(vovworld) - ວັນທີ 15/9, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ ເລີ່ມຕົ້ນການຢ້ຽມຢາມຍີ່ປຸ່ນ ຢ່າງເປັນທາງການ. ການຢ້ຽມຢາມດຳເນີນໃນເວລາ 3 ວັນນີ້ ແມ່ນເຫດການການເມືອງພິເສດໃນການພົວພັນສອງຝ່າຍຫວຽດນາມ - ຍີ່ປຸ່ນ ປີ 2015, ແມ່ນຂີດໝາຍສຳຄັນ, ເປີດວິໄສທັດໃໝ່, ຊຸກຍູ້ຮອບດ້ານ ແລະ ເຮັດໃຫ້ການພົວພັນ “ຄູ່ຮ່ວມມືຍຸດທະສາດເລິກເຊິ່ງກວ້າງຂວາງຫວຽດນາມ - ຍີ່ປຸ່ນ ຍິ່ງເລິກເຊິ່ງກວ່າອີກ, ເພື່ອສັນຕິພາບ ແລະ ຄວາມວັດທະນາຖາວອນຢູ່ອາຊີ” ຕາມທິດນຳ “ເພີ່ມທະວີຄວາມໄວ້ເນື້ອເຊື່ອໃຈ, ເຊື່ອມໂຍງດ້ານເສດຖະກິດ, ເປີດກວ້າງການຮ່ວມມື, ພັດທະນາຢ່າງໝັ້ນຄົງ, ມຸ່ງໄປສູ່ອະນາຄົດ“.
ທ່ານເລຂາທິການໃຫຍ່ ຫງວຽນຟູ່ຈ້ອງ
ພົບປະກັບທ່ານນາຍົກລັດຖະມົນຕີຍີ່ປຸ່ນ Shinzo Abe
(ພາບ: ອິນເຕີແນດ)
ຄວາມໄວ້ເນື້ອເຊື່ອໃຈ, ຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ການເສີມຂະຫຍາຍຜົນປະໂຫຍດໃຫ້ກັນ, ຍົກສູງປະສິດທິຜົນແຫ່ງການຮ່ວມມື, ມານະພະຍາຍາມມຸ່ງໄປສູ່ອະນາຄົດ. ນັ້ນແມ່ນຈຸດພິເສດທີ່ສາມາດຮັບຮູ້ໄດ້ງ່າຍ ເມື່ອຫວນຄືນໄລຍະທາງແຫ່ງການພັດທະນາສາຍພົວພັນລະຫວ່າງຫວຽດນາມ - ຍີ່ປຸ່ນ ໃນຊຸມທົດສະວັດຜ່ານມາ.
ທັງສອງຝ່າຍໄດ້ສ້າງການພົວພັນໄວ້ເນື້ອເຊື່ອໃຈ ແລະ ປະຈຸບັນ, ການພົວພັນນີ້ພວມຢູ່ໃນໄລຍະພັດທະນາຢ່າງຈົບງາມ, ກາຍເປັນ “ຄູ່ຮ່ວມມືຍຸດທະສາດທີ່ເລິກເຊິ່ງ, ກວ້າງຂວາງ, ເພື່ອສັນຕິພາບ ແລະ ຄວາມວັດທະນາຖາວອນຢູ່ອາຊີ“. ດັ່ງນັ້ນ, ຫວັງວ່າການຢ້ຽມຢາມຍີ່ປຸ່ນ ຢ່າງເປັນທາງການຂອງທ່ານເລຂາທິການໃຫຍ່ ຫງວຽນຟູ່ຈ້ອງ ໃນຄັ້ງນີ້ ຈະເປີດວິໄສທັດໃໝ່ໃນການພົວພັນລະຫວ່າງສອງປະເທດຫວຽດນາມ - ຍີ່ປຸ່ນ.
ຮ່ວມມືຢ່າງຈິງໃຈ, ແມ່ນປັດໃຈສ້າງເປັນການພົວພັນຍາວນານ ແລະ ໝັ້ນຄົງ
ຄວາມໄວ້ເນື້ອເຊື່ອໃຈດ້ານການເມືອງລະຫວ່າງຫວຽດນາມ - ຍີ່ປຸ່ນ ແມ່ນຈຸດທີ່ພົ້ນເດັ່ນ. ເຖິງວ່າຈະມີຄວາມແຕກຕ່າງກັນກ່ຽວກັບລະບອບການເມືອງ ແລະ ຮູບແບບເສດຖະກິດກໍ່ຕາມ, ແຕ່ສອງປະເທດຍາມໃດກໍ່ມີຄວາມໄວ້ເນື້ອເຊື່ອໃຈ, ເຄົາລົບນັບຖືເຊິ່ງກັນ ແລະ ກັນ. ການພົວພັນຫວຽດນາມ - ຍີ່ປຸຸ່ນ ໄດ້ຮັບການປັບປຸງ ແລະ ເພີ່ມທະວີຢ່າງບໍ່ຢຸດຢັ້ງ, ຜ່ານການຢ້ຽມຢາມຄັ້ງຕ່າງໆຂອງການນຳຂັ້ນສູງສອງປະເທດ. ອະດີດເອກອັກຄະລັດຖະທູດຍີ່ປຸ່ນ ປະຈຳຫວຽດນາມ Mistuo Sakaba, ຖືວ່າ:
“ໃນໄລຍະເວລາພຽງສັ້ນໆເທົ່ານັ້ນ, ແຕ່ບັນດາການນຳຂັ້ນສູງສຸດຂອງຫວຽດນາມ ໄດ້ໄປຢ້ຽມຢາມຍີ່ປຸ່ນ ແລະ ນາຍົກລັດຖະມົນຕີຍີ່ປຸ່ນ Shinzo Abe ກໍ່ມາຢ້ຽມຢາມຫວຽດນາມ. ການນຳສອງປະເທດກໍ່ໄດ້ພົບປະກັນໃນກອງປະຊຸມ, ເວທີປາໄສສາກົນ ແລະ ການພົບປະຂັ້ນສູງຕ່າງໆເປັນປະຈຳ. ຕາມຂ້າພະເຈົ້າແລ້ວ, ນີ້ແມ່ນສານສະແດງໃຫ້ເຫັນການພົວພັນລະຫວ່າງສອງປະເທດໄດ້ກາຍເປັນການພົວພັນສະໜິດສະໜົມ ແລະ ມີຄວາມເຊື່ອໝັ້ນເຊິ່ງກັນ ແລະ ກັນທີ່ສຸດ“.
ປະສິດທິຜົນຕົວຈິງແຫ່ງການຮ່ວມມື
ພາຍຫຼັງ 40 ປີແຫ່ງການສ້າງສາຍພົວພັນທາງການທູດ, ປະຈຸບັນ ຫວຽດນາມ ແລະ ຍີ່ປຸ່ນ ໄດ້ກາຍເປັນຄູ່ຮ່ວມມືອັນດັບໜຶ່ງຂອງກັນ. ບັນດາກິດຈະກຳທີ່ເຮັດໃຫ້ໂສມໜ້າຂອງຫວຽດນາມ ມີການປ່ຽນແປງນັ້ນ ລ້ວນແຕ່ມີການປະກອບສ່ວນຢ່າງມີປະສິດທິຜົນຂອງຍີ່ປຸ່ນ. ຕົວຢ່າງຄື: ກິດຈະກຳຂົວ ເຍິດເຕີນ, ທ່າອາກາດສະຍານສາກົນໂນ້ຍບ່າຍ… ນີ້ແມ່ນປະກົດການທີ່ມີຊີວິດຊີວາແຫ່ງສາຍພົວພັນມິດຕະພາບລະຫວ່າງຫວຽດນາມ - ຍີ່ປຸ່ນ.
20 ກວ່າປີທີ່ຜ່ານມາ, ຍາມໃດຍີ່ປຸ່ນ ກໍ່ແມ່ນປະເທດອຸປະຖຳທຶນ ODA ສອງຝ່າຍໃຫ້ຫວຽດນາມ ຫລາຍທີ່ສຸດ. ປີ 2015, ທຶນ ODA ເຊິ່ງລັດຖະບານຍີ່ປຸ່ນ ໃຫ້ຄຳໝັ້ນສັນຍາອຸປະຖຳແກ່ຫວຽດນາມ ໄດ້ຂຶ້ນເຖິງລະດັບສະຖິຕິແມ່ນ 3 ຕື້ USD, ຫຼາຍທົບ 3 ເທົ່າເມື່ອທຽບໃສ່ປີ 2014. ປີ 2014, ຫວຽດນາມ ແລະ ຍີ່ປຸ່ນ ໄດ້ຍົກການພົວພັນຂຶ້ນເປັນ “ຄູ່ຮ່ວມມືຍຸດທະສາດທີ່ເລິກເຊິ່ງກວ້າງຂວາງ“. ປີ 2015, ຈາກອັນດັບ 4, ຍີ່ປຸ່ນ ໄດ້ບືນຕົວຂຶ້ນອັນດັບ 2 ໃນບັນດາປະເທດ ແລະ ເຂດແຄວ້ນລົງທຶນເຂົ້າຫວຽດນາມ. ເລື່ອງນາຍົກລັດຖະມົນຕີຍີ່ປຸ່ນ Shinzo Abe ເລືອກ ຫວຽດນາມ ເປັນປະເທດທຳອິດມາຢ້ຽມຢາມ ພາຍຫຼັງໄດ້ຮັບດຳລົງຕຳເໜ່ງເມື່ອປີ 2013 ນັ້ນ, ໄດ້ສະແດງໃຫ້ເຫັນວ່າ, ຍີ່ປຸ່ນ ຖືເປັນສຳຄັນການພົວພັນກັບຫວຽດນາມ.
ການພົວພັນຫວຽດນາມ - ຍີ່ປຸ່ນມຸ່ງໄປສູ່ອະນາຄົດ
ທ່ານເອກອັກຄະລັດຖະທູດຫວຽດນາມ ປະຈຳຍີ່ປຸ່ນ ຫງວຽນກວົກເກື່ອງ ຢືນຢັນວ່າ, ການຢ້ຽມຢາມຍີ່ປຸ່ນ ຂອງການນຳສູງສຸດຫວຽດນາມ ໃນຄັ້ງນີ້ ແມ່ນເຫດການພົວພັນຕ່າງປະເທດສຳຄັນທີ່ສຸດ ໃນການພົວພັນສອງຝ່າຍຫວຽດນາມ - ຍີ່ປຸ່ນ ປີ 2015.
“ບັນດາການນຳຂັ້ນສູງຂອງຍີ່ປຸນ ຄື: ນາຍົກລັດຖະມົນຕີຍີ່ປຸ່ນ Shinzo Abe, ປະທານສະພາສູງ Yamazaki, ປະທານສະພາຕຳ່ Oshima ລ້ວນແຕ່ຕີລາຄາສູງທີ່ຕັ້ງ ແລະ ອິດທິພົນຊື່ສຽງນັບມື້ນັບໄດ້ຮັບການຍົກສູງຂຶ້ນຂອງຫວຽດນາມ ຢູ່ພາກພື້ນ ແລະ ຢູ່ໂລກ, ພ້ອມທັງປາຖະໜາຢາກເພີ່ມທະວີການພົວພັນແທດຈິງ ແລະ ມີປະສິດທິຜົນກັບຫວຽດນາມ. ດັ່ງນັ້ນທັງສອງຝ່າຍລ້ວນແຕ່ຖືການຢ້ຽມຢາມໃນຄັ້ງນີ້ເປັນສຳຄັນ ແລະ ຈະມານະພະຍາຍາມຈົນສຸດຄວາມສາມາດຂອງຕົນ ເພື່ອເຮັດໃຫ້ການຢ້ຽມຢາມປະສົບຜົນສຳເລັດຢ່າງຈົບງາມ“.
ເນື່ອງໃນໂອກາດການຢ້ຽມຢາມຄັ້ງນີ້, ທ່ານເລຂາທິການໃຫຍ່ ຫງວຽນຟູ໋ຈ້ອງ ແລະ ທ່່ານ ນາຍົກລັດຖະມົນຕີຍີ່ປຸ່ນ Shinzo Abe ໄດ້ແລກປ່ຽນຄວາມເຫັນຢ່າງກົງໄປກົງມາກ່ຽວກັບຫຼາຍຂົງເຂດຄື: ການເມືອງ, ຄວາມສະຫງົບປອດໄພ, ເສດຖະກິດ ແລະ ການຮ່ວມມືພັດທະນາ, ການສົມທົບກັນຢູ່ເວທີປາໄສພາກພື້ນ ແລະ ສາກົນ. ທ່ານເອກອັກຄະລັດຖະທູດຍີ່ປຸ່ນ ປະຈຳຫວຽດນາມ Fukada Hiroshi, ຢືນຢັນວ່າ:
“ສອງປະເທດໄດ້ພ້ອມກັນຮ່ວມມື ແລະ ເສີມຂະຫຍາຍບົດບາດຂອງຕົນຢ່າງຕັ້ງໜ້າ ເພື່ອສັນຕິພາບ, ຄວາມສະຫງົບປອດໄພ ແລະ ຄວາມວັດທະນາຖາວອນຂອງພາກພື້ນ ແລະ ໂລກ. ຂ້າພະເຈົ້າຫວັງວ່າໃນໄລຍະຈະມາເຖິງ, ສອງປະເທດທັງພັດທະນາການພົວພັນສອງຝ່າຍ, ທັງກາຍເປັນຄູ່ຮ່ວມມືອັນດີງາມຂອງກັນ“.
ປະຫວັດສາດໄດ້ພິສູດໃຫ້ເຫັນວ່າ, ການພົວພັນທີ່ມີຄວາມຕັດສິນໃຈດ້ານການເມືອງສູງຂອງບັນດາການນຳ, ບົນພື້ນຖານການພົວພັນມິດຕະພາບລະຫວ່າງປະຊາຊົນສອງປະເທດ ຈະເປັນການພົວພັນໝັ້ນຄົງທີ່ສຸດ. ຫວຽດນາມ ແລະ ຍີ່ປຸ່ນ ຍັງມີຄວາມສາມາດບົ່ມຊ້ອນດ້ານຮ່ວມມືຫຼາຍຢ່າງ, ເຊິ່ງສາມາດເພີ່ມເຕີມ, ໜູນຊ່ວຍກັນເພື່ອພ້ອມກັນພັດທະນາໄດ້ ແລະ ສອງປະເທດພວມມານະພະຍາຍາມເພື່ອຍາດເອົາບັນດາກາລະໂອກາດໃໝ່.