ທ່ານປະທານາທິບໍດີ ອາເມລິກາ Barack Obama ພວມປະຕິບັດການຢ້ຽມຢາມ ກູບາຢ່າງເປັນທາງການ ແຕ່ວັນທີ 21/3. ການຢ້ຽມຢາມຂອງປະມຸກລັດ ອາເມລິກາ ເຖິງ ກູບາ ພວມເປີດຄວາມຫວັງຢຸດຕິການເປັນປໍລະປັກກັນທີ່ແກ່ຍາວມາເປັນເວລາກ່ວາເຄິ່ງສະຕະວັດ ລະຫວ່າງ 2 ຝ່າຍ, ພ້ອມທັງປະກອບສ່ວນສ້າງນະໂຍບາຍການຕ່າງປະເທດຂອງອຳນາດການປົກຄອງຊຸດໃໝ່ຂອງ ອາເມລິກາ ກັບ ປະເທດເກາະ Caribe ນີ້. ບົດຂຽນ “ຂີດໝາຍໃໝ່ໃນການພົວພັນ ອາເມລິກາ - ກູບາ” ຂອງ ແອ໋ງຮ່ວຽນ, ນັກຂ່າວ VOV.
ພາຍຫຼັງ 88 ປີນັບແຕ່ປີ 1928, ເປັນຄັ້ງທຳອິດທີ່ປະທານາທິບໍດີ ອາເມລິກາ ຄົນໜຶ່ງໄດ້ໄປ ລາຮາວານ, ໃນການຢ້ຽມຢາມ ກູບາ ຢ່າງເປັນທາງການ. ໃນການຢ້ຽມຢາມເປັນເວລາ 3 ວັນນີ້, ທ່ານ Obama ໄດ້ເຈລະຈາກັບທ່ານ Raul Castro, ປຶກສາຫາລືກັບວິສາຫະກິດ ກູບາ, ມີບົດກ່າວປາໄສຖ່າຍທອດສົດທາງໂທລະພາບ ກູບາ ແລະ ເຂົ້າຮ່ວມການແຂ່ງຂັນເບັດສະບອນ ມິດຕະພາບລະຫວ່າງທິມ Tampa Bay Rays ຂອງ ອາເມລິກາ ແລະ ທິມຊາດ ກູບາ.
ພາບປະກອບ
|
ການຢ້ຽມຢາມຄັ້ງປະຫວັດສາດ
ປະຊາຊົນ ລາຮາວານ ໄດ້ຕ້ອນຮັບເຮືອບິນພິເສດຂອງທ່ານປະທານາທິບໍດີ ອາເມລິກາ Barack Obama ດ້ວຍໃບໜ້າຍິ້ມແຍ້ມແຈ່ມໃສ, ດ້ວຍສຽງຕົບມື ແລະ ປ້າຍຄຳຂວັນຊົມເຊີຍ. ກູບາ ໄດ້ຜັນຂະຫຍາຍກຳລັງປ້ອງກັນຢ່າງໜາແໜ້ນຢູ່ນະຄອນຫຼວງ ເພື່ອປົກປັກປ້ອງກັນຄວາມສະຫງົບ ໃນຂະນະນັ້ນ, ກຳມະກອນພັດຮີບເຮັ່ງປະດັບປະດານະຄອນຫຼວງໃຫ້ສວຍງາມ. ບັນດາປ້າຍຄຳຂວັນຍິນດີຕ້ອນຮັບດ້ວຍຮູບພາບຂອງທ່ານ Raul Castro ແລະ ທ່ານ Barack Obama ຢູ່ຕາມຖະໜົນສາຍຕ່າງໆໄດ້ກາຍເປັນບ່ອນຖ່າຍຮູບເປັນທີ່ລະນຶກ, ໃຫ້ແຂກຄົນເມື່ອຜ່ານໄປ. ສຳລັບປະຊາຊົນ ກູບາ ການຢ້ຽມຢາມ ກູບາ ຄັ້ງນີ້ຂອງທ່ານປະທານາທິບໍດີ ອາເມລິກາ ເປັນການປະສານສົມທົບລະຫວ່າງຄວາມປະເອີບໃຈ ແລະ ຄວາມລະມັດລະວັງ. ຫຼາຍຄົນມີຄວາມຫວັງວ່າການປະກົດຕົວຂອງທ່ານ Obama ຈະຊ່ວຍໃຫ້ເສດຖະກິດຂອງປະເທດນີ້ຫລຸດພົ້ນອອກຈາກສະພາບຕົກຢູ່ໂດດດ່ຽວ ແລະ ໄດ້ຮັບການພັດທະນາຢ່າງແຂງແຮງກ່ວາ.
ເພື່ອກະກຽມໃຫ້ແກ່ການຢ້ຽມຢາມໃນຄັ້ງນີ້, ໃນໄລຍະຜ່ານມາ, ວໍຊິງຕັນ ແລະ ລາຮາວານ ໄດ້ມີຫຼາຍບາດກ້າວທີ່ຕັ້ງໜ້າ. ດັ່ງນັ້ນ, ການຢ້ຽມຢາມຂອງທ່ານປະທານາທິບໍດີ ອາເມລິກາ ໄດ້ຮັບຖືວ່າ ແມ່ນບາດກ້າວເພື່ອລົບລ້າງບັນດາຮົ້ວກີດຂວາງດ້ານການຄ້າ, ການພົບປະແລກປ່ຽນ ແລະ ພັດທະນາການພົວພັນເປັນປົກກະຕິ ລະຫວ່າງ 2 ປະເທດກ່ວາອີກ.
ການພົວພັນ ອາເມລິກາ - ກູບາ ພວມມີສັນຍານທີ່ດີ ນຳມາເຊິ່ງຜົນປະໂຫຍດໃຫ້ທັງ 2 ຝ່າຍ, ເໝາະສົມກັບທ່າອ່ຽງຂອງຍຸກສະໄໝ, ພ້ອມທັງຕອບສະໜອງຄວາມມຸ່ງຫວັງລໍຄອຍຂອງປະຊາຊົນ 2 ປະເທດ ກໍ່ຄືບັນດາຜູ້ທີ່ຮັກຫອມສັນຕິພາບໃນໂລກ. ໃນຕົວຈິງແລ້ວ, ບັນດາມາດຕະການລົງໂທດດ້ານເສດຖະກິດຂອງ ອາເມລິກາ ທີ່ມີຕໍ່ ກູບາ ກໍເຮັດໃຫ້ ວໍຊິງຕັນ ຖືກເສຍຫາຍຢ່າງໜັກໜ່ວງ. ຕາມຕົວເລກຂອງຫ້ອງການການຄ້າ ອາເມລິກາ ແລ້ວ, ຄຳສັ່ງຂວຳ້ບາດດ້ານເສດຖະກິດໄດ້ເຮັດໃຫ້ການຈຳໜ່າຍ ແລະ ການສົ່ງອອກຂອງ ອາເມລິກາ ຖືກເສຍຫາຍ 1,2 ຕື້USD/ປີ ແລະ ຕາມການຄິດໄລ່ຂອງ “ກອງທຶນນະໂຍບາຍກູບາ” ແລ້ວ, ລະດັບຄວາມເສຍຫາຍຂອງພື້ນຖານເສດຖະກິດ ອາເມລິກາ ແມ່ນຂຶ້ນເຖິງ 3,6 ຕື້ USD/ປີ. ນອກນັ້ນ, ຍ້ອນບັນດາມາດຕະການລົງໂທດເສດຖະກິດ, ຊາວ ອາເມລິກາບໍ່ທັນໄດ້ຮັບການຊົມໃຊ້ບັນດາຜະລິດຕະພັນທີ່ມີລັກສະນະບຸກທະລຸໃນຂະແໜງການແພດຂອງ ກູບາ. ຍ້ອນເຫດນັ້ນ, ຖ້າຫາກຄຳສັ່ງຂວ້ຳບາດຖືກຍົກເລີກ, ອາເມລິກາສາມາດໄດ້ຮັບຜົນປະໂຫຍດອັນໃຫຍ່ຫຼວງ.
ສຳລັບ ກູບາ, ການເຊື່ອມຕໍ່ສາຍພົວພັນກັບ ອາເມລກາ ແມ່ນໜຶ່ງໃນບັນດາປັດໃຈສຳຄັນ ປະກອບສ່ວນສ້າງສະພາບແວດລ້ອມຢ່າງປອດໄສໃຫ້ແກ່ການພັດທະນາເສດຖະກິດ - ສັງຄົມຂອງປະເທດ. ພາຍຫຼັງການປະຕິວັດ ກູບາຍາດໄດ້ໄຊຊະນະ ແລະ ກໍ່ສ້າງອຳນາດການປົກຄອງສັງຄົມນິຍົມເມື່ອປີ 1959, ອາເມລິກາໄດ້ກໍ່ຄວາມດັນນັບທັງຂົງເຂດການເມືອງ ແລະ ເສດຖະກິດສຳລັບ ກູບາຢ່າງຕໍ່ເນື່ອງ. ສິ່ງດັ່ງກ່າວເຮັດໃຫ້ ກູບາ, ເຖິງວ່າມີທີ່ຕັ້ງພູມສາດຍຸດທະສາດ ແລະ ຊັບພະຍາກອນທຳມະຊາດອຸດົມສົມບູນກໍ່ຕາມ, ແຕ່ບໍ່ສາມາດເສີມຂະຫຍາຍທ່າໄດ້ປຽບນີ້ໄດ້. ເລື່ອງປັບປຸງສາຍພົວພັນກັບ ອາເມລິກາ ຈະຊ່ວຍຊຸກຍູ້ການປະຕິຮູບພາຍໃນປະເທດ ກູບາ. ວິວັດຫັນເປັນຮູບແບບພື້ນຖານເສດຖະກິດພວມດຳເນີນໄປຢູ່ ກູບາ ຈຳເປັນຕ້ອງໄດ້ຮັບການໜູນຊ່ວຍນັບທັງແຫຼ່ງທຶນ, ເຕັກໂນໂລຢີ ແລະ ພະລັງງານຈາກພາຍນອກ.
ຍັງຄົງຄ້າງບັນດາຄວາມແຕກຕ່າງກັນ
ເຖິງວ່າໄດ້ມີບັນດາບາດກ້າວປັບປຸງການພົວພັນໃນໄລຍະຜ່ານມາຢ່າງບໍ່ຢຸດຢັ້ງກໍ່ຕາມ, ແຕ່ ກູບາ ແລະ ອາເມລິກາ ຍັງຄົງສົນໃຈເຖິງບັນດາຄວາມແຕກຕ່າງກັນທີ່ຍັງຄົງຄ້າງລະຫວ່າງສອງປະເທດຢູ່. ດ້ວຍທັດສະນະຢ່າງຕັ້ງໜ້າໃນການພົວພັນກັບ ກູບາ ກໍ່ຕາມ, ແຕ່ປະທານາທິບໍດີ Barack Obama ຍັງຄົງຖະແຫຼງຢ່າງເປີດເຜີຍວ່າ, ນະໂຍບາຍໃໝ່ຂອງທ່ານທີ່ມີຕໍ່ປະເທດ ກູບາ ບໍ່ແມ່ນການປ່ຽນແປງກ່ຽວກັບຈຸດປະສົງ ຫາກພຽງແຕ່ແມ່ນການປ່ຽນແປງວິທີການດຳເນີນເທົ່ານັ້ນ. ສ່ວນລັດຖະບານ ກູບາ ພັດເນັ້ນໜັກວ່າບໍ່ປະລະອຸດົມຄະຕິ ຫຼື ຫຼັກການປະຕິວັດໃດໆ ເຊິ່ງ ກູບາໄດ້ສະຫຼະຢ່າງຫຼວງຫຼາຍ ເພື່ອກໍ່ສ້າງ ແລະ ຮັກສາໄວ້ຢ່າງໝັ້ນຄົງ. ກ່ອນທີ່ ປະທານາທິບໍດີ Barack Obama ມາຢ້ຽມຢາມ ກູບາ. ໜັງສືພິມລາຍວັນ “Granma“ ອົງການກະບອກສຽງຂອງພັກກອມມູນິດ ກູບາ, ໄດ້ລົງພິມບົດໂດຍຢືນຢັນວ່າ, ລາຮາວານ ພ້ອມແລ້ວທີ່ຈະຊຸກຍູ້ການພົວພັນສອງຝ່າຍກັບ ວໍຊິງຕັນ ແລະ ສືບຕໍ່ເດັດດ່ຽວຕາມເສັ້ນທາງສັງຄົມນິຍົມຂອງຕົນ. ກູບາຢືນຢັນຫຼັກໝັ້ນຢ່າງຈະແຈ້ງຂອງຕົນວ່າ ເພື່ອສ້າງການພົວພັນເປັນ ປົກກະຕິ. ວໍຊິງຕັນ ຕ້ອງຍົກເລີກຄຳສັ່ງປິດລ້ອມ, ຂວ້ຳບາດດ້ານເສດຖະກິດ, ການເງິນ, ການຄ້າຕ້ານ ລາຮາວານ, ກໍ່ຄືມອບຄືນອ່າວ Guantanamo, ເຊິ່ງແມ່ນຜືນແຜ່ນດິນທີ່ ອາເມລິກາໄດ້ຢືດຄອງຢ່າງຜິດກົດໝາຍເພື່ອສ້າງເປັນຖານທີ່ໝັ້ນການທະຫານ.
ຍ້ອນເຫດນັ້ນ, ເມື່ອຕີລາຄາການຢ້ຽມຢາມ ກູບາຂອງ ປະທານາທິບໍດີ Barack Obama, ນັກໄຈ້ແຍກຫຼາຍທ່ານຖືວ່າ, ໃນໄລຍະກາງ, ເຫດການນີ້ຈະສ້າງນະໂຍບາຍທີ່ຂະຫຍັນຂັນແຂງກວ່າສຳລັບ ກູບາເວົ້າສະເພາະ ແລະ ພາກພື້ນ ອາເມລີກາລາຕີນເວົ້າລວມ. ທັງສອງຝ່າຍຍັງຕ້ອງການເວລາຫຼາຍກວ່າອີກ ເພື່ອລົບລ້າງຄວາມແຕກຕ່າງກັນ. ບໍ່ຮູ້ວ່າອຳນາດການປົກຄອງ ອາເມລິກາຕໍ່ໄປຈະສືບຕໍ່ປະຕິບັດບັນດາການປ່ຽນແປງໃນແນວທາງການຕ່າງປະເທດຂອງອຳນາດການປົກຄອງ Obama ສຳລັບກູບາ ແລະ ພາກພື້ນ ອາເມລິກາລາຕີນ ໄດ້ຫຼືບໍ, ສິ່ງດັ່ງກ່າວແມ່ນອີງໃສ່ພັກທີ່ຂຶ້ນກຳອຳນາດໃນອາຍຸການຈະມາເຖິງ.