ດ້ວຍໄຊຊະນະຂອງການບຸກໂຈມຕີຂະໜາດໃຫຍ່ ແລະ ການລຸກຮື້ຂຶ້ນຍາມລະດູບານໃໝ່ປີ 1975 ຊຶ່ງຈຸດຍອດສູງແມ່ນບັ້ນຮົບໂຮ່ຈິມິນປະຫວັດສາດນັ້ນ, ການຕ່ໍ່ສູ້ຕ້ານຈັກກະພັດອາເມລິກາກູ້ຊາດຂອງກອງທັບ ແລະ ປະຊາຊົນຫວຽດນາມໄດ້ຮັບໄຊຊະນະຢ່າງສົມບູນ. ວິລະກຳນີ້ໄດ້ເປີດໄລຍະທີ່ຮຸ່ງເຮືອງເຫຼືອງເຫຼື້ອມໃນປະຫວັດສາດຕ້ານສັດຕູຜູ້ຮຸກຮານຂອງຊາດຫວຽດນາມ.
ລົດຖັງຂອງທະຫານປົດປ່ອຍບຸກເຂົ້າທຳນຽບເອກະລາດເມື່ອວັນທີ 30/4/1975 |
ມະຫາໄຊລະດູບານໃໝ່ປີ 1975 ບໍ່ພຽງແຕ່ສິ້ນສຸດ ການຕ່ໍ່ສູ້ຕ້ານຈັກກະພັດອາເມລິກາກູ້ຊາດໃນຕະຫຼອດ 21 ປີ ເທົ່ານັ້ນ, ຫາກຍັງສິ້ນສຸດການປົກຄອງຂອງລັດທິລ່າເມືອງຂຶ້ນແບບເກົ່າ ແລະ ລັດທິລ່າເມືອງຂຶ້ນແບບໃໝ່ທີ່ແກ່ຍາວມາເປັນເວລາ 117 ປີ ຢູ່ປະເທດຫວຽດນາມ (1858-1975) . ມະຫາໄຊລະດູບານໃໝ່ປີ 1975 ໄດ້ໄຂສັງກາດໃໝ່ແຫ່ງປະຫວັດສາດຂອງຊາດຫວຽດນາມ, ສັງກາດເອກະລາດ, ເອກະພາບ ແລະ ກ້າວຂຶ້ນສູ່ລັດທິສັງຄົມນິຍົມ.
ໄຊຊະນະແຫ່ງຄວາມຄາດຫວັງມີເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບ
ມະຫາໄຊລະດູບານໃໝ່ປີ 1975 ແມ່ນການເຕົ້າໂຮມກຳລັງແຮງຂອງກອງທັບ ແລະ ປະຊາຊົນທົ່ວປະເທດ, ກຳລັງແຮງຂອງທົ່ວທັງຊາດ. ນັ້ນແມ່ນກຳລັງແຮງຂອງສົງຄາມປະຊາຊົນຫວຽດນາມທີ່ມະຫັດສະຈັນ ດ້ວຍການເສຍສະຫຼະຢ່າງໃຫຍ່ຫຼວງຂອງພໍ່ແມ່ປະຊາຊົນ, ນັກຮົບພາກໃຕ້ບົນແນວໜ້າໃຫຍ່ ແລະ ການລຳລຽງຊ່ວຍໜູນຢ່າງສຸດໃຈຂອງແນວຫຼັງພາກເໜືອ. ພົນຈັດຕະວາ ເຈີນຫງອກໂຖ ຮອງປະທານສະມາຄົມຜູ້ປະສົບເຄາະຮ້າຍຈາກສານພິດສີສົ້ມ/ດີໂອຊິນ ຫວຽດນາມ ອະດີດຫົວໜ້າຄະນະການຮົບຂອງປີກໜຶ່ງໃນບັ້ນຮົບໂຮ່ຈິມິນ ໄດ້ຫວນຄືນວ່າ :
“ ສະໜາມຮົບພາກໃຕ້ຕີອາເມລິກາ ແມ່ນລຳບາກກາກກຳ ແລະ ດຸເດືອດທີ່ສຸດ, ມັນແຕກຕ່າງກັບສົງຄາມອື່ນໆ. ກອງທັບ ແລະ ປະຊາຊົນຫວຽດນາມດ້ວຍອາວຸດບໍ່ທັນສະໄໝ ໄດ້ລຸກຂຶ້ນຕ້ານຄືນພວກຈັກກະພັດ”
ພາຍຫຼັງທີ່ໄດ້ຍາດເອົາຊະນະຢູ່ຫຼາຍທ້ອງຖິ່ນ, ທ້າຍເດືອນ 4/1975, ກອງທັບ ແລະ ປະຊາຊົນຫວຽດນາມໄດ້ບຸກເຂົ້າປົດປ່ອຍນະຄອນໄຊງ່ອນ. ເວລາ 11 ໂມງ 30 ນາທີ, ທຸງໄຊຊະນະໄດ້ບິວສະບັດເທິ່ງຊັ້ນດາດຟ້າຂອງທຳນຽບເອກະລາດ. ການບຸກໂຈມຕີໂດຍຕັດສິນໃຈເອົາໄຊຊະນະນັ້ນ ໄດ້ ສິ້ນສຸດການຕ່ໍ່ສູ້ຕ້ານຈັກກະພັດອາເມລິກາກູ້ຊາດຂອງຊາດຫວຽດນາມທີ່ແກ່ຍາວຕະຫຼອດ 21 ປີ. ຮອງສາດສະດາຈານ, ດຣ ຫງວຽນແມ້ງຮ່າ ຫົວໜ້າສະຖາບັນປະຫວັດສາດພັກ ຢືນຢັນວ່າ :
“ປູຍ່າຕາຍາຍຂອງພວກເຮົາ ໄດ້ມີຄຳວ່າ : ສົງຄາມເພື່ອພື້ນຖານສັນຕິພາບແບບຍືນຍົງ. ຊາດຫວຽດນາມແມ່ນຊາດໜຶ່ງທີ່ຮັກຫອມສັນຕິພາບທີ່ສຸດ, ແຕ່ຍາມໃດກໍຕ້ອງຕໍ່ສູ້ຕ້ານບັນດາອິດທິກຳລັງເຂົ້າມາຮຸກຮານ ເພື່ອຍາດເອົາສັນຕິພາບ, ເອກະພາບມາໃຫ້ປະເທດຊາດຄືນ. ແນ່ນອນວ່າ ສົງຄາມແມ່ນຄວາມເສຍຫາຍ, ແມ່ນການເສຍສະຫຼະຊີວິດ. ຄວາມເສຍຫາຍ ແລະ ການເສຍສະຫຼະຊີວິດຂອງພວກເຮົາໃນການຕ່ໍ່ສູ້ຕ້ານຈັກກະພັດອາເມລິກາກູ້ຊາດ ແມ່ນໃຫຍ່ຫຼວງທີ່ສຸດ, ແຕ່ພວກເຮົາຮອມຮັບເພື່ອຍາດເອົາເອກະລາດ, ເອກະພາບ ແລະ ສັນຕິພາບມາໃຫ້ປະເທດຊາດຄືນ”
ໄຊຊະນະຂອງນ້ຳໃຈມະຫາສາມັກຄີແຫ່ງຊາດ
ຄວາມສາມັກຄີ, ເປັນຈິດໜຶ່ງໃຈດຽວໃນທົ່ວພັກ, ທົ່ວປວງຊົນ ແລະ ສາມັກຄີສາກົນ ແມ່ນໜຶ່ງໃນບັນດາປັດໄຈທີ່ສຳຄັນ ເພື່ອຍາດເອົາຊຊະນະໃນການຕ່ໍ່ສູ້ຕ້ານຈັກກະພັດອາເມລິກາກູ້ຊາດ. ພັນເອກ, ຮອງສາດສະດາຈານ, ດຣ ເຈີນຫງອກລອງ ອະດີດຮອງຫົວໜ້າສະຖາບັນປະຫວັດສາດການທະຫານຫວຽດນາມ ເນັ້ນໜັກວ່າ :
“ ຖ້າຫາກພິຈາລະນາກຳລັງບົ່ມຊ້ອນດ້ານເສດຖະກິດ ແລະ ການທະຫານນັ້ນ, ເປັນທີ່ຈະແຈ້ງແລ້ວວ່າ ຫວຽດນາມແມ່ນຢູ່ໃນທ່າອ່ອນກວ່າ. ແຕ່ສຳລັບກຳລັງແຮງສັງລວມນັ້ນ, ຫວຽດນາມລື່ນກາຍຫຼາຍ. ດ້ວຍກຳລັງແຮງ ແລະ ຄວາມສາມາດນັ້ນ, ຊາດຫວຽດນາມໄດ້ຮູ້ຈັກວິທີຍາດເອົາໄຊຊະນະເທື່ອລະກ້າວ, ຕີເອົາໄຊຊະນະສັດຕູໃນແຕ່ລະຍຸດທະສາດ ເພື່ອທັງຕີໃຫ້ອາເມລິກາໃຫ້ຖອຍໄປ, ທັງໂຄ່ນລົ້ມອຳນາດການປົກຄອງຫຸ່່ນໄຊງ່ອນ, ທ້ອນໂຮມປະເທດຊາດເປັນເອກະພາບ ”
ສົງຄາມໄດ້ຜ່ານພົ້ນໄປ, ແຕ່ບັນດາບົດຮຽນປະຫວັດສາດອັນລ້ຳຄ່າໃນການຕ່ໍ່ສູ້ຕ້ານຈັກກະພັດອາເມລິກາກູ້ຊາດ ຍາມໃດກໍຖືກປະຊາຊົນຫວຽດນາມ ແລະ ເພື່ອນ ມິດສາກົນເຕື້ອງເຖິງ ດ້ວຍຄວາມເອກອ້າງທະນົງໃຈ. ຮອງສາດສະດາຈານ, ດຣ ຫງວຽນຈ້ອງຟຸກ ອະດີດຫົວໜ້າສະຖາບັນປະຫວັດສາດພັກ ຢືນຢັນວ່າ :
“ ບົດຮຽນໃຫຍ່ກວ່າໝູ່ຍັງຄົງແມ່ນລັດທິຮັກຊາດ, ເຊີດຊູນ້ຳໃຈມະຫາສາມັກຄີແຫ່ງຊາດ. ນອກຈາກນັ້ນ ຍັງມີບົດບາດນຳພາຂອງພັກ ຈາກແນວທາງສົງຄາມ ຈົນເຖິງວິທີຊີ້ນຳການຈັດຕັ້ງປະຕິບັດຕົວຈິງ. ສຸດທ້າຍ ພວກເຮົາຕ້ອງເວົ້າເຖິງບົດຮຽນກ່ຽວກັບການຍາດແຍ່ງກຳລັງແຮງທັງຊາດ, ສົມທົບກຳລັງແຮງທັງຊາດ ກັບກຳລັງແຮງຂອງຍຸກສະໄໝ, ກຳລັງແຮງຢູ່ພາຍໃນປະເທດກັບກຳລັງແຮງພາຍນອກ, ຍາດແຍ່ງການສະໜັບສະໜຸນຈາກປະຊາຊົນຜູ້ກ້າວໜ້າໃນໂລກ ເພື່ອຍາດເອົາເອກະລາດ ”
ການຜັນແປທັງໝົດໃນ ການຕ່ໍ່ສູ້ຕ້ານຈັກກະພັດອາເມລິກາກູ້ຊາດໄດ້ພິສູດໃຫ້ເຫັນຄວາມຖືກຕ້ອງແນວຄິດຍຸດທະສາດບຸກໂຈມຕີ, ວິທີການປະຕິວັດ , ທິດນຳຊີ້ນຳຍຸດທະສາດ, ແບບວິທີດຳເນີນສົງຄາມ ແລະ ສິລະປະການທະຫານຂອງກອງທັບຫວຽດນາມ ພາຍໃຕ້ການຊີ້ນຳນຳພາຢ່າງສະຫຼາດສອງໃສຂອງພັກກອມູນິດຫວຽດນາມ. ບັນດາແນວຄິດ ແລະ ຈິດໃຈນັ້ນ ໄດ້, ພວມ ແລະ ຖືກໝູນໃຊ້ເຂົ້າໃນກິດຈະການສ້າງສາ, ປ່ຽນແປງໃໝ່ປະເທດຊາດ .