(vovworld)- ປີ 2016 ໃກ້ຈະສິ້ນສຸດ ດ້ວຍການເຄື່ອນໄຫວພົວພັນກັບຕ່າງປະເທດຫລາຍຢ່າງທີ່ຟົດຟື້ນໃນທຸກຂົງເຂດ, ສືບຕໍ່ ນຳຫວຽດນາມ ເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ກວ້າງຂວາງກວ່າ, ປະກອບສ່ວນຍົກສູງທີ່ຕັ້ງບົດບາດຂອງປະເທດຊາດໃນເວທີສາກົນ, ປະກອບສ່ວນຢ່າງຕັ້ງຫນ້າເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດ. ໃນບັນດາການເຄື່ອນໄຫວນັ້ນ, ການພົວພັນສອງຝ່າຍກັບບັນດາຄູ່ຮ່ວມມືຫລັກແຫລ່ງສືບຕໍ່ເຂົ້າສູ່ລວງເລິກ, ມີປະສິດທິຜົນ, ກາຍເປັນ “ຈຸດພົ້ນເດັ່ນ”ໃນວຽກງານພົວພັນຕ່າງປະເທດປີ 2016 ຂອງຫວຽດນາມ.
ທ່ານປະທານາທິບໍດີ ອາເມລິກາ B. Obama ແລະ ທ່ານປະທານປະເທດເຈີນດ້າຍກວາງ
|
ປີ 2016 ສະພາບການໂລກ ແລະ ພາກພື້ນ ໄດ້ເກີດຜັນແປສັບສົນຫລາຍຢ່າງ, ຍາກທີ່ຄາດຄະເນໄດ້ ແລະ ໄດ້ສົ່ງຜົນກະທົບໂດຍກົງເຖິງຫວຽດນາມ. ໃນສະພາບການສາກົນມີຫລາຍຈຸດພິເສດ ແລະ ສັບສົນນັ້ນ, ການພົວພັນລະຫວ່າງຫວຽດນາມ ກັບບັນດາຄູ່ຮ່ວມມືທີ່ມີຄວາມສາມາດບົ່ມຊ້ອນ, ພິເສດ ແມ່ນບັນດາປະເທດໃຫຍ່ ເຂົ້າສູ່ລວງເລິກ, ມີປະສິດທິຜົນ, ນຳມາເຊິ່ງບັນດາຜົນປະໂຫຍດອັນໃຫຍ່ຫລວງໃຫ້ແກ່ປະເທດຊາດ.
ຊຸກຍູ້ການພົວພັນຄູ່ຮ່ວມມືຮອບດ້ານກັບ ອາເມລິກາ
ເດືອນ 5/2016, ເຫດການປະຫວັດສາດຫນຶ່ງດຳເນີນໃນການພົວພັນສອງຝ່າຍ ຫວຽດນາມ ແລະ ອາເມລິກາ. ນັ້ນແມ່ນການຢ້ຽມຢາມຫວຽດນາມ ຢ່າງເປັນທາງການຂອງທ່ານປະທານາທິບໍດີ ອາເມລິກາ Barack Obama. ການຢ້ຽມຢາມຫວຽດນາມ ຄັ້ງທຳອິດຂອງທ່ານປະທານາທິບໍດີ ອາເມລິກາ B. Obama ແລະ ກໍແມ່ນການຢ້ຽມຢາມຫວຽດນາມ ຄັ້ງທີ 3 ຂອງປະທານາທິບໍດີ ອາເມລິກາ ນັບແຕ່ເມື່ອສອງປະເທດສ້າງການພົວພັນເປັນປົກກະຕິກ່ອນນີ້ 21 ປີ, ໄດ້ສ້າງຂີດໝາຍສຳເລັດຜົນຍິ່ງກວ່າຄວາມມຸ້ງຫວັງ. ການຢ້ຽມຢາມແມ່ນຫລັກໝາຍໃຫມ່ບົນເສັ້ນທາງທີ່ສອງປະເທດປະຕິບັດຖະແຫລງການວິໄສທັດຮ່ວມເມື່ອເດືອນ 7/2015 ໃນການຢ້ຽມຢາມ ອາເມລິກາ ຂອງທ່ານເລຂາທິການໃຫຍ່ ຫງວຽນຟູຈ້ອງ, ສະແດງໃຫ້ເຫັນບາດກ້າວເດີນຍາວນານໃນຈີນຕະນາການຂອງບັນດາການນຳ ອາເມລິກາ ສຳລັບຫວຽດນາມ ນັບແຕ່ເມື່ອສອງປະເທດສ້າງການພົວພັນທາງການທູດເປັນປົກກະຕິ. ນັ້ນແມ່ນ ເຄົາລົບລະບອບການເມືອງຂອງຫວຽດນາມ. ໃນການຢ້ຽມຢາມຄັ້ງນີ້, ຮູບພາບປະທານາທິບໍດີ B.Obama ເອົາມືວາງຫນ້າເອີກ ແລະ ເວົ້າວ່າ: “ຂ້າພະເຈົ້າມີຄວາມຕື້ນຕັນໃຈທີ່ສຸດ. ບັນດາອາລົມຈິດຂອງປະຊາຊົນຫວຽດນາມ ໄດ້ເຮັດໃຫ້ຫົວໃຈຂອງຂ້າພະເຈົ້າສັ່ນສະເທື່ອນ”ເປັນການພິສູດໃຫ້ເຫັນຢ່າງຈະແຈ້ງວ່າ ການພົວພັນລະຫວ່າງ ຫວຽດນາມ ແລະ ອາເມລິກາ ກາຍເປັນຄູ່ຮ່ວມມືຮອບດ້ານ”. ທ່ານ ຟ້າມກວາງວີງ, ເອກອັກຄະລັດຖະທູດ ຫວຽດນາມ ປະຈຳ ອາເມລິກາຢືນຢັນວ່າ:
“ມາຮອດປະຈຸບັນ ການພົວພັນລະຫວ່າງຫວຽດນາມ ແລະ ອາເມລິກາ ໄດ້ເປັນປົກກະຕິມາເປັນເວລາ 21 ປີແລ້ວ. ໄດ້ມີບັນດາບາດກ້າວພັດທະນາກະໂດດຂັ້ນ ແລະ ສິ່ງສຳຄັນທີ່ສຸດ ນັ້ນແມ່ນ ສອງຝ່າຍໄດ້ສ້າງຂອບເຂດປົກກະຕິ ແລະ ຍາວນານ ນັ້ນແມ່ນການພົວພັນຄູ່ຮ່ວມມືຮອບດ້ານ. ການຢ້ຽມຢາມຂັ້ນສູງຫລາຍຄັ້ງ ແລະ ການເຄື່ອນໄຫວຫລາຍຢ່າງໃນຂອບເຂດນັ້ນ. ການຮັກສາ, ປັບປຸງ ແລະ ພັດທະນາການພົວພັນໃນບັນດາຂົງເຂດຄື: ຂອບເຂດການພົວພັນຄູ່ຮ່ວມມືຮອບດ້ານທີ່ໄດ້ວາງອອກ ນັ້ນແມ່ນຜົນປະໂຫຍດສອງຝ່າຍຂອງທັງຫວຽດນາມ ແລະ ອາເມລິກາ. ຂ້າພະເຈົ້າມີຄວາມເຊື່ອໝັ້ນວ່າ ການຢ້ຽມຢາມຂອງທ່ານເລຂາທິການໃຫຍ່ ຫງວຽນຟູຈ້ອງ ເປັນຄັ້ງທຳອິດເຖິງ ອາເມລິກາ ໃນເດືອນ 7/2015 ແລະ ການຢ້ຽມຢາມຂອງທ່ານປະທານາທິບໍດີ ອາເມລິກາ B. Obama ເຖິງຫວຽດນາມ ໃນເດືອນ 5/2016 ສືບຕໍ່ສ້າງທ່າ, ກຳນົດທິດການພົວພັນໃນໄລຍະຈະມາເຖິງ.”
ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ ພັດທະນາເປັນປົກກະຕິ, ປອດໃສ
ການພົວພັນກັບຈີນ, ປີ 2016 ກໍແມ່ນປີ ການພົວພັນທາງການທູດລະຫວ່າງສອງປະເທດແມ່ນຟົດຟື້ນທີ່ສຸດ. ເດືອນ 9/2016, ທ່ານນາຍົກລັດຖະມົນຕີ ຫງວຽນຊວນຟຸກ ຢ້ຽມຢາມສັນຖະວະໄມຕີ ຈີນ ຢ່າງເປັນທາງການ ແລະ ນີ້ແມ່ນການຢ້ຽມຢາມຂັ້ນສູງສຸດຂອງການນຳຫວຽດນາມ ເຖິງຈີນ ນັບແຕ່ເມື່ອ ຫວຽດນາມ ປ່ຽນແປງກົງຈັກການນຳໃນຕົ້ນປີ 2016. ເຫດການນີ້ແມ່ນສະແດງໃຫ້ເຫັນຄວາມຕັດສິນໃຈຂອງສອງປະເທດເພື່ອແນໃສ່ສືບຕໍ່ຮັກສາການພົວພັນສອງຝ່າຍໃຫ້ພັດທະນາເປັນປົກກະຕິ ແລະ ດີງາມ, ເຖິງວ່າ ຍັງມີຄວາມບໍ່ລົງລອຍກັນຈຳນວນຫນຶ່ງ. ທ່ານຮອງລັດຖະມົນຕີການຕ່າງປະເທດ ຫວຽດນາມ ເລຮ່ວາຍຈູງ ໃຫ້ຮູ້ວ່າ:
“ສອງປະເທດໄດ້ເຫັນດີແກ້ໄຂຄວາມບໍ່ລົງລອຍກັນຢ່າງສົມເຫດສົມຜົນ. ຕາມນັ້ນແລ້ວ, ສອງຝ່າຍເຫັນດີຊຸກຍູ້ກົນໄກເຈລະຈາປະຈຸບັນ ລະຫວ່າງສອງປະເທດ, ໃນນັ້ນ ມີກົນໄກເຈລະຈາຂັ້ນລັດຖະບານກ່ຽວກັບບັນຫາຊາຍແດນຜືນແຜ່ນດິນ; ກົນໄກເຈລະຈາການຂີດເສັ້ນຊາຍແດນ ແລະ ການຮ່ວມມືນອກອ່າວພາກເຫນືອ, ເສີມຂະຫຍາຍບັນດາກົນໄກເຈລະຈາທີ່ມີຢູ່ແລ້ວ. ສອງຝ່າຍກໍເຫັນດີປະຕິບັດຖະແຫລງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຮອບດ້ານ, ມີປະສິດທິຜົນ ແລະຄົບຖ້ວນ, ສ້າງກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC)ໂດຍໄວ.”
ເປັນຫນ້າສົນໃຈ, ປີ 2016 ຮັບຮູ້ສັນຍານຕັ້ງຫນ້າໃນການຮ່ວມມືດ້ານເສດຖະກິດສອງຝ່າຍ ຫວຽດນາມ - ຈີນ. ນັ້ນແມ່ນເປັນຄັ້ງອິດ ຫວຽດນາມ ລື່ນກາຍ ມາເລເຊຍ, ກາຍເປັນຄູ່ຮ່ວມມືດ້ານການຄ້າລາຍໃຫຍ່ແຖວຫນ້າຂອງຈີນ ໃນ ອາຊຽນ.
ຢືນຢັນການພົວພັນກັບບັນດາປະເທດບ້ານໃກ້ເຮືອນຄຽງຢ່າງແຫນ້ນແຟ້ນ
ໃນການພົວພັນກັບບັນດາປະເທດ, ບັນດາຄູ່ຮ່ວມມື, ການພົວພັນຮ່ວມມື, ມິດຕະພາບ ທີ່ເປັນມູນເຊື້ອກັບບັນດາປະເທດບ້ານໃກ້ເຮືອນຄຽງສືບຕໍ່ແມ່ນການບຸລິມະສິດສູງໃນແນວທາງການຕ່າງປະເທດຂອງພັກ, ລັດຫວຽດາມ. ການເຄື່ອນໄຫວພົວພັນຕ່າງປະເທດຂອງຫວຽດນາມ ໃນປີ ຜ່ານມາ ສືບຕໍ່ໄດ້ຮັບການຜັນຂະຫຍາຍຕາມການກຳນົດທິດນັ້ນ. ການພົວພັນກັບ ສປປ ລາວ, ຫວຽດນາມ ຢືນຢັນ ການພົວພັນທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານກັບລາວ ແມ່ນຊັບສົມບັດລວມອັນລ້ຳຄ່າຂອງທັງສອງຊາດ. ສິ່ງດັ່ງກ່າວໄດ້ພິສຸດໃຫ້ເຫັນຜ່ານຄຳກ່າວປາໄສຂອງທ່ານເລຂາທິການໃຫຍ່ ພັກກອມມູນິດຫວຽດນາມ ຫງວຽນຟູຈ້ອງ ໃນການຢ້ຽມຢາມ ລາວ ເມື່ອເດືອນ 11 ຜ່ານມາ.
“ໃນສະພາບການຂອງໂລກພວມຜັນແປຢ່າງສັບສົນຄືປະຈຸບັນ, ການພົວພັນສາມັກຄີແບບພິເສດ ຫວຽດນາມ - ລາວ ນັບມື້ນັບສຳຄັນຍິ່ງກວ່າເວລາໃດໝົດສຳລັບສອງປະເທດ. ຫວຽດນາມ ແລະ ລາວ ຕັດສິນໃຈເຮັດຈົນສຸດຄວາມສາມາດຂອງຕົນເພື່ອນຳການພົວພັນລະຫວ່າງສອງປະເທດໃຫ້ແຕກດອກອອກຜົນໝັ້ນຄົງຂະຫນົງແກ່ນຈົນຊົ່ວກາລະນານ.
ການພົວພັນກັບ ກຳປູເຈຍ, ການຮ່ວມມືສອງຝ່າຍ ຫວຽດນາມ ແລະ ກຳປູເຈຍ ໃນປີ 2016 ສືບຕໍ່ເສີມຂະຫຍາຍຢ່າງມີປະສິດທິຜົນໃນບັນດາຂົງເຂດ. ການຢ້ຽມຢາມຂອງທ່ານປະທານປະເທດ ເຈີນດ້າຍກວາງ ເຖິງ ກຳປູເຈຍ ໃນເດືອນ 6/2016 ໄດ້ສ້າງພື້ນຖານຢ່າງໝັ້ນຄົງເພື່ອນຳການພົວພັນ “ບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ” ກັບ ກຳປູເຈຍຂຶ້ນສູ່ລະດັບສູງໃຫມ່.
ປີ 2016, ແມ່ນປີເຕັມໄປດ້ວຍບັນດາເຫດການ ແລະ ຜົນງານການພົວພັນຕ່າງປະເທດສຳຄັນ, ສ້າງປະຖົມປັດໄຈຢ່າງໝັ້ນແກ່ນເພື່ອໃຫ້ຫວຽດນາມ ສືບຕໍ່ເຊື່ອມໂຍງເຂົ້າກັບສາກົນຢ່າງມີປະສິດທິຜົນ. ຢືດໝັ້ນແນວທາງການຕ່າງປະເທດສັນຕິພາບ, ເປັນເຈົ້າຕົນເອງ, ຫລາຍຮູບຫລາຍແບບຫລາຍຝ່າຍ, ຖືຜົນປະໂຫຍດຂອງປະເທດຊາດເຫນືອກວ່າສິ່ງໃດໝົດ, ຫວຽດນາມ ໄດ້ແກ້ໄຂການພົວພັນຂອງຕົນກັບບັນດາປະເທດໃຫຍ່, ບັນດາປະເທດບ້ານໃກ້ເຮືອນຄຽງຢ່າງຄ່ອງແຄ້ວ, ຕາມເນື້ອໃນຈິດໃຈ ຫວຽດນາມ ແມ່ນເພື່ອນມິດ, ແມ່ນຄູ່ຮ່ວມມືໄວ້ເນື້ອເຊື່ອໃຈ.