(vovworld) - ການປະຕິວັດເດືອນ 8/1945 ແມ່ນໜຶ່ງໃນບັນດາຂີດໝາຍທີ່ຮູ່ງເຮືອງເຫຼືອເຫຼື້ອມໃນພາລະກິດປົດປ່ອຍຊາດ, ປົກປັກຮັກສາປະເທດຊາດຂອງ ຫວຽດນາມ. 71 ປີໄດ້ຜ່ານພົ້ນໄປ, ແຕ່ຄວາມໝາຍ ແລະ ບັນດາຄຸນຄ່າຂອງການປະຕິວັດຍັງຄົງຕົວ, ໄດ້ຮັບການຮັກສາຢ່າງສົມກຽດໃນຫໍພິພິຕະພັນຫຼາຍແຫ່ງຂອງ ຫວຽດນາມ ຜ່ານຮູບພາບ, ວັດຖຸພັນປະຫວັດສາດນັບພັນໆຢ່າງ. ນັ້ນແມ່ນບັນດາພະຍານຫຼັກຖານພິສູດໃຫ້ເຫັນນຳ້ໃຈຮັກຊາດ, ຕໍ່ສູ້ທີ່ພິລະອາດຫານຂອງກອງທັບ ແລະ ປະຊາຊົນ ຫວຽດນາມ ເພື່ອຍາດເອົາເອກະລາດ, ເສລີພາບມາໃຫ້ປະເທດຊາດ.
ໜຶ່ງໃນບັນດາປັດໄຈຕັດສິນໄຊຊະນະຂອງການປະຕິວັດເດືອນ 8/1945 ນັ້ນແມ່ນພັກກອມມູນິດ ຫວຽດນາມ ໄດ້ປະຕິບັດວຽກງານຂົນຂວາຍ, ເຕົ້າໂຮມມະຫາຊົນໃນແນວໂຮມເອກະພາບ, ສ້າງກຳລັງແຮງອັນໃຫຍ່ຫຼວງໃຫ້ແກ່ການບຸກໂຈມຕີຂະໜາດໃຫຍ່ເປັນຢ່າງດີ. ໃນວິວັດການນັ້ນ, ໜັງສືພິມ, ໃບປິວໂຄສະນາປະຕິວັດໄດ້ມີບົດບາດສຳຄັນເພື່ອຂົນຂວາຍມະຫາຊົນເດີນຕາມພັກ, ຕໍ່ສູ້ຕ້ານລັດທິລ່າເມືອງຂຶ້ນ, ຟາດຊິດ ແລະ ສັກດີນາ ເພື່ອຍາດເອົາເອກະລາດ, ເສລີພາບມາໃຫ້ປະເທດຊາດ.
ຄຳສັ່ງດຳເນີນການລຸກຮື້ຂຶ້ນຂະໜາດໃຫຍ່
(ພາບປະກອບ)
ໃນຈຳນວນຮູບພາບ, ເອກະສານວັດຖຸພັນນັບພັນຢ່າງໄດ້ຈົດຈຳບັນຍາກາດພິລະອາດຫານຂອງການປະຕິວັດເດືອນສິງຫາ ພວມໄດ້ຮັບການເກັບຮັກສາຢູ່ຫໍພິພິຕະພັນປະຫວັດສາດແຫ່ງຊາດ, ຊຸດສະສົມໃບປິວໂຄສະນາໄລຍະການປະຕິວັດເດືອນ 8/1945 ແລະ ຊຸດສະສົມໜັງສືພິມປະຕິວັດ 1925 – 1945 ລວມມີ 90 ສະບັບ ທີ່ໄດ້ສ່ອງແສງບົດບາດສຳຄັນຂອງໜັງສືພິມປະຕິວັດໃນການໂຄສະນາລັດທິຮັກຊາດ, ເຕົ້າໂຮມ ແລະ ປັບປຸງບັນດາກຳລັງປະຕິວັດລຸກຮືຂຶ້ນຍາດເອົາອຳນາດການປົກຄອງ, ດຳເນີນການບຸກໂຈມຕີຂະໜາດໃຫຍ່ຢ່າງມີໄຊ. ນອກຈາກບັນດາໜັງສືພິມຂອງສູນກາງພັກແລ້ວ, ບັນດາອົງການມະຫາຊົນຢູ່ທ້ອງຖິ່ນເກືອບທັງໝົດໃນໄລຍະນັ້ນໄດ້ຈຳໜ່າຍໜັງສືພິມໂດຍຄວາມລັບຄື: ຕາບຈີ໋ໂດ໋ (ວັນລະສານແດງ), ແຈງເດົ໋າ (ຕໍ່ສູ້), ເຢີນໄກ (ຊາວນາ), ຫວຽດນາມ ໂດກເລີບ ( ຫວຽດນາມ ເອກະລາດ), ເກີ່ຢ໋າຍຟ໋ອງ (ທຸງປົດປ່ອຍ). ບັນດາໜັງສືພິມສະບັບນີ້ກາຍເປັນແນວໂຮມທີ່ແຫຼມຄົມ, ຕອບສະໜອງບັນດາຄຳຮຽກຮ້ອງຕ້ອງການຂອງພະນັກງານ, ສະມາຊິກພັກ ແລະ ບັນດາສະມາຊິກສະມາຄົມກູ້ຊາດໃນຂະບວນການຕໍ່ສູ້ປະຕິວັດຢ່າງທັນການ. ນັກປະຫວັດສາດ ເຢືອງຈູງກວກ, ເລຂາທິການໃຫຍ່ສະມາຄົມວິທະຍາສາດປະຫວັດສາດ ຫວຽດນາມ, ໃຫ້ຮູ້ວ່າ:
“ໃນໄລຍະນັ້ນ, ສື່ມວນຊົນໄດ້ເຄື່ອນໄຫວແບບປິດລັບຢູ່ບັນດາເຂດປົດປ່ອຍ, ໃນເຂດຕໍ່ສູ້, ໃນບັນດາເຂດໂດຍສັດຕູຄຸ້ມຄອງເປັນຕົ້ນ. ບັນດາບົດໜັງສືພິມນີ້ບໍ່ພຽງແຕ່ໂຄສະນາເຜີຍແຜ່ດ້ານຄວາມຄິດເທົ່ານັ້ນ ຫາກຍັງເຜີຍແຜ່ເຈດຈຳນົງຄວາມຕັດສິນໃຈ, ຫົວຄິດປະດິດສ້າງເພື່ອໃຫ້ແນວທາງ, ນະໂຍບາຍຂອງອົງການປະຕິວັດນັ້ນເຂົ້າສູ່ຊີວິດຕົວຈິງ. ບັນດາບົດໜັງສືພິມໄດ້ຊ່ວຍໃຫ້ທຸກໆຄົນຮ່ວມແຮງຮ່ວມໃຈເປັນເອກະພາບ, ພິເສດແມ່ນໃນບັນດາການເຄື່ອນໄຫວຍາດເອົາອຳນາດການປົກຄອງ ແລະ ການສ້າງລະບອບສາທາລະນະລັດ ປະຊາທິປະໄຕ”
ຂີດໝາຍຂອງການປະຕິວັດເດືອນສິງຫາ ຍັງສະແດງອອກຜ່ານບັນດາຮູບພາບ, ບັນດາວັດຖຸພັນທີ່ໄດ້ຊີ້ແຈ້ງບົດບາດນຳພາຂອງພັກກອມມູນິດ ຫວຽດນາມ ແລະ ປະທານ ໂຮ່ຈີມິນ ທີ່ມີຕໍ່ພາລະກິດປົດປ່ອຍຊາດ. ມີວັດຖຸພັນອັນລຳ້ຄ່າຫຼາຍຢ່າງ, ເອກະສານຕົ້ນ ສະບັບຂອງເຫດການປະຫວັດສາດການປະຕິວັດເດືອນ 8 ປີ 1945 ໄດ້ຮັບການເກັບຮັກສາຢູ່ຫໍພິພິຕະພັນປະຫວັດສາດແຫ່ງຊາດຄື ມະຕິກອງປະຊຸມໃຫຍ່ແຫ່ງຊາດ, ຄຳສັ່ງການທະຫານຂອງຄະນະກຳມະການລຸກຮືຂຶ້ນທົ່ວປະເທດ, ກາປະທັບຂອງກົມໃຫຍ່ ຫວຽດມີງ ປີ 1944 – 1945… ບັນດາຮູບພາບ, ວັດຖຸພັນນີ້ໄດ້ສະແດງໃຫ້ເຫັນການກະກຽມກ່ຽວກັບທຸກດ້ານຂອງແນວໂຮມ ຫວຽດມີງ ໃຫ້ແກ່ການລຸກຮືຂຶ້ນຍາດເອົາອຳນາດການປົກຄອງປີ 1945 ຂອງຊາດ.
ຮູບພາບໄດ້ວາງສະແດງທີ່ງານວາງສະແດງ
(ພາບປະກອບ)
|
ທີ່ຫໍພິພິຕະພັນປະຫວັດສາດກອງທັບ ຫວຽດນາມ, ໃນຈຳນວນຮູບພາບ, ວັດຖຸພັນກ່ວາ 300 ຢ່າງທີ່ໄດ້ວາງສະແດງໃນງານວາງສະແດງ “ຂີດໝາຍລະດູໃບໄມ້ຫຼົ່ນປະຫວັດສາດ”, ມີຫຼາຍວັດຖຸພັນກ່ຽວກັບການປະຕິວັດເດືອນ 8 ແລະ ວັນສະຖາປານາປະເທດ 2/9/1945 ຄື: ຈົດໝາຍຂອງປະທານ ໂຮ່ຈີມິນ ຝາກໃຫ້ປະຊາຊົນໃນທົ່ວປະເທດກ່ອນວັນລຸກຮື້ຂຶ້ນຂະໜາດໃຫຍ່, ຮຽກຮ້ອງຄວາມສາມັກຄີພ້ອມກັບແນວໂຮມ ຫວຽດມີງ ປົດປ່ອຍຊາດ, ໃບປິວໂຄສະນາຂອງແນວໂຮມ ຫວຽດມີງ ຮຽກຮ້ອງໃຫ້ປະຊາຊົນເຂົ້າຮ່ວມການລຸກຮື້ຂຶ້ນຂະໜາດໃຫຍ່ຍາດເອົາອຳນາດການປົກຄອງໃນການປະຕິວັດເດືອນສິງຫາ ປີ 1945, ກະເປົາຂອງທ່ານ ຟານກວາງຫ່ຽນ, ສະມາຊິກຂອງກອງກຳລັງກູ້ຊາດ, ໄດ້ນຳໃຊ້ເພື່ອບັນຈຸຈົດໝາຍຕິດຕໍ່ຂອງຂັ້ນເທິງໃນວິວັດທະນາການຊີ້ນຳການລຸກຮື້ຂຶ້ນ ຂະໜາດໃຫຍ່ເດືອນ 8/1945 ຢູ່ ຫວຽດບັກ, ຖົງຜ້າຂອງເອື້ອຍເລທິເທາະ, ຢູ່ແຂວງ ຟູ໋ເທາະ, ໄດ້ນຳໃຊ້ເພື່ອສູ່ເຂົ້າສານລຳລຽງໃຫ້ອົງການສູນກາງພັກປີ 1945, ພົນຕີ ຫງວຽນຊວນນັງ, ຜູ້ອຳນວຍການຫໍພິພິຕະພັນປະຫວັດສາດກອງທັບ ຫວຽດນາມ, ໃຫ້ຮູ້ວ່າ:
“ນອກຈາກບັນດາຮູບພາບເອກະສານຕົ້ນສະບັບທີ່ໄດ້ຮັບການເກັບຮັກສາຢູ່ຫໍພິພິຕະພັນປະຫວັດສາດການທະຫານ ຫວຽດນາມ, ກໍ່ມີບັນດາຮູບພາບທີ່ພວກຂ້າພະເຈົ້າຕ້ອງໄປເຖິງສຳນັກຂ່າວສານ ຫວຽດນາມ ແລະ ສາງເກັບຮັກສາອື່ນໆເພື່ອຊອກຫາ, ວາງສະແດງ. ອາດເວົ້າໄດ້ວ່າ: ບັນດາວັດຖຸພັນກ່ຽວກັບເຫດການປະຫວັດສາດເດືອນ 8 ແມ່ນຄົບຖ້ວນພໍສົມຄວນ, ຈາກສະພາບການເຖິງແຜນນະໂຍບາຍຂອງພັກ, ແລ້ວກໍ່ຮອດວິວັດທະນາການກະກຽມການລຸກຮືຂຶ້ນຂະໜາດໃຫຍ່ ຕະຫຼອດຮອດການຜັນແປຢູ່ບັນດາທ້ອງຖິ່ນທີ່ພົ້ນເດັ່ນຄື: ແຂວງ ທ໋າຍງວຽນ, ກວາງຫງາຍ, ເຫ້ວ, ນະຄອນ ໂຮ່ຈີມິນ. ພິເສດ, ຢູ່ຮ່າໂນ້ຍ ແມ່ນຮູບພາບກ່ຽວກັບງານໂຮມຊຸມນຸມກ່ຽວກັບວັນທີ 19/8 ຢູ່ສະໜາມຫຼວງຂອງໂຮງລະຄອນໃຫຍ່ ກໍ່ຄືພິທີປະກາດເອກະລາດໃນວັນທີ 2/9 ຢູ່ສະໜາມຫຼວງ ບາດິ່ງ. ນັ້ນແມ່ນບັນດາຮູບພາບອັນລຳ້ຄ່າທ່ີສຸດ.”
ເປັນໜ້າສົນໃຈແມ່ນບັນດາວັດຖຸພັນກ່ຽວກັບການປະຕິວັດເດືອນສິງຫາ ຢູ່ຫໍພິພິທະພັນປະຫວັດສາດການທະຫານ ຫວຽດນາມ, ຍັງມີຊຸດແກຂອງວົງດົນຕີການທະຫານ ແລະ ເພງຊາດຂອງນັກປະພັນດົນຕີ ວັນກາວ. ຊຸດແກນີ້ໂດຍວົງດົນຕີການທະຫານນຳໃຊ້ເພື່ອບັນເລັງເພງຊາດໃນພິທີເຄົາລົບທຸງຢູ່ສະໜາມຫຼວງ ບາດິ່ງ ເມື່ອວັນທີ 2/9/1945. ໂດຍໄດ້ເຫັນປະຈັກຕາບັນດາວັດຖຸພັນປະຫວັດສາດທີ່ຕິດພັນກັບວັນຊາດ, ອ້າຍ ຫງວຽນວັນແທງ, ແຂກມາຊົມຫໍພິພິທະພັນ, ໃຫ້ຮູ້ວ່າ:
“ຂ້າພະເຈົ້າເຫັນວ່າ ແກທອງກ່ອນນີ້ໄດ້ຮັບການຜະລິດຢ່າງງ່າຍດາຍ ແຕ່ບັນດານັກເປົາແກໃນໄລຍະນັ້ນຍັງໄດ້ນຳໃຊ້ເພື່ອບັນເລັງເພງຊາດ ອັນໄດ້ສ້າງບັນຍາກາດຟົດຟື້ນໃຫ້ແກ່ວັນປະກາດເອກະລາດ. ທັງໝົດເລົ່ານັ້ນເລີ່ມມາຈາກຄວາມຮັກປະເທດຊາດ ດັ່ງນັ້ນບັນດານັກເປົາແກຈຶ່ງນຳວີນຍານເຂົ້າບົດດົນຕີ, ດັ່ງນັ້ນສຽງດົນຕີຈຶ່ງມ່ວນຄືແນວນັ້ນ”
71 ປີໄດ້ລ່ວງເລີຍໄປແລ້ວ, ແຕ່ບັນດາວັດຖຸພັນກ່ຽວກັບການລຸກຮື້ຂຶ້ນຂະໜາດໃຫຍ່ ປະຕິວັດເດືອນ 8/1945 ແລະ ວັນຊາດ 2/9 ຍັງຄົງໄດ້ຮັບການເກັບຮັກສາຢູ່ຫໍພິພິຕະພັນຢູ່ ຫວຽດນາມຢ່າງຄົບຖ້ວນ, ປະກອບສ່ວນປຸກລຸກຄວາມເອກອ້າງທະນົງໃຈຂອງຊາວ ຫວຽດນາມ ທຸກລຸ້ນຄົນ, ພິເສດແມ່ນສຳລັບລຸ້ນໜຸ່ມກ່ຽວກັບມູນເຊື້ອປະຫວັດສາດແຫ່ງການຕໍ່ສູ້ປົດປ່ອຍຊາດ, ສ້າງສາ ແລະ ປົກປັກຮັກສາປະເທດຊາດ.