(vovworld) - ວັນທີ 7/9, ຢູ່ ນະຄອນ Vladivostok ຂຶ້ນກັບພາກຕາເວັນອອກໄກຂອງສະຫະພັນລັດເຊຍ ໄດ້ດຳເນີນກອງປະຊຸມສຸດຍອດວິສາຫະກິດ APEC 2012 (CEO Summit) ພາຍໃຕ້ຫົວຂໍ້ວ່າ: “ແກ້ໄຂສິ່ງທ້າທາຍ, ເປີດກວ້າງຄວາມສາມາດ ຮ່ວມມື”. ນີ້ແມ່ນກອງປະຊຸມສຳຄັນໃນຂອບເຂດສັບປະດາຂັ້ນສູງ APEC 2012 ເຊິ່ງແມ່ນສະຖານທີ່ພົບປະຂອງບັນດາການນຳວິສາຫະກິດຊັ້ນນຳໃນພາກພື້ນ ເພື່ອປຶກສາຫາລືຊອກຫາກາລະໂອກາດການຮ່ວມມືລະຫວ່າງບັນດາສະມາຊິກ. ເນື່ອງໃນໂອກາດນີ້ ທ່ານປະທານປະເທດ ຫວຽດນາມ Truong Tan Sang ໄດ້ມີສານສົ່ງເຖິງກອງປະຊຸມ.
ພິທີຕ້ອນຮັບປະທານປະເທດ Truong Tan Sang ສະຫນາມບິນVladivostok
ພາບ: internet |
ສານຂອງທ່ານປະທານປະເທດ ຫວຽດນາມ Truong Tan Sang ຢູ່ APEC CEO Summit ໄດ້ເນັ້ນຫນັກວ່າ: ບັນດາສະມາຊິກ APEC ພວມພ້ອມກັນແບ່ງປັນຜົນປະໂຫຍດ ແລະ ຄວາມຮັບຜິດຊອບລວມອັນໃຫຍ່ຫລວງ. ນັ້ນແມ່ນຍູ້ແຮງການຮ່ວມສຳພັນດ້ານເສດຖະກິດ, ຮັກສາສັນຕິພາບ, ສະຖຽນລະພາບ, ການຮ່ວມມື ແລະ ຄວາມວັດທະນາຖາວອນ ຢູ່ ພາກພື້ນ ອາຊີ ປາຊີຟີກ. ສືບຕໍ່ຮັກສາບົດບາດນຳຫນ້າຂອງອາຊີ ປາຊີຟີກ ໃນວິວັດທະນາການຟື້ນຕົວຂອງພື້ນຖານເສດຖະກິດທົ່ວໂລກ; ຫນູນຊ່ວຍບັນດາພື້ນຖານເສດຖະກິດສະມາຊິກຟື້ນຕົວ ແລະ ພັດທະນາໃນສະພາວະເສດຖະກິດໂລກຍັງຂາດສະຖຽນລະພາບ. ນອກນັ້ນ, ພ້ອມກັນຮັບມືກັບສິ່ງທ້າທາຍທີ່ມີຕໍ່ການພັດທະນາແບບຍືນຍົງ ແລະ ວັດທະນາຖາວອນຂອງພາກພື້ນ ແລະ ທົ່ວໂລກ, ຄື: ການປ່ຽນແປງຂອງດິນຟ້າອາກາດ, ຄ້ຳປະກັນດ້ານສະບຽງອາຫານ, ປ້ອງກັນ ແລະ ຕ້ານໄພທຳມະຊາດ, ສະພາບຊັບພະຍາກອນເຫືອດແຫ້ງ, ຄວາມຜິດໂຕນລະດັບພັດທະນາ…
ທ່ານປະທານປະເທດ Truong Tan Sang ຢືນຢັນວ່າ: ໃນສະພາບສາກົນ ແລະ ພາກພື້ນສືບຕໍ່ມີການຫັນປ່ຽນຢ່າງວອ່ງໄວ ແລະ ຍາກທີ່ຄາດຄະເນລ່ວງຫນ້າໄດ້, ຫວຽດນາມມີຜົນປະໂຫຍດ ແລະ ປາດຖະຫນາຈະມານະພະຍາມຍາມຈົດສຸດຄວາມສາມາດຂອງຕົນພ້ອມກັບບັນດາສະມາຊິກ APEC ແບກຫາບຄວາມຮັບຜິດຊອບລວມດັ່ງກ່າວ.
“ຫວຽດນາມ ພວມກ້າວເຂົ້າສູ່ໄລຍະຍຸດທະສາດພັດທະນາໃຫມ່, ສືບຕໍ່ປ່ຽນແປງໃຫມ່ຢ່າງຮອບດ້ານ, ສ້າງໂຄງປະກອບພື້ນຖານເສດຖະກິດຄືນໃຫມ່ ແລະ ເປັນເຈົ້າການ, ຕັ້ງຫນ້າເຊື່ອມໂຍງເຂົ້າກັບສາກົນຢ່າງເລິກເຊິ່ງ ແລະ ກວ້າງຂວາງ, ໃນນັ້ນ ການເຊື່ອມໂຍງເສດຖະກິດແມ່ນພື້ນຖານເພື່ອຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ.ສະນັ້ນ ອາຊີ ປາຊີຟີກ ເວົ້າລວມ ແລະ ເວທີປາໄສ APEC ເວົ້າສະເພາະ ນັບມື້ນັບມີຄວາມໝາຍສຳຄັນພິເສດສຳລັບ ຫວຽດນາມ. ນີ້ແມ່ນພາກພື້ນ ຍາມໃດກໍຕິດພັນຢ່າງແຫນ້ນແຟ້ນກັບການພັດທະນາຂອງ ຫວຽດນາມໃນທຸກດ້ານເຊັ່ນເສດຖະກິດ, ການຕ່າງປະເທດ, ຄວາມໝັ້ນຄົງ ແລະ ພັດທະນາ. ຄູ່ຮ່ວມມືສ່ວນຫລາຍທີ່ຫວຽດນາມໄດ້ສ້າງການພົວພັນຄູ່ຮ່ວມມືຍຸດທະສາດ ຫລື ມີລະດັບ ຍຸດທະສາດສຳຄັນສຳລັບ ຫວຽດນາມ ຢູ່ ອາຊີ ປາຊີຟີກ.”
ກ່ຽວກັບການຮ່ວມມືຢ່າງແຫນ້ນແຟ້ນລະຫວ່າງພາກພື້ນ ອາຊີ - ປາຊີຟີກ ກັບ ຫວຽດນາມ, ທ່ານປະທານປະເທດ Truong Tan Sang ຊີ້ແຈງວ່າ: ນີ້ແມ່ນພາກພື້ນທີ່ມີການລົງທຶນໂດຍກົງຫລາຍກວ່າໝູ່ ດ້ວຍ 65% ຍອດຈຳນວນເງິນລົງທຶນຂອງຕ່າງປະເທດ, ກວມ 60% ມູນຄ່າການນຳເຂົ້າ ແລະ 75% ຈຳນວນນັກທ່ອງທ່ຽວຕ່າງປະເທດມາ ຫວຽດນາມ. ທ່ານປະທານປະເທດ Truong Tan Sang ຢືນຢັນວ່າ: ຫນຶ່ງໃນບັນດາການກຳນົດທິດນະໂຍບາຍໃຫຍ່ຂອງ ຫວຽດນາມ ແມ່ນການປະກອບສ່ວນປັບປຸງບັນດາກົນໄກການຮ່ວມມື, ຮ່ວມສຳພັນທາງດ້ານເສດຖະກິດຫລາຍຝ່າຍ, ຈາກອະນຸພາກພື້ນແມ່ນ້ຳຂອງຕະຫລອດຮອດພາກພື້ນອາຊີຕາເວັນອອກສຽງໃຕ້, ເວທີປາໄສ APEC ແລະ ນັບທັງອາຊີ - ປາຊີຟີກ.
“ຫວຽດນາມ ພວມສຸມໃສ່ຜັນຂະຫຍາຍບັນດາຄຳໝັ້ນສັນຍາ, ບັນດາໂຄງການຫັນການຄ້າ, ການລົງທຶນ, ບໍລິການເປັນເສລີ ແລະ ສະດວກ, ເຊື່ອມຈອດພາກພື້ນ ເພື່ອສ້າງປະຊາຄົມ ອາຊຽນ, ຮ່ວມສຳພັນດ້ານເສດຖະກິດ ອາຊຽນ ກັບຄູ່ຮ່ວມມື, ປະຕິບັດຈຸດໝາຍ Bogor. ສັນຍາການຄ້າເສລີ FTA 11 ສະບັບໃນຈຳນວນ 13 ສະບັບ ຊື່ງ ຫວຽດນາມ ໄດ້ລົງນາມ ພວມ ແລະຈະເຈລະຈາແມ່ນບັນດາຄູ່ຮ່ວມມືນອນໃນພາກພື້ນ. ພວກຂ້າພະເຈົ້າພວມພ້ອມກັບບັນດາສະມາຊິກຕັ້ງຫນ້າເຂົ້າຮ່ວມການເຈລະຈາສັນຍາການພົວພັນຄູ່ຮ່ວມມືເສດຖະກິດຍຸດທະສາດເຂດປາຊີຟີກ (TPP), ຫວ່າງແລ້ວນີ້ ໄດ້ເລີ່ມເຈລະຈາສັນຍາ FTA ກັບ ສເກົາຫລີ, ຈະເລີ່ມເຈລະຈາສັນຍາ FTA ກັບສະຫະພັນພາສີ ລັດເຊຍ Belarus - Kazakhstanໃນໄລຍະຈະມາເຖິງ.”
ທ່ານປະທານປະເທດ Truong Tan Sang ເຂົ້າຮ່ວມກອງປະຊຸມ APEC 20
ພາບ: TTXVN |
ທ່ານປະທານປະເທດ Truong Tan Sang ເນັ້ນຫນັກວ່າ ນີ້ແມ່ນບັນດາພື້ນຖານເພື່ອໃຫ້ ຫວຽດນາມ ເປີດກວ້າງການຮ່ວມມື,ຮ່ວມສຳພັນໃນພາກພື້ນຂຶ້ນສູ່ລະດັບສູງໃຫມ່ ແລະ ເຂົ້າຮ່ວມລະບົບສະຫນອງພາກພື້ນຢ່າງເລິກເຊິ່ງ, ກວ້າງຂວາງກວ່າ ແລະ ສິ່ງສຳຄັນແມ່ນເພື່ອປະກອບສ່ວນຮັກສາການພັດທະນາຢ່າງຂະຫຍັນຂັນເຄື່ອນຂອງ ອາຊີ ປາຊີຟີກ. ຢູ່ພາຍໃນປະເທດ, ຫວຽດນາມ ພວມມານະພະຍາຍາມເພື່ອຮັກສາເສດຖະກິດມະຫາພາກໃຫ້ເປັນປົກກະຕິ, ຮັກສາທ່າເຕີບໂຕຢ່າງເໝາະສົມ ແລະ ຜັນຂະຫຍາຍແຜນການສັງລວມສ້າງໂຄງປະກອບພື້ນຖານເສດຖະກິດຄືນໃຫມ່. ຫວຽດນາມ ພວມຕັ້ງຫນ້າຊອກຫາບັນດາມາດຕະການເພື່ອສ້າງໂຄງປະກອບການລົງທຶນຂອງລັດ, ບັນດາກຸ່ມບໍລິສັດ, ບໍລິສັດໃຫຍ່ແຫ່ງລັດຄືນໃຫມ່, ແລະ ລະບົບທະນາຄານການຄ້າ, ບັນດາອົງການການເງິນ, ພ້ອມທັງຕັດສິນໃຈຕ້ານການສໍ້ລາດບັງຫລວງ, ຍູ້ແຮງການປະຕິຮູບດ້ານບໍລິຫານເພື່ອເພີ່ມລັກສະນະໝັ້ນຄົງ, ນະໂຍບາຍເສດຖະກິດໂປ່ງໃສ, ປັບປຸງກົນໄກດ້ານກົດໝາຍແກ່ການລົງທຶນດຳເນີນທຸລະກິດໃຫ້ສົມບູນແບບ.
ທ່ານປະທານປະເທດ Truong Tan Sang ໄດ້ຢືນຢັນວ່າ: ໃນໄລຍະທາງ 25 ປີ ແຫ່ງກິດຈະການປ່ຽນແປງໃຫມ່ຜ່ານມາ, ຍາມໃດບັນດາປະເທດສະມາຊິກ APEC ກໍຮ່ວມເດີນທາງກັບ ຫວຽດນາມ. ໃນໄລຍະສຳຄັນປະຈຸບັນ ແລະ ໄລຍະຈະມາເຖິງ,ຫວຽດນາມ ປາດຖະຫນາຢາກສືບຕໍ່ໄດ້ຮັບການຫນູນຊ່ວຍໃຫຍ່ຫລວງຈາກປະຊາຄົມໂລກ, ເປັນຕົ້ນແມ່ນການປະກອບຄຳຄິດຄຳເຫັນໃສ່ນະໂຍບາຍ, ຂໍ້ສະເຫນີ ແລະ ພ້ອມກັນຜັນຂະຫຍາຍບັນດາມາດຕະການລະອຽດ. ຫວຽດນາມ ໃຫ້ຄຳໝັ້ນສັນຍາ ວ່າ ໄດ້,ພວມ ແລະ ຈະເຮັດຈົນສຸດຄວາມສາມາດຂອງຕົນ ເພື່ອສ້າງສະພາບແວດລ້ອມຢ່າງສະດວກ, ໂປ່ງໃສທີ່ສຸດເພື່ອໃຫ້ປະຊາຄົມວິສາຫະກິດບັນດາປະເທດສະມາຊິກ APEC ທຳມາຫາກິນ, ດຳເນີນທຸລະກິດຢ່າງມີປະສິດທິຜົນຢູ່ ຫວຽດນາມ.ເພາະວ່າ ຫວຽດນາມ ມີການເຕີບໂຕ, ຄວາມວັດທະນາຖາວອນ ຈະປະກອບສ່ວນສ້າງຄວາມຂະຫຍັນຂັນເຄື່ອນ, ວັດທະນາຖາວອນລວມຂອງພາກພື້ນ, ນອກນັ້ນ ຫວຽດນາມ ມີການຈະເລີນເຕີບໂຕ, ວັດທະນາຖາວອນ ກໍ່ຈະນຳມາເຊິ່ງຜົນປະໂຫຍດໃຫ້ແກ່ບັນດາວິສາຫະກິດ APEC ເອງ.
Hoang Dung