(vovworld)- ໃນຂະນະທີ່ເອີລົບ ບໍ່ທັນຊອກໄດ້ມາດຕະການທີ່ມີປະສິດທິຜົນ ເພື່ອແກ້ໄຂວິກິດການຊາວອົບພະຍົບ, ບົດລາຍງານຫວ່າງແລ້ວນີ້ຂອງ ຂ້າຫລວງໃຫຍ່ ສປຊ ກ່ຽວກັບຊາວອົບພະຍົບ (UNHCR) ໃຫ້ຮູ້ວ່າ: ມີຊາວອົບພະຍົບຢ່າງຫນ້ອຍສຸດ 700 ຄົນຖືກເສຍຊີວິດ ແລະ ຫລາຍຄົນຖືກຫາຍສາບສູນບົນທະເລເມດີຕາລາເນໃນ ຊຸມມື້ຜ່ານມາ. ວິນາດສະກຳນີ້ອີກຄັ້ງຫນຶ່ງໄດ້ກ່າວເຕືອນເຖິງເລື່ອງຂາດບັນດາມາດຕະການແກ້ໄຂວິກິດການຊາວອົບພະຍົບປະຈຸບັນ.
ການປະຊຸມຂ່າວພາຍຫລັງການເຈລະຈາສັນຕິພາບຢູ່ຊີຣີ
(AFP/TTXVN)
|
ຊາວອົບພະຍົບເດີນທາງເຖິງ ເອີລົບຄັ້ງນີ້ ສ່ວນຫລາຍແມ່ນມາຈາກບັນດາປະເທດ ອາຟຼິກາ. ເຂົາເຈົ້າບໍ່ໄດ້ຮັບເສື້ອຊູຊີບ ແລະ ຕ້ອງຢູ່ໃນບັນດາກຳປັ່ນບໍ່ມີເຄື່ອງຈັກ ພຽງແຕ່ອີງໃສ່ກຳລັງແຮງຂອງບັນດາກຳປັ່ນຄ້າຂາຍສິນຄ້າລຳໃຫຍ່ເທົ່ານັ້ນ. ເຖິງຢ່າງໃດກໍຕາມ, ເຂົາເຈົ້າພັດບໍ່ຫົວຊາຕໍ່ທຸກຄວາມອັນຕະລາຍເພື່ອຊອກຫາເສັ້ນທາງເຖິງ ເອີລົບ.
ຈຳນວນຜູ້ຖືກເສຍຊີວິດເພີ່ມຂຶ້ນຫລາຍ
ເລື່ອງກີດຂວາງເສັ້ນທາງເຖິງ ປະເທດ ເກຼັກ ພາຍຫລັງຂໍ້ຕົກລົງ ລະຫວ່າງ ອີຢູ ແລະ ຕວກກີ ໄດ້ບັງຄັບໃຫ້ຊາວອົບພະຍົບຕ້ອງເລືອກເຟັ້ນເສັ້ນທາງຈາກ ລີບີ ເຖິງ ອີຕາລີ ຊື່ງແມ່ນເສັ້ນທາງທີ່ຍາວກວ່າ ແລະ ອັນຕະລາຍກວ່າ. ອາກາດອຳນວຍຄວາມສະດວກແມ່ນເງື່ອນໄຂດີສຸດເພື່ອໃຫ້ກຳປັ່ນຂົນສົ່ງຊາວອົບພະຍົບເລີ່ມເດີນທາງໃນພາບດຽວ. ສິ່ງດັ່ງກ່າວໄດ້ກໍ່ກຳລັງດັນຢ່າງແຮງຕໍ່ກຳລັງກູ້ໄພກູ້ຊີບເມື່ອມີເກີດເຫດ. ຕາມການສະຖິຕິ, ບັນດາກໍລະນີກຳປັ່ນຂົນສົ່ງຊາວອົບພະຍົບໄປຍັງເອີລົບຖືກຈົມນ້ຳໃນຊຸມມື້ຜ່ານມາ ໄດ້ເຮັດໃຫ້ຈຳນວນຜູ້ຖືກເສຍຊີວິດນັບແຕ່ຕົ້ນປີມາຮອດປະຈຸບັນຂຶ້ນເຖິງກວ່າ 2.500 ຄົນ, ໃນນັ້ນ ສ່ວນຫລາຍແມ່ນແມ່ຍິງ ແລະ ເດັກນ້ອຍ. ກອງທຶນ ສປຊ ເພື່ອເດັກນ້ອຍ (UNICEF) ສະແດງຄວາມວິຕົກກັງວົນກ່ຽວກັບສະພາບການນີ້. UNICEF ຍັງກ່າວເຕືອນວ່າ ສະພາບການນີ້ອາດຈະເພີ່ມຂຶ້ນ ຍ້ອນຕົ້ນລະດູຮ້ອນໄດ້ເກີດມີຫລາຍກໍລະນີຂ້າມຊາຍແດນຢູ່ທະເລເມດີຕາລາເນ, ເປັນຕົ້ນແມ່ນຢູ່ເຂດທະເລລະຫວ່າງລີບີ ແລະ ອີຕາລີ. ໃນບົດລາຍງານປະກາດເມື່ອວັນທີ 29/5, UNICEF ໃຫ້ຮູ້ວ່າ: ອົງການນີ້ຈະສົມທົບກັບລັດຖະບານ ອີຕາລີ ແລະ ບັນດາຄູ່ຮ່ວມມືສາກົນ ເພື່ອເພີ່ມທະວີບັນດາການເຄື່ອນໄຫວມະນຸດສະທຳ, ເປັນຕົ້ນແມ່ນວຽກງານໂຄສະນາ ແລະ ສະຫນອງອຸປະກອນກູ້ຊີບທີ່ຈຳເປັນ ໂດຍໄວ.
ຜົນຮ້າຍຢ້ອນຫລັງຈາກໄພອົບພະຍົບ
ເລື່ອງບັນດາປະເທດສະຫະພາບເອີລົບ (ອີຢູ) ຍັງບໍ່ທັນຊອກໄດ້ມາດຕະການແກ້ໄຂວິກິດການຊາວອົບພະຍົບນັ້ນ ໄດ້ສ້າງກາລະໂອກາດທີ່ດີເພື່ອໃຫ້ບັນດາອົງການກໍ່ການຮ້າຍ ແລະ ອາດຊະຍາກຳດຳເນີນຈຸດໝາຍຂອງຕົນ. ກະແສຊາວອົບພະຍົບເພີ່ມຂຶ້ນຢ່າງແຮງ ແມ່ນເງື່ອນໄຂສະດວກເພື່ອໃຫ້ການບໍລິການຂົນສົ່ງຊາວອົບພະຍົບໄປຍັງເອີລົບເພີ່ມຂຶ້ນຢ່າງແຮງ. ປີ 2015, 90% ຈຳນວນຊາວອົບພະຍົບໄປເຖິງ ເອີລົບ ຕ້ອງອີງໃສ່ພວກອາດຊະຍາກຳ ແລະ ການຂ້າມຊາຍແດນຄັ້ງຫນຶ່ງຕ້ອງເສຍຄ່າແຕ່ 3.200 -6.500 USD. ຕາມຕົວເລກສະຖິຕິບໍ່ທັນຄົບ, ບໍລິການນີ້ໄດ້ຊ່ວຍໃຫ້ອົງການກໍ່ການຮ້າຍຫາລາຍໄດ້ 5 ຕື້ USD ໃນປີ 2015. ຕາມການຄາດຄະເນຂອງ Europol ແລ້ວ: ປີ 2016 ຈຳນວນຊາວອົບພະຍົບຍັງຢູ່ໃນລະດັບສູງກວ່າເມື່ອທຽບໃສ່ປີ 2015. ສະເພາະ ຢູ່ ລີບີ, ປະຈຸບັນ ມີປະມານ 800.000 ຄົນ ພວມລໍຖ້າກາລະໂອກາດເພື່ອຂ້າມທະເລໄປຍັງ ອີຢູ, ໂດຍບໍ່ຫົວຊາຕໍ່ຄວາມອັນຕະລາຍເຖິງຊີວິດອີນຊີ.
ເລື່ອງບັນດາ ພວກອາດຊະຍາກຳຈັດຕັ້ງການບໍລິການຂ້າມຊາຍແດນເຮັດໃຫ້ວິກິດການອົບພະຍົບຢູ່ ເອີລົບ ຍິ່ງຮ້າຍແຮງກວ່າ ແລະວິນາດສະກຳມະນຸດສະທຳກໍເພີ່ມຂຶ້ນ. ນອກນັ້ນ ເປັນສິ່ງທ້າທາຍດ້ານຄວາມສະຫງົບປອດໄພ, ດ້ານການເມືອງໃຫຍ່ຫລວງຕໍ່ອີຢູ, ເປັນຕົ້ນແມ່ນໄພອັນຕະລາຍກ່ຽວກັບການກໍ່ການຮ້າຍ.
ການຊອກຫາມາດຕະການແກ້ໄຂ
ປະກົດການຊາວອົບພະຍົບສືບຕໍ່ຊອກຫາເສັ້ນທາງໄປຍັງ ເອີລົບ ແມ່ນການພິສູດໃຫ້ເຫັນວ່າ ໃນໄລຍະຜ່ານມາ, ບັນດາການນຳ ຍັງບໍ່ທັນເອົາໃຈໃສ່ແກ້ໄຂບັນດາສາຍເຫດພາໄປເຖິງວິກິດການນີ້ຢ່າງເຖິງຖອງ. ບັນດາປະເທດ ເອີລົບ ປະຈຸບັນ ບໍ່ທັນຊອກໄດ້ບັນດາມາດຕະການ ມີປະສິດທິຜົນຢ່າງພຽງພໍເພື່ອໃຫ້ມີການປະສານງານລວມໃນທົ່ວພາກພື້ນເພື່ອແນໃສ່ແກ້ໄຂບັນຫາອົບພະຍົບຢ່າງຂ້ຽວຂາດ. ວິທີແກ້ໄຂຂອງ ເອີລົບປະຈຸບັນ ສ່ວນຫລາຍແມ່ນແກ້ໄຂຕາມສະຖານະການ, ສະກັດກັ້ນຈາກທາງໄກ ດ້ວຍບັນດາມາດຕະການຄື ສົ່ງກຳລັງພິເສດເຂົ້າ ຊີຣີ ແລະ ລີບີ ແຕ່ບໍທັນແຂງແຮງເທື່ອ.
ໃນສະພາບການນັ້ນ, ຫາງສຽງມີຄວາມວິຕົກກັງວົນຕໍ່ຂໍ້ຕົກລົງກ່ຽວກັບຊາວອົບພະຍົບລະຫວ່າງ ອີຢູ ແລະ ຕວກກີ ຫາກໍບັນລຸໄດ້ໃນທ້າຍເດືອນ 3/2016 ອາດຈະຖືກລົ້ມລະລາຍໃນຂະນະທີ່ຊຸມມື້ຫວ່າງແລ້ວນີ້ ການນຳສອງຝ່າຍຍົກອອກບັນດາຖະແຫລງການແຂງກະດ້າງຢ່າງລຽນຕິດກ່ຽວກັບການຍົກເວັ້ນວິຊາໃຫ້ແກ່ພົນລະເມືອງຕວກກີ ເຂົ້າອີຢູ, ນີ້ແມ່ນບັນຫາສຳຄັນໃນຂໍ້ຕົກລົງລະຫວ່າງສອງຝ່າຍ. ຜູ້ໃຫ້ຄຳປືກສາດ້ານເສດຖະກິດຂອງ ປະທານາທິບໍດີ ຕວກກີ Yigit Bulut ເນັ້ນຫນັກວ່າ Ankara ອາດຈະຢຸດຕິຂໍ້ຕົກລົງທັງໝົດກັບ ອີຢູ ຖ້າຫາກກຸ່ມນີ້ ບໍ່ຮັກສາຄຳໝັ້ນສັນຍາກ່ຽວກັບການຍົກເວັ້ນວິຊາໃຫ້ແກ່ພົນລະເມືອງ ຕວກກີ ຢູ່ ເຂດ Schengen, ຍູ້ ອີຢູ ຕົກເຂົ້າສູ່ສະພາບຕ້ອງຊອກຫາມາດຕະການ ແກ້ໄຂບັນຫາຊາວອົບພະຍົບເຂົ້າມາເປັນຈຳນວນຫລວງຫລາຍ ໂດຍບໍ່ໄດ້ຮັບການຊ່ວຍເຫລືອຈາກຝ່າຍຕວກກີ. ເຖິງຢ່າງໃດກໍຕາມ, ຝ່າຍ ອີຢູ ຍັງຄົງເດັດດ່ຽວຮຽກຮ້ອງປະເທດນີ້ ຕ້ອງປັບປຸງກົດໝາຍວ່າດ້ວຍການຕ້ານກໍ່ການຮ້າຍ, ແມ່ນຫນຶ່ງໃນ 5 ມາດຕາສຳຄັນ ຊື່ງສອງຝ່າຍໃຫ້ຄຳໝັ້ນສັນຍາປະຕິບັດກ່ອນທີ່ ພົນລະເມືອງ ຕວກກີ ອາດຈະໄດ້ຍົກເວັ້ນວິຊາ ເຂົ້າອີຢູ. ເມື່ອຂໍ້ຕົກລົງກ່ຽວກັບຊາວອົບພະຍົບນັບມື້ນັບຍາກທີ່ປະຕິບັດໄດ້, ອີຢູ ກໍຄິດໄລ່ເຖິງວິທີການເພື່ອໃຫ້ເກຼັກ ກາຍເປັນສູນຕ້ອນຮັບຊາວອົບພະຍົບ ແລະ ອີຢູ ຈະສົ່ງບ້ວງສິນເຊື່ອທີ່ໄດ້ໝັ້ນໝາຍໃຫ້ແກ່ ຕວກກີ. ເຖິງຢ່າງໃດກໍຕາມ, ປະຈຸບັນ ເກຼັກ ກໍພວມປະສົບກັບຄວາມຫຍຸ້ງຍາກເມື່ອຕ້ອງປະເຊີນຫນ້າກັບຫນີ້ສາທາລະນະພວມຢູ່ໃນລະດັບສູງ, ພື້ນຖານເສດຖະກິດ ຖືກຊຸດໂຊມ.
ໃນຂະນະນັ້ນ, ວົງການໄຈ້ແຍກຖືວ່າ ຂໍ້ກຸນແຈເພື່ອແກ້ໄຂວິກິດການອົບພະຍົບປະຈຸບັນ ຢ່າງສິ້ນເຊິງນັ້ນ ແມ່ນອີງໃສ່ເລື່ອງຮັກສາສະຖຽນລະພາບຢູ່ບັນດາປະເທດຕາເວັນອອກກາງ ແລະ ອາຟຼູິກາເຫນືອ. ພິເສດ ແມ່ນບັນດາປະເທດຖືກສົງຄາມກາງເມືອງ ແລະ ຖືກຜົນກະທົບຢ່າງແຮງຈາກວິກິດການລະດູບານໃຫມ່ ອາຣັບ ຄື: ອີຣັກ, ຊີຣີ, ລີບີ, ເຢແມນ ຫລື ອີຢີບ. ຮອດຈຸດເວລາທີ່ເອີລົບ ແລະ ໂລກ ຕ້ອງມີການກະທຳໃນລະດັບທົ່ວໂລກເພື່ອຊ່ວຍບັນດາປະເທດພາຍໃນພາກພື້ນຟື້ນຟູຢ່າງແຮງກວ່າ, ມີກຳລັງຄວາມສາມາດຢ່າງແຮງເພື່ອຮັກສາສະພາບການເສດຖະກິດ, ສັງຄົມໃຫ້ເປັນປົກກະຕິ.
ເຖິງວ່າ ມີຄວາມມານະພະຍາຍາມຢ່າງຫລວງຫລາຍກໍຕາມ ແຕ່ມາຮອດປະຈຸບັນ ເອີລົບຍັງບໍ່ທັນຊອກໄດ້ມາດຕະການສັງລວມຢ່າງມີປະສິດທິຜົນ, ມາດຕະການພື້ນຖານໃດໃຫ້ແກ່ບັນຫາຊາວອົບພະຍົບ. ບັນດາມາດຕະການຖືກຍົກອອກມາ ພຽງແຕ່ມີລັກສະນະຊົ່ວຄາວ ແລະ ປະເຊີນຫນ້າເທົ່ານັ້ນ. ໃນໄລຍະຈະມາເຖິງ, ກ່ຽວກັບໄລຍະສັ້ນ ເອີລົບ ຍັງຄົງຈະສືບຕໍ່ປະເຊີນຫນ້າກັບບັນດາກຳລັງດັນໃຫຍ່ກ່ຽວຂ້ອງເຖິງບັນຫາຊາວອົບພະຍົບ.