເມືອງຍິງ Hillary Clinton ປີນີ້ ມີອາຍຸ 68 ປີ, ເປັນພັນລະຍາຂອງອະດີດປະທານາທິບໍດີອາເມລິກາ Bill Clinton ແລະ ໃນອະດີດແມ່ນລັດຖະມົນຕີການຕ່າງປະເທດອາເມລິກາ ໄດ້ຮັບການສະໜັບສະໜູນຢ່າງແຂງແຮງ ແລະ ມາຮອດຈຸດເວລານີ້ ກໍເປັນຜູ້ສະໝັກຮັບເລືອກຕັ້ງທີ່ມີແງ່ຫວັງດີກວ່າໝູ່ຂອງພັກປະຊາທິປະໄຕສຳລັບການຫາສຽງເລືອກຕັ້ງປະທານາທິບໍດີອາເມລິກາ. ປະຈຸບັນ, ພັກນີ້ ຍັງບໍ່ທັນມີຜູ້ສະໝັກຮັບເລືອກຕັ້ງຄົນໃດທີ່ດີເດັ່ນ ເພື່ອສາມາດກາຍເປັນຄູ່ແຂ່ງຂອງຜູ້ສະໝັກຮັບເລືອກຕັ້ງ Hillary Clinton.
ທ່ານນາງ Hillary Clinton ເປັນຜູ້ສະໝັກຮັບເລືອກຕັ້ງທີ່ມີແງ່ຫວັງດີກວ່າໝູ່ຂອງພັກປະຊາທິປະໄຕສຳລັບການຫາສຽງເລືອກຕັ້ງປະທານາທິບໍດີອາເມລິກາ |
ສ່ວນພັກສາທາລະນະນັ້ນ, ໃນມໍ່ໆມານີ້, ທ່ານ Marco Rubio , ອາຍຸ 43 ປີໄດ້ກາຍເປັນສະມາຊິກສະພາສູງສັງກັດພັກສາທາລະນະ ທີ່ໜຸ່ມແໜ້ນກວ່າໝູ່ໃນການເຂົ້າຮ່ວມແຂ່ງຂັນກາຍເປັນຜູ້ນຳທຳນຽບຂາວ ຂະນະທີ່ໄດ້ປະກາດຢ່າງເປັນທາງການວ່າ ຈະຜັນຂະຫຍາຍບັ້ນຫາສຽງເລືອກຕັ້ງປະທານາທິບໍດີອາເມລິກາ. ເປັນອັນວ່າ ນັກການເມືອງຄົນນີ້ ຈະຕ້ອງປະເຊີນໜ້າກັບນັກການເມືອງທີ່ມີປະສົບການຄົນອື່ນໆໃນເລື່ອງກາຍເປັນບຸກຄົນຖືກສະເໜີອອກສະໝັກຮັບເລືອກຕັ້ງຂອງພັກນີ້ຄື : ທ່ານ Jeb Bus ສະມາຊິກສະພາສູງສັງກັດພັກສາທາລະນະຂອງລັດ Florida. ກ່ອນໜ້ານັ້ນ, ພັກສາທາລະນະ ໄດ້ມີຜູ້ສະໝັກຮັບເລືອກຕັ້ງ 2 ທ່ານ ປະກາດອອກສະໝັກຮັບເລືອກຕັ້ງປະທານາທິບໍດີ ຊຶ່ງລວມມີ ສະມາຊິກສະພາສູງ Ted cruz ແລະ ສະມາຊິກສະພາສູງ Rand Paul. ນອກຈາກນັ້ນ, ທ່ານ Jeb Bus ອະດີດຜູ້ວ່າການລັດ Florida ຊຶ່ງແມ່ນນ້ອງຊາຍຂອງອະດີດປະທານາທິບໍດີອາເມລິກາ George W. Bush ແລະ ແມ່ນລູກຊາຍຂອງອະດີດປະທານາທິບໍດີອາເມລິກາ George Bush ກໍໄດ້ຮັບການຄາດຄະເນວ່າ ອາດຈະເຂົ້າຮ່ວມການແຂ່ງຂັນກາຍເປັນຜູ້ສະໝັກຮັບເລືອກຕັ້ງປະທານາທິບໍດີອາເມລິກາ.
ຜູ້ສະໝັກຮັບເລືອກຕັ້ງສັງກັດພັກສາທາລະນະ ຫຼື ພັກປະຊາທິປະໄຕສາມາດເອົາຊະນະ ?
ຈຸດສຸມຂອງບັ້ນຫາສຽງເລືອກຕັ້ງຂອງທ່ານນາງ Hillary Clinton ແມ່ນຊ່ວຍພວກຊົນຊັ້ນກາງ ແລະ ຫຼຸດຜ່ອນຄວາມຜິດໂຕນດ້ານລາຍຮັບໃນສັງຄົມ. ຕາມບັນດານັກໄຈ້ແຍກແລ້ວ, ມີເຫດຜົນຫຼາຍພໍສົມຄວນເພື່ອຊ່ວຍທ່ານນາງ Hillary Clinton ຍາດເອົາທ່າໄດ້ປຽບຫຼາຍຢ່າງໃນການແຂ່ງຂັນເຂົ້າທຳນຽບຂາວໃນປີ 2016. ກ່ອນອື່ນໝົດ, ໃນຕົວຈິງ, ຂະບວນການສັງຄົມໄດ້ນຳແມ່ຍິງກາຍເປັນຜູ້ມີ ສິດອຳນາດສູງສຸດຊຶ່ງພວມເກີດຂຶ້ນຢູ່ທົ່ວປະເທດອາເມລິກາ ແລະ ນີ້ແມ່ນທ່າໄດ້ປຽບຂອງທ່ານນາງ Hillary Clinton. ທ່ານນາງກໍມີໃນກຳມື ກົງຈັກທີ່ພ້ອມແລ້ວກະທຳເພື່ອທ່ານນາງ ຍ້ອນຄວາມເກັ່ງກ້າສາມາດໃນການຂົນຂວາຍຫາສຽງສະໜັບສະໜູນທີ່ພົ້ນເດັ່ນ. ນອກຈາກນັ້ນ, ຄວາມສາມາດດ້ານການເງິນຢ່າງໃຫຍ່ຫຼວງ ແລະ ເໜືອກ່ວາສິ່ງໃດໝົດ, ທ່ານນາງມີ “ຊັບສົມບັດອັນລ້ຳຄ່າ” ນັ້ນແມ່ນມີສາມີແມ່ນ ອະດີດປະທານາທິບໍດີອາເມລິກາ Bill Clinton ຊຶ່ງໄດ້ສ້າງທ່າດີທີ່ສຸດໃຫ້ແກ່ທ່ານນາງ. ພ້ອມກັນນັ້ນ, ທ່ານນາງ Hillary Clinton ໄດ້ຜ່ານການດຳລົງຕຳແໜ່ງຕ່າງໆທີ່ສຳຄັນຂອງອາເມລິກາ. ເພາະສະນັ້ນ, ການແຂ່ງຂັນກາຍເປັນປະທານາທິບໍດີຍິງຂອງອາເມລິກາຂອງ ທ່ານນາງ Hillary Clinton ພວມແມ່ນຄວາມປາຖະໜາຂອງພັກປະຊາທິປະໄຕ.
ການແຂ່ງຂັນຫາສຽງເລືອກຕັ້ງຍັງຈະມີການຜັນແປຫຼາຍຢ່າງ
ເຖິງຢ່າງໃດກໍຕາມ, ພາລະກິດການເມືອງຂອງ ທ່ານນາງ Hillary Clinton ຍັງປະສົບກັບສິ່ງທ້າທາຍຫຼາຍຢ່າງຂະນະທີ່ ພັກສາທາລະນະພວມມານະພະຍາຍາມສະກັດກັ້ນບັ້ນຫາສຽງເລືອກຕັ້ງປີ 2016 ຂອງທ່ານນາງ ຢ່າງບໍ່ຢຸດຢັ້ງ . ປະຈຸບັນ, ພັກສາທາລະນະມີສະມາຊິກກວ່າ 10 ຄົນໄດ້ຮັບຖືວ່າ ມີຄວາມສາມາດອອກຫາສຽງເລືອກຕັ້ງປະທານາທິບໍດີອາເມລິກາ. ໃນນັ້ນ, ຜູ້ສະໝັກຮັບເລືອກຕັ້ງໄດ້ຮັບຖືວ່າ ມີແງ່ຫວັງດີກວ່າໝູ່ແມ່ນທ່ານ Jeb Bus ອະດີດຜູ້ວ່າການລັດ Florida ຊຶ່ງແມ່ນນ້ອງຊາຍຂອງອະດີດປະທານາທິບໍດີອາເມລິກາ George W. Bush. ນອກຈາກນັ້ນ, ຍັງມີຄູ່ແຂ່ງທີ່ສຳຄັນອີກທ່ານໜຶ່ງ, ນັ້ນແມ່ນຜູ້ສະໝັກຮັບເລືອກຕັ້ງ Ted Cruz. ໂດຍໄດ້ຮັບໄຊຊະນະໃນການເລືອກຕັ້ງເປັນ ສະມາຊິກສະພາສູງ ແຕ່ເດືອນ 11/2012, ທ່ານ Ted Cruz ເຄີຍແມ່ນໜຶ່ງໃນບັນດາຜູ້ຕຳໜິຕິຕຽນຢ່າງຮຸນແຮງກ່ຽວກັບໂຄງການປະຕິຮູບການເຂົ້າເມືອງ ແລະ ສາທາລະນະສຸກຂອງ ປະທານາທິບໍດີອາເມລິກາ Obama. ເຖິງວ່າໄດ້ຮັບການຕີລາຄາແມ່ນຜູ້ມີແງ່ຫວັງດີກໍຕາມ, ແຕ່ທ່ານ Ted Cruz ຈະຕ້ອງປະສົບກັບການແກ່ງແຍ້ງຢ່າງແຂງແຮງຈາກນັກການເມືອງຄົນອື່ນໆເພື່ອຮັບເລືອກເຟັ້ນເປັນຜູ້ສະໝັກຮັບເລືອກຕັ້ງ ປະທານາທິບໍດີອາເມລິກາ ເປັນຕົວແທນໃຫ້ແກ່ ພັກສາທາລະນະໃນການແຂ່ງຂັນເຂົ້າທຳນຽບຂາວປີ 2016. ຜົນຂອງການຢັ່ງຫາງສຽງໃນມໍ່ໆ ມານີ້ ໃຫ້ເຫັນວ່າ ທ່ານ Ted Cruz ໄດ້ຮັບພຽງ 8% ຈຳນວນສຽງສະໜັບສະໜູນຂອງບັນດາສະມາຊິກສັງກັດພັກສາທາລະນະ.
ໃນຄວາມຈິງ, ການເລືອກຕັ້ງ ປະທານາທິບໍດີອາເມລິກາທຸກຄັ້ງ, ລ້ວນແຕ່ກໍ່ຄວາມຕົກສະເງີ້ໃນຈຸດເວລາສຸດທ້າຍ ແລະ ປະຈຸບັນ, ຍັງໄວເກີນໄປເພື່ອຈະຮູ້ວ່າໃຜແມ່ນບຸກຄົນທີ່ມີຄວາມສາມາດບົ່ມຊ້ອນຫຼາຍທີ່ສຸດ. ເລື່ອງກັບຄືນສູ່ເວທີ່ການເມືອງຂອງທ່ານນາງ Hillary Clinton ພ້ອມກັບການເຂົ້າຮ່ວມ ຫາສຽງເລືອກຕັ້ງຂອງບັນດານັກການເມືອງຈາກທັງ 2 ພັກພວມເຮັດໃຫ້ການແຂ່ງຂັນຊອກຫາ ປະທານາທິບໍດີຄົນທີ 45 ຂອງອາເມລິກາ ຍັງບໍ່ທັນມີຄຳຕອບ