(vovworld) - ອົງການແຮງງານສາກົນ (ILO) ຫາກໍ່ປຸກລະດົມໂຄງການຊຸກຍູ້ວຽກເຮັດງານທຳຂຽວໃນຂອບຂະຫນາດທົ່ວໂລກ ແລະ ຖືວ່າ ນີ້ແມ່ນມາດຕະການຄົບຊຸດໃນບັ້ນຕ້ານການປ່ຽນແປງຂອງດິນຟ້າອາກາດທົ່ວໂລກ ແລະ ສ້າງບັນດາ ແຫລ່ງກຳລັງສັງຄົມໃຫ້ແກ່ແຕ່ລະປະເທດ. ຢູ່ ຫວຽດນາມ, ກຳມະບານທຸກ ຂັ້ນ ນັບມື້ນັບເອົາໃຈໃສ່ເຖິງຫນ້າທີ່ສ້າງວຽກເຮັດງານທຳຂຽວຕາມໂຄງການຂອງ ILO ແລະ ຕອບສະຫນອງຄວາມຮຽກຮ້ອງຕ້ອງການຂອງການສ້າງໂຄງປະກອບພື້ນຖານເສດຖະກິດຄືນໃຫມ່ຕາມທິດພັດທະນາແບບຍືນຍົງ.
ການສຳມະນາກ່ຽວກັບວຽກເຮັດງານທຳຂຽວ
ພາບ: congdoanvn.org.vn
|
ວຽກເຮັດງານທຳຂຽວແມ່ນວຽກງານທີ່ປະກອບສ່ວນໃຫ້ແກ່ການປົກປັກຮັກສາຄຸນນະພາບຂອງສິ່ງແວດລ້ອມ, ຮັບປະກັນເພື່ອໃຫ້ແກ່ສັງຄົມພັດທະນາແບບຍືນຍົງໃນປະຈຸບັນ ແລະ ອະນາຄົດ, ປະຕິບັດສິດສະເຫມີພາບ ແລະ ຍຸດຕິທຳຕໍ່ທຸກຄົນ. ສ້າງວຽກເຮັດງານທຳຂຽວຊຶ່ງລວມມີ: ຫັນວຽກງານປະຈຸບັນເປັນວຽກເຮັດງານທຳຂຽວ, ຜະລິດອຸປະກອນພາຫະນະເພື່ອປົກປັກຮັກສາສິ່ງແວດລ້ອມ, ພັດທະນາຂະແຫນງອາຊີບໃຫມ່ ແລະ ບັນດາວຽກເຮັດງານທຳທີ່ໄດ້ສ້າງຂຶ້ນເພ່ືອບັນເທົາ ແລະ ຮັບມືກັບການປ່ຽນແປງຂອງດິນຟ້າອາກາດ. ຢູ່ ຫວຽດນາມ, ຖ້າຫາກນະໂຍບາຍສ້າງວຽກເຮັດງານທຳຂຽວໄດ້ຮັບການພັດທະນາເພື່ອຜົນປະໂຫຍດຂອງຜູ້ທຸກຍາກ, ເດັກນ້ອຍ, ຄົນພິການ, ຜູ້ອາຍຸສູງ, ປະຊາຊົນຢູ່ເຂດຫ່າງໄກສອກຫລີກ... ເພື່ອໃຫ້ເຂົາເຈົ້າສ້າງລາຍຮັບຕື່ມອີກ ແລະ ມີວຽກເຮັດງານທຳ ດ້ວຍການປັບປຸງເງື່ອນໄຂເຮັດວຽກໃຫ້ດີ. ທ່ານ Le Thanh Ha ຮອງຫົວຫນ້າສະຖານບັນກຳມະກອນ ແລະ ກຳມະບານ ສັງກັດສະຫະພັນໃຫຍ່ແຮງງານ ຫວຽດນາມ ໃຫ້ຮູ້ວ່າ:
“ຢູ່ ຫວຽດນາມ ຄວາມສາມາດບ່ົມຊ້ອນສ້າງວຽກເຮັດງານທຳຂຽວແມ່ນໃຫຍ່ຫລວງ ເພາະວ່າ ຫວຽດນາມ ຈຳເປັນຕ້ອງປະຕິບັດບັນດາບາດກ້າວທຳອິດ ແລະ ໄປຖືກທິດໃນການເຕີບໂຕຂຽວ. ພວກເຮົາພວມຜ່ານຜ່າເກືອບ 2 ທົດສະວັດແຫ່ງການເຕີບໂຕຂຽວນຳມາຊຶ່ງບັນດາຄວາມກ້າວຫນ້າດີພໍສົມຄວນໃນການພັດທະນາເສດຖະກິດ ແລະ ແກ້ໄຂບັນດາບັນຫາສັງຄົມກໍຄືໃນການປະຕິບັດບັນດາຈຸດໝາຍຍຸດທະສາດ. ເຖິງຢ່າງໃດກໍຕາມ, ປະຈຸບັນ ພວກເຮົາກໍຄວນເອົາໃຈໃສ່ເຖິງບັນດາຈຸດໝາຍກ່ຽວກັບສິ່ງແວດລ້ອມ.”
ໂດຍແມ່ນປະເທດມີລາຍຮັບປານກາງ, ຫວຽດນາມ ພວມປະເຊີນຫນ້າກັບບາງສິ່ງທ້າທາຍໃຫມ່ໃນການຮັກສາການເຕີບໂຕເສດຖະກິດ ແລະ ຮັບປະກັນຄວາມສະເຫມີພາບໃນສັງຄົມ. ເພາະສະນັ້ນ ລັດຖະບານ ຫວຽດນາມ ໄດ້ສ້າງຍຸດທະສາດການເຕີບໂຕຂຽວ, ຕາມນັ້ນແລ້ວ ກຳມະບານທຸກຂັ້ນ ຈະເຂົ້າຮ່ວມໂດຍກົງເຂົ້າໃນການສ້າງພື້ນຖານເສດຖະກິດຂຽວ ແລະ ສ້າງວຽກເຮັດງານທຳຂຽວ. ທ່ານ Mai Duc Chinh ຮອງຫົວຫນ້າສະຫະພັນໃຫຍ່ແຮງງານ ຫວຽດນາມ ຢືນຢັນວ່າ: ກຳມະບານ ຫວຽດນາມ ຕັ້ງຫນ້າຕອບສະຫນອງຍຸດທະສາດນີ້.
“ພວກຂ້າພະເຈົ້າຮັບຮູ້ ແລະ ກຳນົດຢ່າງຈະແຈ້ງວ່າ: ເສດຖະກິດຂຽວ ແມ່ນພື້ນຖານເສດຖະກິດທີ່ມີຄວາມຈຳເປັນທີ່ສຸດ, ໃນໄລຍະເກີດວິກິດການເສດຖະກິດ, ວິກິດການຊີວະພາບຂອງຫວຽດນາມ. ບົນພື້ນຖານນັ້ນ, ພວກຂ້າພະເຈົ້າຈະສ້າງຍຸດທະສາດຂອງກຳມະບານ ຫວຽດນາມ ກ່ຽວກັບການສ້າງວຽກເຮັດງານທຳຂຽວຢ່າງລະອຽດ ເພື່ອເຂົ້າຮ່ວມກັບລັດຖະບານໃນວິວັດການຫັນປ່ຽນ ແລະ ປະຕິບັດພື້ນຖານເສດຖະກິດຂຽວຢ່າງແທດຈິງ ແລະ ມີປະສິດທິຜົນ ເພື່ອເພີ່ມທະວີກຳລັງແຮງຂອງພື້ນຖານເສດຖະກິດ ທັງຮັບປະກັນຊີວິດສັງຄົມ.”
ຂະບວນການປູກຕົ້ນໄມ້ຂຽວ
ພາບ:internet
|
ການສ້າງພື້ນຖານເສດຖະກິດຂຽວ ກັບການສ້າງວຽກເຮັດງານທຳຂຽວຈະປະກອບສ່ວນຮັກສາສຸຂະພາບຂອງຄົນງານ, ຫນູນຊ່ວຍປະຕິບັດບັນດາຈຸດໝາຍພັດທະນາເສດຖະກິດ, ເພີ່ມລາຍຮັບ, ຮັບປະກັນວຽກງານແບບຍືນຍົງ ແລະ ລົບລ້າງຄວາມອຶດຫິວຫລຸດຜ່ອນຄວາມທຸກຍາກ. ເຖິງຢ່າງໃດກໍຕາມ, ການນຳໃຊ້ບັນດາເຕັກໂນໂລຊີໃຫມ່ບໍ່ສົ່ງຜົນສະທ້ອນເຖິງສິ່ງແວດລ້ອມ, ເທັກໂນໂລຊີກ່ຽວກັບພະລັງງານຜະລິດຄືນໃຫມ່, ເທັກໂນໂລຊີສະອາດ, ທັນສະໄຫມ ເພີ່ມສະມັດຕະພາບການຜະລິດ ແຕ່ອາດຈະເກີດຄວາມສ່ຽງກ່ຽວກັບການຫລຸດຜ່ອນວຽກເຮັດງານທຳ, ຫັນປ່ຽນວິທີເຮັດວຽກ, ຮຽກຮ້ອງໃຫ້ມີການບຳລຸງສ້າງຄືນໃຫມ່, ກໍ່ຄວາມຫຍຸ້ງຍາກໃຫ້ແກ່ຄົນງານ. ນີ້ແມ່ນບັນດາສິ່ງທ້າທາຍບໍ່ຫນ້ອຍສຳລັບຄົນງານ ເປັນຕົ້ນແມ່ນບັນດາຄົນງານຢູ່ປະເທດພວມພັດທະນາຄື ຫວຽດນາມ. ສະນັ້ນ ກຳມະບານ ຫວຽດນາມ ສວມບົດບາດສຳຄັນໃນການສ້າງວຽກເຮັດງານທຳຂຽວ ແລະ ສ້າງພື້ນຖານເສດຖະກິດຂຽວ. ດອກເຕີ Le Thanh Ha ຮອງຫົວຫນ້າສະຖາບັນກຳມະກອນ ແລະ ກຳມະບານ ເນັ້ນຫນັກວ່າ:
“ຫນ້າທີ່ຂອງກຳມະບານຂັ້ນຕ່າງໆ ແມ່ນໂຄສະນາ, ຍົກສູງຄວາມຮັບຮູ້ໃຫ້ແກ່ກຳມະກອນ ແລະ ຊາວຜູ້ອອກແຮງງານກ່ຽວກັບວຽກເຮັດງານທຳຂຽວ, ເຂົ້າຮ່ວມການຕີລາຕາຄວາມສາມາດບົ່ມຊ້ອນວຽກເຮັດງານທຳຂຽວ, ສະພາບຂາດວຽກເຮັດງານທຳໃນການປ່ຽນແປງຮູບແບບການເຕີບໂຕ, ສ້າງໂຄງປະກອບບັນດາຂະແຫນງການ, ນຳໃຊ້ເຕັກໂນໂລຊີທີ່ບໍ່ສົ່ງຜົນສະທ້ອນເຖິງສິ່ງແວດລ້ອມ, ເຂົ້າຮ່ວມການສ້າງແຜນການບຳລຸງສ້າງ ແລະ ພັດທະນາແຫລ່ງຊັບພະຍາກອນມະນຸດວຽກເຮັດງານທຳຂຽວ.”
ຫນຶ່ງໃນບັນດາຫນ້າທີ່ສຳຄັນອື່ນນັ້ນແມ່ນ ກຳມະບານຂັ້ນຮາກຖານ ຕ້ອງເຂົ້າຮ່ວມການຂົນຂວາຍກຳມະກອນ, ລັດຖະກອນ, ຜູ້ອອກແຮງງານປະຕິບັດກົດໝາຍວ່າດ້ວຍການປົກປັກຮັກສາສິ່ງແວດລ້ອມເປັນຢ່າງດີ, ເຂົ້າຮ່ວມບັນດາການເຄື່ອນໄຫວຂອງວັນສິ່ງແວດລ້ອມໂລກ. ນອກນັ້ນ ບັນດາໂຮງຮຽນ, ສະຖາບັນຄົ້ນຄ້ວາໃນລະບົບກຳມະບານຄວນຍູ້ແຮງບັນດາການເຄື່ອນໄຫວຄົ້ນຄ້ວາກ່ຽວກັບການຕ້ານມົນລະພິດສິ່ງແວດລ້ອມ, ບັນດາເຕັກນິກເຮັດໃຫ້ສິ່ງແວດລ້ອມຢູ່ເຂດອຸດສາຫະກຳສະອາດ, ນຳໃຊ້ອຸປະກອນຜະລິດຄືນໃຫມ່, ພະລັງງານສະອາດ, ຍົກສູງປະສິດທິຜົນວຽກງານຄວາມປອດໄພຫລັກອະນາໄມໃນການອອກແຮງງານ, ຄົ້ນຄ້ວາກ່ຽວກັບການເຕີບໂຕຂຽວ, ເສດຖະກິດຂຽວເພື່ອສ້າງວຽກເຮັດງານທຳຂຽວໃຫ້ແກ່ຜູ້ອອກແຮງງານ.
Thu Hoa