ສາທາລະນະລັດປະຊາຊົນປະຊາທິປະໄຕ ເກົາຫຼີ ເດັດດຽວຈະດຳເນີນການທົດລອງນິວເຄຼຍຄັ້ງທີ່ 3. (ພາບປະກອບ )
|
ໃນຂະນະທີ່ ສາທາລະນະລັດປະຊາຊົນປະຊາທິປະໄຕ ເກົາຫຼີ ເດັດດຽວດຳເນີນການທົດລອງນິວເຄຼຍຄັ້ງທີ່ 3 ເພື່ອແນໃສ່ໂຕ້ຕອບຕໍ່ມະຕິລົງໂທດໃໝ່ຂອງ ສະພາຄວາມໝັ້ນຄົງສະຫະປະຊາຊາດ ກ່ຽວກັບກໍລະນີຍິງດາວທຽມຂອງປະເທດນີ້ເມື່ອເດືອນທັນວາປີກາຍນີ້, ວັນທີ 30/1, ສາທາລະນະລັດເກົາຫຼີ ໄດ້ປະກາດຍິງລູກສອນໄຟສົ່ງດາວທຽມຂຶ້ນສູ່ວົງໂຄຈອນສຳເລັດຜົນ. ເຫດການດັ່ງກ່າວໄດ້ເຮັດໃຫ້ສະພາບການໃນແຫຼມເກົາຫຼີ ຖືກຕົກຢູ່ໃນຄວາມເຄັ່ງຕຶງຄັ້ງໃໝ່ ແລະ ຫາງສຽງຄາດຄະເນວ່າ ຖ້າຫາກບໍ່ມີວິທີແກ້ໄຂທາງການທູດໃໝ່ ທີ່ຮອບດ້ານກ່ວານັ້ນ, ແນ່ນອນວ່າ ສະພາບການໃນພາກພື້ນນີ້ ຍາກທີ່ຈະຢູ່ໃຕ້ການຄວບຄຸມຂອງຝ່າຍຕ່າງໆໃນຊຸມມື້ທີ່ຈະມາເຖິງໄດ້.
ລູກສອນໄຟ Naro ໄດ້ຖືກຍິງອອກຈາກຖານຍິງທີ່ສູນອະວະກາດ ສາທາລະນະລັດເກົາຫຼີ ທີ່ຝັ່ງທະເລທາງທິດໃຕ້ຂອງປະເທດນີ້ເມື່ອຕອນບ່າຍວັນທີ 30/1 ຕາມເວລາທ້ອງຖິ່ນ. ການຍິງດັ່ງກ່າວ ໄດ້ຖືກດຳເນີນຖືກຕາມແຜນການ ແລະ ລູກສອນໄຟສາມາດບັນລຸລະດັບເປົ້າໝາຍ. ຂ່າວຄາວດັ່ງກ່າວໄດ້ຮັບການຢັ້ງຢືນຈາກບັນດາເຈົ້າໜ້າທີ່ ສາທາລະນະລັດເກົາຫຼີ ແລະ ນີ້ແມ່ນຄວາມມານະພະຍາຍາມຍິງ ລູກສອນໄຟສົ່ງດາວທຽມຂຶ້ນສູ່ວົງໂຄຈອນຄັ້ງທີ່ 3 ຂອງ ສາທາລະນະລັດເກົາຫຼີໃນຮອບ 4 ປີ ທີ່ຜ່ານມາ. ຈະບໍ່ມີຫຍັງນຳມາເວົ້າ ຖ້າຫາກຄວາມມວ່ນຊື່ນດັ່ງກ່າວບໍ່ແມ່ນຂອງ ສາທາລະນະລັດເກົາຫຼີ ແລະ ການພົວພັນລະຫວ່າງ ເຊີອູນ-ພຽງຢາງໃນຫຼາຍປີຜ່ານມາ ດຳເນີນໄປດ້ວຍດີ. ແຕ່ຄວາມຈິງ ພັດກົງກັນຂ້າມ. ແຕ່ດົນນານມາແລ້ວ, ຄວາມເຄັ່ງຕຶງລະຫວ່າງ 2 ພາກເກົາຫຼີ ພ້ອມກັບທ່າທີເປັນປໍລະປັກຂອງອາເມລິກາ, ສາທາລະນະລັດເກົາຫຼີ ກ່ຽວກັບ ບັນຫານິວເຄຼຍຂອງ ສາທາລະນະລັດປະຊາຊົນປະຊາທິປະໄຕ ເກົາຫຼີ ໄດ້ ທຳລາຍທຸກໆຄວາມມານະພະຍາຍາມສ້າງສັນຕິພາບໃນແຫຼມເກົາຫຼີ. ຍ້ອນເຫດ ນີ້ເອງ, ໂຄງການລູກສອນໄຟຂອງ ສາທາລະນະລັດເກົາຫຼີ ໄດ້ເຮັດໃຫ້ ປະເທດເພື່ອນບ້ານໃກ້ຄຽງມີຄວາມໂກດແຄ້ນທີ່ສຸດ ແລະ ໃນຖະແຫຼງການຫຼ້າສຸດ, ພຽງຢາງໄດ້ຖືວ່າ ເປັນຄວາມບໍ່ຍຸຕິທຳເມື່ອກໍລະນີຍິງລູກສອນໄຟໄລຍະໄກເພື່ອສົ່ງດາວທຽມຂຶ້ນສູ່ວົງໂຄຈອນຂອງປະເທດນີ້ ພັດຕ້ອງຮັບຄຳສັ່ງລົງໂທດຂອງສະຫະປະຊາຊາດ.
ພາຍຫຼັ້ງທີ່ ສະພາຄວາມໝັ້ນຄົງສະຫະປະຊາຊາດຮັບຮອງເອົາ ຄຳສັ່ງລົງໂທດເພີ່ມເຕີມແນໃສ່ ສາທາລະນະລັດປະຊາຊົນປະຊາທິປະໄຕ ເກົາຫຼີ ຂະນະທີ່ປະເທດນີ້ດຳເນີນການຍິງ ລູກສອນໄຟເມື່ອວັນທີ 12/12/2012, ພຽງຢ່າງໄດ້ກ່າວນາບຂູ່ຫຼາຍເທື່ອແລ້ວວ່າ ຈະດຳເນີນການທົດລອງນິວເຄຼຍຄັ້ງທີ່ 3. ໃນມໍ່ມານີ້, ທີ່ກອງປະຊຸມເລຂາອົງຄະນະພັກຂັ້ນຮາກຖານຂອງພັກແຮງງານເກົາຫຼີ, ທ່ານ ກິມກີນາມ ເລຂາທິການພັກ ຮັບຜິດຊອບການໂຄສະນາຂອງເກົາຫຼີ ໄດ້ຮຽກຮ້ອງໃຫ້ທົ່ວປວງຊົນ ເຂົ້າຮ່ວມການສູ້ຢັນຢ່າງຂະໜາດໃຫຍ່ ເພື່ອຕອບໂຕ້ຕໍ່ການນາບຂູ່ທີ່ນັບມື້ນັບເພີ່ມຂຶ້ນຈາກຝ່າຍ ສາທາລະນະລັດເກົາຫຼີ ແລະ ອາເມລິກາ. ກ່ອນໜ້ານັ້ນ, ພຽງຢາງໄດ້ນາບຂູ່ວ່າ ຈະບຸກໂຈມຕີ ເຊີອູນ ຖ້າຫາກວ່າ ປະເທດນີ້ສືບຕໍ່ເດີນຕາມ ຄຳສັ່ງລົງໂທດໃໝ່ຂອງສະຫະປະຊາຊາດ, ພ້ອມກັນນັ້ນກໍຖະແຫຼງ ວ່າ ຈະປະຕິເສດທຸກໆການເຈລະຈາທີ່ກ່ຽວຂ້ອງເຖິງການຍົກເລີກໂຄງການນິວເຄຼຍຂອງປະເທດນີ້. ແຕ່ກ່ອນເປັນຕົ້ນມາ, ສາທາລະນະລັດປະຊາຊົນປະຊາ ທິປະໄຕເກົາຫຼີ ຍາມໃດກໍຮັກສາຫຼັກໝັ້ນທີ່ວ່າ ການທົດລອງນິວເຄຼຍ ແມ່ນຄວາມຮຽກຮ້ອງຕ້ອງການຂອງປະຊາຊົນ ແລະ ຈະບໍ່ມີຫຍັງທີ່ສາມາດຂັດຂວາງປະເທດນີ້ກາຍເປັນປະເທດມະຫາອຳນາດດ້ານການທະຫານໄດ້.
ໃນຕົວຈິງ, ສາທາລະນະລັດປະຊາຊົນປະຊາທິປະໄຕເກົາຫຼີຍັງຄົງປະຕິບັດທຸກສິ່ງທຸກຢ່າງທີ່ເຂົາເຈົ້ານາບຂູ່ຈະປະຕິບັດ. ເພາະສະນັ້ນ, ເລື່ອງ ສາທາລະນະ ລັດປະຊາຊົນປະຊາທິປະໄຕເກົາຫຼີ ດຳເນີນການທົດລອງນິວເຄຼຍຄັ້ງທີ່ 3 ໃນຊຸມມື້ທີ່ຈະມາເຖິງ, ແນ່ນອນວ່າ ແມ່ນສິ່ງທີ່ບໍ່ຕ້ອງການຄາດຄະເນ. ມາຮອດຈຸດເວລານີ້, ບັນດາແຫຼ່ວຂ່າວການທະຫານ ແລະ ການສືບລາຊະການລັບຂອງ ສາທາລະນະລັດເກົາຫຼີ ໄດ້ສະແດງໃຫ້ເຫັນວ່າ ບັນດາການເຄື່ອນໄຫວກະກຽມໃຫ້ແກ່ການທົດລອງນິວເຄຼຍຄັ້ງນີ້ ພວມຖືກ ສາທາລະນະລັດປະຊາຊົນປະຊາ ທິປະໄຕ ເກົາຫຼີປະຕິບັດ.
ຈາກສະພາບການປະຈຸບັນ, ວົງການນັກໄຈ້ແຍກໄດ້ໃຫ້ຂໍ້ສັງເກດວ່າ ເຖິງເວລາ ແລ້ວ, ຄວນມີ ວິທີການແກ້ໄຂໃໝ່ທີ່ຮອບດ້ານກ່ວາເພື່ອທົດແທນບັນດາ ມາດຕະ ການແກ້ໄຂເກົ່າທີ່ບໍ່ສາມາດເສີມຂະຫຍາຍປະສິດທິຜົນໃນໄລຍະຍາວນານ. ສິ່ງທີ່ສຳຄັນຂອງບັນຫາແມ່ນຢູ່ບ່ອນວ່າ ໃນຂະນະທີ່ພຽງຢາງຍາມໃດກໍຢືນຢັນການຍິງດາວທຽມຂອງຕົນແມ່ນເພື່ອແນໃສ່ພັດທະນາວິທະຍາສາດເຕັກນິກ ຊຶ່ງນອນໃນແຜນການສ້າງລັດໃຫ້ເຂັ້ມແຂງ ແລະ ຈະເລີນຮຸ່ງເຮືອງ, ແຕ່ອາເມລິກາ ແລະ ສາທາລະນະ ລັດເກົາຫຼີ ພັດຖືວ່ານັ້ນແມ່ນບັນດາການຍິງທົດລອງລູກສອນໄຟທີ່ປອມແປງ, ແມ່ນກະທຳເກາະຜິດລະດັບສູງທີ່ນາບຂູ່ສັນຕິພາບ ແລະ ຄວາມສະຫງົບປອດໄພໃນພາກພື້ນ. ສິ່ງທີ່ສຳຄັນໃນປະຈຸບັນ, ນັ້ນແມ່ນບັນດາຝ່າຍທີ່ກ່ຽວຂ້ອງຈົ່ງລະງັບໃຈ, ຫຼີກລ້ຽງທຸກການກະທຳເຮັດໃຫ້ຄວາມເຄັ່ງຕຶງປີນຂັ້ນໄດ, ກໍ່ຜົນສະທ້ອນເຖິງຈຸດໝາຍລົບລ້າງອາວຸດນິວເຄຼຍໃນແຫຼມເກົາຫຼີ. ແຕ່ເບິ່ງຄືວ່າ ການຍິງລູກສອນໄຟຂອງ ສາທາລະນະລັດເກົາຫຼີ ໃນຈຸດເວລາທີ່ເຄັ່ງຮ້ອນນີ້ ປຽບເໝືອນການທ້າທາຍທີ່ມີຕໍ່ອຳນາດການປົກຄອງຂອງພົນເອກ ກິມຢອງອຸນ, ແຫຼມ ເກົາຫຼີ ແນ່ນອນວ່າ ຈະມີບັນດາການຜັນແປທົ່ວຊົ່ວຮ້າຍລົງໃນຊຸມມື້ທີ່ຈະມາເຖິງ ແລະ ສັນຕິພາບຢູ່ພາກພື້ນນີ້ຍັງຄົງແມ່ນສິ່ງພວມລໍຄອຍ.