ໃນຊຸມມື້ຜ່ານມາ, ລັດຖະມົນຕີຫວຽດນາມຫຼາຍທ່ານ ໄດ້ມີການໂອ້ລົມສົນທະນາຄັ້ງຕ່າງໆຢ່າງລຽນຕິດ ຜ່ານບັນດາພາຫະນະສື່ມວນຊົນ ທີ່ກ່ຽວຂ້ອງເຖິງບັນດາແຜນນະໂຍບາຍ ນະໂຍບາຍຂອງພັກ, ລັດ, ບັນດາບັນຫາຊີວິດສັງຄົມທີ່ແທດຈິງໃນຊີວິດປະຈຳວັນ. ນີ້ບໍ່ແມ່ນສິ່ງທີ່ໃໝ່ອ່ຽມ ໃນການເຄື່ອນໄຫວຂອງລັດຖະບານ ແຕ່ການມີໜ້າຂອງຜູ້ນຳບັນດາກະຊວງ, ຂະແໜງການໃນຊຸມວັນຕົ້ນປີ 2012 ນີ້ ໄດ້ເຮັດໃຫ້ປະຊາຊົນ ມີຄວາມໄວ້ເນື້ອເຊື່ອໃຈ ຕໍ່ກົງຈັກບໍລິຫານຂອງລັດຖະບານໃນໄລຍະທີ່ຈະມາເຖິງ.
ລັດຖະມົນຕີກະຊວງອຸດສາຫະກຳການຄ້າຫວຽດນາມໂອ້ລົມສົນທະນາກັບປະຊາຊົນ
ພາບ: Http//:moit.gov.vn
ວັນທີ 6/1, ໃນປະຕູຖານຂໍ້ມູນລັດຖະບານ, ທ່ານລັດຖະມົນຕີກະຊວງອຸດສາຫະກຳການຄ້າຫວຽດນາມຫວູ໋ຮູຍຮ່ວາງ ໄດ້ຕອບຄຳຖາມຂອງປະຊາຊົນ ທີ່ກ່ຽວຂ້ອງເຖິງບັນຫາເພີ່ມລາຄາໄຟຟ້າ, ຄຸນນະພາບ ແລະການຄຸ້ມຄອງຄຸນນະພາບນ້ຳມັນເຊື້ອໄຟນັບຮ້ອຍຄຳຖາມ. ທ່ານລັດຖະມົນຕີຫວ໋ຮູຍຮ່ວາງໃຫ້ຮູ້ວ່າ: ປີ 2011, ລັດຖະບານໄດ້ອະນຸຍາດໃຫ້ຂະແໜງໄຟຟ້າ ດັດປັບລາຄາໄຟຟ້າ, ຍ້ອນວ່າ ໃນໄລຍະຍາວນານ, ຖ້າບໍ່ມີການດັດປັບລາຄາໄຟຟ້າ, ສະພາບສະໜອງໄຟຟ້າຈະປະສົບກັບຄວາມຫຍຸ້ງຍາກກ່ວາອີກ, ກໍ່ຄວາມຫຍູ້ງຍາກເຖິງການຜະລິດ ດຳເນີນທຸລະກິດ ແລະຊີວິດການເປັນຢູ່ຂອງປະຊາຊົນ. ທ່ານລັດຖະມົນຕີຫວ໋ຮູຍຮ່ວາງອະທິບາຍວ່າ:
“ການດັບປັບລາຄາຄືແນວນັ້ນ ແນ່ນອນວ່າຈະກະທົບເຖິງໄພເງິນເຟີ້, ກໍ່ຜົນສະທ້ອນເຖິງຊີວິດການເປັນຢູ່ຂອງປະຊາຊົນ, ສະນັ້ນ ຂະແໜງໄຟຟ້າຈຶ່ງຂໍຄຳເຫັນຈາກກະຊວງ ແລະລັດຖະບານ. ຂະແໜງໄຟຟ້າໄດ້ປະຕິບັດການຊີ້ນຳຂອງລັດຖະບານ, ຂອງທ່ານນາຍົກລັດຖະມົນຕີຢ່າງເຂັ້ມງວດ, ພ້ອມທັງມີຄວາມຮັບຜິດຊອບຕໍ່ຊີວິດການເປັນຂອງປະຊາຊົນ. ການດັບປັບລາຄາໄຟຟ້າຄັ້ງນີ້, ຜູ້ທຸກຍາກ, ຜູ້ນຳໃຊ້ໄຟຟ້າຕ່ຳກ່ວາ 100 kw/ໂມງ ຈະບໍ່ຮັບຜົນສະທ້ອນ, ໝາຍຄວາມວ່າ ປະຊາຊົນສ່ວນຫຼາຍ, ຜູ້ເຮັດວຽກກິນເງິນເດືອນບໍ່ຮັບຜົນສະທ້ອນ”
ວັນທີ 9/1, ການນຳອົງການກວດກາລັດຖະບານ ແລະຜູ້ຕາງໜ້າກະຊວງການເງິນ, ກະຊວງຊັບພະຍາກອນ ສິ່ງແວດລ້ອມ ໄດ້ຕອບຄຳຖາມ ແລະຂໍ້ຂ້ອງໃຈຂອງປະຊາຊົນໃນທົ່ວປະເທດນັບຮ້ອຍຂໍ້ ທີ່ກ່ຽວຂ້ອງເຖິງການແກ້ໄຂການຮ້ອງທຸກດ້ານທີ່ດິນ, ການຊົດເຊີຍ, ການບຸກເບີກໜ້າພຽງ. ເຖິງວ່າ ບັນດາຄຳຖາມແມ່ນກ່ຽວຂ້ອງເຖິງບັນດາບັນຫາລະອຽດຢູ່ທ້ອງຖິ່ນ ຫລືຄວາມຂ້ອງໃນກ່ຽວກັບບັນດາບັນຫາດ້ານກົດໝາຍ, ການຮ້ອງທຸກກໍຕາມ…ແຕ່ໄດ້ຮັບຄຳຕອບຢ່າງກະທັດລັດ, ເຂົ້າໃຈງ່າຍ.
ແລະກໍໃນວັນທີ 9/1, ທ່ານລັດຖະມົນຕີກະຊວງຄົມມະນາຄົມຂົນສົ່ງຫວຽດນາມດິງລາທັງ ກໍໄດ້ໂອ້ລົມສົນທະນາໂດຍກົງກັບປະຊາຊົນໃນທົ່ວປະເທດ ຜ່ານທາງວິທະຍຸກະຈາຍສຽງຫວຽດນາມ. ທ່ານໄດ້ຕອບບັນດາບັນຫາທີ່ປະຊາຊົນມີຄວາມສົນໃຈທີ່ສຸດໃນປະຈຸບັນ, ໃນນັ້ນມີເລື່ອງເພີ່ມຄ່າຈໍລະຈອນສຳລັບພາຫະນະຄົມມະນາຄົມສ່ວນບຸກຄົນຢູ່ຫວຽດນາມ ແລະຄ່າລົດໂອໂຕເຂົ້າໃຈກາງນະຄອນໃນເວລາໄປການ ແລະເລິກງານ ຊື່ງກະຊວງຄົມມະນາຄົມຂົນສົ່ງ ໄດ້ຍື່ນສະເໜີຕໍ່ລັດຖະບານ, ທ່ານລັດຖະມົນຕີດິງລາທັງເນັ້ນໜັກວ່າ, ນີ້ຖືກຖືວ່າ ແມ່ນໜື່ງໃນບັນດາມາຕະການອັນຮີບດ່ວນ ເພື່ອແນໃສ່ຄວບຄຸມ, ຫລຸດຜ່ອນອຸບັດຕິເຫດທາງຄົມມະນາຄົມ ແລະຕ້ານສະພາບລົດຕິດຢູ່ບັນດານະຄອນໃຫ່ຍ:
ໃນແຕ່ລະມື້, ມີ 30 ກ່ວາຄົນເສຍຊີວິດຍ້ອນອຸບັດຕິເຫດທາງຄົມມະນາຄົມ ແລະຜູ້ຖືກບາດເຈັບຫຼາຍເທົ່ານັ້ນ. ດັ່ງນັ້ນຈຶ່ງ ຕ້ອງມີບັນດາມາດຕະການແກ້ໄຂຢ່າງຂ້ຽວຂາດ, ຄົບຊຸດ ເພື່ອຫລຸດຜ່ອນອຸບັດຕິເຫດໃນລະດັບຕ່ຳສຸດ, ຕ້ານສະພາບລົດຕິດ. ກ່ອນທີ່ຈະສະເໜີຕໍ່ລັດຖະບານຄືແນວນັ້ນ, ທາງກະຊວງໄດ້ມີການພິຈາລະນາບັນດາເອກະສານນິຕິກຳຂອງລັດ, ສະພາບຕົວຈິງຂອງປະເທດຊາດຢ່າງລະອຽດທີ່ສຸດ ແລະມີການທາບທາມບົດຮຽນຈາກປະເທດຕ່າງໆໃນພາກພື້ນກໍຄືໃນໂລກ“
ແຕ່ເຖິງຢ່າງໃດກໍຕາມ, ທ່ານລັດຖະມົນຕີດິງລາທັງກໍຢັ້ງຢືນວ່າ ປະຈຸບັນ, ວິທີການນີ້ພວມຢູ່ໃນໄລຍະຄົ້ນຄ້ວາ ພິຈາລະນາ, ກ່ອນທີ່ຈະມີການຕົກລົງສຸດທ້າຍ ຍ້ອນວ່າ ຕ້ອງມີຄວາມເຫັນດີເຫັນພ້ອມ ແລະການ ຕອບສະໜອງຂອງທົ່ວປວງຊົນ. ຍ້ອນເຫດນັ້ນ, ຜ່ານການໂອ້ລົມສົນທະນາໂດຍກົງກັບປະຊາຊົນ, ຮັບຟັງບັນດາຄຳຄິດຄຳເຫັນຈາກປະຊາຊົນ ຈະແມ່ນມາດຕະການດີທີ່ສຸດ ເພື່ອໃຫ້ບັນດາອົງການມີໜ້າທີ່ຮັບຜິດຊອບ ຍົກອອກບັນດາຂໍ້ກຳນົດທີ່ເໝາະສົມທີ່ສຸດ.
ທ່່ນລັດຖະມົນຕີກະຊວງຄົມມະນາຄົມຂົນສົ່ງຫວຽດນາມດິງລາທັງ
ພາບ:http//:dantri.com.vn
ກ່ອນໜ້ານັ້ນ, ໃນຕົ້ນອາທິດນີ້, ທ່ານລັດຖະມົນຕີກະຊວງການຕ່າງປະເທດຟ້າມບິງມິງກໍສະຫງວນເວລາເກືອບ 1 ຊົ່ວໂມງເພື່ອໂອ້ລົມສົນທະນາກັບປະຊົນໃນທົ່ວປະເທດ ກ່ຽວກັບບັນດາຜົນງານດ້ານການພົວພັນກັບຕ່າງປະເທດຂອງປະເທດຊາດໃນປີຜ່ານມາ, ແນວທາງ, ນະໂຍາຍໃນໄລຍະຈະມາເຖິງ. ໃນການໂອ້ລົມສົນທະນາຄັ້ງນີ້, ປະຊາຊົນໄດ້ມີຄວາມສົນໃຈທີ່ສຸດເຖິງບັນຫາປົກປ້ອງອະທິປະໄຕ, ຜືນແຜ່ນດິນອັນຄົບຖ້ວນ, ໂດຍສະເພາະແມ່ນເລື່ອງແກ້ໄຂການພິພາດບົນທະເລໃນປີຜ່ານມາ. ຕາມທ່ານລັດຖະມົນຕີແລ້ວ, ນີ້ແມ່ນບັນຫາສັກກະລະບູຊາທີ່ມີຕໍ່ແຕ່ລະປະເທດ, ແຕ່ລະຊາດ, ຄວາມຮັບຜິດຊອບຂອງຂະແໜງການຕ່າງປະເທດແມ່ນໃຫ່ຍຫຼວງທີ່ສຸດ ແຕ່ທັດສະນະຂອງຫວຽດນາມ ແມ່ນຢຶດໝັ້ນແນວທາງແກ້ໄຂການພິພາດຜ່ານການເຈລະຈາໂດຍສັນຕິວິທີ. ທ່ານລັດຖະມົນຕີຟ້າມບິງມິງເວົ້າວ່າ:
“ຄວາມຮັບຜິດຊອບປົກປັກຣັກສາອະທິປະໄຕ ຜືນແຜ່ນດິນຂອງຊາດ ແມ່ນໜ້າທີ່ຂອງທຸກຂັ້ນ, ທຸກຂະແໜງການ ແລະປະຊາຊົນຫວຽດນາມທຸກຄົນ, ໃນນັ້ນຂະແໜງການຕ່າງປະເທດມີພາລະກຳສຳຄັນທີ່ສຸດ. ໃນໄລຍະຜ່ານມາ, ຂະແໜງການຕ່າງປະເທດໄດ້ເປັນເຈົ້າການໃນການເຮັດໃຫ້ເພື່ອນມິດສາກົນ ເຂົ້າໃຈແຈ້ງກ່ຽວກັບສະພາບການຢູ່ທະເລຕາເວັນອອກ ແລະແຜນນະໂຍບາຍ, ນະໂຍບາຍສະເໝີຕົ້ນສະເໝີປາຍຂອງພັກ ແລະລັດ ຫວຽດນາມ ໃນການແກ້ໄຂການພິພາດຢູ່ທະເລຕາເວັນອອກ ”
ອາດເຫັນໄດ້ວ່າ, ຜ່ານການໂອ້ລົມສົນທະນາ, ຄວາມປະທັບໃຈຂອງປະຊາຊົນກ່ຽວກັບບົດບາດຂອງລັດຖະບານ ໃນການແກ້ໄຂບັນດາບັນຫາອັນແທດຈິງຂອງປະເທດຊາດ, ຂອງຊີວິດການເປັນຢູ່ມີຄວາມກະຈ່າງແຈ້ງກ່ວາອີກ. ຄວາມໄວ້ເນື້ອເຊື່ອໃຈຂອງປະຊາຊົນແມ່ນໄດ້ຣັບການສ້າງຂຶ້ນຈາກການໂອ້ລົມສົນທະນາໂດຍກົງລະຫວ່າງບັນດາທ່ານລັດຖະມົນຕີ ກັບປະຊາຊົນ. ອັນຈະສ້າງຄວາມເຫັນດີເຫັນພ້ອມໃນສັງຄົມ ເພື່ອສືບຕໍ່ນຳປະເທດຊາດພັດທະນາ, ໃນສະພາບການທີ່ຍັງປະສົບກັບຄວາມຫຍຸ້ງຍາກ ແລະສິ່ງທ້າທາຍນາໆປະການ.
ແອງຮ່ວຽນ