(vovworld)- ການຢ້ຽມຢາມລາຊະອານາຈັກໄທຢ່າງເປັນທາງການຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ແມ່ນການເຄື່ອນໄຫວພົວພັນຕ່າງປະເທດທີ່ສຳຄັນຂອງຫວຽດນາມໃນປີ 2013 . ການຢ້ຽມຢາມເປັນຂີດໝາຍສຳຄັນນຳການພົວພັນລະຫວ່າງສອງປະເທດຂຶ້ນສູ່ລະດັບສູງໃຫມ່ ບົນພື້ນຖານສາຍພົວພັນມິດຕະພາບທີ່ດີງາມ, ໄວ້ເນື້ອເຊື່ອໃຈ, ເຂົ້າອົກເຂົ້າໃຈເຊິ່ງກັນ ແລະ ກັນ ລະຫວ່າງຫວຽດນາມ ແລະ ໄທ.
ທ່ານເລຂາທິການໃຫຍ່ ຫງວຽນຟູຈ້ອງ
ພາບ:internet
|
ໄທ ແລະ ຫວຽດນາມ ແມ່ນສອງປະເທດບ້ານໃກ້ເຮືອນຄຽງຢູ່ພາກພື້ນອາຊີ ຕາເວັນອອກສຽງໃຕ້ ມີຫລາຍຈຸດທີ່ຄ້າຍຄືກັນກ່ຽວກັບວັດທະນະທຳ, ແບບແຜນການດຳລົງຊີວິດ, ຈີນຕະນາການ. ພ້ອມກັນເປັນສະມາຊິກຂອງອາຊຽນ, ສອງປະເທດພວມມານະພະຍາຍາມຮ່ວມມືເພື່ອສ້າງພາກພື້ນອາຊຽນແຫ່ງສັນຕິພາບ, ສະຖຽນລະພາບ ແລະ ວັດທະນາຖາວອນ. ນີ້ແມ່ນພື້ນຖານສຳຄັນເພື່ອເພີ່ມທະວີ ແລະ ຊຸກຍູ້ການພົວພັນຮອບດ້ານລະຫວ່າງສອງປະເທດໃຫ້ແຂງແຮງກວ່າ, ມຸ່ງໄປເຖິງອະນາຄົດອັນສົດໃສໃຫ້ແກ່ແຕ່ລະປະເທດກໍຄືຜົນປະໂຫຍດຂອງພາກພື້ນ.
ນັບແຕ່ເມື່ອຫວຽດນາມ ແລະ ໄທ ສ້າງຕັ້ງສາຍພົວພັນທາງການທູດເມື່ອ ປີ 1976, ໃນ 37 ປີຜ່ານມາ, ການພົວພັນລະຫວ່າງສອງປະເທດໄດ້ຮັບການປັບປຸງຢ່າງບໍ່ຢຸດຢັ້ງ ແລະ ພັດທະນາໃນທຸກຂົງເຂດ. ການພົວພັນດ້ານການເມືອງໄດ້ຮັບການເພີ່ມທະວີ ຜ່ານບັນດາການຢ້ຽມຢາມເຊິ່ງກັນ ແລະ ກັນຂອງການນຳຂັ້ນສູງສອງປະເທດ. ທ່ານນາງນາຍົກລັດຖະມົນຕີໄທ ຍີ່ງຣັກ ສິນນະວັດ ໄດ້ມາຢ້ຽມຢາມຫວຽດນາມ ເປັນສອງຄັ້ງ ຄືເມື່ອເດືອນ 11/2011 ແລະ ເດືອນ 10/2012. ທ່ານປະທານສະພາແຫ່ງຊາດ ຫວຽດນາມ ຫງວຽນຊີງຮຸ່ງ ໄປຢ້ຽມຢາມໄທເມື່ອເດືອນ 12/2012. ໃນປີ 2011, ສອງປະເທດກໍ່ໄດ້ຈັດຕັ້ງການເຄື່ອນໄຫວຫລາຍຢ່າງເພື່ອສະເຫລີມສະຫລອງ 35 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດ(6/8/1976). ເດືອນ 10/2012, ສອງປະເທດສືບຕໍ່ຈັດກອງປະຊຸມຄະນະລັດຖະບານຮ່ວມຄັ້ງທີ 2 ຢູ່ ຮ່າໂນ້ຍ. ອາດຈະເວົ້າໄດ້ວ່າ ຂົງເຂດສຳເລັດຜົນທີ່ສຸດໃນການພົວພັນລະຫວ່າງສອງປະເທດແມ່ນການລົງທຶນການຄ້າ. ການພົວພັນດ້ານເສດຖະກິດ ການຄ້າລະຫວ່າງຫວຽດນາມ ແລະ ໄທ ນັບມື້ນັບໄດ້ຮັບການເປີດກວ້າງ, ເປັນຕົ້ນໃນບັນດາຂົງເຂດຄື: ການຮ່ວມມືຜະລິດ ແລະ ສົ່ງອອກເຂົ້າສານ, ການເງິນ, ຂົນສົ່ງ, ນ້ຳມັນອາຍແກສ… ປະຈຸບັນ ໄທແມ່ນປະເທດລົງທຶນ ໃຫຍ່ອັນດັບ 10 ໃນຍອດຈຳນວນບັນດາປະເທດລົງທຶນເຂົ້າຫວຽດນາມ ດ້ວຍ 300 ໂຄງການ ລວມມູນຄ່າກວ່າ 6 ຕື້ USD.ໃນຂະນະນັ້ນ ປະຈຸບັນ ຫວຽດນາມ ແມ່ນຄູ່ຮ່ວມມືດ້ານການຄ້າໃຫຍ່ອັນດັບ 2 ຂອງໄທ ໃນພາກພື້ນ ອາຊຽນ ແລະ ແມ່ນຄູ່ຮ່ວມມືດ້ານການຄ້າໃຫຍ່ອັນດັບ 9 ຂອງໄທຢູ່ໃນໂລກ. ປີ 2012, ວົງເງິນການຄ້າສອງສົ້ນລະຫວ່າງສອງປະເທດບັນລຸປະມານ 9 ຕື້ USD. ທີ່ກອງປະຊຸມຄັ້ງປະຖົມມະເລີກຂອງຄະນະກຳມະການປະສົມ ການຄ້າ ຫວຽດນາມ - ໄທ, ສອງຝ່າຍໄດ້ເຫັນດີສູ້ຊົນເພີ່ມວົງເງິນແລກປ່ຽນການຄ້າຕື່ມອີກ 20% ໃນແຕ່ລະປີ, ວາງຄາດໝາຍນຳວົງເງິນການຄ້າສອງຝ່າຍໃຫ້ຂຶ້ນເຖິງ ກວ່າ 15 ຕື້ USD ໃນປີ 2020. ສອງຝ່າຍສືບຕໍ່ຮັກສາກົນໄກຮ່ວມມືສົ່ງອອກເຂົ້າສານ, ຊຸກຍູ້ການຮ່ວມສຳພັນດ້ານເສດຖະກິດ, ການຮ່ວມມືຂຸດຄົ້ນແລວເສດຖະກິດຕາເວັນອອກ -ຕາເວັນຕົກ. ໄທຖືເປັນສຳຄັນ ແລະ ປາດຖະຫນາຢາກຊຸກຍູ້ການພົວພັນຮ່ວມມືກັບຫວຽດນາມ ໃນຂອບເຂດຮ່ວມມືພາກພື້ນ ແລະ ເວທີປາໄສສາກົນຄື: ອາຊຽນ, ການຮ່ວມມືເສດຖະກິດເຂດລຸ່ມແມ່ນ້ຳຂອງເປີດກວ້າງ (GMS), ກອງປະຊຸມສຸດຍອດຍຸດທະສາດຮ່ວມມືເສດຖະກິດ 3 ລຳແມ່ນ້ຳ Ayeyawadi - ເຈົ້າພະຢາ, ແມ່ຂອງ (ACMECS), ເວທີປາໄສການຮ່ວມມືເສດຖະກິດ ອາຊີ ປາຊີຟີກ(APEC) …
ການຮ່ວມມືສອງຝ່າຍໃນບັນດາຂົງເຂດຄື: ການປ້ອງກັນຊາດປ້ອງກັນຄວາມສະຫງົບ, ການສຶກສາ, ວັດທະນະທຳ, ກິລາ ແລະ ທ່ອງທ່ຽວ ພວມມີບາດກ້າວພັດທະນາຢ່າງຕັ້ງຫນ້າ. ໄທ ຫນູນຊ່ວຍເພີ່ມທະວີກຳລັງຄວາມສາມາດບຳລຸງສ້າງ ແລະ ສອນພາສາໄທ ຢູ່ມະຫາວິທະຍາໄລຂອງຫວຽດນາມຈຳນວນຫນຶ່ງ; ຫນູນຊ່ວຍປະຕິບັດການບຳລຸງສ້າງໃຫ້ແກ່ພະນັກງານຫວຽດນາມໄລຍະສັ້ນກ່ຽວກັບບັນດາເນື້ອໃນຈຸດສຸມຂອງໂຄງການຮ່ວມມືລະຫວ່າງສອງປະເທດ. ໄທສະຫນັບສະຫນູນແຜນຮ່າງສ້າງຕັ້ງສູນພາສາສາດ ແລະ ສຶກສາຫວຽດນາມ ຢູ່ໄທ ແລະ ສະເຫນີສ້າງຕັ້ງສູນຄົ້ນຄ້ວາກ່ຽວກັບໄທຢູ່ບັນດາມະຫາວິທະຍາໄລຂອງຫວຽດນາມ. ໄທ ໄດ້ສ້າງເງື່ອນໄຂແກ່ການກໍ່ສ້າງເຂດອະນຸສອນສະຖານປະທານໂຮ່ຈິມີນ ຢູ່ແຂວງ ອຸດອນ ທະນີ ແລະ ນະຄອນ ພະນົມ ຊື່ງແມ່ນສະຖານທີ່ເຊີ່ງກ່ອນນີ້ປະທານໂຮ່ຈິມີນ ໄດ້ດຳລົງຊີວິດ ແລະ ເຄື່ອນໄຫວປະຕິວັດໃນໄລຍະທາງແຫ່ງການຊອກຫາເສັ້ນທາງກູ້ຊາດ.
ໃນສະພາບຄືແນວນັ້ນ, ການຢ້ຽມຢາມລາຊະອານາຈັກໄທຢ່າງເປັນທາງການຂອງທ່ານເລຂາທິການໃຫຍ່ ຫງວຽນຟູຈ້ອງ ເພື່ອແນໃສ່ສືບຕໍ່ຜັນຂະຫຍາຍການເຄື່ອນໄຫວພົວພັນຕ່າງປະເທດຢ່າງຄົບຊຸດ ແລະ ຮອບດ້ານ; ເປັນເຈົ້າການ, ຕັ້ງຫນ້າເຊື່ອມໂຍງເຂົ້າກັບສາກົນ, ຢືນຢັນນະໂຍບາຍຖືການເພີ່ມທະວີການພົວພັນກັບບັນດາປະເທດໃນພາກພື້ນເປັນສຳຄັນ ແລະ ໃຫ້ບຸລິມະສິດສູງ; ຢັ້ງຢືນ: ຫວຽດນາມ ແມ່ນປະເທດສະມາຊິກມີຄວາມຮັບຜິດຊອບ, ຕັ້ງຫນ້າ, ພ້ອມແລ້ວທີ່ຈະພ້ອມກັບ ໄທ ແລະ ບັນດາປະເທດອາຊຽນ ມານະພະຍາຍາມສ້າງປະຊາຄົມ ອາຊຽນສາມັກຄີ, ສະຫນິດຕິດພັນ, ເຂັ້ມແຂງ ເພື່ອພາກພື້ນອາຊີຕາເວັນອອກສຽງໃຕ້ແຫ່ງສັນຕິພາບ, ມິດຕະພາບ, ຮ່ວມມື ແລະ ພັດທະນາ. ໃນການຢ້ຽມຢາມໄທຄັ້ງນີ້, ທ່ານເລຂາທິການໃຫຍ່ ມີການເຈລະຈາ, ພົບປະແລກປ່ຽນຄຳເຫັນກັບບັນດາການນຳໄທ, ແລກປ່ຽນບັນດາມາດຕະການຊຸກຍູ້ການພົວພັນສອງຝ່າຍກໍຄືແບ່ງປັນທັດສະນະກ່ຽວກັບບັນດາບັນຫາພາກພື້ນ ແລະ ສາກົນ. ຄາດວ່າ ສອງຝ່າຍຈະອອກຖະແຫລງການຮ່ວມຢ່າງເປັນທາງການກ່ຽວກັບການສ້າງການພົວພັນຄູ່ຮ່ວມມືຍຸດທະສາດ ຫວຽດນາມ - ໄທ. ທ່ານເລຂາທິການໃຫຍ່ ຫງວຽນຟູຈ້ອງ ຈະພົບປະກັບການນຳພັກການເມືອງຈຳນວນຫນຶ່ງຂອງໄທ, ປະກອບສ່ວນເປີດກວ້າງ ແລະ ປັບປຸງການພົວພັນລະຫວ່າງພັກກອມມູນິດຫວຽດນາມ ກັບບັນດາພັກດັ່ງກ່າວ, ສ້າງພື້ນຖານດ້ານການເມືອງອັນຫນັກແຫນ້ນໃຫ້ແກ່ການພົວພັນລະຫວ່າງສອງປະເທດ.