1 ປີໄດ້ຜ່ານພົ້ນໄປ ນັບຕັ້ງແຕ່ມື້ ອາເມລິການຳໜ້າກຳລັງທະຫານປະສົມ ປຸກລະດົມການສູ້ຮົບທີ່ມີຂອບຂະໜາດໃຫຍ່ເພື່ອຕ້ານກຳລັງລັດອິດສະລາມ IS ໂດຍຂະໜານນາມເອງ. ເຖິງວ່າໄດ້ສິ້ນເປືອງເງິນນັບຕື້ USD ໃຫ້ແກ່ການສູ້ຮົບນີ້ແລ້ວ ກໍຕາມ, ແຕ່ເບິ່ງຄືວ່າ IS ຍັງຄົງສືບຕໍ່ເພີ່ມທະວີກຳລັງແຮງ ແລະ ກຳລັງທະຫານປະສົມຕ້ອງສືບຕໍ່ຜັນຂະຫຍາຍບັນດາມາດຕະການແກ້ໄຂໃໝ່ເພື່ອປ່ຽນແປງທ່າສະໜາມນີ້.
(ພາບປະກອບ) |
ອາເມລິກາ ແລະ ກຳລັງທະຫານປະສົມໄດ້ເລີ່ມດຳເນີນການສູ້ຮົບຕ້ານກຳລັງລັດອິດສະລາມ IS ໂດຍຂະໜານນາມເອງ ຊຶ່ງແມ່ນກຸ່ມກໍ່ການຮ້າຍໃໝ່ຢູ່ອີຣັກ ແລະ ຊີຣີ ໃນທ້າຍປີ 2014 ແລະ ມາຮອດປະຈຸບັນ ໄດ້ດຳເນີນການບຸກໂຈມຕີທາງອາກາດ 6000 ຄັ້ງທີ່ແນໃສ່ IS. ຕະຫຼອດ 1 ປີທີ່ຜ່ານມາ, ອາເມລິກາໄດ້ຈ່າຍເງິນປະມານ 3,5 ຕື້ USD, ຊຶ່ງຍັງບໍທັນຄິດໄລເຖິງເງິນໃຊ້ຈ່າຍໃນການຊ່ວຍຝຶກແອບ ແລະ ໃຫ້ຄຳປຶກສາແກ່ບັນດາກຳລັງຢູ່ອີຣັກເພື່ອຮັບມື້ກັບກຸ່ມກໍ່ການຮ້າຍນີ້. ເຖິງຢ່າງໃດກໍຕາມ, ໝາກຜົນແຫ່ງການສູ້ຮົບນີ້ ແມ່ນຍັງບໍ່ທັນບັນດາລຸຕາມຄວາມຫວັງເທື່ອ.
IS ນັບມື້ນັບເປີດກ້ວາງການສົ່ງຜົນສະທ້ອນ
ຕາມການຄິດໄລແລ້ວ, ການບຸກໂຈມຕີທາງອາກາດຄັ້ງຕ່າງໆຂອງກຳລັງທະຫານປະສົມໄດ້ດັບສູນມືປືນ IS ນັບພັນຄົນ ແລະ ຮັດແຄບເນື້ອທີ່ເຂດດິນແດນທີ່ IS ຄວບຄຸມຢູ່ອີຣັກ ແລະ ຊີຣີລົງປະມານ 30%. ແຕ່ອາເມລິກາ ແລະ ພັນທະມິດກໍບໍ່ສາມາດປະຕິບັດໄດ້ຢ່າງງ່າຍດາຍໃນເປົ້າໝາຍ “ດັບສູນ IS ເຖິງກົກເຖິງຮາກ” ຂະນະທີ່ບັນດາທີ່ຕັ້ງຍຸດທະສາດຖືກຕົກຢູ່ໃນກຳມືຂອງ IS ແລະ ອົງການນີ້ໄດ້ເປີດກ້ວາງຂອບເຂດທຳສົງຄາມອອກສູ່ຫຼາຍພາກພື້ນໃນໂລກ. ເກືອບ 1 ປີ ພາຍຫຼັງທີ່ໄດ້ຢຶດຄອງນະຄອນໂມຊູນຊຶ່ງແມ່ນນະຄອນຍຸດທະສາດທຳອິດຢູ່ພາກເໜືອອີຣັກ, ສີທຸງດຳຂອງ IS ໄດ້ປະກົດຕົວຢູ່ນະຄອນຍຸດທະສາດອື່ນ ນັ້ນແມ່ນ ຣາມາດີ ຫ່າງຈາກນະຄອນຫຼວງແບກແດດໄປທາງທິດຕາເວັນຕົກພຽງປະມານ 100 ກິໂລແມັດ. ສ່ວນຢູ່ຊີຣີ, ຊຶ່ງແມ່ນປະເທດພວມຕົກຢູ່ໃນສົງຄາມກາງເມືອງນັ້ນ,ນະຄອນ ປານມີຣາ ແລະ ດ່ານກວດກາຊາຍດ່ານແຫ່ງສຸດທ້າຍຕິດກັບອີຣັກ ກໍຖືກຕົກຢູ່ໃນກຳມືຂອງພວກລຸກຮື້ຂືຶ້ນ. ເບິ່ງຄືວ່າ ລັດອິດສະລາມ IS ໂດຍຂະໜານນາມເອງ ພວມຢູ່ໃນທ່າຫັນເປົ້າໝາຍໃຫ້ປະກົດຜົນເປັນຈິງກ່ຽວກັບລັດອິດສະລາມດ້ວຍບັນດາພື້ນຖານທີ່ຈຳເປັນຄື ຜືນແຜ່ນດິນ, ກອງທັບ ແລະ ແຫຼ່ງການເງິນຈາກນ້ຳມັນ. ເພື່ອສະກັດກັ້ນໄພອັນຕາລາຍນີ້, ອາເມລິກາ ແລະ ບັນດາປະເທດພັນທະມິດ ບໍ່ມີວິທີໃດໆນອກເໜືອຈາກວິທີຕ້ອງປ່ຽນແປງຍຸດທະສາດ, ເພາະບັນຫາຢູ່ນີ້ ບໍ່ພຽງແຕ່ແມ່ນເພື່ອຕ້ານຄືນພວກລຸກຮື້ຂຶ້ນອີກແລ້ວ, ຫາກມັນໄດ້ກາຍເປັນກຳລັງທີ່ມີການຈັດຕັ້ງທີ່ດີພໍສົມຄວນເມື່ອທຽບໃສ່ບັນດາກຸ່ມຫົວຮຸນແຮງທີ່ພວມເຄື່ອນໄຫວໃນປະຈຸບັນ.
ປ່ຽນແປງທ່າສະໜາມສູ້ຮົບ
ບາດລ້ຽວໜຶ່ງຂອງການສູ້ຮົບ, ນັ້ນແມ່ນໃນມໍ່ໆມານີ້, ຕວກກີ ໄດ້ຕົກລົງຮ່ວມມືກັບ ອາເມລິກາ ແລະ ເຂົ້າຮ່ວມການສູ້ຮົບຢ່າງຮອບດ້ານພາຍຫຼັງບໍ່ເຂົ້າຮ່ວມສຳພັນທະມິດສູ້ຮົບຕ້ານ IS ເປັນເວລາຫຼາຍເດືອນ. ນອກຈາກນັ້ນ, ເຖິງວ່າ ອາເມລິກາໄດ້ຖະແຫຼງຫຼາຍຄັ້ງວ່າ ບໍ່ຜັນຂະຫຍາຍທະຫານບົກໄປຍັງຕາເວັນອອກກາງເພື່ອເຂົ້າຮ່ວມຕ້ານ IS ໂດຍກົງກໍຕາມ, ແຕ່ໃນມໍ່ໆມານີ້, ທຳນຽບ 5 ແຈໄດ້ຈັດສົ່ງເຮືອບິນສູ້ຮົບ F6 ຈຳນວນ 6 ລຳ ແລະ ພົນທະຫານເກືອບ 300 ຄົນໄປຍັງຖານທີ່ໝັ້ນທັບອາກາດ Incirlik ຂອງຕວກກີເພື່ອ ປ່ຽນແປງທ່າສະໜາມສູ້ຮົບນີ້. ອຳນາດການປົກຄອງຂອງປະທານາທິບໍດີ Barak Obama ໄດ້ຖະແຫຼງວ່າ ສືບຕໍ່ປະຕິບັດໂຄງການລວມມູນຄ່າ 500 ລ້ານ USD ເພື່ອຝຶກແອບໃຫ້ມືປືນຝ້າຍຄ້ານ ຊີ້ຣີ້ ຈຳນວນ 5400 ຄົນ ໃນຮອບເວລາ 3 ປີເພື່ອຕໍ່ສູ້ຕ້ານ IS. ຕາມຂ່າວຫຼ້າສຸດເມື່ອວັນທີ 12/8, ອາເມລິກາໄດ້ເລີ່ມຜັນຂະຫຍາຍ ການບຸກໂຈມຕີທາງອາກາດຄັ້ງຕ່າງໆເພື່ອຕ້ານພວກກໍ່ການຮ້າຍ IS ດ້ວຍການນຳໃຊ້ບັນດາເຮືອບິນມີຄົນຂັບຊຶ່ງລະດົມຈາກ ຖານທີ່ໝັ້ນທັບອາກາດ Incirlik ຂອງຕວກກີ.
ການສູ້ຮົບຂອງກຳລັງທະຫານປະສົມຕ້ານ IS ນັບມື້ນັບປະສົບຄວາມຫຍຸ້ງຍາກ
ໃນຂະນະທີ່ບັນດາບັ້ນບຸກໂຈມຕີທາງອາກາດຂອງກຳລັງທະຫານປະສົມໂດຍອາເມລິການຳໜ້າທີ່ແນໃສ່ IS ຍັງບໍ່ທັນສະແດງໃຫ້ເຫັນມີປະສິດທິຜົນນັ້ນ, ອາເມລິກາ ແລະ ບັນດາປະເທດພັນທະມິດໄດ້ປະສົບກັບຄວາມລະແວງສົງໄສບໍ່ໜ້ອຍກ່ຽວກັບເປົ້າໝາຍແທ້ຈິງຂອງການສູ້ຮົບນີ້. ລັດຖະບານຊີຣີ ຖະແຫຼງວ່າ ສະໜັບສະໜູນບັນດາຄວາມມານະພະຍາຍາມຕ້ານ IS, ແຕ່ດ້ວຍເງື່ອນໄຂຕ້ອງມີການສົມທົບ ແລະ ທາບທາມຄຳເຫັນຂອງເຂົາເຈົ້າ. ສ່ວນລັດເຊຍ ກໍໄດ້ຮຽກຮ້ອງອາເມລິກາຈົ່ງຮ່ວມມືກັບປະທານາທິບໍດີຊີຣີ Bashar al-Assad ເພື່ອຮັບມືກັບ IS, ພ້ອມທັງຖືວ່າ ຈຳເປັນຕ້ອງສ້າງຕັ້ງສຳພັນທະມິດສາກົນ ໂດຍເຕົ້າໂຮມທຸກໆກຳລັງທີ່ຖື IS ແມ່ນສັດຕູຮ່ວມ. ໃນຂະນະນັ້ນ, ອາເມລິກາ ແລະ ບາງປະເທດໃນພາກພື້ນ ເດັດດຽວບໍ່ຍອມຮັບປະທານາທິບໍດີຊີຣີ Bashar al-Assad ແມ່ນຄູ່ຮ່ວມມືໃນການສູ້ຮົບຕ້ານພວກກໍ່ການຮ້າຍ IS.
ເລື່ອງອາເມລິກາ ແລະ ຕວກກີຮ່ວມມືກັນໃນ ການສູ້ຮົບຕ້ານ IS ອາດຈະຊ່ວຍອາເມລິກາມີເງື່ອນໄຂສະດວກກວ່າໃນການຜັນຂະຫຍາຍບັນດາການບຸກໂຈມຕີທາງອາກາດບົນສະໜາມຮົບຕ້ານພວກກໍ່ການຮ້າຍ. ແຕ່ການບໍ່ຍອມຮັບບົດບາດຂອງລັດຖະບານຊີຣີໃນການສູ້ຮົບນີ້ ຈະເຮັດໃຫ້ກຳລັງທະຫານປະສົມຍາກທີ່ຈະຍາດໄດ້ໄຊຊະນະຕໍ່ໜ້າ IS ທີ່ນັບມື້ນັບເປັນອັນຕະລາຍ. ເລື່ອງລັດເຊຍ ແລະ ອີຣານພວກຊຸກຍູ້ແຜນການໃໝ່, ໃນນັ້ນສະເໜີໃຫ້ເຊື້ອເຊີນທຸກໆຝ່າຍ ລວມທັງກອງທັບຊີຣີ, ບັນດາກຸ່ມກຳລັງປະກອບອາວຸດ ແລະ ນັບທັງກຳລັງຊາວເຄີດ ພ້ອມກັນເຂົ້າຮ່ວມການເຈລະຈາ, ແມ່ນໄດ້ຮັບການຕີລາຄາວ່າ ແມ່ນວິທີການແກ້ໄຂທີ່ສາມາດປະຕິບັດໄດ້ ແນໃສ່ແກ້ໄຂວິກິດການຊີຣີ, ອັນໄດ້ນຳມາເຊິ່ງກາລະໂອກາດ ສ້າງບາດກ້າວບຸກທະລຸບົນສະໜາມຮົບຕ້ານ IS ຊຶ່ງຄາດຄະເນວ່າ ຍັງຈະເຕັມໄປດ້ວຍຄວາມລຳບາກ .