(vovworld)- ວັນທີ 11/9, ທ່ານນາຍົກລັດຖະມົນຕີສິງກະໂປ ຫຼີຊຽນຫຼົງ ເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການຕາມຄຳເຊີນຂອງທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸງ. ການຢ້ຽມຢາມຫວຽດນາມ ຂອງທ່ານນາຍົກລັດຖະມົນຕີສິງກະໂປ ຫຼີຊຽນຫຼົງ ດຳເນີນໄປກົງກັບໂອກາດສອງປະເທດສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນທາງການທູດ, ແມ່ນຂີດໝາຍທີ່ມີຄວາມໝາຍ, ເປີດບັນດາແງ່ຫວັງ ແລະ ກາລະໂອກາດຮ່ວມມືໃໝ່ ໃນການພົວພັນລະຫວ່າງຫວຽດນາມ-ສິງກະໂປ.
ທ່ານຫຼີຊຽນຫຼົງຢ້ຽມຢາມຫວຽດນາມຄັ້ງທີ 2
(ພາບ: vnexpress.net)
ຫວຽດນາມ ແລະ ສິງກະໂປ ສ້າງຕັ້ງສາຍພົວພັນທາງການທູດນັບແຕ່ວັນທີ 1/8/1973, ໃນ 40 ປີຜ່ານມາ, ໝາກຜົນທີ່ພົ້ນເດັ່ນທີ່ສຸດໃນການພົວພັນລະຫວ່າງສອງປະເທດ ແມ່ນການພັດທະນາຂອງສາຍພົວພັນດ້ານການເມືອງທີ່ໜ້າໄວ້ເນື້ອເຊື່ອໃຈ ແລະ ຮອບດ້ານໃນທຸກຂົງເຂດ. ການຮ່ວມມືດ້ານເສດຖະກິດລະຫວ່າງຫວຽດນາມ ແລະ ສິງກະໂປ ກໍ່ໄດ້ຮັບການພັດທະນາຢ່າງແຮງ. ທ່ານຮອງລັດຖະມົນຕີກະຊວງການຕ່າງປະເທດຫວຽດນາມ ຟ້າມກວາງວິງ ໃຫ້ຂໍ້ສັງເກດວ່າ:
“ອາດເວົ້າໄດ້ວ່າ, ໃນ 40 ປີຜ່ານມາ, ການພົວພັນຮ່ວມມື ຫວຽດນາມ ແລະ ສິງກະໂປ ມີບາດກ້າວພັດທະນາກ້າວກະໂດດຂັ້ນ. ສິງກະໂປ ແມ່ນໜຶ່ງໃນບັນດາປະເທດເປີດສາກການຮ່ວມມື ແລະ ໜູນຊ່ວຍຫວຽດນາມ ໃນພາລະກິດປ່ຽນແປງໃໝ່. ໃນຫຼາຍປີຜ່ານມາ, ສິງກະໂປແມ່ນໜຶ່ງໃນບັນດາຄູ່ຮ່ວມມືອັນດັບໜຶ່ງຂອງຫວຽດນາມ. ໄລ່ຮອດທ້າຍປີ 2012, ວົງເງິນການຄ້າສອງຝ່າຍໄດ້ຂຶ້ນເຖິງ 9,6 ຕື້ USD. ຮອດເດືອນ 7/2013, ສິງກະໂປ ມີກ່ວາ 1100 ໂຄງການລົງທຶນຢູ່ຫວຽດນາມ ດ້ວຍຍອດມູນຄ່າກ່ວາ 24 ຕື້ USD“.
ເຂດອຸດສາຫະກຳຫວຽດນາມ-ສິງກະໂປ
(ພາບ: nhadatchinhchu.com)
ປະຈຸບັນ, ຫວຽດນາມ ແລະ ສິງກະໂປ ໄດ້ລົງນາມໃນສັນຍາ, ຂໍ້ຕົກລົງຮ່ວມມືປະມານ 20 ສະບັບ. ພິເສດ, ບັນດາເຂດອຸດສາຫະກຳ ຫວຽດນາມ ແລະ ສິງກະໂປ ຖືກຖືວ່າແມ່ນແບບຢ່າງໃນການຮ່ວມມືດ້ານເສດຖະກິດລະຫວ່າງສອງປະເທດ ນັບມື້ນັບໄດ້ຮັບການເປີດກ້ວາງ. ນອກຈາກນັ້ນແລ້ວ, ສອງຝ່າຍພວມຍາດແຍ່ງໂອກາດຍູ້ແຮງການຮ່ວມມືໃນບັນດາຂົງເຂດຊື່ງ ສິງກະໂປ ມີທ່າແຮງ ແລະ ຫວຽດນາມ ມີຄວາມຕ້ອງການຄື: ການສຶກສາ, ວິທະຍາສາດເຕັກໂນໂລຊີ, ການປ້ອງກັນຊາດ, ປ້ອງກັນຄວາມສະຫງົບ…. ທ່ານ Lim Hong Kieng ລັດຖະມົນຕີກະຊວງອຸດສາຫະກຳການຄ້າສິງກະໂປ ຢືນຢັນວ່າ:
“ບັນດາວິສາຫະກິດສິງກະໂປ ເຫັນວ່າຫວຽດນາມ ມີຄວາມສາມາດບົ່ມຊ້ອນໃຫ່ຍຫຼວງ ແລະ ປາດຖະໜາຢາກປະກອບສ່ວນຢ່າງຕັ້ງໜ້າເຂົ້າໃນວິວັດການພັດທະນາເສດຖະກິດຂອງຫວຽດນາມ. ຍ້ອນເຫດນັ້ນ, ຫຼາຍບໍລິສັດໄດ້ ເຂົ້າມາລົງທຶນຢູ່ຫວຽດນາມ ແລະ ບັນລຸໄດ້ໝາກຜົນທີ່ດີ“.
ບໍ່ພຽງແຕ່ຂອງເຂດຮ່ວມມືສອງຝ່າຍເທົ່ານັ້ນ, ຫວຽດນາມ ແລະ ສິງກະໂປ ຍັງສົມທົບກັນຢ່າງແໜ້ນແຟ້ນໃນຂອບເຂດຮ່ວມມືຫຼາຍຝ່າຍອີກດ້ວຍ. ພິເສດ, ສອງຝ່າຍໄດ້ຕັ້ງໜ້າສົມທົບກັນຍູ້ແຮງບັນດາຄວາມມານະພະຍາ ຍາມຂອງອາຊຽນ ກ່ຽວກັບການສ້າງປະຊາຄົມ. ສອງປະເທດກໍ່ສະໜັບສະໜູນຫຼັກໝັ້ນຂອງອາຊຽນ ກ່ຽວກັບການຮັບປະກັນສັນຕິພາບ, ສະຖຽນລະພາບ, ຄວາມສະຫງົບປອດໄພ ແລະ ຄວາມເສລີໃນການເດີນເຮືອຢູ່ທະເລຕາເວັນອອກ, ແກ້ໄຂບັນດາການພິພາດໂດຍສັນຕິວິທີບົນພື້ນຖານກົດໝາຍສາກົນ.
ໃນເດືອນ 9/2011, ໃນການຢ້ຽມຢາມທາງລັດຖະກິດ ສິງກະໂປ ຂອງທ່ານປະທານປະເທດຫວຽດນາມ ເຈືອງເຕີນຊາງ, ສອງຝ່າຍໄດ້ເຫັນດີເປັນເອກະສັນກ່ຽວກັບຫຼັກການນຳການພົວພັນສອງປະເທດຈາກການຮ່ວມມືຮອບດ້ານໃນສັດຕະວັດທີ 21 ຂຶ້ນເປັນຄູ່ຮ່ວມມືຍຸດທະສາດ. ໃນການຢ້ຽມຢາມຫວຽດນາມ ຢ່າງເປັນທາງການຂອງທ່ານ ນາຍົກລັດຖະ ມົນຕີສິງກະໂປ ຫຼີຊຽນຫຼົງ ຄັ້ງນີ້, ດ້ວຍບັນດາໝາກຜົນບັນລຸໄດ້ໃນ 40 ປີຜ່ານມາ, ສອງຝ່າຍຍິ່ງມີທ່າຊຸກຍູ້ການພົວພັນກ່ວາອີກ. ທ່ານຮອງລັດຖະມົນຕີກະຊວງການຕ່າງປະເທດຫວຽດນາມ ຟ້າມກວາງວິງ ຖືວ່າ:
“ການພົວພັນດ້ານການເມືອງລະຫວ່າງສອງຝ່າຍແມ່ນມີຄວາມໄວ້ເນື້ອເຊື່ອໃຈທີ່ສຸດ ແລະ ຕ້ອງສືບຕໍ່ຮັດແໜ້ນຫຼາຍກວ່າອີກ. ບັນດາທ່າແຮງໃນການຮ່ວມມືລະຫວ່າງສອງປະເທດໃນໄລຍະຜ່ານມາ, ພິເສດແມ່ນດ້ານເສດຖະກິດ ຕ້ອງສືບຕໍ່ໄດ້ຮັບການຊຸກຍູ້ ພ້ອມທັງຕ້ອງເພີ່ມທະວີການຮ່ວມມື ແລະ ສົມທົບກັນໃນບັນດາເວທີປາໄສພາກພື້ນ ແລະ ສາກົນກ່ວາອີກ“.
ການຢ້ຽມຢາມຫວຽດນາມ ຢ່າງເປັນທາງການຂອງທ່ານນາຍົກລັດ ຖະມົນຕີສິງກະໂປ ຫຼີຊຽນຫຼົງ ແຕ່ວັນທີ 11-13/9 ອາດຈະຮັບຖືວ່າ ແມ່ນຂີດໝາຍສຳຄັນໃນໂອກາດສອງປະເທດສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນທາງການທູດ, ສ້າງກຳນົດທິດໃນການພົວພັນລະຫວ່າງຫວຽດນາມ-ສິງກະໂປ, ທັງຂອບເຂດສອງຝ່າຍ ແລະ ຫຼາຍຝ່າຍໃນລະດັບສູງໃໝ່./.