ທ່ານນາຍົກລັດຖະມົນຕີຍີປຸ່ນ Shinzo Abe (ພາບ : internet)
|
ພາຍຫຼັງຖືກໂຈະໄວ້ຄັ້ງໜຶ່ງ, ວັນທີ 21/2, ທ່ານນາຍົກລັດຖະມົນຕີຍີປຸ່ນ Shinzo Abe ໄດ້ທຳການຢ້ຽມຢາມອາເມລິກາເປັນເວລາ 3 ວັນ ແນໃສ່ປັບປຸງການພົວພັນກັບປະເທດພັນທະມິດຍຸດທະສາດນີ້. ການຢ້ຽມຢາມຄັ້ງນີ້ແມ່ນມີເນື້ອໃນສຳຄັນຫຼາຍຢ່າງ, ບໍ່ພຽງແຕ່ຫັນການພົວພັນຍີປຸ່ນ-ອາເມລິກາໃນອາຍຸການໃໝ່ຂອງ ທ່ານນາຍົກລັດຖະມົນຕີຍີປຸ່ນ Shinzo Abe ແລະ ປະທານາທິບໍດີອາເມລິກາ Barak Obama ເປັນລະອຽດເທົ່ານັ້ນ, ຫາກຍັງສົ່ງຜົນສະທ້ອນບໍ່ໜ້ອຍເຖິງພາກພື້ນອາຊີຕາເວັນອອກສ່ຽງເໜືອຊຶ່ງພວມເກີດຄວາມສັບສົນວຸ່ນວາຍຫຼາຍຢ່າງອີກດ້ວຍ.
ບັນຫາທີ່ ທ່ານນາຍົກລັດຖະມົນຕີຍີປຸ່ນ Shinzo Abe ນຳໄປຍັງອາເມລິກາ, ນັ້ນແມ່ນເລື່ອງ ໂຕກຽວ ອາດຈະເຂົ້າຮ່ວມການເຈລະຈາສັນຍາຄູ່ຮ່ວມມືລະຫວ່າງເຂດປາຊີຟິກ (TPP), ເພີ່ມທະວີການພົວພັນປ້ອງກັນຄວາມສະຫງົບ, ເສດຖະກິດຍີປຸ່ນ-ອາເມລິກາ ແລະ ແນ່ນອນວ່າ ບັນຫານິວເຄຼຍໃນແຫຼມເກົາຫຼີແມ່ນຂາດບໍ່ໄດ້, ໂດຍສະເພາະແມ່ນພາຍຫຼັງທີ່ ສ.ປ.ປ ເກົາຫຼີຫາກໍດຳເນີນການທົດລອງນິວເຄຼຍຄັ້ງທີ່ 3 . ຕາມນັ້ນແລ້ວ, ໃນເວລາຢ້ຽມຢາມອາເມລິກາ, ທ່ານນາຍົກລັດຖະມົນຕີຍີປຸ່ນ Shinzo Abe ຈະມີການພົບປະກັບ ປະທານາທິບໍດີອາເມລິກາ Barak Obama ແລະ ລັດຖະມົນຕີການຕ່າງປະເທດຍີປຸ່ນ Fumio Kishida ຈະມີການພົບປະກັບຄູ່ຕຳແໜ່ງ John Kerry . ນອກຈາກນັ້ນ, ທ່ານນາຍົກລັດຖະມົນຕີຍີປຸ່ນ Shinzo Abe ຈະມີບົດກ່າວປາໄສຢູ່ວໍຊິງຕັນ ກ່ຽວກັບບັນດານະໂຍບາຍເສດຖະກິດ ເພື່ອແນໃສ່ຟື້ນຟູການເຕີບໂຕຂອງຍີປຸ່ນ ແລະ ແກ້ໄຂບັນຫາເງິນຝືດທີ່ແກ່ຍາວ. ກ່າວຄຳເຫັນກ່ອນ ການຢ້ຽມຢາມອາເມລິກາ ຂອງ ທ່ານນາຍົກລັດຖະມົນຕີຍີປຸ່ນ Shinzo Abe, ເລຂານຸການດ້ານການຂ່າວຂອງ ປະທານາທິບໍດີອາເມລິກາ Barak Obama ໃຫ້ຮູ້ວ່າ ປະທານາທິບໍດີ Barak Obama ພວມຄອ່ຍຖ້າບັນດາການປຶກສາຫາລືກັບ ທ່ານນາຍົກລັດຖະມົນຕີຍີປຸ່ນ Shinzo Abe ຈະລົງເລິກເຂົ້າສູ່ບັນດາບັນຫາ 2 ຝ່າຍ, ພາກພື້ນ ແລະ ທົ່ວໂລກ, ຊຶ່ງລວມທັງສັນຍາປ້ອງກັນຄວາມສະຫງົບ ອາເມລິກາ-ຍີປຸ່ນ, ບັນດາບັນຫາເສດຖະກິດ ແລະ ການຄ້າ. ແຕ່ຕາມຂໍ້ສັງເກດຂອງວົງການນັກໄຈ້ແຍກແລ້ວ, ບັນຫາການທົດລອງນິວເຄຼຍຂອງ ສ.ປ.ປ ເກົາຫຼີໃນເວລາທີ່ຜ່ານມາ ອາດຈະແມ່ນຫົວເລື່ອງນຳມາປຶກສາຫາລືທີ່ການເຈລະຈາລະຫວ່າງການນຳທັງ 2 . ແລະ ບັນຫານີ້ແມ່ນອາດຈະບັນລຸຄວາມເປັນເອກະພາບກັນລະຫວ່າງ 2 ຝ່າຍໄດ້ຢ່າງ
ງ່າຍດາຍໃນການຢ້ຽມຢາມອາເມລິກາອາເມລິກາຂອງ ທ່ານນາຍົກລັດຖະມົນຕີ ຍີປຸ່ນ Shinzo Abe ໂດຍອີງໃສ່ບັນດາສັນຍານທີ່ຕັ້ງໜ້າໂດຍໂຕກຽວ ແລະ ວໍຊິງຕັນໄດ້ແຈ້ງໃຫ້ຊາບກ່ອນນີ້. ໃນການເຈລະຈາທາງໂທລະສັບເມື່ອວັນທີ 13/2, ປະທານາທິບໍດີອາເມລິກາ Barak Obama ແລະ ທ່ານນາຍົກລັດຖະມົນຕີຍີປຸ່ນ Shinzo Abe ໄດ້ເປັນເອກະພາບກັນກ່ຽວກັບການຮ່ວມມືໃນບັນດາການກະທຳທີ່ແຂງກະດ້າງກ່ວາເພື່ອຮັບມືກັບ ສ.ປ.ປ ເກົາຫຼີ, ໃນນັ້ນຈະລວມທັງມະຕິໃໝ່ກ່ຽວກັບການເພີ່ມທະວີການລົງໂທດຕ້ານພຽງຢາງ. ປະທານາທິບໍດີອາເມລິກາ Barak Obama ຍັງຢືນຢັນຄືນເລື່ອງອາເມລິກາຍັງຄົງຍຶດໝັ້ນບັນດາຄຳໝັ້ນສັນຍາໃນການປ້ອງກັນຊາດກັບຍີປຸ່ນ, ລວມມີການເປີດກ້ວາງການເຄື່ອນໄຫວຂອງລະບົບປ້ອງກັນນິວເຄຼຍຂອງອາເມລິກາ. ໃນການພົບປະຢູ່ວໍຊິງຕັນຄັ້ງນີ້, 2 ຝ່າຍຍັງອາດຈະປຶກສາຫາລືກ່ຽວກັບການສົມທົບກັນຄຸ້ມຄອງແຫຼ່ງເງິນຈາກບັນດາຕະຫຼາດການເງິນສາກົນທີ່ພວມຖອກເທເຂົ້າພຽງຢາງຕື່ມອີກ.
ການເພີ່ມທະວີການຮ່ວມມື 2 ຝ່າຍ ອາເມລິກາ-ຍີປຸ່ນ ຍັງໄດ້ຮັບການສັງເກດວ່າ ຈະບັນລຸໄດ້ພາຍຫຼັງ ການຢ້ຽມຢາມອາເມລິກາ ຂອງ ທ່ານນາຍົກ ລັດຖະມົນຕີຍີປຸ່ນ Shinzo Abe, ພາຍຫຼັງຖືກຢຸດສະງັກໃນສະໄໝອານາດການປົກຄອງຊຸດກ່ອນເປັນໄລຍະໜຶ່ງ. ຜູ້ຄົນທັງຫຼາຍຍົງຈືດີວ່າ ພາຍຫຼັງການເລືອກຕັ້ງສະພາຕ່ຳເມື່ອເດືອນ 12 ປີກາຍນີ້, ທ່ານນາຍົກລັດຖະມົນຕີຍີປຸ່ນ Shinzo Abe ໄດ້ເນັ້ນໜັກເຖິງຈຸດສຸມຍຸດທະສາດການຕ່າງປະເທດຂອງລັດຖະບານຍີປຸ່ນແມ່ນເພີ່ມທະວີການພົວພັນກັບອາເມລິກາໃນຂົງເຂດປ້ອງກັນຄວາມສະຫງົບ ແລະ ເສດຖະກິດ. ແລະ ໃນຂອບເຂດການຢ້ຽມຢາມອາເມລິກາເມືອ່ກາງເດືອນ 1 ຜ່ານມາຂອງ ລັດຖະມົນຕີການຕ່າງປະເທດຍີປຸ່ນ Fumio Kishida, ອະດີດລັດຖະມົນຕີການຕ່າງປະເທດອາເມລິກາ Hillary Clinton ຍັງຢືນຢັນເຖິງຄວາມຈຳເປັນຕ້ອງເຮັດໃຫ້ການພົວພັນແບບພັນທະມິດ ອາເມລິກາ-ຍີປຸ່ນ ໃຫ້ເລິກເຊິ່ງໃນໄລຍະທີ່ຈະມາເຖິງ. ຖ້າຫາກ ໂຕກຽວ ແລະ ວໍຊິງຕັນ ຈະເປັນເອກະພາບຕໍ່ ຫຼັກໝັ້ນ ກ່ຽວກັບການເພີ່ມທະວີມາດຕະການລົງໂທດ ສ.ປ.ປ ເກົາຫຼີ ຢ່າງງາຍດາຍ ກໍຄືເພີ່ມທະວີການຮ່ວມມືໃນບັນຫາປ້ອງກັນຄວາມສະຫງົບນັ້ນ, 2 ຝ່າຍຍັງບໍ່ລົງລອຍກັນຢ່າງເລິກເຊິ່ງກ່ຽວກັບບັນຫາທີ່ກ່ຽວຂ້ອງເຖິງເລື່ອງຍີປຸ່ນຈະເຂົ້າຮ່ວມຫຼືບໍ່ເຈລະຈາສັນຍາຄູ່ຮ່ວມມືລະຫວ່າງເຂດປາຊີຟິກ (TPP) ເພື່ອຍາດແຍ່ງຄວາມໄວ້ເນື້ອເຊື່ອໃຈຂອງອຳນາດການປົກຄອງຂອງປະທານາທິບໍດີອາ Barak Obama. ແຕ່ສຳລັບຍີປຸ່ນ, ນີ້ແມ່ນບັນຫາບໍ່ງາຍດ່າຍແຕ່ຢ່າງໃດ ຍ້ອນວ່າປະຈຸບັນ, ມີ ສ.ສ ຫຼາຍທ່ານ ນັບທັງແມ່ນສະມາຊິກ ແລະ ບໍ່ແມ່ນສະມາຊິກພັກປະຊາທິປະໄຕເສລີ LDP ກຳອຳນາດ ພວມຄັດຄ້ານສັນຍາຄູ່ຮ່ວມມືລະຫວ່າງເຂດປາຊີຟິກ (TPP) ຍ້ອນຄວາມວິຕົກກັງວົນວ່າສັນຍານີ້ຈະສົ່ງຜົນສະທ້ອນເຖິງຕະຫຼາດຜະລິດຕະພັນກະພັນເສດຍີປຸ່ນ.
ການຢ້ຽມຢາມອາເມລິກາເປັນຄັ້ງທຳອິດພາຍຫຼັງດຳລົງຕຳແໜ່ງເປັນນາຍົກ ລັດຖະມົນຕີຍີປຸ່ນ ຂອງທ່ານShinzo Abe ໃນສະຖານະການການພົວພັນລະຫວ່າງ 2 ປະເທດ ຍັງມີຄວາມບໍ່ລົງລອຍກັນບາງຢ່າງນັ້ນ, ຍັງຄົງໄດ້ຮັບຄວາມປາດຖະໜາວ່າ ຈະ ເຮັດໃຫ້ການພົວພັນແບບພັນທະມິດ ອາເມລິກາ-ຍີປຸ່ນເລິກເຊິ່ງກ່ວາອີກ ພາຍຫຼັງຖືກຢຸດສະງັກໃນສະໄໝອານາດການປົກຄອງຊຸດກ່ອນ.