(VOVWORLD) -ວັນທີ 11 ມິຖຸນາ, ພໍດີຄົບຮອບ 70 ປີແຫ່ງວັນປະທານໂຮ່ຈິມິນ ອອກຄຳຮຽກຮ້ອງແຂ່ງຂັນຮັກຊາດ (11 ມິຖຸນາ 1948 – 11 ມິຖຸນາ 2018). ເນື່ອງໃນໂອກາດນີ້, ທ່ານປະທານປະເທດ ເຈີ່ນດ້າຍກວາງ ມີບົດຂຽນດ້ວຍຫົວຂໍ້ວ່າ “ຍູ້ແຮງຂະບວນການແຂ່ງຂັນຮັກຊາດ, ສ້າງກຳລັງໜູນຢ່າງແຮງເພື່ອປະຕິບັດໜ້າທີ່ສ້າງສາ ແລະ ປົກປັກຮັກສາປະເທດຊາດຢ່າງມີໄຊ”.
 (ທ່ານປະທານປະເທດ ເຈີ່ນດ້າຍກວາງ) |
ການປະຕິວັດເດືອນສິງຫາ ປີ 1945 ບັນລຸຜົນສຳເລັດ, ປະເທດສາທາລະນະປະຊາທິປະໄຕຫວຽດນາມ, ຊຶ່ງແມ່ນລັດຂອງກຳມະກອນ ແລະ ຊາວນາລັດທຳອິດຢູ່ອາຊີຕາເວັນອອກສ່ຽງໃຕ້, ຫາກໍ່ໄດ້ຮັບການສ້າງຕັ້ງ ໄດ້ສຸມໃສ່ແກ້ໄຂບັນດາໜ້າທີ່ຮີບດ່ວນ, ຕ້ານສັດຕູທັງຢູ່ພາຍໃນ ແລະ ພາຍນອກ, ຕ້ານຄວາມອຶດຫິວ, ຕ້ານຄວາມໂງ່ຈ້າ, ປົກປັກຮັກສາອຳນາດການປົກຄອງປະຕິວັດ. ໃນສະພາບການນັ້ນ, ວັນທີ 11 ມິຖຸນາ ປີ 1948, ປະທານໂຮ່ຈິມິນ ໄດ້ອອກຄຳຮຽກຮ້ອງແຂ່ງຂັນຮັກຊາດ ແລະ ຊີ້ແຈ້ງວ່າ “ໜ້າທີ່ຂອງປະຊາຊົນຫວຽດນາມ, ບໍ່ວ່າເຮັດວຽກງານໃດ, ກໍ່ລ້ວນແຕ່ ຕ້ອງແຂ່ງຂັນ: ເຮັດໃຫ້ໄວ, ເຮັດໃຫ້ດີ, ເຮັດໃຫ້ຫຼາຍ… ແຂ່ງຂັນກັນຮັກຊາດຈະຊ່ວຍແກ້ໄຂຄວາມຫຍຸ້ງຍາກ ແລະ ເຮັດໃຫ້ທຸກກົນອຸບາຍຂອງອິດທິກຳລັງທີ່ເປັນປໍລະປັກພັງທະລາຍເພື່ອໄປເຖິງໄຊຊະນະສຸດທ້າຍ”.
ຄຳຮຽກຮ້ອງແຂ່ງຂັນຮັກຊາດຂອງປະທານໂຮ່ຈິມິນ ໄດ້ກະຕຸກຊຸກຍູ້ປະຊາຊົນຫວຽດນາມ ສາມັກຄີກັນເປັນຈິດໜຶ່ງໃຈດຽວ, ຜ່ານຜ່າທຸກຄວາມຫຍຸ້ງຍາກລຳບາກ, ປະກອບສ່ວນເຫື່ອແຮງ, ຊັບສິນເຂົ້າໃນພາລະກິດປະຕິວັດອັນສະຫງ່າລາສີຂອງພັກ ແລະ ຂອງຊາດ.
ການແຂ່ງຂັນຮັກຊາດໄດ້ສ້າງກຳລັງໜູນທາງດ້ານຈິດໃຈ, ບັນຍາກາດປະຕິວັດຢ່າງແຮງ
ຂຶ້ນຕົ້ນບົດຂຽນ, ທ່ານປະທານປະເທດ ເຈີ່ນດ້າຍກວາງ ໄດ້ຍົກອອກປະສິດທິຜົນອັນໃຫຍ່ຫຼວງຂອງຂະບວນການແຂ່ງຂັນຮັກຊາດໃນຕະຫຼອດໄລຍະ 70 ປີຜ່ານມາ ສຳລັບວິວັດທະນາການປະຕິວັດຫວຽດນາມ. ຕາມທ່ານປະທານປະເທດແລ້ວ, 70 ປີຜ່ານມາ, ການແຂ່ງຂັນຮັກຊາດໄດ້ກາຍເປັນຂະບວນການຂອງມະຫາຊົນ, ລະດົມກຳລັງແຮງສັງລວມຂອງທົ່ວປວງຊົນທັງຊາດ. ບັນດາຂະບວນການນັ້ນໄດ້ສ້າງໜ້າປະຫວັດສາດອັນສະຫງ່າລາສີ, ເປັນໂຮງຮຽນປະຕິວັດຝຶກຝົນຫຼໍ່ຫຼອມບັນດາບຸກຄົນໃໝ່ຂອງສັງຄົມນິຍົມໃນຍຸກສະໄໝໂຮ່ຈິມິນ ສະຫງ່າງາມຢ່າງແທ້ຈິງ.
ໃນການຕໍ່ສູ້ຕ້ານພວກລ່າເມືອງຂຶ້ນຝລັ່ງ ເຂົ້າມາຮຸກຮານ, ອາດຈະເວົ້າເຖິງບັນດາຂະບວນການແຂ່ງຂັນຄື: “ຕ້ານຄວາມອຶດຫິວ, ຕ້ານຄວາມໂງ່ຈ້າ, ຕ້ານສັດຕູເຂົ້າມາຮຸກຮານ”, “ຕ້ານຄວາມກືກໜັງສື”, “ໄຫເຂົ້າຕໍ່ຕ້ານ”… ຂອງກຳມະກອນ, ຊາວນາ, ປັນຍາຊົນ, ທະຫານ, ກອງຫຼອນ.
ຫຼັງຈາກນັ້ນ, ໃນການຕໍ່ສູ້ຕ້ານຈັກກະພັດອາເມລິກາ ອັນຍືດເຍື້ອຍາວນານນັ້ນ, ບັນດາຂະບວນການແຂ່ງຂັນຮັກຊາດໄດ້ປະກົດຂຶ້ນຢູ່ຫຼາຍຂົງເຂດ. ນັ້ນແມ່ນຂະບວນການແຂ່ງຂັນ “3 ທີໜຶ່ງ” ໃນກອງທັບ; ຂະບວນການ “ລົມ ດ້າຍຟອງ” ໃນຂົງເຂດກະສິກຳ; ຂະບວນການ “ຄື້ນຝັ່ງທະເລ” ໃນຂົງເຂດອຸດສາຫະກຳ; ຂະບວນການ “3 ກຽມພ້ອມ” ແລະ “5 ຕະລຸມບອນ” ໃນໝູ່ຊາວໜຸ່ມ… ບັນດາຂະບວນການແຂ່ງຂັນດັ່ງກ່າວໄດ້ປັບປຸງຄວາມໄວ້ເນື້ອເຊື່ອໃຈຢ່າງແຮງເຂົ້າໃນໄຊຊະນະ, ສ້າງຄວາມເປັນເອກະພາບທາງດ້ານແນວຄິດ ແລະ ການກະທຳ, ລະດົມກຳລັງໃຈປະຊາຊົນທຸກຊັ້ນວັນນະຕັ້ງໜ້າຕໍ່ສູ້, ອອກແຮງງານ ທຳການຜະລິດ, ປະກອບສ່ວນສຳຄັນເຂົ້າໃນການຍາດເອົາມະຫາໄຊລະດູບານໃໝ່ 1975, ປົດປ່ອຍພາກໃຕ້ຢ່າງສົມບູນ, ທ້ອນໂຮມປະເທດຊາດເປັນເອກະພາບ.
ເມື່ອປະເທດຊາດໄດ້ໂຮມເຂົ້າກັນເປັນເອກະພາບແລ້ວ, ໂດຍສະເພາະແມ່ນໃນໄລຍະກວ່າ 30 ປີແຫ່ງການດຳເນີນກິດຈະການປ່ຽນແປງໃໝ່, ແນວຄິດແຂ່ງຂັນຮັກຊາດຂອງປະທານໂຮ່ຈິມິນ ນັບມື້ນັບໄດ້ນຳໃຊ້ຢ່າງມີຫົວຄິດປະດິດສ້າງ, ມີໄຫວພິບ. ບັນດາຂະບວນການໄດ້ສຸມໃສ່ມຸ່ງໄປເຖິງຂັ້ນຮາກຖານ ແລະ ຜູ້ອອກແຮງງານ, ສ້າງບັນຍາກາດແຂ່ງຂັນຢ່າງຟົດຟື້ນ, ຫ້າວຫັນເພື່ອປະຕິບັດ 2 ໜ້າທີ່ຍຸດທະສາດນັ້ນແມ່ນສ້າງສາ ແລະ ປົກປັກຮັກສາປະເທດຊາດ.
ຍູ້ແຮງການແຂ່ງຂັນຮັກຊາດເພື່ອຊຸກຍູ້ພາລະຫະກິດຫັນປະເທດເປັນປະເທດອຸດສາຫະກຳ, ທັນສະໄໝ ແລະ ເຊື່ອມໂຍງເຂົ້າກັບສາກົນ
ເພື່ອເສີມຂະຫຍາຍບັນດາໝາກຜົນ, ຜົນງານເຊິ່ງບັນດາຂະບວນການແຂ່ງຂັນຮັກຊາດບັນລຸໄດ້ໃນຕະຫຼອດ 70 ປີຜ່ານມາ, ທ່ານປະທານປະເທດ ເຈີ່ນດ້າຍກວາງ ຢືນຢັນວ່າ, ໃນໄລຍະຈະມາເຖິງ, ທຸກຂັ້ນ, ທຸກຂະແໜງການ ຄວນສ້າງການຫັນປ່ຽນຢ່າງແຮງໃນສັງຄົມ ກ່ຽວກັບບົດບາດ, ທີ່ຕັ້ງ ແລະ ຄຸນປະໂຫຍດອັນໃຫຍ່ຫຼວງຂອງວຽກງານແຂ່ງຂັນ, ຍ້ອງຍໍ, ຖືການແຂ່ງຂັນຮັກຊາດແມ່ນກຳລັງໜູນຢ່າງໃຫຍ່ຫຼວງ ເພື່ອຊຸກຍູ້ພາລະກິດຫັນປະເທດຊາດເປັນປະເທດອຸດສາຫະກຳ, ທັນສະໄໝ ແລະ ເຊື່ອມໂຍງເຂົ້າກັບສາກົນ.
ພ້ອມກັບການເຮັດໃຫ້ຂະບວນການແຂ່ງຂັນຮັກຊາດກາຍເປັນຂະບວນການກະທຳປະຕິວັດຢ່າງເລິກເຊິ່ງ, ກວ້າງຂວາງໃນທົ່ວປະເທດ, ທ່ານປະທານປະເທດຖືວ່າ, ທຸກຂັ້ນ, ທຸກຂະແໜງການຄວນສືບຕໍ່ປ່ຽນແປງໃໝ່ເນື້ອໃນ, ຮູບການ, ວິທີຈັດຕັ້ງບັນດາຂະບວນການແຂ່ງຂັນ ຕາມທິດສຸມໃສ່ຂັ້ນຮາກຖານ, ຕິດພັນກັນຢ່າງແໜ້ນແຟ້ນກັບການກໍ່ສ້າງ, ປັບປຸງພັກ, ຮ່ຳຮຽນ ແລະ ປະຕິບັດຕາມແນວຄິດ, ຄຸນສົມບັດ, ວິຖີຊີວິດຂອງປະທານໂຮ່ຈິມິນ; ປ້ອງກັນ, ຕ້ານການສໍ້ລາດບັງຫຼວງ, ການຟຸມເຟືອຍ…
ເລື່ອງແຂ່ງຂັນ, ຍ້ອງຍໍ ຄວນເອົາໃຈໃສ່ເຖິງບັນດາໝູ່ຄະນະ, ຜູ້ອອກແຮງງານເຂົ້າຮ່ວມການຜະລິດ, ດຳເນີນທຸລະກິດໂດຍກົງ; ເອົາໃຈໃສ່ຍ້ອງຍໍຊົມເຊີຍຢູ່ຂັ້ນຮາກຖານ, ເຂດຫ່າງໄກສອກຫຼີກ, ເຂດຊາຍແດນ, ທະເລໝູ່ເກາະ ແລະ ເຂດຊົນເຜົ່າສ່ວນໜ້ອຍ. ເປັນເຈົ້າການສະເໜີຍ້ອງຍໍບັນດາໝູ່ຄະນະ, ສ່ວນບຸກຄົນຂອງຊາວຫວຽດນາມ ອາໄສຢູ່ຕ່າງປະເທດ, ເພື່ອນມິດສາກົນທີ່ມີການປະກອບສ່ວນຫຼາຍຢ່າງເຂົ້າໃນພາລະກິດຕໍ່ສູ້ປົດປ່ອຍຊາດ, ສ້າງສາ, ປົກປັກຮັກສາ ແລະ ພັດທະນາປະເທດຊາດ.
ສະຫຼຸບບົດຂຽນ, ທ່ານປະທານປະເທດ ເຈີ່ນດ້າຍກວາງ ເນັ້ນໜັກວ່າ, ການແຂ່ງຂັນຮັກຊາດແມ່ນກຳລັງໜູນຢ່າງໃຫຍ່ຫຼວງເພື່ອຊຸກຍູ້ຂະບວນການປະຕິວັດ ແລະ ແມ່ນມາດຕະການສຳຄັນເພື່ອສ້າງບຸກຄົນໃໝ່ສັງຄົມນິຍົມ. ແນວຄິດແຂ່ງຂັນຮັກຊາດຂອງປະທານໂຮ່ຈິມິນ ຈະປະກາຍແສງສະຫວ່າງ, ເຍື່ອງທາງໃຫ້ທົ່ວພັກ, ທົ່ວປວງຊົນ ແລະ ທົ່ວກອງທັບ ອອກແຮງແຂ່ງຂັນກັນປະຕິບັດພາລະກິດສ້າງສາ ແລະ ປົກປັກຮັກສາປະເທດຊາດ ຫວຽດນາມ ສັງຄົມນິຍົມຢ່າງມີໄຊ.