ທ່ານລັດຖະມົນຕີວ່າການຕ່າງປະເທດ ລັດເຊບ Sergei Lavrov
ແລະ ຄູ່ຕຳແໜ່ງ John Kerry (ພາບ: Reuters)
(vovworld) - ພາຍຫຼັງຄວາມມານະພະຍາຍາມຫຼາຍຢ່າງ, ວັນທີ 22/2, ອາເມລິກາ ແລະ ລັດເຊຍໄດ້ປະກາດຂໍ້ຕົກລົງຢຸດຍິງຢູ່ ຊີຣີ ແລະ ຂໍ້ຕົກລົງນີ້ເລີ່ມມີຜົນສັກສິດນັບແຕ່ວັນທີ 27/2 ຈະມາເຖິງ. ຫາງສຽງສາກົນໄດ້ເອີ້ນຂໍ້ຕົກລົງຢຸດຍິງນີ້ແມ່ນ “ສັນຍານແຫ່ງຄວາມຫວັງ”ໃໝ່, ເປີດຊ່ອງທາງໃຫ້ວິວັດທະນາການມອບໂອນດ້ານການເມືອງ, ສ້າງຕັ້ງລັດຖະບານໜຶ່ງເພື່ອຕອບສະໜອງຄວາມມຸ້ງມາດປາຖະໜາຂອງຊາວ ຊີຣີ.
ຕາມຂໍ້ຕົກລົງດັ່ງກ່າວແລ້ວ, ການຢຸດຍິງເລີ່ມດຳເນີນແຕ່ເວລາ 00ໂມງ (ເວລາ Damascus); ວັນທີ 27/2/2016, ເຖິງຢ່າງໃດກໍ່ຕາມ, ບັນດາການເຄື່ອນໄຫວດ້ານການທະຫານອື່ນໆເຊັ່ນ: ການບຸກໂຈມຕີທາງອາກາດຂອງ ຊີຣີ, ລັດເຊຍ ແລະ ພັນທະມິດໂດຍອາເມລິການຳໜ້າ ເພື່ອຕ້ານອົງການແຫ່ງລັດ ອິດສະລາມ (IS), al-Nusra Front ແລະ ບັນດາກຸ່ມກໍ່ການຮ້າຍ, ໂດຍສະຫະປະຊາຊາດບົ່ງຕົວ ແມ່ນຍັງຄົງໄດ້ຮັບການດຳເນີນຢູ່. ຕາມຂໍ້ຕົກລົງແລ້ວ, ມົດສະກູ, ວໍຊິງຕັນ ກໍ່ຈະສ້າງຕັ້ງໂທລະສັບສາຍດ່ວນ ເພື່ອແລກປ່ຽນຂໍ້ມູນຂ່າວກ່ຽວກັບ ຊີຣີ. ບັນດາຝ່າຍເຂົ້າຮ່ວມສົງຄາມຢູ່ ຊີຣີ ຕ້ອງຍົກອອກທັດສະນະເຫັນດີ ຫຼືບໍ່ເຫັນດີຕໍ່ຂໍ້ຕົກລົງລະຫວ່າງລັດເຊຍ ແລະ ອາເມລິກາ, ໂດຍຊ້າສຸດແມ່ນໃນວັນທີ 26/2.
ມີຫຼາຍກາລະໂອກາດສັນຕິພາບໃຫ້ຊີຣີຖືກພາດໂອກາດ
ຂໍ້ຕົກລົງຢຸດຍິງຖືກຍົກອອກມາ ພາຍຫຼັງພວກເຂົ້າຮ່ວມສົງຄາມເພື່ອສາສະໜາວາງລະເບີດຢູ່ເຂດມໍ່ກັບ Damacus ໜຶ່ງວັນ, ເຮັດໃຫ້ 134 ຄົນ, ສ່ວນຫຼາຍແມ່ນສາມັນຊົນເສຍຊີວິດ. ໃນ 5 ປີຜ່ານມາ, ສະພາບການຢູ່ປະເທດນີ້ຍາມໃດກໍ່ສັບສົນທີ່ສຸດ, ດ້ວຍການວາງລະເບີດເກີດຂຶ້ນປະຈຳວັນ.
ໄລຍະຜ່ານມາ, ເຖິງວ່າປະຊາຄົມສາກົນ ໄດ້ມີຄວາມມານະພະຍາຍາມຫຼາຍຢ່າງເພື່ອອອກຄຳສັ່ງຢຸດຍິງຢູ່ ຊີຣີແລ້ວກໍ່ຕາມ, ແຕ່ບັນດາຄວາມມານະພະຍາຍາມນີ້ລ້ວນແຕ່ຖືກປະລາໄຊ. ຫວ່າງແລ້ວນີ້ແມ່ນຂໍ້ຕົກລົງທີ່ບັນລຸໄດ້ລະຫວ່າງ 17 ປະເທດໃນກຸ່ມສາກົນທີ່ສະໜັບສະໜູນ ຊີຣີ, ໃນນັ້ນມີອາເມລິກາ ແລະ ລັດເຊຍ. ມີຫຼາຍສາຍເຫດທີ່ພາໃຫ້ຂໍ້ຕົກລົງນີ້ບໍ່ໄດ້ຮັບການປະຕິບັດ. ບັນດາກຸ່ມລຸກຮຶ້ຂຶ້ນຢູ່ ຊີຣີຍາມໃດກໍ່ສົງໄສຕໍ່ຂໍ້ຕົກລົງຕ່າງໆ. ໃນຂະນະທີ່ກຳລັງທັບເສລີ ຊີຣີ, ເຊິ່ງແມ່ນກຳລັງຕ້ານລັດຖະບານ ແລະ ປະຈຸບັນພວມໄດ້ຮັບການໜູນຫຼັງຈາກຝ່າຍຕາເວັນຕົກ, ຍົກສາຍເຫດບັນດາການບຸກໂຈມຕີທາງອາກາດຕ້ານ IS ຂອງລັດເຊຍຢູ່ ຊີຣີຍັງຄົງສືບຕໍ່ນັ້ນ, ບັນດາກຸ່ມອື່ນໆພັດຢືນຢັນພຽງແຕ່ຢຸດຕິການປະທະກັນເມື່ອປະທານາທິບໍດີ ຊີຣີ Bashar al- Assad ປະລະສິດອຳນາດຂອງຕົນເທົ່ານັ້ນ.
ໃນຂະນະນັ້ນ, ປະທານາທິບໍດີ Bashar al- Assad, ດ້ານໜຶ່ງໄດ້ອອກສຽງສະໜັບສະໜູນການເຈລະຈາໂດຍສັນຕິວິທີ ກໍ່ຄືບັນດາມາດຕະການດ້ານການເມືອງໃຫ້ແກ່ວິກິດການຢູ່ ຊີຣີ, ແຕ່ດ້ານໜຶ່ງພັກໃຫ້ຄຳໝັ້ນສັນຍາຍາດເອົາສິດຄວບຄຸມປະເທດ ແລະ ຜືນແຜ່ນດິນອັນຄົບຖ້ວນຂອງ ຊີຣີ, ເຊິ່ງແມ່ນຄາດໝາຍທີ່ອຳນາດການປົກຄອງ Damacus ຍາມໃດກໍ່ມຸ້ງໄປເຖິງ. ດັ່ງນັ້ນການປະຕິບັດຂໍ້ຕົກລົງຢຸດຍິງໃຫ້ແກ່ ຊີຣີ ບໍ່ແມ່ນເລື່ອງງ່າຍດາຍ. ຊ້ຳບໍ່ໜຳ, ລະຫວ່າງປະເທດຕ່າງໆຍັງຄົງມີບັນດາຄວາມບໍ່ລົງລອຍກັນທີ່ຍັງບໍ່ທັນໄດ້ຮັບການແກ້ໄຂເທື່ອ. ອາເມລິກາ ແລະ ບັນດາພັນທະມິດເອີລົບ ຍັງຄົງຮັກສາແນວຄິດຕາຍຕົວກ່ຽວກັບການບຸກໂຈມຕີທາງອາກາດຂອງ ລັດເຊຍຢູ່ ຊີຣີ ກໍ່ຄືອະນາຄົດຂອງ ປະທານາທິບໍດີ Bashar al- Assad.
ບັນຫາຫຍຸ້ງຍາກທີ່ຈະຕ້ອງແກ້ໄຂ
ປະຈຸບັນ, ຍັງບໍ່ທັນມີປະຕິກິລິຍາໃດໆກ່ຽວກັບຂໍ້ຕົກລົງຢຸດຍິງທີ່ຫາກໍ່ໄດ້ຮັບການປະກາດຈາກຝ່າຍ Damacus ເທື່ອ, ນອກຈາກເລື່ອງ ປະທານາທິບໍດີ Bashar al- Assad ຖະແຫຼງການເລືອກຕັ້ງສະພາແຫ່ງຊາດຂອງປະເທດນີ້ຈະດຳເນີນໃນວັນທີ 13/4 ຈະມາເຖິງເທົ່ານັ້ນ. ບັນດາກຸ່ມຝ່າຍຄ້ານຕົ້ນຕໍຢູ່ ຊີຣີໃຫ້ຮູ້ວ່າ, ເຂົາເຈົ້າ “ເຫັນດີມີປະຕິກິລິຍາຢ່າງຕັ້ງໜ້າຕໍ່ບັນດາຄວາມມານະພະຍາຍາມສາກົນ ເພື່ອແນໃສ່ບັນລຸຂໍ້ຕົກລົງຢຸດຍິງໃຫ້ໄດ້“. ໃນຂະນະນັ້ນ, ອາເມລິກາ ແລະ ລັດເຊຍພັດມີການເຄື່ອນໄຫວດ້ານການທູດຢ່າງຕັ້ງໜ້າ ເພື່ອຊອກຫາຂໍ້ຕົກລົງຢຸດຍິງຢ່າງແທ້ຈິງໃຫ້ແກ່ ຊີຣີ. ອາເມລິກາ ແລະ ລັດເຊຍພວມຍົກບັນດາມາດຕາໃນຂໍ້ຕົກລົງຢຸດຍິງມາປຶກສາຫາລືກັບບັນດາປະເທດທີ່ກ່ຽວຂ້ອງເຖິງເສິກກາງເມືອງຢູ່ ຊີຣີ. ຕາມນັ້ນແລ້ວ, ລັດເຊຍປຶກສາຫາລືຂໍ້ຕົກລົງນີ້ກັບລັດຖະບານ ຊີຣີ ແລະ ອີຣານ, ສ່ວນ ອາເມລິກາປຶກສາຫາລືກັບຝ່າຍຄ້ານ ແລະ ບັນດາປະເທດໃນກຸ່ມສາກົນທີ່ກະທຳເພື່ອ ຊີຣີ. ຫຼັງຈາກນັ້ນ, ສອງຝ່າຍຈະເຫັນດີເປັນເອກະສັນລາຍລະອຽດສຸດທ້າຍຂອງຂໍ້ຕົກລົງ ກ່ອນທີ່ຈະປະຕິບັດ.
ເຖິງວ່າມີຄວາມປະເອີບໃຈວ່າ ຂໍ້ຕົກລົງຢຸດຍິງຊົ່ວຄາວນີ້ຈະໄດ້ຮັບການປະຕິບັດຢ່າງເຂັ້ມງວດຈາກຝ່າຍຕ່າງໆແລ້ວກໍ່ຕາມ, ແຕ່ ອາເມລິກາຍັງຮັກສາທັດສະນະວ່າ, ຈະບໍ່ມີມາດຕະການດ້ານການເມືອງໃດໆເພື່ອແກ້ໄຂສະພາບເສິກກາງເມືອງຢູ່ ຊີຣີຢ່າງມີປະສິດທິຜົນ, ຖ້າຫາກວ່າທ່ານ Bashar al- Assad ຍັງຄົງຕົກລົງຮັບດຳລົງຕຳແໜ່ງເປັນປະທານາທິບໍດີ. ຍັງມີສິ່ງກີດຂວາງໜຶ່ງອີກຕໍ່ການປະຕິບັດຂໍ້ຕົກລົງຢຸດຍິງ, ນັ້ນແມ່ນເຮັດແນວໃດເພື່ອບັນລຸຄວາມເຫັນດີເປັນເອກະພາບລະຫວ່າງອາເມລິກາ ແລະ ລັດເຊຍ ກ່ຽວກັບກຸ່ມໃດຢູ່ ຊີຣີ ຖືກຖືວ່າ “ກໍ່ການຮ້າຍ“. ນັບແຕ່ດົນນານມາແລ້ວ, ບັນດາເຈົ້າໜ້າທີ່ ອາເມລິກາ ກ່າວປະນາມວ່າ 70% ຈຳນວນການບຸກໂຈມຕີທາງອາກາດຂອງລັດເຊຍ ແມ່ນເລັ່ງໃສ່ກຸ່ມລຸກຮຶ້ຂຶ້ນ, ເຊິ່ງໃນຈຳນວນດັ່ງກ່າວມີພາກສ່ວນໜຶ່ງແມ່ນໄດ້ຮັບການໜູນຫຼັງຈາກອາເມລິກາ. ແຕ່ລັດເຊຍພັດປະຕິເສດ ແລະ ຖືວ່າ ການບຸກໂຈມຕີທັງໝົດຂອງເຂົາເຈົ້າແມ່ນເລັ່ງໃສ່ພວກກໍ່ການຮ້າຍ.
ຍ້ອນເຫດນັ້ນ, ເລື່ອງຊອກຫາມາດຕະການດ້ານການເມືອງຢູ່ ຊີຣີ ຍັງຄົງແມ່ນບັນຫາແກ້ໄຂຍາກໃນປະຈຸບັນ. ການວາງລະເບີດຢ່າງນອງເລືອດຄັ້ງຕ່າງໆຫາກໍ່ເກີດຂຶ້ນຢູ່ ຊີຣີ ເປັນການກ່າວເຕືອນໃຫ້ທຸກຝ່າຍທີ່ເຂົ້າຮ່ວມເສິກກາງເມືອງຢູ່ ຊີຣີວ່າ, ຮອດເວລາແລ້ວທີ່ຕ້ອງສ້າງຕັ້ງສັນຕິພາບຢ່າງແທ້ຈິງຢູ່ ຊີຣີ “ບໍ່ຮູ້ວ່າຂໍ້ຕົກລົງຢຸດຍິງທີ່ຫາກໍ່ບັນລຸໄດ້ຈະນຳມາເຊິ່ງສັນຕິພາບໃຫ້ ຊີຣີ ຫຼືບໍ່?“ ນັ້ນແມ່ນສິ່ງທີ່ຫາງສຽງພວມສົນໃຈ.