(vovworld) – ວັນທີ 20/3, ປະທານາທິບໍດີອາເມລິກາ Barak Obama ເລີ່ມເດີນທາງໄປປະຕິບັດງານຢູ່ ອິດສະຮາແອນ, ຝັ່ງຕາເວັນຕົກ ແລະ ຈຳແດນ ເປັນເວລາ 3 ວັນ. ເລື່ອງເລືອກເຟັ້ນເຂດນີ້ເປັນແຫ່ງໄປປະຕິບັດງານທຳອິດ ພາຍຫຼັງໄດ້ຮັບເລືອກຕັ້ງເປັນປະທານາທິບໍດີອາເມລິກາ ອາຍຸການທີ 2 ນັ້ນ, ໄດ້ສະແດງໃຫ້ເຫັນວ່າ, ບັນຫາຢູ່ຕາເວັນອອກກາງຍັງຄົງມີຜົນສະທ້ອນຢ່າງແນ່ນອນເຖິງປະທານາທິບໍດີອາເມລິກາ ກໍ່ຄືບັນດາໂຄງການດຳເນີນງານຂອງທ່ານໃນ 4 ປີຈະມາເຖິງ. ເຖິງຢ່າງໃດກໍ່ຕາມ, ການຢ້ຽມຢາມຂອງປະທານາທິບໍດີອາເມລິກາ Barak Obama ຍາກທີ່ຈະມີບາດກ້າວບຸກທະລຸໃດໆໃນການແກ້ໄຂຄວາມຂາດສະຖຽນລະພາບໃນພາກພື້ນນີ້.
ປະທານາທິບໍດີອາເມລິກາ Barak Obama
ຕາມແຜນການປະຕິບັດງານແລ້ວ, ຢູ່ ອິດສະຮາແອນ, ປະທານາທິບໍດີອາເມລິກາ Barak Obama ຈະມີການພົບປະກັບທ່ານນາຍົກລັດຖະມົນຕີ Benjamin Netanyahu, ກ່າວປາໄສຕໍ່ບັນດານັກສຶກສາຢູ່ Jerusalem, ໄປຢ້ຽມຢາມປູຊະນີຍະສະຖານປະຫວັດສາດບາງແຫ່ງ. ເມື່ອໄປຢ້ຽມຢາມເຂດຝັ່ງຕາເວັນຕົກແມ່ນ້ຳຈຳແດນ, ປະທານາທິບໍດີອາເມລິກາ Barak Obama ຈະມີການພົບປະກັບປະທານາທິບໍດີປາແລດສະຕີນ Mahmoud Abbas ແລະ ທ່ານນາຍົກລັດຖະມົນຕີ Salam Fayyad ຢູ່ Ramallah, ໄປຢ້ຽມຢາມສູນຊາວໜຸ່ມປາແລດສະຕີນ. ຫຼັງຈາກນັ້ນ, ທ່ານຈະໄປຢ້ຽມຢາມຈໍແດນ, ເຊິ່ງແມ່ນພັນທະມິດທີ່ສຳຄັນຂອງອາເມລິກາ ເປັນເວລາ 24 ຊົ່ວໂມງ, ເພື່ອປຶກສາຫາລືກ່ຽວກັບສະພາບການໃຊ້ຄວາມຮຸນແຮງຢູ່ເຂດຊາຍແດນຊີຮີ ໃນສະພາບການທີ່ມີປະຊາຊົນປະເທດນີ້ 45.000 ກວ່າຄົນ ອົບພະຍົບຢູ່ຈໍແດນ ເຊິ່ງປະຈຸບັນພວມຕ້ອງການໄດ້ຮັບການຊ່ວຍເຫຼືອຈາກສາກົນທີ່ສຸດ.
ປະທານາທິບໍດີອາເມລິກາ Barak Obama ມີການເຄື່ອນໄຫວຫຼາຍຢ່າງຢູ່ອິດສະຮາແອນ ແລະ ເຂດຕາເວັນຕົກແມ່ນນ້ຳຈໍແດນ, ເພາະວ່າເຂດດັ່ງກ່າວມີການພົວພັນຢ່າງສະໜິດແໜ້ນເຖິງຜົນປະໂຫຍດຂອງອາເມລິກາ. ບຸລິມາສິດຕົ້ນຕໍ່ຂອງປະທານາທິບໍດີອາເມລິກາ Barak Obama ແມ່ນປັບປຸງການພົວພັນກັບທ່ານນາຍົກລັດຖະມົນຕີ Benjamin Netanyahu. ການພົວພັນ ພັນທະມິດນີ້ບໍ່ໄດ້ດີປານໃດ ຍ້ອນບັນດາບັນຫາທີ່ກ່ຽວຂ້ອງເຖິງອີຮານ ເມື່ອອິດສະຮາແອນ ຢາກບຸກໂຈມຕີປະເທດ ສ ອິດສະລາມນີ້, ສ່ວນອາເມລິກາ ພັດມີບາດກ້າວອັນລະມັດລະວັງ ດ້ວຍມາດຕະການແກ້ໄຂຜ່ານທາງການທູດ ແລະ ລົງໂທດດ້ານເສດຖະກິດ. ເພື່ອເອົາໃຈພັນທະມິດທີ່ສຳຄັນນີ້, ກ່ອນການເດີນທາງ, ວັນທີ 18/3, ປະທານາທິບໍດີອາເມລິກາ Barak Obama ໄດ້ກ່າວເຕືອນອີຮານ ອີກເທື່ອໜຶ່ງວ່າ ຕ້ອງມີມາດຕະການຕ່າງ ເພື່ອຫຼຸດຜ່ອນຄວາມເຄັ່ງຕຶງທີ່ກ່ຽວຂ້ອງເຖິງໂຄງການນິວຄະເລຍ ເຊິ່ງໄດ້ກໍ່ຄວາມໂຕ້ຖຽງກັນມາເປັນເວລາຫຼາຍປີຂອງປະເທດນີ້ໃນທັນທີ. ທ່ານ Obama ເນັ້ນໜັກວ່າ, ຮອດເວລາແລ້ວທີ່ບັນດາການນຳອີຮານ ຕ້ອງມີບັນດາມາດຕະການທີ່ມີຄວາມໝາຍໃນທັນທີ ເພື່ອພິສູດໃຫ້ປະຊາຄົມໂລກວ່າ ໂຄງການນິວຄະເລຍຂອງເຂົາເຈົ້າແມ່ນຮັບໃຊ້ໃຫ້ແກ່ຈຸດປະສົງຄົ້ນຄ້ວາດ້ານແພດສາດ ແລະ ພະລັງໄຟຟ້າ.
ບັນຫາສຳຄັນໜຶ່ງອີກໃນການຢ້ຽມຢາມ ອິດສະຮາແອນ ແລະ ເຂດຝັ່ງຕາເວັນຕົກແມ່ນ້ຳຈໍແດນ ຄັ້ງນີ້ ຂອງປະທານາທິບໍດີອາເມລິກາ Barak Obama, ນັ້ນແມ່ນວິວັດທະນາການສັນຕິພາບລະຫວ່າງອິດສະຮາແອນ ແລະ ປາແລດສະຕີນ. ແຕ່ກ່ອນການຢ້ຽມຢາມ, ທຳນຽບຂ່າວໃຫ້ຮູ້ວ່າ, ປະທານາທິບໍດີອາເມລິກາ Barak Obama ຈະບໍ່ຍົກອອກບັນດາຂໍ້ສະເໜີໃໝ່ເພື່ອແນໃສ່ແກ້ໄຂບັນຫາບໍ່ລົງລອຍກັນຂອງການເຈລະຈາສັນຕິພາບຕ່າງໆລະຫວ່າງອິດສະຮາແອນ ແລະ ປາແລດສະຕີນ ເຊິ່ງຖືກແກ່ຍາວມາເປັນເວລາກວ່າ 2 ປີແລ້ວ. ກ່າວຄວາມເຫັນຕໍ່ບັນດາການນຳຂອງປະຊາຄົມຊາວຢີວຢູ່ອາເມລິກາ ໃນອາທິດກ່ອນ, ທ່ານປະທານາທິບໍດີອາເມລິກາ Barak Obama ກໍ່ໄດ້ຍົກອອກສັນຍານທີ່ວ່າ ຈະບໍ່ມີຂໍ້ລິເລີ່ມໃດໆກ່ຽວກັບສັນຕິພາບຢູ່ຕາເວັນອອກກາງຖືກຍົກອອກມາປຶກສາຫາລື. ພ້ອມທັງຢັ້ງຢືນວ່າທ່ານບໍ່ວາງຈຸດໝາຍແກ້ໄຂບັນຫາການເມືອງອັນລະອຽດໃດໆ. ຍ້ອນເຫດນັ້ນ, ວົງການນັກໄຈ້ແຍກຈຶ່ງໃຫ້ຂໍ້ສັງເກດວ່າ ຈຸດປະສົງຂອງການຢ້ຽມຢາມຄັ້ງນີ້ຂອງປະທານາທິບໍດີອາເມລິກາ Barak Obama ແມ່ນເຮັດໃຫ້ຄວາມຂັດແຍ້ງກັນລະຫວ່າງອິດສະຮາແອນ ແລະ ປາແລດສະຕີນ ກໍ່ຄືເລື່ອງອີຮານປະຕິບັດໂຄງການນິວຄະເລຍ ບໍ່ກາຍເປັນບັນຫາທີ່ເຄັ່ງຕຶງກວ່າອີກເທົ່ານັ້ນ. ສ່ວນບັນດາເຈົ້າໜ້າທີ່ປາແລດສະຕີນ ກໍ່ປະຕິເສດເລື່ອງວິຈານກ່ຽວກັບການຢ້ຽມຢາມ ກໍ່ຄືການກະທົບຂອງເຫດການນີ້ທີ່ມີຕໍ່ວິວັດທະນາການສັນຕິພາບ. ປະທານາທິບໍດີປາແລດສະຕີນ Mahmoud Abbas ຖືວ່າ, ການຢ້ຽມຢາມພຽງແຕ່ຊຸກຍູ້ວິວັດການເຈລະຈາທີ່ຖືກຢຸດຕິໄວ້ນັບແຕ່ປີ 2010 ເທົ່ານັ້ນ.
ເບິ່ງຄືວ່າ, ການຢ້ຽມຢາມຄັ້ງທຳອິດໃນອາຍຸການທີ 2 ຂອງປະທານາທິບໍດີອາເມລິກາ Barak Obama ພຽງແຕ່ມີລັກສະນະຊອກຮູ້ສະພາບການຂອງແຕ່ລະຝ່າຍ ແລະ ກະກຽມເງື່ອນໄຂທີ່ເໝາະສົມ ເພື່ອ ດຳເນີນການເຈລະຈາສັນຕິພາບຄືນໃໝ່ ເທົ່ານັ້ນ. ຍ້ອນເຫດນັ້ນ, ການຢ້ຽມຢາມຄັ້ງນີ້ບໍ່ໄດ້ຮັບການຕ້ອນຮັບຢ່າງສຸດຈິດສຸດໃຈຈາກປະຊາຊົນຄືດັ່ງກ່ອນນີ້ 4 ປີ, ເມື່ອທ່ານ Barak Obama ໄປຕາເວັນອອກກາງ, ໃນຖານະເປັນຜູ້ອອກສະໝັກຮັບເລືອກຕັ້ງເປັນປະທານາທິບໍດີອາເມລິກາ, ເຊິ່ງແມ່ນຈຸດເວລາທີ່ປະຊາຊົນຫວັງວ່າທ່ານຈະສ້າງການຫັນປ່ຽນໂດຍພື້ນຖານໃນການພົວພັນລະຫວ່າງອາເມລິກາ ແລະ ໂລກອິດສະລາມ ອາຮັບ.