(vovworld)-ໄຊຊະນະທີ່ຍິ່ງໃຫຍ່ຂອງການປະຕິວັດເດືອນ 8/1945 ໄດ້ພາໄປເຖິງການສະຖາປະນາປະເທດສາທາລະນະລັດ ປະຊາທິປະໄຕ ຫວຽດນາມ, ເຊິ່ງແມ່ນລັດຂອງກຳມະກອນ ຊາວນາ ລັດທຳອິດຢູ່ອາຊີຕາເວັນອອກສ່ຽງໃຕ້ ໃນວັນທີ 2/9/1945, ກ່ອນນີ້ 67 ປີ ເຕັມ, ຄວາມມຸ້ງຫວັງໄດ້ຮັບເອກະລາດ, ເສລີພາບໃນຊຸມວັນລະດູໃບໄມ້ຫຼົ່ນປີ 1945 ນັ້ນ ແມ່ນກຳລັງແຮງເພື່ອໃຫ້ຫວຽດນາມ ຫຼຸດພົ້ນອອກຈາກປະເທດທີ່ເປັນຂ້ອຍຂ້າມາເປັນເວລານັບຮ້ອຍປີ, ລຸກຮຶ້ຂຶ້ນເປັນເຈົ້າຊາຕາກຳຂອງຕົນ ແລະ ສ້າງສິ່ງມະຫັດສະຈັນໃນການສ້າງສາ ແລະ ພັດທະນາປະເທດຊາດໃນທຸກວັນນີ້
ປະທານ Ho Chi Minh ອ່ານຖະແຫຼງປະກາດເອກະລາດໃນວັນທີ 2/9/1945
(ພາບ: google.com.vn)
”ພວກຂ້າພະເຈົ້າ, ລັດຖະບານຊົ່ວຄາວຂອງປະເທດສາທາລະນະລັດ ປະຊາທິປະໄຕຫວຽດນາມ ເປັນກຽດທີ່ໄດ້ຖະແຫຼງໃຫ້ໂລກໄດ້ຮັບຊາບວ່າ ປະເທດຫວຽດນາມ ມີສິດຊົມໃຊ້ເສລີພາບ, ເອກະລາດ ແລະ ຄວາມຈິງຫວຽດນາມ ໄດ້ກາຍເປັນປະເທດເສລີພາບ, ເອກະລາດຢ່າງແທ້ຈິງ, ຊາວຫວຽດນາມ ທັງຊາດຕັດສິນໃຈປະກອບກຳລັງ, ເຫື່ອແຮງ, ຊີວິດ ແລະ ຊັບສົມບັດຂອງຕົນ ເພື່ອຮັກສາຄວາມເສລີພາບ, ເອກະລາດນັ້ນໄວ້…”
ບົດຖະແຫຼງປະກາດເອກະລາດ ໂດຍທ່ານປະທານ ໂຮ່ຈີມິນ ອ່ານທີ່ພິທີໂຮມຊຸມນຸມຢູ່ສະໜາມຫຼວງບາດິ່ງ ປະຫວັດສາດ ເມື່ອວັນທີ 2/9/1945 ສະຖາປະນາປະເທດສາທາລະນະລັດ ປະຊາທິປະໄຕ ຫວຽດນາມ ໄດ້ເປັນການຢັ້ງຢືນໄຊຊະນະຢ່າງສົມບູນຂອງການປະຕິວັດເດືອນ 8/1945, ສ້າງພື້ນຖານປະຊາທິປະໄຕ, ຢັ້ງຢືນສິດທິມະນຸດ, ຄວາມມຸ້ງຫວັງໄດ້ຮັບເອກະລາດ, ເສລີພາບຂອງຊາດຫວຽດນາມ. ສາສະດາຈານ Van Tao, ອະດີດຫົວໜ້າສະຖາບັນປະຫວັດສາດຫວຽດນາມ, ຖືວ່າ ຄວາມມຸ້ງຫວັງໄດ້ຮັບເອກະລາດ, ເສລີພາບ ແມ່ນແຫຼ່ງກຳລັງທີ່ດຶງດູດຊາວຫວຽດນາມ ທຸກຄົນລຸກຮຶ້ຂຶ້ນຍາດເອົາອຳນາດການປົກຄອງເພື່ອສ້າງພື້ນຖານເອກະລາດ:
”ການປະຕິວັດເດືອນ 8 ແມ່ນການປະຕິວັດຂະໜາດໃຫຍ່, ເປັນໜຶ່ງດຽວໃນປະຫວັດສາດຫວຽດນາມ, ອັນໄດ້ສ້າງເປັນຂີດໝາຍຢ່າງເລິກເຊິ່ງ. ຄວາມໝາຍອັນໃຫຍ່ຫຼວງຂອງການປະຕິວັດເດືອນ 8 ນັ້ນ, ແມ່ນການປະຕິວັດໄດ້ນຳຫວຽດນາມຈາກປະເທດທີ່ເປັນຂ້ອຍຂ້າກາຍເປັນປະເທດເສລີພາບ, ເອກະລາດ, ຫຼັງຈາກນັ້ນແມ່ນສືບຕໍ່ປ່ຽນແປງລະບອບສັງຄົມ, ຈາກສັງຄົມຫົວເມືອງຂຶ້ນສັກດີນາ ກ້າວຂຶ້ນສູ່ສັງຄົມປະຊາທິປະໄຕ ປະຊາ ຊົນ, ປະຈຸບັນແມ່ນຕາມກຳນົດທິດສັງຄົມນິຍົມ”
(ພາບ: google.com.vn)
ວັນທີ 2/9/1945, ໄດ້ໄຂສັງກາດໃໝ່ແຫ່ງເອກະລາດ, ເສລີພາບ ແລະ ພັດທະນາໃຫ້ແກ່ປະເທດຫວຽດນາມ. ອຳນາດການປົກຄອງໃໝ່ໄດ້ນຳມາເຊິ່ງບັນດາສິດຜົນປະໂຫຍດໃຫ້ແກ່ປະຊາຊົນ. ຕໍ່ຈາກນັ້ນ, ພາຍຫຼັງການເລືອກຕັ້ງທົ່ວປະເທດຄັ້ງທຳອິດເມື່ອປີ 1946 ຢ່າງເສລີ ແລະ ປະຊາທິປະໄຕນັ້ນ, ລັດຖະບານປະຕິວັດຊົ່ວຄາວ ໄດ້ກາຍເປັນລັດຖະບານຂອງປະເທດສາທາລະນະລັດ ປະຊາທິປະໄຕ ຫວຽດນາມ, ໂດຍປະຊາຊົນເລືອກຕັ້ງ, ເຊິ່ງລວມມີຫຼາຍພາກສ່ວນ, ທີ່ເປັນຕົວແທນໃຫ້ແກ່ປະຊາຊົນ ທຸກຊັ້ນວັນນະໃນສັງຄົມ, ຕໍ່ສູ້ເພື່ອສິດຜົນປະໂຫຍດຂອງທັງຊາດຫວຽດນາມ. ອຳນາດການປົກຄອງປະຕິວັດໄດ້ດຶງດູດການສະໜັບສະໜູນຂອງທົ່ວປວງຊົນ, ແລະ ໄດ້ຮັບການປົກປ້ອງຈາກປະຊາຊົນ ເພາະວ່າມັນຖືກກັບຈິດໃຈຂອງປະຊາຊົນ. ທະນາຍຄວາມ Luu Van Dat, ແມ່ນປັນຍາຊົນຜູ້ມີຊື່ສຽງຢູ່ຫວຽດນາມ, ເນັ້ນໜັກວ່າ:
”ສິ່ງທີ່ຂ້າພະເຈົ້າພໍໃຈທີ່ສຸດ ແມ່ນນ້ຳໃຈມະຫາສາມັກຄີທົ່ວປວງຊົນທັງຊາດ, ແລະ ການນັບຖືຜູ້ທີ່ມີຄວາມເກັ່ງກ້າສາມາດຂອງປະທານ ໂຮ່ຈີມິນ. ລຸງໂຮ່ເວົ້າວ່າຜູ້ໃດມີຄວາມສຸດຈິດສຸດໃຈແມ່ນຈະຮັບມາເຮັດວຽກເພື່ອຊ່ວຍປະຊາຊົນ, ຊ່ວຍປະເທດຊາດ. ໃນເວລານັ້ນສະມາຊິກພັກແມ່ນມີໜ້ອຍ, ແຕ່ເຂົາເຈົ້າລ້ວນແຕ່ສະໜັບສະໜູນລຸງໂຮ່, ສະໜັບສະໜູນຫວຽດມິນ ແລະ ພັກ. ເປັນຍາຊົນໃນເວລານັ້ນສ່ວນຫຼາຍແມ່ນຢູ່ພາຍໃຕ້ຄັນທຸງຂອງປະທານໂຮ່ຈີມິນ, ເຂົາເຈົ້າພ້ອມແລ້ວທີ່ຈະເຮັດວຽກງານທຸກຢ່າງເພື່ອຜົນປະໂຫຍດຂອງປະເທດຊາດ”
ພ້ອມກັບຄວາມມຸ້ງຫວັງຢາກໄດ້ຮັບເສລີພາບຂອງປະຊາຊົນ, ປະທານໂຮ່ຈີມິນໄດ້ປຸກລຸກຈິດໃຈຍົກຍ້ອງປະເທດຊາດ, ຫັນຄວາມມຸ້ງຫວັງຢາກໄດ້ຮັບເອກະລາດ, ເສລີພາບເປັນແຫຼ່ງກຳລັງ ເພື່ອສ້າງສາ ແລະ ປົກປັກຮັກສາປະເທດ ສາທາລະນະລັດ ປະຊາທິປະໄຕ ຫວຽດນາມ. ກຸ່ມກ້ອນມະຫາສາມັກຄີທົ່ວປວງຊົນທັງຊາດໄດ້ຮັບການກໍ່ສ້າງຂຶ້ນຢ່າງກວ້າງຂວາງ ແລະ ໄດ້ເສີມຂະຫຍາຍກຳລັງແຮງອັນໃຫຍ່ຫຼວງໃນການຕໍ່ສູ້ຕ້ານເສິກຕ່າງດ້າວຂອງຊາດຫວຽດນາມໃນໄລຍະຕໍ່ມາ. ພິເສດ, ບັນດາຜົນງານທີ່ສຳຄັນ ແລະ ມີຄວາມໝາຍປະຫວັດສາດຂອງຊຸມປີແຫ່ງການປ່ຽນໃໝ່ຫວ່າງແລ້ວນີ້, ໄດ້ຊ່ວຍໃຫ້ຫວຽດນາມຫຼຸດພົ້ນອອກຈາກປະເທດທີ່ຫຼ້າຫຼັງ, ດ້ອຍພັດທະນາ. ສາດສະດາຈານ Le Mau Han ຖືວ່າ, ຄວາມມຸ້ງຫວັງຢາກມີເສລີພາບ, ເອກະລາດໃນການປະຕິວັດເດືອນ 8 ແລະ ວັນສະຖາປະນາປະເທດເມື່ອປີ 1945 ໄດ້ກາຍເປັນແຫຼ່ງກຳລັງເພື່ອພັດທະນາປະເທດໃນປະຈຸບັນ:
”ໄຊຊະນະຂອງການປະຕິວັດເດືອນ 8/1945 ແມ່ນໄຊຊະນະຂອງແນວຄິດລັດແຫ່ງອຳນາດນິຕິບັນຍັດ ຕາມແນວຄິດ ໂຮ່ຈີມິນ ໂດຍພັກກອມມູນິດຫວຽດນາມ ເປັນຜູ້ຈັດຕັ້ງ ແລະ ນຳພາ. ນັ້ນແມ່ນໄຊຊະນະຂອງແນວຄິດ ຊົນຊາດ ແລະ ຄວາມສະເໝີພາບ, ຊົນຊາດ ແລະ ຄວາມມະຫາສາມັກຄີ. ນັ້ນແມ່ນບົດຮຽນທີ່ມີຄວາມໝາຍພິເສດ ໃນຂະນະທີ່ປະຈຸບັນ, ພວກເຮົາພວມຕັ້ງບັນຫາຕ້ອງຕັ້ງໜ້າເສີມຂະຫຍາຍສິດເສລີ, ປະຊາທິປະໄຕຂອງປະຊາຊົນ ເພື່ອປະຕິບັດພາລະກິດປ່ຽນແປງໃໝ່ຢ່າງມີໄຊ”
67 ປີ ພາຍຫຼັງລະດູໃບໄມ້ຫຼົ່ນແຫ່ງການປະຕິວັດເດືອນ 8/1945 ແລະ ວັນສະຖາປະນາປະເທດ, ບົດຮຽນກ່ຽວກັບການກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເສີມຂະຫຍາຍຈິດໃຈເອກະລາດ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ເພື່ອສ້າງສາ ແລະ ປົກປັກຮັກສາປະເທດຊາດໃນຊຸມເດືອນປີອັນພິລະອາດຫານນັ້ນ ຍັງຄົງຮັກສາຄຸນຄ່າເດີມໄວ້ໄດ້. ຄວາມມຸ້ງຫວັງກ່ຽວກັບເອກະລາດ, ເສລີພາບໃນລະດູໃບໄມ້ຫຼົ່ນປີ 1945 ນັ້ນ ຈະສືບຕໍ່ແມ່ນເຂັມຊີ້ທິດ, ເປັນແຫຼ່ງປຸກລຸກບັນດາແນວຄິດທີ່ກ້າວໜ້າ, ບັນດານະໂຍບາຍປ່ຽນໃໝ່, ລະດົມກຳລັງແຮງຈາກປະຊາຊົນເພື່ອພັດທະນາປະເທດຊາດ ແລະ ເຊື່ອມໂຍງ.