(vovworld)- ປະທານາທິບໍດີ ມຽນມາ Htin Kyaw ແລະ ພັນລະຍາ ພວມຢ້ຽມຢາມທາງລັດຖະກິດຫວຽດນາມ ແຕ່ວັນທີ 26/28/10/2016 ຕາມຄຳເຊີນຂອງທ່ານປະທານປະເທດຫວຽດນາມ ເຈີນດ້າຍກວາງ. ການຢ້ຽມຢາມແມ່ນເຫດການການເມືອງສຳຄັນລະຫວ່າງສອງປະເທດ.
ກອງປະຊຸມຄັ້ງທີ 8 ຄະນະກຳມະການປະສົມຫວຽດນາມ -ມຽນມາ
(ປີ 2015)
(TTXVN)
|
ນີ້ແມ່ນການຢ້ຽມຢາມຫວຽດນາມ ເປັນຄັ້ງທຳອິດຂອງປະທານາທິບໍດີ ມຽນມາ Htin Kyaw ນັບແຕ່ເມື່ອທ່ານຮັບດຳລົງຕຳແຫນ່ງໃນວັນທີ 30/3/2016 ໄດ້ຮັບການປະຕິບັດພາຍຫລັງປະທານາທິບໍດີ ເຂົ້າຮ່ວມບັນດາກອງປະຊຸມສຸດຍອດ ກຳປູເຈຍ - ລາວ - ມຽນມາ - ຫວຽດນາມ ຄັ້ງທີ 8 (CLMV 8) ແລະ ຍຸດທະສາດການຮ່ວມມືເສດຖະກິດ Ayeyawady – ເຈົ້າພະຍາ ແລະ ແມ່ຂອງ (ACMECS 7) ແລະ ກອງປະຊຸມເວທີປາໄສເສດຖະກິດໂລກ ກ່ຽວກັບແມ່ຂອງ ໂດຍຫວຽດນາມ ຈັດຕັ້ງ. ການຢ້ຽມຢາມຄັ້ງນີ້ ເປັນການຢັ້ງຢືນວ່າ ການນຳສອງປະເທດລ້ວນແຕ່ຖືເປັນສຳຄັນ ແລະ ເອົາໃຈໃສ່ເຖິງການຊຸກຍູ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານລະຫວ່າງຫວຽດນາມ ແລະ ມຽນມາ.
ຄວາມສະຫນິດຕິດພັນດ້ວຍຫລາຍຈຸດທີ່ຄ້າຍຄືກັນ
ຫວຽດນາມ ແລະ ມຽນມາ ມີການພົວພັນມາແຕ່ດົນນານ, ມີຫລາຍຈຸດທີ່ຄ້າຍຄືກັນກ່ຽວກັບດ້ານວັດທະນະທຳ ແລະ ສາສະຫນາ. ປະຈຸບັນ ທັງສອງປະເທດລ້ວນແຕ່ແມ່ນສະມາຊິກຂອງ ອາຊຽນ. ປີ 1947, ຫວຽດນາມ ຕັ້ງ ສຳນັກງານສື່ມວນຊົນ ຢູ່ Yangon, ພາຍຫລັງໄດ້ຮັບການຍົກລະດັບຂຶ້ນເປັນອົງການຜູ້ຕາງຫນ້າລັດຖະບານເມື່ອປີ 1948. ປີ 1975, ສອງປະເທດໄດ້ສ້າງຕັ້ງການພົວພັນທາງການທູດຢ່າງເປັນທາງການ. ມາຮອດປະຈຸບັນ, ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານລະຫວ່າງຫວຽດນາມ - ມຽນມາ ມີຫລາຍບາດກ້າວພັດທະນາຢ່າງແທດຈິງ, ມີປະສິດທິຜົນ ແລະ ໄດ້ຮັບຜົນງານສຳຄັນຫລາຍຢ່າງ. ສອງຝ່າຍ ໄດ້ແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນ, ມີຫລາຍກົນໄກຮ່ວມມືໄດ້ຮັບການສ້າງຂຶ້ນ ແລະ ເປັນລະບົບ, ການນຳສອງປະເທດກໍຕັ້ງຫນ້າພົບປະແລກປ່ຽນເປັນປະຈຳ. ເດືອນ 6/2013, ສອງປະເທດໄດ້ສ້າງຕັ້ງສະມາຄົມສະມາຊິກລັດຖະສະພາມິດຕະພາບ ຫວຽດນາມ - ມຽນມາ ແລະ ສະມາຄົມສະມາຊິກລັດຖະສະພາມິດຕະພາບ ມຽນມາ -ຫວຽດນາມ. ເດືອນ 8/2014, ຫວຽດນາມ ໄດ້ສ້າງຕັ້ງສະມາຄົມມິດຕະພາບ ຫວຽດນາມ -ມຽນມາ ເພື່ອເພີ່ມທະວີຄວາມເຂົ້າອົກເຂົ້າໃຈ ແລະ ການພົວພັນແລກປ່ຽນປະຊາຊົນສອງປະເທດ. ປີ 2015, ສອງຝ່າຍມີການເຄື່ອນໄຫວຫລາຍຢ່າງເພື່ອສະເຫລີມສະຫລອງ 40 ປີແຫ່ງວັນສ້າງຕັ້ງການພົວພັນທາງການທູດ; ຈັດຕັ້ງກອງປະຊຸມຄັ້ງທີ 8 ຄະນະກຳມະການປະສົມກ່ຽວກັບການຮ່ວມມືສອງຝ່າຍ ຫວຽດນາມ - ມຽນມາ.
ການຮ່ວມມືດ້ານເສດຖະກິດ ການຄ້າ ການລົງທຶນ ແມ່ນຈຸດພົ້ນເດັ່ນ
ກ່ຽວກັບການພົວພັນດ້ານເສດຖະກິດ, ການຄ້າ, ການລົງທຶນ, ຫວຽດນາມ ແລະ ມຽນມາ ໄດ້ກຳນົດ ແລະ ຮັກສາ 12 ຂົງເຂດຮ່ວມມືບຸລິມະສິດ ຊື່ງລວມມີ: ກະສິກຳ, ປູກຕົ້ນອຸດສາຫະກຳ, ສິນໃນນ້ຳ, ການເງິນ - ທະນາຄານ, ການບິນ, ໂທລະຄົມມະນາຄົມ, ນ້ຳມັນອາຍແກສ, ຂຸດຄົ້ນແຮ່ທາດ, ຜະລິດເຄື່ອງອຸປະກອນໄຟຟ້າ, ຜະລິດ ແລະ ຕິດຕັ້ງໂອໂຕ, ກໍ່ສ້າງ, ການລົງທຶນ ການຄ້າ. ໃນຊຸມປີມໍ່ໆມານີ້, ການພົວພັນຮ່ວມມືດ້ານເສດຖະກິດ ລະຫວ່າງສອງປະເທດໄດ້ພັດທະນາດີສົມຄວນ. ແຕ່ລະປີ ສອງຝ່າຍໄດ້ຈັດຕັ້ງງານຕະຫລາດນັດເປັນຫລາຍຄັ້ງຢູ່ແຕ່ລະປະເທດ ເພື່ອແນະນຳຜະລິດຕະພັນ ແລະ ດຶງດູດບັນດາວິສາຫະກິດມາລົງທຶນ. ສອງຝ່າຍຮັກສາກົນໄກປະຊຸມອະນຸກຳມະການປະສົມກ່ຽວກັບດ້ານການຄ້າ. ຫວຽດນາມ ແມ່ນຄູ່ຮ່ວມມືດ້ານການຄ້າລາຍໃຫຍ່ທີ 10 ຂອງມຽນມາ. ໄລ່ຮອດເດືອນ 7/2016, ວົງເງິນການຄ້າສອງສົ້ນບັນລຸ 299 ລ້ານ USD, ເພີ່ມຂຶ້ນ 15,9% ເມື່ອທຽບໃສ່ໄລຍະດຽວກັນຂອງປີ 2015. ປະເພດສິນຄ້າສົ່ງອອກນັບມື້ນັບມີຫລາຍຮູບຫລາຍແບບ, ຊື່ງລວມມີ ເຫລັກກ້າ, ຜະລິດຕະພັນຈາກໂລຫະ, ເຄື່ອງຈັກອຸປະກອນ ແລະ ເຄື່ອງອາໄຫລ່, ວັດສະດຸ ແລະ ຜະລິດຕະພັນຕ່ຳແຜ່ນຕັດຫຍິບ, ຜະລິດຕະພັນປະລາສະຕິກ, ເຄື່ອງເຟີນີເຈີ. ຮອດເດືອນ 5/2016, ຫວຽດນາມ ມີ 47 ໂຄງການລົງທຶນຢູ່ ມຽນມາ ດ້ວຍຍອດຈຳນວນທຶນ 557 ລ້ານ USD. ສະຫະສະມາຄົມວິສາຫະກິດຫວຽດນາມ ລົງທຶນຢູ່ ມຽນມາໄດ້ຮັບການສ້າງຕັ້ງ ແລະ ເຄື່ອນໄຫວຢ່າງມີປະສິດທິຜົນ, ຕັ້ງຫນ້າ. ມີໂຄງການຈຳນວນຫນຶ່ງມີຊື່ສຽງ ແລະ ສ້າງເປັນພາບພົດອັນດີງາມຄື: ໂຄງການກໍ່ສ້າງເຂດປະສົມ ໂຮງແຮມ, ຫ້ອງການ ແລະ ສູນການຄ້າຂອງ ກຸ່ມບໍລິສັດ ຮ່ວາງແອງຢາລາຍ ຢູ່ Yangon, ໂຄງການຮ່ວມມືຂຸດຄົ້ນນ້ຳມັນລະຫວ່າງ ບໍລິສັດໃຫຍ່ສຳຫລວດຂຸດຄົ້ນນ້ຳມັນອາຍແກສ (PVEP) ແລະ ບໍລິສັດນ້ຳມັນອາຍແກສ ມຽນມາ (MOGE), ກຸ່ມບໍລິສັດນ້ຳມັນອາຍແກສ ຫວຽດນາມ ເປີດກວ້າງການສຳຫລວດນ້ຳມັນອາຍແກສ, ກຸ່ມບໍລິສັດ Viettel ຫາກໍຊະນະການປະມູນກະກຽມການຮ່ວມທຸລະກິດກັບບໍລິສັດ Yantanarpor Teleport ຂອງ ມຽນມາ, ສ້າງຕັ້ງສາຍການບິນໂດຍກົງເຖິງ Yangon.. ວັນທີ 4/3/2016, ມຽນມາ ກໍໄດ້ອອກຫນັງສືອະນຸຍາດໃຫ້ທະນາຄານລົງທຶນ ແລະ ພັດທະນາຫວຽດນາມ ເປີດສາຂາຢູ່ ມຽນມາ.
ກຳລັງຫນູນໃຫມ່ໃຫ້ການພົວພັນສອງປະເທດ
ຫວຽດນາມ ແລະ ມຽນມາ ໄດ້ຈັດຕັ້ງການເຄື່ອນໄຫວທາງການທູດເປັນປະຈຳຢ່າງມີປະສິດທິຜົນ, ປະກອບສ່ວນປັບປຸງ ແລະ ເພີ່ມທະວີການພົວພັນຮ່ວມມືມິດຕະພາບ. ໃນບັນດາເວທີປາໄສພາກພື້ນ ແລະ ສາກົນ, ສອງປະເທດ ໄດ້ສົມທົບກັນເປັນປະຈຳ ແລະ ສະຫນັບສະຫນູນເຊິ່ງກັນ ແລະກັນ ທີ່ບັນດາເວທີປາໄສຫລາຍຝ່າຍ. ຫວຽດນາມ ໄດ້ຕັ້ງຫນ້າສະຫນັບສະຫນູນ ມຽນມາ ເຂົ້າເປັນສະມາຊິກປະຊາຄົມບັນດາປະເທດ ອາຊີຕາເວັນອອກສ່ຽງໃຕ້ (ອາຊຽນ), ເວທີປາໄສການຮ່ວມມື ອາຊີ ເອີລົບ (ASEM). ມຽນມາ ກໍສະຫນັບສະຫນູນຫວຽດນາມ ເຂົ້າຮ່ວມອົງການການຄ້າໂລກ (WTO) ແລະ ພ້ອມກັບບັນດາປະເທດ ອາຊີ ເຫັນດີ ສະຫນັບສະຫນູນຫວຽດນາມ ອອກສະຫມັກຮັບເລືອກຕັ້ງເປັນກຳມະການບໍ່ປະຈຳຂອງ ສະພາຄວາມໝັ້ນຄົງ ສປຊ. ສອງປະເທດ ຍັງສົມທົບກັນຢ່າງແຫນ້ນແຟ້ນຢູ່ເວທີປາໄສຫລາຍຝ່າຍໃນພາກພື້ນ ແລະ ສາກົນ.
ໃນການຢ້ຽມຢາມທາງລັດຖະກິດຫວຽດນາມຄັ້ງນີ້, ປະທານາທິບໍດີ ມຽນມາ Htin Kyaw ແລະ ບັນດາການນຳ ຫວຽດນາມ ຈະສຳຫລວດກວດກາຄືນບັນດາຂົງເຂດຮ່ວມມື ແລະ ແລກປ່ຽນຄຳເຫັນກ່ຽວກັບບັນດາມາດຕະການຊຸກຍູ້ບັນດາການຮ່ວມມືໃຫມ່ຊື່ງສອງຝ່າຍຕ່າງມີຄວາມສົນໃຈ, ໃນນັ້ນ ມີດ້ານການເມືອງ, ເສດຖະກິດ, ການຄ້າ, ການປ້ອງກັນຊາດປ້ອງກັນຄວາມສະຫງົບ, ການທ່ອງທ່ຽວ, ກະສິກຳ. ສອງຝ່າຍກໍແລກປ່ຽນຄຳເຫັນກ່ຽວກັບການຊຸກຍູ້ການເຊື່ອມຕໍ່ອະນຸພາກພື້ນ, ກ່ຽວກັບບັນດາບັນຫາສາກົນ ແລະ ພາກພື້ນ ຊື່ງຕ່າງຝ່າຍຕ່າງມີຄວາມສົນໃຈ. ໝາກຜົນການຢ້ຽມຢາມ ເປັນການປະກອບສ່ວນປັບປຸງການພົວພັນດ້ານການເມືອງທີ່ມີຄວາມໄວ້ເນື້ອເຊື່ອໃຈ, ຄວາມສະຫນິດຕິດພັນລະຫວ່າງການນຳຂັ້ນສູງ, ເພີ່ມກຳລັງຫນູນໃຫ້ແກ່ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານລະຫວ່າງ ຫວຽດນາມ ແລະ ມຽນມາຕື່ມອີກ.