(vovworld)- ທ່ານ Nguyen Phu Trong ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ພວມເດີນທາງຢ້ຽມຢາມສັນຖະວະໄມຕີ ສາທາລະນະລັດ ກູບາຢ່າງເປັນທາງການ ແລະ ຢ້ຽມຢາມທາງລັດຖະກິດປະເທດ ສາທາລະນະລັດສະຫະພັນ ບຣາຊີນ. ຊຶ່ງແມ່ນສອງໃນຈຳນວນບັນດາປະເທດ ອາເມລິກາລາຕີນ ທີ່ມີສາຍພົວພັນເປັນມູນເຊື້ອ, ມິດຕະພາບທີ່ມີມາແຕ່ດົນນານ ກັບ ຫວຽດນາມ, ການຢ້ຽມຢາມຂອງຜູ້ນຳຫນ້າພັກກອມມູນິດ ຫວຽດນາມ ແມ່ນແນໃສ່ສົ່ງສານສູງສູດຂອງ ຫວຽດນາມ ກ່ຽວກັບຄວາມສາມັກຄີ, ມິດຕະພາບ, ການຮ່ວມມືພ້ອມກັນພັດທະນາກັບບັນດາປະເທດເພື່ອນມິດທີ່ເປັນມູນເຊື້ອ ແລະ ຂະບວນການຝ່າຍຊ້າຍ ອາເມລິກາລາຕີນ ໃນວິວັດການເປັນເຈົ້າການເຊື່ອມໂຍງກັບສາກົນຂອງ ຫວຽດນາມ.
ນະຄອນຫລວງ ລາຮາວານ ປະເທດ ກູບາ
ພາບ:internet
|
ໃນການພົວພັນກັບຫວຽດນາມ, ປະຊາຊົນບັນດາປະເທດ ອາເມລິກາລາຕີນ ເວົ້າລວມ ແລະ ກູບາ, ບຣາຊີນ ເວົ້າສະເພາະ ຍາມໃດກໍສະຫງວນອາລົມຈິດອັນດີງາມ ແລະ ເລິກເຊິ່ງໃຫ້ແກ່ ຫວຽດນາມ, ເຄົາລົບນັບຖື ຫວຽດນາມ ໃນການຕໍ່ສູ້ປົດປ່ອຍຊາດ ແລະ ປ່ຽນແປງໃຫມ່, ພັດທະນາປະເທດຊາດ.
ກ່ອນນີ້ 52 ປີ, ກູບາ ແມ່ນປະເທດທຳອິດຢູ່ທາງທິດຕາເວັນຕົກເຄິ່ງຫນ່ວຍໂລກໄດ້ສ້າງສາຍພົວພັນທາງການທູດກັບ ຫວຽດນາມຢ່າງເປັນທາງການ. ນັບແຕ່ນັ້ນມາ, ການພົວພັນລະຫວ່າງ ຫວຽດນາມ ແລະ ກູບາ ຍາມໃດກໍໄດ້ຮັບການຮັກສາ ແລະ ພັດທະນາ. ກູບາ ແມ່ນປະເທດນຳຫນ້າໃນຂະບວນການປະຊາຊົນໂລກສະຫນັບສະຫນູນການຕໍ່ສູ້ເພື່ອເອກະລາດ, ເສລີພາບ ແລະ ຄວາມເປັນເອກະພາບແຫ່ງຊາດກ່ອນນີ້ ກໍຄືໃນການສ້າງສາປະເທດຫວຽດນາມ ໃນປະຈຸບັນ. ການພົວພັນບໍລິສຸດຜຸດຜ່ອງ ແລະ ສະຫນິດຕິດພັນ ລະຫວ່າງ ຫວຽດນາມ ແລະ ກູບາ ໄດ້ຮັບການປັບປຸງຢ່າງບໍ່ຢຸດຢັ້ງ ແລະ ພັດທະນາຢ່າງແຂງແຮງໃນທຸກດ້ານກໍຄື ໄດ້ຮັບການຫລໍ່ຫລອມ ແລະ ທົດສອບໃນຈຸດເວລາທີ່ປະສົບກັບຄວາມຫຍຸ້ງຍາກທີ່ສຸດໃນພາລະກິດປະຕິວັດຂອງແຕ່ລະປະເທດ. ທ່ານ Fredesman Turro Gonzales ເອກອັກຄະລັດຖະທູດ ກູບາ ປະຈຳ ຫວຽດນາມ ໄດ້ຢືນຢັນວ່າ:
“ ໃນການຕໍ່ສູ້ອັນດຸເດືອດເພື່ອອຸດົມຄະຕິ ແລະ ຄວາມມຸ້ງມາດປາດຖະຫນາລວມຂອງທັງສອງຊາດ ໄດ້ສ້າງເປັນສາຍພົວພັນອັນດີງາມລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຫວຽດນາມ ແລະ ກູບາ. ກູບາ ຍາມໃດກໍສະແດງຄວາມຂອບອົກຂອບໃຈຕໍ່ການຊ່ວຍເຫລືອ ຊຶ່ງຫວຽດນາມ ສະຫງວນໃຫ້ແກ່ ກູບາ ໃນຕະຫລອດຊຸມເດືອນປີທີ່ຫຍຸ້ງຍາກ ແລະ ພວກຂ້າພະເຈົ້າຢືນຢັນວ່າ ຈະມານະພະຍາຍາມເພ່ືອປົກປັກຮັກສາ ແລະ ເສີມຂະຫຍາຍສາຍພົວພັນມິດຕະພາບລະຫວ່າງສອງຊາດ.”
ສຳລັບ ບຣາຊີນ, ເຖິງວ່າ ການພົວພັນມິດຕະພາບ ແລະ ການຮ່ວມມືລະຫວ່າງ ຫວຽດນາມ ແລະ ບຣາຊີນ ພຽງຜ່ານໄລຍະສອງທົດສະວັດເທົ່ານັ້ນ ແຕ່ສາຍພົວພັນນີ້ນັບມື້ນັບພັດທະນາ. ສອງຝ່າຍໄດ້ແລກປ່ຽນຄະນະຜູ້ແທນຂັ້ນສູງ ແລະ ຂັ້ນລັດຖະມົນຕີຫລາຍຄະນະ ແລະ ບັນດາໝາກຜົນແຫ່ງການຢ້ຽມຢາມຄັ້ງຕ່າງໆນັ້ນ ໄດ້ປະກອບສ່ວນຍົກການພົວພັນລະຫວ່າງສອງປະເທດຂຶ້ນສູ່ລະດັບສູງໃຫມ່, ໃນນັ້ນເປັນຫນ້າສົນໃຈທີ່ສຸດແມ່ນຖະແຫລງການຮ່ວມເນື່ອງໃນໂອກາດສິ້ນສຸດການຢ້ຽມຢາມ ບຣາຊີນ ຂອງທ່ານ Nong Duc Manh ອະດີດເລຂາທິການໃຫຍ່ພັກກອມມູນິດຫວຽດນາມ ເມື່ອປີ 2007, ສອງປະເທດໄດ້ໃຫ້ຄຳໝັ້ນສັນຍາສ້າງສາຍພົວພັນຄູ່ຮ່ວມມືຮອບດ້ານ, ສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ. ຍອດວົງເງິນການຄ້າສອງສົ້ນໄດ້ເພີ່ມຂຶ້ນໃນແຕ່ລະປີ, ປີ 2011 ບັນລຸກວ່າ 1,5 ຕື້ USD, ເພີ່ມຂຶ້ນປະມານ 150% ເມື່ອທຽບໃສ່ປີ 2010. ເປັນຫນ້າສົນໃຈນັ້ນແມ່ນ ໃນໄລຍະມໍ່ໆມານີ້ ບຣາຊີນ ໄດ້ນຳ ຫວຽດນາມ ຫລຸດພົ້ນອອກຈາກບັນຊີລາຍຊື່ບັນດາປະເທດຖືກສືບສວນກ່ຽວກັບການຂາຍເກີບຫນັງບຸບລາຄາ, ຮັບຮອງເອົາບັນຊີລາຍຊື່ ວິສາຫະກິດຫວຽດນາມ 74 ແຫ່ງທີ່ບັນລຸມາດຕະຖານການສົ່ງອອກສິນໃນນ້ຳຢ່າງພຽງພໍ ເພື່ອສ່ົງໄປຂາຍຢູ່ຕະຫລາດ ບຣາຊີນ ແລະ ປະຈຸບັນ ຫວຽດນາມ ແມ່ນປະເທດ ຢືນອັນດັບທີ 6 ໃນການສົ່ງອອກສິນໃນນ້ຳເຂົ້າປະເທດນີ້. ສອງປະເທດກໍແລກປ່ຽນຄວາມສາມາດຮ່ວມມືໃນຂົງເຂດຈຳນວນຫນຶ່ງຄື: ຜະລິດ ແລະ ນຳໃຊ້ etanol, ຜະລິດເຫລັກກ້າ, ຜະລິດກົນຈັກ, ກະສິກຳ. ທ່ານ Nguyen Thac Dinh ຮອງປະທານສະມາຄົມມິດຕະພາບ ແລະ ການຮ່ວມມື ຫວຽດນາມ ບຣາຊີນ, ອະດີດເອກອັກຄະລັດຖະທູດ ຫວຽດນາມ ປະຈຳ ບຣາຊີນ ຖືວ່າ:
“ປະຈຸບັນ ການພົວພັນຮ່ວມມືລະຫວ່າງສອງປະເທດພັດທະນາທີ່ສຸດ. ຕົວຢ່າງຄື: ກ່ຽວກັບດ້ານການຄ້າ, ຫວຽດນາມ ນຳເຂົ້າວັດຖຸດິບເຄື່ອງເຟີນີເຈີ, ເຄື່ອງຜະລິດດ້ວຍຫນັງຈາກ ບຣາຊີນເປັນຕົ້ນຕໍ, ສ່ວນ ບຣາຊີນ ແມ່ນນຳເຂົ້າບັນດາປະເພດສິນຄ້າສິນໃນນ້ຳ, ເຄື່ອງຕຳແຜ່ນຕັດຫຍິບຈາກ ຫວຽດນາມ. ສອງປະເທດມີຈຸດຄ້າຍຄືກັນຫລາຍຢ່າງ, ພິເສດ ທັງສອງປະເທດລ້ວນແຕ່ແມ່ນປະເທດຜະລິດກາເຟ ອັນດັບຫນຶ່ງຢູ່ໃນໂລກ. ສອງຝ່າຍພະຍາຍາມພ້ອມກັນຮ່ວມມືເພື່ອປົກປັກຮັກສາສິດຜົນປະໂຫຍດຂອງບັນດາປະເທດສົ່ງອອກກາເຟ. ”
ໃນສະພາບການ ທີ່ບຣາຊີນ ພວມຊອກຮູ້ຮູບແບບພັດທະນາ ເສດຖະກິດສັງຄົມ ເພື່ອແທນໃຫ້ຮູບແບບເສລີໃຫມ່ນັ້ນ ການຢ້ຽມຢາມ ບຣາຊີນ ຄັ້ງນີ້ຂອງທ່ານເລຂາທິການໃຫຍ່ Nguyen Phu Trong, ຈະເຕື້ອງເຖິງບົດຮຽນແຫ່ງການພັດທະນາເສດຖະກິດການຕະຫລາດຕາມກຳນົດທິດສັງຄົມນິຍົມຂອງ ຫວຽດນາມ. ທ່ານ Nguyen Thac Dinh ໃຫ້ຮູ້ຕື່ມອີກວ່າ:
“ປະຈຸບັນ, ລັດຖະບານ ບຣາຊີນ ໂດຍແມ່ນພັກຝ່າຍຊ້າຍຮັບຜິດຊອບ ນັ້ນແມ່ນພັກແຮງງານນຳພາ. ບາຣາຊີນ ມີຄວາມເຂົ້າໃຈຢ່າງຈະແຈ້ງ ແລະ ເຄົາລົບນັບຖື ຫວຽດນາມ ໃນວິວັດການຕໍ່ສູ້ຍາດເອົາເອກະລາດ ແລະ ກ້າວຂຶ້ນກໍ່ສ້າງສັງຄົມນິຍົມ. ປະຈຸບັນ, ບາຣາຊີນ ກໍມີຄວາມເຄົາລົບນັບຖື ຫວຽດນາມ ກ່ຽວກັບບັນດາຜົນງານແຫ່ງການປ່ຽນແປງໃຫມ່ທາງດ້ານເສດຖະກິດຂອງປະເທດຊາດ ແລະ ເນັ້ນຫນັກວ່າ: ຮູບແບບການພັດທະນາເສດຖະກິດການຕະຫລາດຕາມກຳນົດທິດສັງຄົມນິຍົມ ຂອງຫວຽດນາມ ແມ່ນບັນຫາທີ່ຄວນຮ່ຳຮຽນເອົາບົດຮຽນ, ສະນັ້ນ ບຣາຊີນ ເຫັນວ່າ ມີກາລະໂອກາດຫລາຍຢ່າງເພື່ອພ້ອມກັນຮ່ວມມືກັບຫວຽດນາມ.”
ທ່ານນາງປະທານາທິບໍ ບຣາຊີນ Dilma Rousseff
ພາບ:phunuonline.vn
|
ການຢ້ຽມຢາມ ກູບາ ແລະ ບຣາຊີນ ຂອງທ່ານເລຂາທິການໃຫຍ່ພັກກອມມູນິດ ຫວຽດນາມ Nguyen Phu Trong ແນ່ນ່ອນວ່າຈະເປັນການຮັດແຫນ້ນສາຍພົວພັນຄວາມສາມັກຄີທ່ີເປັນມູນເຊື້ອ, ຊຸກຍູ້ການພົວພັນມິດຕະພາບ, ການຮ່ວມມື ກັບ ກູບາ ແລະ ບຣາຊີນ ໃຫ້ກ້າວເຂົ້າສູ່ລວງເລິກ, ມີປະສິດທິຜົນ ແລະ ໝັ້ນຄົງກວ່າອີກ. ສຳລັບ ກູບາ, ຈຸດສຸມນັ້ນແມ່ນ ເພີ່ມທະວີການພົວພັນດ້ານການເມືອງ, ຊຸກຍູ້ບັນດາມາດຕະການຮ່ວມມືທາງດ້ານເສດຖະກິດ ການຄ້າ ເພື່ອເພີ່ມລັກສະນະປະສິດທິຜົນ ແລະ ໝັ້ນຄົງ, ສອດຄອ່ງກັບເງື່ອນໄຂໃຫມ່ ແລະ ຜົນປະໂຫຍດຂອງແຕ່ລະປະເທດ. ສຳລັບ ບຣາຊີນ ການຢ້ຽມຢາມ ແມ່ນຢືນຢັນ ແລະ ຊຸກຍູ້ການຫັນຂອບເຂດການພົວພັນຄູ່ຮ່ວມມືຮອບດ້ານ, ສະເໝີພາບ, ຕ່າງຝ່າຍຕ່າງມີຜົນປະໂຫຍດໃຫ້ປະກົດຜົນເປັນຈິງ ແລະ ຊຸກຍູ້ເລື່ອງລົງນາມໃນບັນດາສັນຍາແມ່ເພື່ອສ້າງກອບກົດໝາຍ ແນໃສ່ຍູ້ແຮງການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ບົນພື້ນຖານທ່າແຮງຂອງກັນ. ການຢ້ຽມຢາມກໍແມ່ນໂອກາດເພື່ອໃຫ້ ຫວຽດນາມ ສະແດງ ການສະຫນັບສະຫນູນ, ຄວາມສາມັກຄີຂອງ ຫວຽດນາມ ກັບບັນດາກຳລັງຝ່າຍຊ້າຍ, ກ້າວຫນ້າຢູ່ສອງປະເທດ, ພ້ອມກັນແລກປ່ຽນທັດສະນະກ່ຽວກັບເສັ້ນທາງກ້າວຂຶ້ນສັງຄົມນິຍົມ, ປະກອບສ່ວນກໍ່ສ້າງພາລະກິດປະຕິວັດຢູ່ແຕ່ລະປະເທດສຳເລັດຜົນ.
ແອງຮ່ວຽນ