(vovworld) - ຕາມກະຊວງການຕ່າງປະເທດ ຍີ່ປຸ່ນແລ້ວ, ກອງປະຊຸມລັດຖະມົນຕີການຕ່າງປະເທດ ຍີ່ປຸ່ນ - ຈີນ - ສ.ເກົາຫຼີ ຄັ້ງທີ 8 ໄຂຂຶ້ນຢ່າງເປັນທາງການໃນວັນທີ 24/8, ຢູ່ ໂຕກຽວ, ປະເທດ ຍີ່ປຸ່ນ. ຖ້າໄດ້ຮັບການດຳເນີນຖືກຕາມແຜນການທີ່ໄດ້ວາງອອກ, ນີ້ຈະແມ່ນກອງປະຊຸມຂັ້ນລັດຖະມົນຕີທຳອິດໃນ 5 ປີຜ່ານມາ, ເພື່ອແກ້ໄຂບັນດາບັນຫາທີ່ຍັງຄົງຄ້າງລະຫວ່າງ 3 ປະເທດບ້ານໃກ້ເຮືອນຄຽງໃນພາກພື້ນ ອາຊີຕາເວັນອອກສ່ຽງເໜືອ. ເຖິງຢ່າງໃດກໍ່ຕາມມີການກະທຳຫຍໍ້ທໍ້ຫຼາຍຢ່າງຂອງບັນດາຝ່າຍກ່ອນທີ່ດຳເນີນກອງປະຊຸມ, ຈະມີການກະທົບບໍ່ແມ່ນໜ້ອຍເຖິງໝາກຜົນຂອງເຫດການສຳຄັນນີ້.
ລັດຖະມົນຕີການຕ່າງປະເທດ ຍີ່ປຸ່ນ Fumio Kishida ແລະ
ຄູ່ຕຳແໜ່ງ ທ່ານ ຫວາງຢີ ຂອງຈີນ
(ພາບ: IndianExpress)
ເພື່ອກະກຽມໃຫ້ແກ່ກອງປະຊຸມຂັ້ນລັດຖະມົນຕີການຕ່າງປະເທດຄັ້ງທີ 8, ຮອງລັດຖະມົນຕີການຕ່າງປະເທດບັນດາປະເທດ ສ.ເກົາຫຼີ, ຈີນ ແລະ ຍີ່ປຸ່ນ ໄດ້ປະຊຸມຢູ່ ໂຕກຽວໃນວັນທີ 21/8. ເຂົ້າຮ່ວມກອງປະຊຸມມີທ່ານຮອງລັດຖະມົນຕີການຕ່າງປະເທດ ສ.ເກົາຫຼີ Kim Hyoung-zhin ພ້ອມກັບຄູ່ຕຳແໜ່ງຈີນ ຫຼີວເຈິງໝິນ ແລະ Takeo Akiba ຂອງ ຍີ່ປຸ່ນ. ນີ້ແມ່ນກອງປະຊຸມຂັ້ນຮອງລັດຖະມົນຕີການຕ່າງປະເທດຄັ້ງທີ 11 ນັບແຕ່ກົນໄກນີ້ເລີ່ມໄດ້ຮັບການດຳເນີນເມື່ອເດືອນ 3/2007, ອັນໄດ້ສ້າງຊ່ອງສຳຄັນເພື່ອແລກປ່ຽນຄວາມເຫັນລະຫວ່າງສາມປະເທດ.
ປຶກສາຫາລືຫຼາຍເນື້ອໃນທີ່ສຳຄັນ
ເຂົ້າຮ່ວມກອງປະຊຸມລັດຖະມົນຕີການຕ່າງປະເທດ 3 ປະເທດອາຊີຕາເວັນອອກສ່ຽງເໜືອຄັ້ງນີ້, ມີລັດຖະມົນຕີການຕ່າງປະເທດ ຍີ່ປຸ່ນ Fumio Kishida ແລະຄູ່ຕຳແໜ່ງສອງທ່ານ, ແມ່ນທ່ານ Yun Byung Se ຂອງ ສ.ເກົາຫຼີ ແລະ ທ່ານ ຫວາງຢີ ຂອງຈີນ. ນີ້ແມ່ນຄັ້ງທຳອິດທີ່ລັດຖະມົນຕີການຕ່າງປະເທດ ຈີນໄປ ຍີ່ປຸ່ນ, ນັບແຕ່ທ່ານສີຈີ້ນຜີງ ກາຍເປັນ ປະທານປະເທດ ຈີນ ເມື່ອປີ 2012.
ໃນການປະຊຸມ, ລັດຖະມົນຕີການຕ່າງປະເທດ 3 ປະເທດໄດ້ແລກປ່ຽນຫຼາຍທັດສະນະນຳກັນ ໃນບັນດາບັນຫາໃຫຍ່ຂອງພາກພື້ນ ແລະ ທົ່ວໂລກ, ກໍ່ຄືຕີລາຄາກ່ຽວກັບການຮ່ວມມືລະຫວ່າງສາມຝ່າຍ ແລະ ບັນດາທິດທາງພັດທະນາໃນອະນາຄົດຂອງການຮ່ວມມືນີ້. ບັນດາຝ່າຍອາດຈະເຕື້ອງເຖິງບັນດາການຂັດແຍ້ງກັນກ່ຽວກັບຜືນແຜ່ນດິນລະຫວ່າງ ຈີນ ແລະ ຍີ່ປຸ່ນ, ທີ່ກ່ຽວຂ້ອງເຖິງໝູ່ເກາະ ເຊິ່ງ ໂຕກຽວເອີ້ນວ່າ Senkaku, ສ່ວນ ປັກກິງເອີ້ນວ່າ ຕ້ຽວອີ. ຄຽງຂ້າງນັ້ນ, ເຊີອູນ ແລະ ປັກກິງ ກໍ່ສາມາດປຶກສາຫາລືກ່ຽວກັບເລື່ອງ ສ.ເກົາຫຼີ ແລະ ອາເມລິກາ ຜັນຂະຫຍາຍລະບົບປ້ອງກັນລູກສອນໄຟໄລຍະສູງ, ໄລຍະສຸດທ້າຍ (THAAD). ນອກນັ້ນ, ລັດຖະມົນຕີການຕ່າງປະເທດ ສາມທ່ານຈະແລກປ່ຽນຄວາມເຫັນກ່ຽວກັບການເປີດກວ້າງການຮ່ວມມືທີ່ມີປະໂຫຍດໃຫ້ທຸກຝ່າຍ ແລະ ຕີລາຄາສະພາບການໃນປະຈຸບັນຢູ່ພາກພື້ນ ແລະ ໃນໂລກ, ປຶກສາຫາລືກ່ຽວກັບການພັດທະນາລູກສອນໄຟ ແລະ ນິວເຄຼັຍຂອງ ສປປ.ເກົາຫຼີ.
ກອງປະຊຸມຂັ້ນລັດຖະມົນຕີການຕ່າງປະເທດຄັ້ງນີ້ກໍ່ເພື່ອແນໃສ່ກະກຽມເນື້ອໃນໃຫ້ແກ່ການພົບປະຂັ້ນສຸດຍອດ 3 ປະເທດ, ອາດຈະໄດ້ຮັບການຈັດຕັ້ງຢູ່ນອກກອງປະຊຸມຂັ້ນສູງກຸ່ມບັນດາພື້ນຖານເສດຖະກິດພັດທະນາ ແລະ ຫາກໍ່ພົ້ນເດັ່ນແຖວໜ້າໂລກ (ຈີ 20), ຈະດຳເນີນໄປຢູ່ຈີນ ໃນຕົ້ນເດືອນ 9.
ດ້ວຍຫຼາຍເນື້ອໃນສຳຄັນຄືແນວນັ້ນ, ກະຊວງການຕ່າງປະເທດ ສ. ເກົາຫຼີ ໄດ້ໃຫ້ຂໍ້ສັງເກດວ່າ ກອງປະຊຸມຂັ້ນລັດຖະມົນຕີການຕ່າງປະເທດ 3 ຝ່າຍຈະແມ່ນກາລະໂອກາດເພື່ອໃຫ້ຜູ້ຕາງໜ້າການທູດຂັ້ນສູງຂອງບັນດາປະເທດອາດຈະປຶກສາຫາລືກ່ຽວກັບບັນດາບັນຫາທີ່ພົ້ນເດັ່ນ, ເປີດກາລະໂອກາດກ່ຽວກັບເລື່ອງເປີດກ້ວາງການພົວພັນຮ່ວມມືພ້ອມກັນນຳມາເຊິ່ງຜົນປະໂຫຍດໃຫ້ແກ່ທຸກໆຝ່າຍທີ່ກ່ຽວຂ້ອງ.
ຄວາມເຄັ່ງຕຶງກ່ອນທີ່ຈັດກອງປະຊຸມ
ເຖິງວ່າ 3 ປະເທດບັນລຸໄດ້ຄວາມເຫັນດີເຫັນພ້ອມກ່ຽວກັບການຈັດຕັ້ງກອງປະຊຸມຂັ້ນລັດຖະມົນຕີການຕ່າງປະເທດກໍ່ຕາມ ແຕ່ບັນດາຄວາມບໍ່ລົງລອຍກັນລະຫວ່າງ ປັກກິ່ງ ກັບ ໂຕກຽວ ກໍ່ຄືລະຫວ່າງ ປັກກິງ ກັບ ເຊີອູນ ໄດ້ຮັບຖືວ່າຈະສົ່ງຜົນສະທ້ອນບໍ່ແມ່ນໜ້ອຍເຖິງໝາກຜົນຂອງກອງປະຊຸມ.
ການຂັດແຍ້ງກັນຢ່າງເລິກເຊິ່ງກ່ຽວກັບບັນຫາອະທິປະໄຕຜືນແຜ່ນດິນຢູ່ໝູ່ເກາະ ທີ່ຈີນ ເອີ້ນວ່າ ຕ໋ຽວອີ ສ່ວນ ຍີ່ປຸ່ນ ເອີ້ນວ່າ Senkaku ປະຈຸບັນແມ່ນປັດໄຈສົ່ງຜົນສະທ້ອນເຖິງການພົວພັນ ຈີນ - ຍີ່ປຸ່ນ. ກ່ອນທີ່ຈັດຕັ້ງກອງປະຊຸມ, ຝ່າຍ ຍີ່ປຸ່ນ ໄດ້ອອກຖະແຫຼງການກ່ຽວກັບແຜນການເພີ່ມງົບປະມານປ້ອງກັນປະເທດ ສິ່ງດັ່ງກ່າວສະແດງໃຫ້ເຫັນຫຼັກໝັ້ນຢ່າງຈະແຈ້ງຂອງ ຍີ່ປຸ່ນ ໃນການປັບປຸງກຳລັງແຮງດ້ານປ້ອງກັນປະເທດ ແລະ ບັນດາວິທີການຮັບມືກັບໄພຂາດສະຖຽນລະພາບໃນພາກພື້ນ. ຕາມນັ້ນແລ້ວ, ງົບປະມານປ້ອງກັນປະເທດຈະແມ່ນຈຳນວນເງິນກ່ວາ 5.000 ຕື້ເຢັນ (ເທົ່າກັບກ່ວາ 50 ຕື້ USD) ໃນປີການເງິນ 2017, ເພີ່ມຂຶ້ນ 2,3% ເມື່ອທຽບໃສ່ປີ 2016. ຖ້າຫາກໄດ້ຮັບການຮັບຮອງເອົາ ນີ້ຈະແມ່ນລະດັບສະຖິຕິ ແລະ ລັດຖະບານ ຍີ່ປຸ່ນ ຈະສຸມໃສ່ຍູ້ແຮງການຜະລິດບັນດາລະບົບປ້ອງກັນລູກສອນໄຟທັນສະໄໝ. ໂຕກຽວ ກໍ່ຄິດໄລ່ຊັ່ງຊາເຖິງເລື່ອງຕໍ່ກຳປັ່ນລາດຕາເວັນຕື່ມອີກຢູ່ບັນດາເຂດອ້ອມແອ້ມໝູ່ເກາະ Senkaku, ທີ່ຝ່າຍ ຈີນ ເອີ້ນວ່າ ຕ້ຽວອີ ໃນທະເລຮວາຕູງ. ຄາດວ່າ, ລັດຖະບານ ຍີ່ປຸ່ນ ຈະຊອກຫາວິທີຮັບຮອງເອົາງົບປະມານຕໍ່ກ່ຳປັ່ນໃນວາລະປະຊຸມຂອງຄະນະລັດຖະບານຈະມາເຖິງ.
ລັດຖະມົນຕີການຕ່າງປະເທດ ຍີ່ປຸ່ນ Fumio Kishida
(ພາບ: Sputnik)
ຄວາມເຄັ່ງຕຶງລະຫວ່າງ ຈີນ - ຍີ່ປຸ່ນຍັງຄົງຄ້າງຢູ່, ເມື່ອກ່ອນໄຂກອງປະຊຸມລັດຖະມົນຕີການຕ່າງປະເທດອາຊີຕາເວັນອອກສ່ຽງເໜືອ ໜຶ່ງວັນ, ທ່ານນາງລັດຖະມົນຕີປ້ອງກັນປະເທດ ຍີ່ປຸ່ນ Tomomi Inada ໄດ້ໄປຢ້ຽມຢາມຖານທີ່ໝັ້ນຂອງກຳລັງປ້ອງກັນບົນທະເລ (MSDF) ຢູ່ Yokosuka, ທາງທິດຕາເວັນຕົກພາກໃຕ້ ໂຕກຽວ. ຕາມທ່ານນາງ Tomomi Inada ແລ້ວ, MSDF ຄວນມານະພະຍາຍາມປະຕິບັດບັນດາໜ້າທີ່ກ່າວເຕືອນ ແລະ ຕິດຕາມກວດກາໃນສະພາບການທີ່ ຈີນ ພວມຜັນຂະຫຍາຍການກະທຳຕ່າງໆຢູ່ທະເລນັບມື້ນັບຂ້ຽວຂາດກວ່າ.
ກ່ອນທີ່ ຍີ່ປຸ່ນຈະມີການກະທຳນີ້, ນັບແຕ່ຕົ້ນເດືອນ 8 ມານີ້, ບັນດາກຳປັ່ນຫາປາ ແລະ ກຳ່ປັ່ນຕຳຫຼວດຂອງຈີນຫຼາຍລຳໄດ້ເຂົ້າເຂດທະເລຂອງ ຍີ່ປຸ່ນ, ຫຼື ປະກົດຕົວຢູ່ເຂດຕິດກັບໝູ່ເກາະເຊິ່ງໂຕກຽວ ເອີ້ນວ່າ Senkaku, ສ່ວນ ຈີນເອີ້ນວ່າ ຕ້ຽວອີ. ເຫດການດັ່ງກ່າວໄດ້ພາໃຫ້ ຍີ່ປຸ່ນຕ້ອງສົ່ງຈົດໝາຍທາງການຫຼາຍຄັ້ງເພື່ອຄັດຄ້ານ ຈີນຢ່າງແຮງ.
ໃນຂະນະນັ້ນ, ເລື່ອງ ວໍຊິງຕັນ ແລະ ເຊີອູນ ເຫັນດີເປັນເອກະສັນຜັນຂະຫຍາຍລະບົບຕີສະກັດລູກສອນໄຟໄລຍະສູງ, ໄລຍະສຸດທ້າຍ THAAD ຢູ່ ສ.ເກົາຫຼີ ເມື່ອເດືອນ 7/2016, ເພື່ອເພີ່ມຄວາມສາມາດປ້ອງກັນຕໍ່ການນາບຂູ່ຈາກຝ່າຍ ສປປ.ເກົາຫຼີ ນັ້ນ, ໄດ້ສົ່ງຜົນສະທ້ອນບໍ່ດີເຖິງການພົວພັນລະຫວ່າງ ສ.ເກົາຫຼີ - ຈີນ. ກະຊວງການຕ່າງປະເທດ ຈີນ ຖືວ່າ, THAAD ຈະສົ່ງຜົນສະທ້ອນຢ່າງຮ້າຍແຮງເຖິງບັນດາຜົນປະໂຫຍດດ້ານປ້ອງກັນຄວາມສະຫງົບຍຸດທະສາດຂອງບັນດາປະເທດໃນພາກພື້ນ, ໃນນັ້ນລວມມີທັງ ຈີນ. ປະທານປະເທດ ຈີນ, ສືຈິນຜີງ ໄດ້ຮຽກຮ້ອງ ສ.ເກົາຫຼີ ເອົາໃຈໃສ່ເຖິງຄວາມວິຕົກກັງວົນຂອງຈີນ ແລະ “ລະມັດລະວັງ“ ຕໍ່ແຜນການນີ້. ພ້ອມກັບການກ່າວເຕືອນດັ່ງກ່າວ, ປັກກິງ ເລີ່ມຍົກເລີກຖານະສະໜອງບັດເຊີນວີຊາດ້ານການຄ້າໃຫ້ບັນດາວິສາຫະກິດໃຫຍ່ຂອງ ສ.ເກົາຫຼີ, ຮັດແຄບການຄຸ້ມຄອງຕໍ່ກະແສວັດທະນະທຳ ສ.ເກົາຫຼີ ທີ່ພວມແຜ່ລາມຢ່າງກວ້າງຂວາງຢູ່ປະເທດນີ້.ຄວາມບໍ່ລົງລອຍກັນລະຫວ່າງສາມປະເທດບ້ານໃກ້ເຮືອນຄຽງຢູ່ ອາຊີຕາເວັນອອກສ່ຽງເໜືອ ໃນຕະຫຼອດໄລຍະຜ່ານມາ ແມ່ນສາຍເຫດທີ່ພາໃຫ້ການພົບປະຂັ້ນລັດຖະມົນຕີການຕ່າງປະເທດຖືກໂຈະໄວ້ຫຼາຍເທື່ອ. ຫາງສຽງຫວັງວ່າ, ທີ່ກອງປະຊຸມລັດຖະມົນຕີການຕ່າງປະເທດຄັ້ງທີ 8 ນີ້, ບັນດາຝ່າຍຈະມານະພະຍາຍາມຜ່ານຜ່າຄວາມບໍ່ລົງລອຍກັນເພື່ອພ້ອມກັນຮ່ວມມື, ເພື່ອສັນຕິພາບ, ສະຖຽນລະພາບ, ແລະການພັດທະນາຂອງພາກພື້ນ ແລະ ທົ່ວໂລກ.